tatlo ka lalaki nga nagapakighambal sa lalaki nga nagapungko sa duta

The Judgments of Job [Ang mga Husga nahanungod kay Job], ni Joseph Brickey

Agosto 1–7

Job 1–3; 12–14; 19; 21–24; 38–40; 42

“[Magasalig Gihapon Ako sa Iya]”

Samtang imo ginabasa ang Job, ang Espiritu magagiya sa imo para madiskubrehan ang importante nga mga kamatuoran nga mapuslanon sa imo. Isulat ang imo madiskubrehan, kag binagbinaga kon paano magamit ining mga kamatuoran sa imo.

Isulat Ang Imo Mga Panghunahuna

Natural lang nga matingala kon ngaa nagakatabo ang malain nga mga butang sa maayo nga mga tawo—ukon pareho sinang butang, kon ngaa nagakatabo ang maayo nga mga butang sa malain nga mga tawo. Ngaa ginatugtan ina, sang Dios nga matarong, nga matabo? Ang mga pamangkot pareho sini ginpatungkad paagi sa eksperiyensya ni Job, isa sa maayo nga mga tawo nga nag-agi sang malain nga mga butantg. Bangud sa mga pagtilaw ni Job, nanghunahuna ang iya mga abyan kon bala maayo gid man sia nga tawo. Gintindugan ni Job ang iya kaugalingon nga pagkamatarong kag nagpamangkot kon bala patas gid man ang Dios. Apang sa tunga sang iya pag-antos kag pagpanghunahuna, ginpadayon ni Job ang iya integridad kag pagtuo kay Jesucristo. Sa libro nga Job, ginduhaduhaan kag gintilawan ang pagtuo pero wala lubos nga gintalikdan. Wala ina nagakahulugan nga ang tanan nga mga pamangkot nasabat. Pero ang libro nga Job nagatudlo nga mientras indi ini masabat, ang mga pagpangduhaduha kag pagtuo sarang mag-upod, kag bisan ano pa ang matabo sa karon, makasiling kita parte sa aton Ginuo, “[Magasalig gihapon ako sa Iya]” (Job 13:15).

Learn More image

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Job 1–3; 12–13

Ang akon pagsalig sa Amay nga Langitnon kag kay Jesucristo makabulig sa akon nga magpabilin nga matinuohon sa tanan nga sitwasyon.

Ang pangbukas nga mga kapitulo sang Job gintuyo para hatagan importansya ang papel ni Satanas bilang aton kaaway ukon tag-akusar, indi para ilaragway kon ano ang inter-aksyon sa tunga sang Dios kag ni Satanas. Kon imo basahon ang akusasyon ni Satanas kay Job (tan-awa sa Job 1:9–11; 2:4–5), mahimo nga makapanumdom ka kon amo man bala sina ang masiling sa imo. Mahimo nga pamangkuton mo ang imo kaugalingon, Ano bala ang akon mga rason sa pagpabilin nga matinuohon sa Dios? Binagbinaga ang mga pagtilaw nga ginhatag kay Job kag ang iya mga reaksyon (tan-awa sa Job 1:20–22; 2:9–10). Ano ang imo matun-an sa iya nga mahimo makabulig sa imo sa pag-atubang sang imo mga hangkat?

Bisan pa nga nagatinguha si Job nga magpabilin nga matinuohon, nagpadayon ang iya mga pagtilaw kag ang iya pag-antos (tandai ang iya mga pagpanghakroy sa kapitulo 3). Ang matuod, daw mas naglala pa gid ang iya pag-antos, kag ginsiling sang iya mga abyan nga ginasilutan sia sang Dios (tan-awa sa Job 4–5; 8; 11). Samtang imo ginabasa ang bahin sang sabat ni Job sa mga kapitulo 12–13, pamensara kon ano ang nahibal-an ni Job parte sa Dios nga nagtugot sa iya nga magpadayon sa pagsalig, wala sapayan sang iya pag-antos kag wala masabat nga mga pamangkutanon. Ano ang imo nahibal-an parte sa Dios nga nagabulig sa imo nga atubangon ang imo mga hangkat? Paano mo nahibal-an ining mga kamatuoran, kag paano ka sini ginpabakod sa imo pagtuo?

Job 19

Si Jesucristo ang akon Manunubos.

Kon kaisa ang pinakaimportante nga mga kamatuoran ginapahayag sa aton sa tunga sang aton pinakamasakit nga pag-antos. Binagbinaga ang mga pagtilaw nga ginlaragway ni Job sa Job 19:1–22 kag ang mga kamatuoran nga iya ginsambit sa Job 19:23–27. Dayon binagbinaga kon paano mo nahibal-an nga buhi ang imo Manunubos. Ano ang ginahimo nga kinalain sining ihibalo kon makaeksperiyensya ka sang mabudlay nga mga pagtilaw?

Tan-awa man sa Doktrina kag mga Kasugtanan 121:1–12; 122.

lalaki nga nagatangla

Job [Si Job], ni Gary L. Kapp

Job 21–24

“Kon matilawan niya ako, magagwa ako subong sang bulawan.”

Samtang padayon mo nga ginabasa ang debate sa tunga ni Job kag sang iya kaabyanan parte sa mga rason nga nagaantos si Job, mahimo nga makapanghunahuna ka kon paano mo sabton ang pamangkot nga sentro sang ila debate: Ngaa bala nga ang mga matarong kon kaisa nagaantos kag ang mga malain kon kaisa wala ginasilutan? Pamensara ini samtang imo ginabasa ang Job 21–24. Ano ang imo nahibal-an parte sa Amay nga Langitnon kag sa Iya plano nga makabulig hatag sang mga sabat? Tan-awa, halimbawa sa, 2 Nefi 2:11–13; Mosias 23:21–23; 24:10–16; Abraham 3:22–26.

Job 38; 40; 42

Ang perspektibo sang Dios mas dako sangsa akon.

Nga nagaugtas sa mga akusasyon sang iya kaabyanan (tan-awa sa Job 16:1–5; 19:1–3), sulit-sulit nga nagpanawag si Job sa Dios nga nagapangayo sang paathag sa iya pag-antos (tan-awa sa Job 19:6–7; 23:1–9; 31). Si Elder Neal A. Maxwell nagsiling nga “kon daw ginatak-an kita sa tiyempo sang Dios nga nakahibalo sang tanan,” nga daw amo-amo man kay Job, “daw ginapagwa naton nga nakahibalo kita kon ano ang pinakamaayo. Pinasahi, indi bala—kita nga nagasuksok sang relo luyag maglaygay sa Iya nga nagadumala sang mga orasan kag kalendaryo sa kahawaan” (“Hope through the Atonement of Jesus Christ,” Ensign, Nob. 1998, 63). Binagbinaga ining mga pulong samtang imo ginabasa ang sabat sang Dios kay Job sa mga kapitulo 38 kag 40. Ano nga mga kamatuoran ang Iya ginatudlo kay Job? Ngaa importante nga mahibal-an naton ining mga kamatuoran samtang nagapakigbato kita sa kabudlayan kag mga pamangkot diri sa duta? Ano ang nanamian mo sa sabat ni Job sa Job 42:1–6?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Job 1:20–22.Para maintiendihan kon ano ayhan ang nabatyagan ni Job, suno sa ginlaragway sa sining mga bersikulo, pwede nga basahon ukon drama-dramahon sang imo pamilya ang Job 1:13–22. Ano ang aton matun-an sa ehemplo ni Job?

Job 14:14.Paano naton sabton ang pamangkot ni Job sa sining bersikulo? Paano ang Alma 11:42–44 makabulig sa aton?  

Job 16:1–5.Nangin pareho bala kita sa mga abyan ni Job, nga naghusga kag nagpakalain kay Job sang nagakinahanglan sia sing pagpasulhay? (tan-awa sa Job 16:1–4; tan-awa man sa Juan 7:24). Paano makapabakod sa iban ang aton mga pulong sa tion sang ila kasubo? (tan-awa sa Job 16:5).

Job 19:23–27.Pagkatapos nga basahon ining mga bersikulo, pwede nga mag-istorya ang mga miyembro sang pamilya kon paano nila nahibal-an nga buhi ang aton Manunubos. Pwede man kamo magbuligay sa pagsulat sang inyo mga pulong sang testimonya (ukon sang mga drowing sang kabataan parte sa Manluluwas) sa isa ka libro, pareho sang journal sang pamilya (tan-awa sa bersikulo 23). Pwede man kamo magkanta sang kanta nga nagapamatuod parte sa Manluluwas, pareho sang “I Know That My Redeemer Lives [Buhi Gid ang Manunubos Ko]” (Mga Himno kag mga Ambahanon sang Kabataan, no. 38–39), kag ipaambit ang nga dinalan nga nagapabakod sang inyo pagtuo sa Iya.

Job 23:8–11.Ano ang buot silingon sang “magagwa” halin sa aton mga pagtilaw “subong sang bulawan”? Sin-o ang kilala ta nga nakahimo na sini? Mahimo nga masadyahan ang mga kabataan sa paghimo sang bisan ano nga bagay nga may sulat nga mga tinaga halin sa bersikulo 10 sa mga ini. Mahimo man ninyo hambalan kon paano nalampuwasan ni Jesucristo ang Iya mga pagtilaw (tan-awa sa Lucas 22:41–44; Doktrina kag mga Kasugtanan 19:16–19).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Hunahunaa. Mahimo nga mag-abot ang makahulugan nga paghangop kon tinguhaan naton nga ibutang ang aton mga kaugalingon sa balaan nga mga kasulatan. Halimbawa, ang pagbutang sang imo kaugalingon sa sitwasyon ni Job mahimo nga makabulig sa imo nga binagbinagon ang imo relasyon sa Amay nga Langitnon kag kay Jesucristo.

mga lalaki nga nagapakighambal sa lalaki nga nagapungko sa duta

Job and His Friends [Si Job kag ang Iya Kaabyanan], ni Ilya Repin