lalaki nga nagatuon sang balaan nga mga kasulatan

Agosto 29–Septyembre 4

Mga Hulubaton 1–4; 15–16; 22; 31; Ang Manugwali 1–3; 11–12

“Ang Kahadlok sa Ginuo Amo ang Pamuno sang Kaalam”

Pamensara kon paano makabulig sa imo ang imo pagtuon sang Mga Hulubaton kag Ang Manugwali sa “paglingig sang imo idulungog sa kaalam” (Mga Hulubaton 2:2).

Isulat Ang Imo Mga Panghunahuna

Sa una nga kapitulo sang libro nga Mga Hulubaton, makita naton ining mga pulong: “Anak ko, pamatii ang pagtudlo sang imo amay, kag indi pagbayai ang kasuguan sang imo iloy” (Mga Hulubaton 1:8). Ang Mga Hulubaton ginakabig nga koleksyon sang maalamon nga mga hambalanon halin sa mapinalanggaon nga ginikanan, nga ang mayor nga mensahe amo nga ang mga bugay sang paghidaet kag pagtin-ad nagaabot sa ila nga nagahandum sang kaalam—labi na ang klase sang kaalam nga ginatanyag sang Dios. Pero ang Mga Hulubaton ginasundan sang libro nga Ang Manugwali, nga daw nagasiling, “Indi ini amo sina kasimple.” Ang Manugwali nga ginsambit sa Ang Manugwali nagsiling nga iya “gintugyan ang [iya] tagipusuon sa pagkilala sang kaalam” pero sa gihapon nakakita sang “pagpanikasog sa hangin” kag “tama nga kalisod” (Ang Manugwali 1:17–18). Sa lainlain nga paagi, nagapamangkot ang libro, “May matuod bala nga kahulugan sa kalibutan kon sa diin ang tanan daw hapaw, temporaryo, kag wala sing kasigurohan?”

Pero, samtang ang duha ka mga libro nagatulok sa kabuhi halin sa lainlain nga mga panan-awan, nagatudlo ang mga ini sang pareho nga mga kamatuoran. Ang Manugwali nagapahayag: “Ini amo ang katapusan sang butang; ang tanan nabatian na: Magkahadlok sa Dios, kag magbantay sang iya mga sugo: kay amo ini ang bug-os nga katungdanan sang tawo” (Ang Manugwali 12:13). Amo man ini ang prinsipyo nga makita sa bilog nga Mga Hulubaton: “[Magsalig] sa Ginuo sa bug-os mo nga tagipusuon. … Dili ka magpakaalam sa imo kaugalingon nga mga mata: kahadluki ang Ginuo” (Mga Hulubaton 3:5,7). Bisan ano ang matabo sa kabuhi, bisan pa nga daw makalilibog kag wala ginapaabot, mas maayo gid pirme kon magsalig kita kay Ginuong Jesucristo.

 

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Hulubaton 1–4; 15–16

“[Ilingig ang] imo idulungog sa kaalam.”

Ang libro nga Mga Hulubaton puno sang mga pagpahangop parte sa kaalam. Pamensara nga markahan ang tinaga nga “kaalam” kag ang naangot nga mga tinaga, pareho sang “ihibalo” kag “panghangop,” kada makita mo ang mga ini sa mga kapitulo 1–4 kag 15–16. Ano ang epekto sining mga kapitulo sa imo panan-aw parte sa kaalam? Base sa imo nakita, paano mo ilaragway ang kaalam nga “[ginahatag sang Ginuo]”? (Mga Hulubaton 2:6). Pamensara kon paano mo ginapangayo ang bulig sang Ginuo nga mangin “maalam sa tagipusuon” (Mga Hulubaton 16:21). Ano nga mga bugay ang nagaabot halin sa kaalam sang Dios?

Tan-awa man sa Mga Hulubaton 8–9; Mateo 7:24–27; 25:1–13.

Mga Hulubaton 1:7; 2:5; 16:6; 31:30; Ang Manugwali 12:13

Ano ang “kahadlok sa Ginuo”?

Si Elder David A. Bednar nagpaathag: “Indi pareho sang kalibutanon nga kahadlok nga nagatuga sang kakugmat kag kabalaka, ang diosnon nga kahadlok amo ang ginhalinan sang paghidaet, pagsalig, kag kompiyansa. … [Ini] nagasakop sang madalom nga balatyagon sang pagtahod, respeto, kag pagdayaw kay Ginuong Jesucristo; pagtuman sang Iya mga kasuguan; kag pagpaabot sang Katapusan nga Paghukom kag hustisya sa Iya mga kamot. … Ang diosnon nga kahadlok amo ang pagpalangga kag pagsalig sa Iya” (“Therefore They Hushed Their Fears,” Liahona, Mayo 2015, 48–49).

Tan-awa man sa Mga Hulubaton 8:13.

Mga Hulubaton 4

“Tapana ang banas sang imo mga tiil.”

Ang Mga Hulubaton 4 nagalaragway sang kaalam kag pagkamatarong bilang “banas” ukon “dalanon” (tan-awa man sa Mga Hulubaton 3:5–6). Samtang imo ginabasa ining kapitulo, mahimo nga makakita ka sang mga dinalan nga makabulig sa imo sa pagbinagbinag sang “banas sang imo mga tiil” (bersikulo 26) kag kon paano ka ginadala sang imo mga pagpili palapit sa Ginuo. Halimbawa, ano ang ginatudlo sang mga bersikulo 11–12 kag 18–19 parte sa mga bugay sang pagsunod sang husto nga banas? Ano ang kahulugan sang mga bersikulo 26 kag 27 sa imo?

Tan-awa man sa 2 Nefi 31:18–21.

Mga Hulubaton 15:1–2, 4, 18, 28; 16:24–32

“Ang mahumok nga panalabton nagalugpay sang kasingkal.”

Ang pila sa mga hulubaton sa mga kapitulo 15 kag16 mahimo nga makainspirar sa imo nga pauswagon ang paagi nga nagapakighambal ka sa iban, labi na sa mga mahal mo sa kabuhi. Halimbawa, hunahunaa ang partikular nga mga tinion nga pwede ka kuntani maggamit sang “mahumok nga panalabton” imbes nga “matigdas nga mga pulong” (Mga Hulubaton 15:1). Paano nagabulig sa imo ang laygay sa Mga Hulubaton 16:24–32 nga hunahunaon ang mga tinaga nga imo ginagamit?

Pamensara ining pagpahangop halin kay Elder W.Craig Zwick: “Ang ‘mahumok nga panalabton’ nagaunod sang ginhunahuna nga sabat—disiplinado nga mga tinaga halin sa mapainubuson nga tagipusuon. Wala ini nagakahulugan nga indi gid kita maghambal sing prangka ukon dapat naton kapankapanan ang kamatuoran sang doktrina. Ang mga tinaga nga mahimo mabudlay batunon pwede nga ihambal sa mapinalanggaon nga paagi” (“What Are You Thinking?” Liahona, Mayo 2014, 42).

babayi nga nagapakaon sang mga seagull

Ang Babayi nga Takos Sin-o Bala ang Makakita? II, ni Louise Parker

Mga Hulubaton 31:10–31

“Ang babayi nga nagakahadlok sa Ginuo, dayawon sia.”

Ang Mga Hulubaton 31:10–31 nagalaragway sang “babayi nga takos,” ukon sang babayi nga may dako nga espirituhanon nga kusog, ikasarang, kag impluwensya. Pwede mo man tilawan nga palip-uton sa imo kaugalingon nga mga pulong kon ano ang ginasiling sang tagsa sining mga bersikulo parte sa iya. Ano ang pila sa iya mga kinaiya nga pwede mo sundon?

Ang Manugwali 1–3;12

Temporaryo lang ang mortal nga kabuhi.

Ngaa nga importante nga imo panumdumon nga kadamo sa sining kalibutan, pareho sang ginapahayag sa Ang Manugwali 1–2, ang “hapaw” (ukon temporaryo kag masami indi importante)? Ano ang imo nakita sa kapitulo 12 nga nagahatag sang balor sa wala katapusan nga kabuhi?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Hulubaton.Mahimo nga masadyahan ang imo pamilya sa paghimo sang inyo kaugalingon nga “libro sang Mga Hulubaton”—koleksyon sang maalam nga laygay halin sa balaan nga mga kasulatan kag mga propeta sa ulihing mga adlaw.

Mga Hulubaton 1:7; 2:5; 16:6; Ang Manugwali 12:13–14.Para buligan ang mga miyembro nga maintiendihan ang Mga Hulubaton 1:7; 2:5; 16:6; Ang Manugwali 12:13, basi makabulig nga islan ang tinaga nga kahadlok sang mga tinaga pareho sang pagtahod, pagpalangga, ukon pagtuman (tan-awa man sa Mga Hebreo 12:28). Paano ini nagaapekto sa aton panghunahuna parte sa sining mga bersikulo? Paano naton ipakita nga nagakahadlok kita sa Ginuo?

Mga Hulubaton 3:5–7.Para buligan ang mga miyembro sang pamilya nga mapanan-aw kon ano ang ginatudlo sining mga bersikulo, pwede mo sila hagaron nga magsandig sa bagay nga mabakod kag istable, pareho sang dingding. Dayon tilawan nila nga magsandig sa bagay nga indi mabakod, pareho sang silhig. Ngaa indi kita dapat “magsandig sa [aton] kaugalingon nga paghangop”? Paano naton ipakita nga nagasalig kita kay Jesucristo sa aton bug-os nga tagipusuon?

Mga Hulubaton 15:1–2, 18; 16:24, 32.Paano nagaapekto ang aton mga tinaga sa pamatyagan sa sulod sang aton puluy-an? Basi pwede nga praktisan sang mga miyembro sang pamilya ang paghatag sang “mahumok nga panalabton” sa “matigdas nga mga pulong” kag tilawan nga gamiton ang ila natun-an sa ila mga pagpakigbagay sa kada isa. Ang kanta pareho sang “Kaluoy Sugod sa Akon” (Mga Himno kag Mga Ambahanon sang Kabataan, 145) sarang makabulig pabakod sining prinsipyo.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

 

Pagpauswag sang Personal nga Pagtuon

Ang mga tinaga sa balaan nga mga kasulatan para sa tanan. May pila ka mga dinalan sa balaan nga mga kasulatan nga ginapatungod sa mga lalaki lamang ukon sa mga babayi lamang (pareho sang Mga Hulubaton 3:13; 31:10). Sa kalabanan, ugaling, ang mga prinsipyo sa sining mga dinalan ginapatungod sa tanan.

Si Jesus nga nagatuytoy sang duha ka karnero sa kakahuyan

“Sa tanan mo nga dalanon kilalaha sia, kag magatuytoy sia sa imo mga banas” (Mga Hulubaton 3:-6). Ginatuytuyan Niya Ako, ni Yongsung Kim, havenlight.com