Si Cristo nga nakapula nga malaba nga panapton nga ginalibutan sang nagaluhod nga katawhan

Every Knee Shall Bow [Ang Tagsa ka Tuhod Magaluhod], ni J. Kirk Richards

Agosto 22–28

Mga Salmo 102–103; 110; 116–119; 127–128; 135–139; 146–150

“Ang Tagsa ka Butang Nga May Ginhawa Magdayaw sa Ginuo”

Ang Salmo 119:105 nagatudlo nga ang pulong sang Dios “kapawa sa [imo] banas.” Samtang imo ginabasa ang Mga Salmo, isulat ang mga dinalan kag mga ideya nga nagainspirar sa imo kag nagabulig pasanag sang imo banas pabalik sa Amay nga Langitnon.

Isulat Ang Imo Mga Panghunahuna

Ang tradisyunal nga ngalan sa Judio sang libro nga Mga Salmo isa ka Hebreo nga tinaga nga nagakahulugan “mga pagdayaw.” Inang tinaga, Tehillim, may kaangtanan man sa pagsambit sang “hallelujah” (nga buot silingon “dayawon si Jehova” ukon “dayawon ang Ginuo”). Kon papilion ka sang isa ka tinaga para palip-uton ang mayor nga mensahe sang Mga Salmo, “pagdayaw” ang mangin maayo pilion. Ang pila sa Mga Salmo nagaunod sang direkta nga imbitasyon nga “dayawa ninyo ang Ginuo” (tan-awa labi na sa Mga Salmo 146–50), kag ini tanan makainspirar sang balatyagon sang pagsimba kag pagdayaw. Ginaagda kita sang Mga Salmo nga binagbinagon ang gahum sang Ginuo, ang Iya kaluoy, kag ang dalagko nga mga butang nga Iya ginhimo. Indi naton Sia mabayran sa bisan diin sini, pero sarang naton Sia nga dayawon tungod sini. Inang pagdayaw mahimo nga lainlain ang porma sa kada tawo—mahimo ini nga maglakip sang pagkinanta, pagpangamuyo, ukon pagpaambit sang testimonya. Masami ini nga nagadala sang mas madalom nga pangako sa Ginuo kag sa pagsunod sang Iya mga pinanudlo. Kon ano man ang kahulugan sang “dayawa ninyo ang Ginuo” sa imo kabuhi, makakita ka sang dugang nga inspirasyon nga himuon ini samtang imo ginabasa kag ginabinagbinag ang Mga Salmo.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Salmo 102–3; 116

Sarang ako pasulhayon sang Ginuo sa akon pag-antos.

Pat-ini kon paano ginalaragway sang Salmo 102:1–11 ang mga balatyagon sang kabalaka kag pag-isahanon nga masami kaupod sang mga kalisdanan. Mahimo nga naagyan mo na ang amo nga mga balatyagon, kag makabulig sa imo ining mga paglaragway nga mas maintiendihan ang imo mga eksperiyensya. Ukon basi makabulig sa imo ining mga bersikulo nga maintiendihan ang mga balatyagon sang iban nga nagaantos.

Samtang imo ginabasa ang Mga Salmo 102:12–28; 103; 116, pangitaa ang mga dinalan nga nagahatag sa imo sang kompiyansa nga pwede ka “[magpanawag] sa ngalan sang Ginuo” sa tion sang imo mga pagtilaw (Salmo 116:13). Basi gusto mo nga markahan, sauluhon, ukon ipaambit sa iban ang mga dinalan nga nagahatag sa imo sang paglaum sa Iya.

Tan-awa man sa Isaias 25:8; 2 Mga Taga-Corinto 1:3–7; Mga Hebreo 2:17–18; Alma 7:11–13.

Si Jesus nga nagapang-ayo

Healing [Pagpang-ayo], ni J. Kirk Richards

Mga Salmo 110; 118

Ang Mga Salmo makatudlo sa akon padulong sa Manluluwas.

Ang Mga Salmo nagaunod sang mga dinalan nga nagatudlo padulong sa kabuhi kag pag-alagad ni Jesucristo. Ari ang pila ka mga halimbawa:

• Salmo 110:1–4 (tan-awa sa Mateo 22:41–45; Mga Hebreo 5:4–10; 6:20)

• Salmo 118:22 (tan-awa sa Mateo 21:42; Mga Binuhatan 4:10–11; 1 Pedro 2:7)

• Salmo 118:25–26 (tan-awa sa Mateo 21:9)

Ano nga mga kamatuoran ang ginatudlo sining mga bersikulo sa imo parte kay Jesucristo? Paano ka ginbugayan sang paghibalo sining mga kamatuoran?

Samtang imo ginabasa ang Mga Salmo sining semana, padayona ang pagtanda sang iban pa nga mga dinalan nga nagatudlo sa imo parte sa Manluluwas. Mahimo ka man nga magbasa ukon mamati sa pila sang imo paborito nga mga himno nga nagabulig sa imo nga panumdumon Sia.

Salmo 119

Ang pulong sang Dios magapabilin sa akon sa Iya banas.

Ang ining salmo nagaunod sang madamo nga mga dinalan nga nagakomparar sang aton mga kabuhi sa biyahe pabalik sa Amay nga Langitnon. Samtang nagabasa ka, pangitaa ang mga tinaga pareho sang nagalakat, banas, dalanon, tiil, kag pagpatalang. Binagbinaga ang imo kaugalingon nga pagpanglakaton sa kabuhi—sa diin ka naghalin, sa diin ka na subong, kag ano nga direksyon ang imo ginapadulungan. Ano ang imo matun-an sa sining salmo parte sa imo pagpanglakaton papauli? Suno sa sining salmo, ano ang ginhatag sang Dios para buligan ka nga magpabilin sa husto nga banas?

Mahimo nga mangin interesado ka nga mahibal-an nga sa orihinal nga Hebreo, ang una nga walo ka bersikulo sa Salmo 119 nagasugod sa una nga letra sang Hebreo nga alpabeto. Ang masunod nga walo ka mga bersikulo nagasugod sa madason nga letra, kag padayon hasta sa katapusan nga alpabeto.

Tan-awa man sa Isaias 42:16; 2 Nefi 31:17–21; Alma 7:19–20.

Mga Salmo 134–36

Mas gamhanan ang Ginuo sangsa bisan ano nga dios-dios.

Pat-ini ang mga rason nga ginhatag sa Salmo 135:15–18 kon ngaa binuang-buang ang magsalig sa mga dios-dios. Ano ayhan ang magatentar sa imo nga magsalig sa bagay nga kaanggid sa mga dios-dios nga ginlaragway sa sining mga bersikulo?

Pwede mo ilista ang mabaskog nga mga butang nga mahimo sang Ginuo, suno sa ginlaragway sa Mga Salmo 134–36. Ano nga mabaskog nga mga butang ang Iya ginhimo para sa imo?

Mga Salmo 146–50

“Dayawa ninyo ang Ginuo.”

Samtang imo ginabasa ining katapusan nga mga salmo sang pagdayaw, hunahunaa ang mga rason kon ngaa kinahanglan mo dayawon ang Ginuo. Ngaa importante nga dayawon Sia? Ano ang mga paagi nga madayaw mo Sia?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Salmo 119:105.Basi pwede nga maghimo ang imo pamilya sang banas kag mag-agi diri sa dulom, nga nagagamit sang suga para pasanagan ang dalan sa unhan. Samtang nagalakat kamo, pwede ka magpamangkot pareho sang “Ano ang kaanggid sining kadulom sa aton mga kabuhi?” ukon “Paano makomparar sa kasanag ang pulong sang Dios?” Ang pagkanta sang parte sa kasanag sang Dios, pareho sang “Teach Me to Walk in the Light [Tudloi Ako sang Iya Gugma]” (Mga Himno kag mga Ambahanon sang Kabataan, 66), makabulig sa imo sa pagpabakod sang prinsipyo nga gintudlo sa Salmo 119:105.

Mga Salmo 127–28.Ano ang buot silingon sang buligan kita sang Ginuo nga “magpatindog sang [aton] balay”? (Salmo 127:1). Paano naton Sia mas paentrahon sa aton mga pagpaninguha nga maghimo sang matarong nga puluy-an? Para buligan ang imo pamilya sa pagsabat sining pamangkot, pwede ka magdrowing sang balay sa isa ka panid sang papel kag guntingon ini nga daw puzzle. Sa likod sang kada panid, pwede nga isulat ukon drowingon sang mga miyembro sang pamilya ang mga paagi agud himuon ang Ginuo nga parte sang inyo puluy-an. Dayon pwede ninyo nga sugpon-sugpunon ang puzzle. Ano pa ang aton makita sa sining mga salmo nga nagainspirar sa aton nga maglakat sa mga dalanon sang Ginuo?

Salmo 139.Pagkatapos nga basahon ang mga bersikulo 1–4, pwede nga hambalan sang mga miyembro sang pamilya kon paano nila nahibal-an nga kilala sila sang Dios sa personal (tan-awa man sa mga bersikulo 14–15, 23–24).

Mga Salmo 146–50.Mahimo mo hagaron ang imo pamilya nga basahon ang pila ka mga bersikulo sa Mga Salmo 146–50 sing matunog, nga ginapahayag ang mga balatyagon sang tagsulat. Paano naton ipahayag ang aton pagdayaw sa Ginuo? Basi masadyahan ang mga miyembro sang pamilya sa pagsulat sang ila kaugalingon nga mga salmo sang pagdayaw kag ipaambit ini sa kada isa.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Teach Me to Walk in the Light [Tudloi Ako sang Iya Gugma],” Mga Himno kag mga Ambahanon sang Kabataan, 66.

Pagpauswag sang Aton Pagpanudlo

Maggamit sang audio recordings. Sa imo pagtudlo sa imo pamilya, hunahunaa ang pagpamati sa audio nga bersyon sang balaan nga mga kasulatan, nga makita sa ChurchofJesusChrist.org ukon sa Librarya sang Ebanghelyo nga app. Ang pagpamati sa mga salmo mas mabaskog ang epekto tungod gintuyo ini nga basahon sing matunog.

banas sa kakahuyan

“Palakta ako sa banas sang imo mga sugo; kay dira may kalipay ako” (Salmo 119:35).