“Agosto 15–21. Mga Salmo 49–51; 61–66; 69–72; 77–78; 85–86: ‘Ipahayag Ko ang Iya Nahimo tungod sa Akon Kalag,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Agosto 15–21. Mga Salmo 49–51; 61–66; 69–72; 77–78; 85–86,” Dali, Magsunod sa Akon—Para sa Mga Indibidwal kag Mga Pamilya: 2022
Saving That Which Was Lost [Pagluwas sang Nadula], ni Michael T. Malm
Agosto 15–21
Mga Salmo 49–51; 61–66; 69–72; 77–78; 85–86
“Ipahayag Ko ang Iya Nahimo tungod sa Akon Kalag”
Ining outline nagamitlang sang pila ka doktrinal nga mga topiko nga ginatalakay sa sining mga salmo. Samtang nagatuon ka, ang pila ka mga tinaga, mga imahe, ukon mga ideya mahimo nga mangibabaw para sa imo. Ano sa pamatyag mo ang gusto itudlo sang Ginuo sa imo?
Isulat Ang Imo Mga Panghunahuna
Ang mga manunulat sang Mga Salmo nagpaambit sang madalom nga personal nga mga balatyagon sa ila mga binalaybay. Nagsulat sila parte sa pagkadismaya, kahadlok, kag paghinulsol. Kon kaisa, pamatyag nila gintalikdan na sila sang Dios, kag ang iban nga mga salmo may samay sang kapaslawan ukon pagkadesperado. Kon nakabatyag ka na sang pareho sini, ang pagbasa sang Mga Salmo makabulig sa imo nga makahibalo nga wala ka nagaisahanon. Pero makakita ka man sang mga salmo nga makapaisog sa imo kon may amo ka sina nga mga balatyagon, tungod gindayaw man sang mga salmista ang Ginuo bangud sang Iya kaayo, nahalawhaw sa Iya gahum, kag nagkasadya sa Iya kaluoy. Nakahibalo sila nga ang kalibutan napun-an sing kalain kag sala pero ang Ginuo “maayo, kag handa sa pagpatawad” (Salmo 86:5). Naintiendihan nila nga ang pag-angkon sing pagtuo sa Ginuo wala nagakahulugan nga indi ka na makigbato sa kabalaka, sala, ukon kahadlok. Nagakahulugan ini nga nakahibalo ka kon kay Sin-o ka magpabulig kon kinahanglanon.
Mga Ideya para sa Personal nga Pagtuon sang Balaan nga mga Kasulatan
Ang pagtubos nagaabot lamang paagi kay Jesucristo.
Ang Salmo 49 may mensahe para sa “tingub ang kubos kag mataas, manggaranon kag imol” (bersikulo 2). Ano sa banta mo ining mensahe? Ano sa pamatyag mo ang ginadugang sang Salmo 62:5–12 sa sinang mensahe?
Ang pagbasa sang mga salmo mahimo nga magatulod sa imo nga binagbinagon ang mga paagi nga ginabutang sang iban nga tawo ang ila pagsalig sa isa ka butang magluwas sa Dios para sa pagtubos (tan-awa sa Salmo 49:6–7). Paano gin-impluwensyahan ang imo kabuhi sang imo testimonya nga “ang Dios magatubos sang [imo] kalag gikan sa gahum sang [lulubngan]”? (bersikulo 15).
Tan-awa man sa Mga Huluhaton 28:6; Alma 34:8–17.
Tungod sa kaluoy sang Manluluwas, sarang ako mapatawad sang akon mga sala.
Ang mga pagpakitluoy sa Salmo 51 ginapatungod kay Haring David, nga nakasala sang pagpanglahi kag pagpatay (tan-awa sa 2 Samuel 11). Bisan pa nga indi gawa seryoso ang aton mga sala, mabatyagan naton ang kakinahanglan sang kaluoy nga ginapautwas sa sining salmo. May matun-an man kita parte sa kahulugan sang maghinulsol. Halimbawa, ano nga mga pulong ukon dinalan sa Salmo 51 ang nagatudlo sa imo parte sa pamatasan nga kinahanglan naton para maghinulsol? Ano ang imo natun-an parte sa epekto sang Pagbayad-Sala sang Manluluwas sa imo kabuhi?
Mahimo mo ipamangkot ang amo man nga mga pamangkot samtang imo ginabasa ang Mga Salmo 85–86. Pwede ka man mangita sang mga dinalan nga nagalaragway sa Ginuo. Paano ginapabakod sining mga dinalan ang imo pagtuo nga patawaron ka Niya? (tan-awa, halimbawa, sa Salmo 86:5, 13, 15).
Tan-awa man sa Alma 36.
Mga Salmo 51:13–15; 66:16–17; 71:15–24
Ang akon testimonya kay Jesucristo makabulig sa iban nga magpalapit sa Iya.
Binagbinaga kon paano mo naangkon ang imo testimonya parte kay Jesucristo kag sa Iya nagabayad-sala nga gahum. Dayon, samtang imo ginatun-an ang Mga Salmo 51:13–15; 66:16–17; 71:15–24, hunahunaa kon paano mo agdahon ang iban nga mag “kari kag tan-awa ang mga binuhatan sang Dios” (Salmo 66:5). Ano ang kahulugan sa imo sang “magahambal sang [Iya] pagkamatarong sa bug-os nga adlaw”? (Salmo 71:24). Paano mo ihambal sa iban “ang iya nahimo tungod sa [imo] kalag”? (Salmo 66:16).
Tan-awa man sa Mosias 28:1–4; Alma 26.
Sarang naton mapaambit sa iban ang aton mga testimonya parte sa ginhimo sang Ginuo para sa aton.
Buligan ako sang Ginuo sa tion sang akon gilayon nga panginahanglan.
Pila ka mga salmo ang nagalaragway, sa maathag nga lenggwahe, kon ano ang pamatyagan sang mahilayo sa Dios kag sang desperado nga pagkinahanglan sang Iya bulig. Pwede mo man panumdumon ang pagpangita sang amo nga mga paglaragway sa Mga Salmo 63:1, 8; 69:1–8, 18–21; 77:1–9. Ano ang imo nakita sa Mga Salmo 63; 69; 77–78 nga naghatag sining mga salmista sang paglaum?
Kon ginabudlayan ka, paano makabulig sa imo ang “sambiton ang mga binuhatan sang Ginuo” kag ang Iya “katingalahan nga dumaan”? (Salmo 77:11). Pila sinang mga katingalahan ginlaragway sa Salmo 78. Samtang ginabasa mo ang parte sini, binagbinaga kon ano ang nagabulig sa imo nga “mapahamtang sa Dios ang [imo] paglaum” (bersikulo 7). Ano nga mga eksperiyensya sa kasaysayan sang imo pamilya ang nagainspirar sa imo?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Salmo 51:17.Pamensara kon paano mo itudlo sa imo pamilya ang kahulugan sang pag-angkon sang [masinulub-on] nga tagipusuon. Halimbawa, pwede nga magbulos-bulos ang mga miyembro sang pamilya sa pagbuka sang bagay nga matig-a ang tukiba, pareho sang itlog ukon mani. Ngaa daw pareho kon kaisa sa sinang tukiba ang aton mga tagipusuon? Paano naton buksan ang aton mga tagipusuon sa Ginuo? Mahimo nga ang pagbasa sang Salmo 51 sing ululupod makahatag sang pila ka mga ideya.
-
Salmo 61:2–3.Basi masadyahan ang mga miyembro sang pamilya sa pagdrowing sang mga litrato sang mga simbolo sa sining mga bersikulo kag hambalan kon paano si Jesucristo nangin pareho sa mataas nga “[bato],” “nangin [aton] dalangpan,” kag “tore nga mabakod.”
-
Mga Salmo 71:17; 78:5–7.Ano ang gusto sang Ginuo nga inyo “ipakilala … sa [inyo] mga anak”? (Salmo 78:5). Basi pwede nga mag-istorya ang tagsa ka miyembro sang pamilya sang halimbawa sang “makatilingala nga mga binuhatan” sang Ginuo, pareho sang istorya sa balaan nga kasulatan, isa ka eksperiyensya, ukon personal nga testimonya, nga nagabulig sa ila nga “mapahamtang nila sa Dios ang ila paglaum” (Mga Salmo 71:17; 78:7).
-
Salmo 72.Ang Salmo 72 ginsulat ni David parte sa iya anak nga si Salomon, pero kalabanan sini magamit man kay Jesucristo. Samtang ginabasa sang inyo pamilya ining salmo, pwede nila alsahon ang litrato sang Manluluwas kon makakita sila sang mga bersikulo nga nagapadumdom sa ila kay Jesucristo. Paano naton tumanon ang handum nga “mapuno ang bug-os nga duta sang iya himaya”? (Salmo 72:19; tan-awa man sa Doktrina kag mga Kasugtanan 65:2).
-
Salmo 85:11.Mahimo nga makainspirar ining bersikulo sang diskusyon parte sa mga hitabo sa Pagpanumbalik sang ebanghelyo—kon ngaa ang Libro ni Mormon kamatuoran nga “[nag-ulhot] sa duta” kag kon paano ang langitnon nga mga mensahero nagpanaog “halin sa langit” (tan-awa man sa Moises 7:62).
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “I Need Thee Every Hour [Sa Tanan nga Tion],” Mga Himno kag mga Ambahanon sang Kabataan, no. 12.
Pagpauswag sang Aton Pagpanudlo
Lainlaina ang pamaagi sa pagtudlo. “Magpangita sang mga paagi nga malainlain mo ang imo pagpaninguha sa pagtudlo sang ebanghelyo. Ang paghimo sini nagadugang sa kasangkad kag katahum sang eksperiyensya. … Pamensara kon paano makaimbitar sang Espiritu ang paggamit sang musika, mga istorya, mga litrato, kag iban pa nga klase sang art” (Teaching in the Savior’s Way, 22).
Doubt Not, Thomas [Dili Ka Magmadinuhaduhaon, Tomas], ni J. Kirk Richards