Si Jesus nga nagalakat upod sa mga karnero

The Lord Is My Shepherd [Ang Ginuo Akon Manugpahalab], ni Yongsung Kim, havenlight.com

Agosto 8–14

Mga Salmo 1–2; 8; 19–33; 40; 46

“Ang Ginuo Akon Manugpahalab”

Indi magbatyag nga limitado ka lang sa pinili nga Mga Salmo ukon sa mga prinsipyo nga ginapanugyan sa sining outline. Tugoti ang Espiritu nga maggiya sa imo sa mga kamatuoran nga makabulig sa imo nga makabatyag nga mas malapit sa Ginuo.

Isulat Ang Imo Mga Panghunahuna

Wala kita makapiho gid kon sin-o ang nagsulat sang Mga Salmo. May pila nga ginapatungod kay Haring David, pero ang kalabanan sa mga ini, nagapabilin nga indi kilala ang mga manunulat. Pero pagkatapos nga basahon ang Mga Salmo, mahimo nga makabatyag kita nga daw nakilala na naton ang mga Salmista, bisan pa nga wala naton mahibal-i ang ila mga ngalan. Ang aton nahibal-an amo nga ang Mga Salmo importante nga bahin sang pagsimba sang mga Israelnon, kag nahibal-an naton nga masami ini nga ginasambit sang Manluluwas. Sa Mga Salmo, daw may bintana kita agud makita ang kalag sang dumaan nga katawhan sang Dios. Makita naton kon ano ang ila nabatyagan parte sa Dios, kon ano ang ila mga ginakabalak-an, kag kon paano sila nakakita sang paghidaet. Pareho sa mga tumuluo sa karon, sa bilog nga kalibutan, ginagamit naton sa gihapon ining mga pulong sa aton pagsimba sa Dios. Ang mga manunulat sang Mga Salmo daw may bintana sa aton mga kalag kag daw nakakita sang paagi nga mapahayag ang aton nabatyagan parte sa Dios, kon anong aton mga ginakabalak-an, kag kon paano kita makakita sang paghidaet.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Salmo 1; 23; 26–28; 46

Ang Mga Salmo nagatudlo sa aton nga magsalig sa Ginuo.

Mahimo nga natalupangdan mo samtang imo ginabasa ang Mga Salmo kon kada san-o ginapahayag sang mga manunulat ang kahadlok, kasubo, ukon kabalaka. Normal ang amo sina nga mga balatyagon, bisan sa mga tawo nga may pagtuo. Pero ano ang naghimo sa Mga Salmo nga makainspirar amo ang mga solusyon nga ila ginatanyag, lakip na ang lubos nga pagsalig sa Ginuo. Pamensara ining makainspirar nga mga mensahe samtang imo ginabasa ang Mga Salmo 1; 23; 26–28; 46. Bantayi ang masunod, kag isulat ang imo mga madiskubrehan:

• Mga pangagda nga magsalig sa Ginuo:

• Mga tinaga nga nagalaragway sa Ginuo:

• Mga tinaga nga nagalaragway sang paghidaet, kusog, kag iban pa nga mga bugay nga Iya ginahatag:

• Mga tinaga nga nagalaragway sang mga nagasalig sa Iya:

Mga Salmo 2; 22

Ginatudlo sang Mga Salmo ang aton mga hunahuna sa kabuhi kag pag-alagad ni Jesucristo.

Ang pila sa Mga Salmo nagatumod sa mortal nga kabuhi ni Jesucristo. Nakita man sang mga Kristiyano sa panahon sang Bag-ong Katipan ining mga koneksyon—halimbawa, natalupangdan nila sa Salmo 2 ang pagtumod sa mga pagtilaw ni Jesus sa atubang ni Haring Herodes kag Poncio Pilato (tan-awa sa Mga Binuhatan 4:24–30). Pamensara ang pagbasa sang Mga Salmo 2 kag 22 kaupod sa Mateo 27:35–46; Lucas 23:34–35; kag Juan 19:23–24. Pangitaa ang mga koneksyon sa tunga sang mga pulong sa sining mga salmo kag sa kabuhi sang Manluluwas, kag padayona ang pagpangita sang pareho nga mga koneksyon samtang imo ginatun-an ang libro nga Mga Salmo sa madason nga sinemana.

Pamensara nga isa ka ka Judio sang panahon ni Jesus nga pamilyar sa Mga Salmo kag nakita ang mga koneksyon sa kabuhi sang Manluluwas. Paano ayhan nangin bugay sa imo ining ihibalo?

Tan-awa man sa Mga Salmo 31:5; 34:20; 41:9; Lucas 24:44; Mga Hebreo 2:9–12.

Mga Salmo 8; 19; 33

“Ang duta puno sang malig-on nga paghigugma sang Ginuo.”

Ang pagbasa sang Mga Salmo 8; 19; kag 33 mahimo nga makainspirar sa imo nga hunahunaon ang madamo nga matahum nga gintuga sang Ginuo. Tutoki ang imo panghunahuna kag mga balatyagon samtang ginahimo mo ini. Paano “nagapahayag sang himaya sang Dios” ang mga gintuga sang Ginuo sa imo? (Salmo 19:1).

Mga Salmo 19:7–11; 29

Ang pulong sang Ginuo gamhanan, “nagapasadya sa tagipusuon.”

Sa Mga Salmo, ang mga tinaga nga pagpamatuod, pagtulun-an, sugo, kag pagsulundan mahimo nga magtumod sa pulong sang Ginuo. Tandai ina samtang imo ginabasa ang Salmo 19:7–11. Anong ginapanugyan sining mga bersikulo sa imo parte sa pulong sang Ginuo? Ano ang ginatudlo sang Salmo 29 sa imo parte sa Iya tingug? Sa imo eksperiyensya, paano nagsanto sa sining mga paglaragway ang pulong ukon tingug sang Ginuo?

Templo sang Concepción Chile

Kinahanglan naton nga mangin matinlo kag putli sa espirituhanon para makasulod sa presensya sang Ginuo.

Mga Salmo 24; 26–27

Ang pagsulod sa presensya sang Ginuo nagapangayo sang kaputli.

Bangud gintukod ang templo sa Jerusalem sa bungyod, ang dinalan nga “bakulod sang Ginuo” (Salmo 24:3) mahimo nga nagatumod sa templo ukon sa presensya sang Dios. Ano ang ginadugang sini sa imo paghangop sang Salmo 24? Ano ang kahulugan sa imo sang pag-angkon sang “kamot nga matinlo, kag tagipusuon nga putli”? (Salmo 24:4).

Ano ang ginatudlo sa imo sang Mga Salmo 26 kag 27 parte sa balay sang Ginuo?

Tan-awa man sa Salmo 15.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Salmo 22.Samtang ginabasa sang isa ka miyembro sang pamilya ining salmo, pwede nga pangitaon sang iban ang mga pagpalareho sa Mateo 27:35–46. Dayon pwede nila iistorya ang ila mga nabatyagan parte kay Jesucristo kag sa Iya sakripisyo para sa aton.

Salmo 23.Mahimo nga masadyahan ang imo pamilya sa pagdrowing sang ila makita sa salmo kag ipapakot sa mga miyembro sang pamilya ang mga bersikulo nga nagasanto sa mga drowing. Paano nangin pareho sa manugpahalab naton ang Ginuo?

Salmo 24:3–5.Para hatagan importansya ang pag-angkon sang matinlo nga mga kamot kag putli nga tagipusuon, pwede ninyo basahon ang Salmo 24:3–5 samtang nagapanghinaw ang mga miyembro sang ila mga kamot. Ano ayhan ang ginasimbolo sang mga kamot sa sining salmo? Ano ayhan ang ginasimbolo sang tagipusuon? Ano ang sarang naton himuon para tinloan ang aton mga kamot kag mga tagipusuon sa espirituhanon?

Salmo 30:5, 11.Ang Salmo 30:5 nagaunod sang promisa nga “ang paghibi magapadayon sa kagab-ihon, apang ang kalipay nagaabot sa kaagahon.” Paano ginbuslan sang Ginuo ang aton kasubo sang kalipay? Mahimo nga masadyahan ang pila ka mga miyembro sang pamilya nga drama-dramahon ang ginalaragway sa bersikulo 11.

Salmo 33.Tandai kon pila ka beses gingamit ang tinaga nga tanan sa sining salmo. Ano ang aton matun-an parte sa Ginuo sa sulitsulit nga paggamit sining tinaga, labi na sa mga bersikulo 13–15?

Salmo 46:10.Pwede kamo maghimo sang isa ka butang sing ululupod kon sa diin kinahanglan “magpahimuyong” ang mga miyembro sang pamilya. Paano ang pagpahimuyong nagabulig sa aton nga makilala ang Dios? Ano ang mga oportunidad nga ara sa aton agud magpahimuyong kag kilalahon ang Dios?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Mangin matugahon [creative]. Ang balaan nga mga kasulatan pareho sang Mga Salmo masami nga nagainspirar sa mga tawo nga magdayaw sa Ginuo sa matugahon nga pamaagi. Kon natandog ka agud ipahayag ang imo debosyon paagi sa musika, binalaybay, visual nga art, ukon sa iban pa nga paagi, aktohi inang mga balatyagon. Pamensara ang pagpaambit sang imo ginhimo para buligan ang iban nga magpatubo sang pagtuo sa Amay nga Langitnon kag kay Jesucristo.

Si Jesus nga nagapas-an sang karnero sa iya mga abaga

The Good Shepherd [Ang Maayong Manugpahalab], ni Ken Spencer