“Septyembre 12–18. Isaias 13–14; 24–30; 35: ‘Makatilingala nga Buhat kag Kalatingalahan,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Septyembre 12–18. Isaias 13–14; 24–30; 35,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Joseph Smith nga nakakita sa Amay nga Langitnon kag kay Jesucristo sa Sagrado nga Kakahuyan

Sacred Grove [Sagrado nga Kakahuyan], ni Brent Borup

Septyembre 12–18

Isaias 13–14; 24–30; 35

“Makatilingala nga Buhat kag Kalatingalahan”

Si Pangulong Bonnie H. Cordon nagtudlo, “Ang balaan nga mga kasulatan nagapasanag sang aton mga kaisipan, nagabusog sang aton mga espiritu, nagasabat sang aton mga pamangkot, nagapadako sang aton pagsalig sa Ginuo, kag nagabulig sa aton nga sentruhon ang aton kabuhi sa Iya” (“Trust in the Lord and Lean Not,” Ensign ukon Liahona, Mayo 2017, 7).

Isulat Ang Imo Mga Panghunahuna

Isa sa mga butang nga ginapangayo sang Ginuo sa mga propeta amo ang magpaandam parte sa mga konsikwensya sang sala. Sa kaso sang mga propeta sa Daan nga Katipan, masami nga nagakahulugan ini sang paghambal sa mga nagapamuno sa gamhanan nga mga ginharian nga kinahanglan nila nga maghinulsol kay kon indi, pagalaglagon sila. Delikado ini nga buluhaton, pero wala mahadlok si Isaias, kag ang iya mga paandam sa mga ginharian sang iya panahon—lakip na sa Israel, Juda, kag sa nagapalibot nga mga nasyon—maisog (tan-awa sa Isaias 13–23).

Pero, si Isaias may mensahe man sang paglaum. Bisan pa nga ang mga ginpropesiya nga kalaglagan natabo gid sang ulihi sa sining mga ginharian, nakita na ngadaan ni Isaias ang pagpanumbalik kag pagbag-o. Pagaagdahon sang Ginuo ang Iya katawhan nga magbalik sa Iya. Himuon niya nga “ang nagaigpat nga balas … mangin linaw, kag ang kigas nga duta mga tuburan sang tubig” (Isaias 35:7). Magahimo Sia sing “makatilingala nga buhat kag kalatingalahan” (Isaias 29:14), nga ginabalik sa Israel ang mga bugay nga Iya ginpromisa sa ila. Wala sa ila ni Isaias ukon iban pa nga buhi sadto nga panahon ang nakaabot sa katumanan sining makatilingala nga buhat. Pero makita naton karon ang pinakamataas nga katumanan sini. Sa matuod, kabahin kita sini!

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Isaias 13:1–11, 19–22; 14:1–20

Ang malain nga mga ginharian sang kalibutan kag ang ila mga manuggahum mapaslawan.

Ang Isaias 13–14 ginatawag nga “ang lulan sang” (mensahe sang propeta parte sa) Babilonia (Isaias 13:1). Ang sadto mabaskog nga ginharian nga may gamhanan nga manuggahum, ang Babilonia karon ginakabig na lang nga kasaysayan. Ngaa importante ang mensahe sa Babilonia sa aton karon? Sa balaan nga mga kasulatan, ang Babilonia simbolo sang bugal, pagkakalibutanon, kag sala, kag sa karon ginalibutan kita sini tanan. Pamensara ining simbolismo samtang imo ginabasa ang Isaias 13:1–11, 19–22; 14:1–20. Pwede ka man mamensar sang mga pamangkot pareho sini:

Ano ang pagpalareho sang mga paandam ni Isaias sa Babilonia sa mga propesiya parte sa kalibutan antes sa Ikaduha nga Pagkari sang Manluluwas? (tan-awa sa Isaias 13:1–11; Doktrina kag mga Kasugtanan 45:26–42).
Ano ang pagpalareho nga imo nakita sa bugal sang hari sang Babilonia kag sang bugal ni Satanas? (tan-awa sa Isaias 14:4–20; Moises 4:1–4). Ano nga mga paandam ang imo nakita para sa imo kaugalingon sa sining mga bersikulo?
Paano ang Manluluwas naghatag sang “pagpapahuway sa imo sa imo kasubo kag sa imo kalisdanan”? (Isaias 14:3).

He Comes Again to Rule and Reign [Magaabot Sia Liwat sa Pagpamuno kag sa Paghari], ni Mary R. Sauer

Isaias 24:21–23; 25:6–8; 26:19; 28:16

Ang mga sinulatan ni Isaias nagatudlo sa akon padulong kay Jesucristo.

Ang mga pinanudlo ni Isaias masami nga nagatumod sa misyon sang Manluluwas, lakip na ang Iya nagabayad-sala nga sakripisyo, Pagkabanhaw, kag Ikaduha nga Pagkari. Ano nga mga aspeto sang Iya misyon ang nagasulod sa imo panghunahuna samtang imo ginabasa ang masunod nga mga bersikulo: Isaias 24:21–23; 25:6–8; 26:19; 28:16? Ano pa nga mga dinalan ang imo makita nga nagapadumdom sa imo sang Manluluwas?

Tan-awa man sa Isaias 22:22–25.

Isaias 24:1–12; 28:7–8; 29:7–10; 30:8–14

Ang Apostasiya nagakahulugan sang pagtalikod sa Ginuo kag sa Iya mga propeta.

Para paandaman sang mga konsikwensya sang pagtalikod sa Ginuo kag pagsikway sang Iya mga propeta, naggamit si Isaias sang lainlain nga mga palaanggiran. Nagalakip ini sang hublas nga duta (Isaias 24:1–12), pagkapalahubog (Isaias 28:7–8), gutom kag kauhaw (Isaias 29:7–10), kag nagalitik nga pader ukon suludlan (Isaias 30:8–14). Base sa imo mga nabasa sa sining mga bersikulo, ngaa importante nga tumanon ang aton mga kasugtanan? Pamensara kon ano ang imo ginahimo para magpabilin nga tampad sa Ginuo kag sa Iya mga alagad.

Isaias 29; 30:18–26; 35

Mauli sang Ginuo ang mga butang nga nadula ukon naguba.

Kon ang katawhan ukon mga sosyedad magtalikod sa Ginuo, gusto ni Satanas nga panumdumon naton nga permanente na ang mga konsikwensya. Pero, ginlaragway ni Isaias ang pila sa makatilingala nga mga butang nga himuon sang Ginuo kon maghinulsol ang katawhan kag magdangop sa Iya. Ano ang imo matun-an sa Isaias 29:13–24; 30:18–26; 35 parte sa Ginuo, sa Iya pagpalangga, kag sa Iya gahum?

Isa ka paagi nga ginpahayag sang Ginuo ang Iya gahum sa aton panahon amo ang Pagpanumbalik sang Iya ebanghelyo. Ang Isaias 29 nagaunod sang pila ka mga dinalan nga may anggid sa mga hitabo sa Pagpanumbalik. Halimbawa:

Ikumparar ang Isaias 29:11–12 sa 2 Nefi 27:6–26 kag Joseph Smith—Kasaysayan 1:63–65.
Ikumparar ang Isaias 29:13–14 sa Doktrina kag mga Kasugtanan 4 kag Joseph Smith—Kasaysayan 1:17–19.
Ikumparar ang Isaias 29:18–24 sa tig-ulo nga pahina sang Libro ni Mormon.

Ano ang imo mga panghunahuna parte sa Pagpanumbalik sang ebanghelyo samtang ginabasa mo ining mga dinalan?

Tan-awa man sa “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan” (ChurchofJesusChrist.org).

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Isaias 25:4–9.Nakaeksperiyensya na bala ang inyo pamilya sang bugay sang hilway nga palasilungan sa tion sang bagyo ukon palahandungan sa mainit nga adlaw? (tan-awa sa bersikulo 4). Hambali ninyo ang parte diri samtang inyo ginabasa ining mga bersikulo kag ang iban pa nga mga paglaragway sa Ginuo nga makita sa Isaias 25:4–9. Sa ano nangin pareho ang Ginuo sa mga ini?

Isaias 25:8–9; 26:19.Ang pagpakita sang mga litrato sang Manluluwas sa Getsemani, sa krus, kag pagkatapos sang Iya Pagkabanhaw makabulig sa imo pamilya nga makita ang mga koneksyon sining mga bersikulo kay Jesucristo (tan-awa sa Libro sang mga Larawan nga Pang-Ebanghelyo, no. 56, 57, 58, 59). Agdaha ang imo pamilya sa pag-istorya kon ngaa sila “[nagakasadya] sa iya kaluwasan” (Isaias 25:9).

Isaias 29:11–18.Makabulig ining mga bersikulo sa imo pamilya nga hambalan ang “makatilingala nga buhat kag kalatingalahan” (bersikulo 14) sang Pagpanumbalik sang ebanghelyo kag ang paggwa sang Libro ni Mormon. Ngaa makatilingala kag kalatingalahan ining mga butang sa aton? Agdaha ang mga miyembro sang pamilya nga magpangita sang mga butang sa inyo balay nga nagatiglawas sang makatilingala nga mga bugay sang Pagpanumbalik.

Isaias 35.Basi masadyahan ang imo pamilya sa pagdrowing sang mga litrato sang mga imahe sa sining kapitulo nga nagabulig sa aton nga maintiendihan kon paano ginatukod ni Jesucristo ang Sion sa aton panahon. Ano ang aton matun-an sa sining mga imahe? Ano ang pwede naton himuon para makabulig tukod sang Sion?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Tugoti ang kabataan nga ipakita ang ila pagkamatugahon. Kon ang kabataan maghimo sang isa ka butang nga may relasyon sa isa ka prinsipyo sang ebanghelyo, nagabulig ini sa ila nga mas maintiendihan ang prinsipyo. Tugoti sila nga magtukod, magdrowing, magkolor, magsulat, kag maghimo. (Tan-awa sa Teaching in the Savior’s Way, 25.)