The Cry of Jeremiah the Prophet [Ang Panawagan ni Jeremias nga Propeta], halin sa kinurit nga iya sang Eskwelahan sang Nazareno

Oktubre 17–23

Jeremias 30–33; 36; Mga Panalabiton 1; 3

“Baylohan Ko ang Ila Paglalaw sa Kalipay”

Samtang imo ginasulat ang imo mga panghunahuna, pamensara kon paano naangot ang mga prinsipyo sa Jeremias kag Mga Panalabiton sa iban pa nga butang nga imo natun-an sa Daan nga Katipan.

Isulat Ang Imo Mga Panghunahuna

Sang primero nga gintawag sang Ginuo si Jeremias nga mangin propeta, ginsilingan Niya sia nga ang iya misyon amo ang “paggabot, kag pagguba” (Jeremias 1:10)—kag sa Jerusalem, madamo kaayo sang kalainan nga kinahanglan gabuton kag gub-on. Pero parte lang ini sa misyon ni Jeremias—gintawag man sia sa “pagpatindog, kag sa pagtanom” (Jeremias 1:10). Ano ang sarang tukuron ukon itanom sa pagkawasak nga nabilin tungod sang pagrebelde sang Israel? Sa amo man, kon ginwasak ang aton mga kabuhi sang sala ukon kabudlayan, paano bala kita magpatukod kag magtanom liwat? Ang sabat ara sa “Sanga sang pagkamatarong” (Jeremias 33:15), ang ginpromisa nga Mesias. Ang Mesias nagadala sang “bag-ong katipan” (Jeremias 31:31)—katipan nga nagapangayo sang masobra pa sangsa hapaw nga pangako ukon ang panggwa nga pagpakita sang debosyon. Ang iya layi kinahanglan ara “sa sulod [naton],” nasulat “sa [aton] tagipusuon.” Amo ina ang matuod nga kahulugan sang Ginuo nga “mangin [aton] Dios” kag sa aton nga “mangin [Iya] katawhan” (Jeremias 31:33). Bilog nga kabuhi ini nga proseso, kag magahimo kita sa gihapon sang mga sayop kag may rason nga magkasubo kon kaisa. Pero kon matabo ini, may promisa sa aton ang Ginuo: “Baylohan ko ang ila paglalaw sa kalipay” (Jeremias 31:13).

 

Mga Ideya para sa Personal nga Pagtuon sang Balaan nga mga Kasulatan

Jeremias 30–31; 33

Pagwaon sang Ginuo ang Israel sa pagkabihag kag tipunon sila.

Sa Jeremias 30–31; 33 ginkilala sang Ginuo ang “panalabiton, kag paghibi nga mapait” (Jeremias 31:15) nga maeksperiyensyahan sang mga Israelnon samtang ginabihag sila. Pero, nagtanyag man Sia sang mga pulong sang pagpaumpaw kag paglaum. Ano sa banta mo ang mga dinalan sa sining mga kapitulo nga nakahatag kuntani sa mga Israelnon sang pagpaumpaw kag paglaum? Ano nga mga promisa ang imo makita halin sa Ginuo sa Iya katawhan? Paano ayhan magamit ining mga promisa sa imo?

Jeremias 31:31–34; 32:37–42

“Sila mangin akon katawhan, kag ako mangin-ila Dios.”

Bisan pa nga ginbali sang mga Israelnon ang ila kasugtanan upod sa Ginuo, si Jeremias nagpropesiya nga ang Ginuo magahimo liwat sang “bag-o” kag “dayon nga katipan” upod sa Iya katawhan (Jeremias 31:31; 32:40). Ang bag-o kag wala’y katubtuban nga kasugtanan amo ang “kabug-osan sang ebanghelyo ni Jesucristo [tan-awa sa Doktrina kag mga Kasugtanan 66:2]. Ini bag-o tagsa nga ginapahayag ini liwat pagkatapos sang tion sang apostasiya. Ini wala’y katubtuban tungod kay ini kasugtanan sang Dios kag nabaton sa tagsa ka dispensasyon sang ebanghelyo sa diin ang mga tawo handa sa pagbaton sini.”

Samtang imo ginabasa ang Jeremias 31:31–34; 32:37–42, binagbinaga kon ano ang kahulugan para sa imo sang mangin parte sang katawhan sang Dios sa kasugtanan. Paano naapektuhan sining mga bersikulo ang imo paglantaw sang imo relasyon sa kasugtanan upod sa Dios? Ano ang buot silingon sang masulat ang Iya layi sa imo tagipusuon? (tan-awa sa Jeremias 31:33).

Tan-awa man sa Jeremias 24:7; Mga Hebreo 8:6–12.

Ang balaan nga mga kasulatan sarang mag-inspirar sa aton nga maghinulsol kag magliso sa Ginuo.

Jeremias 36

Ang balaan nga mga kasulatan may gahum para magtalikod ako sa kalainan.

Ginsugo sang Ginuo si Jeremias nga isulat ang iya mga propesiya sa “linukot nga tulun-an,” ukon sa scroll, nga nagapaathag nga kon mabatian sang katawhan ining mga propesiya, “ayhan … magtalikod sila ang tagsa ka tawo sa iya malaut nga dalanon, agud nga mapatawad ko ang ila kalautan” (Jeremias 36:2–3). Samtang imo ginabasa ang Jeremias 36, pamensara nga pat-inan kon ano ang nabatyagan sang masunod nga mga tawo sa sining mga propesiya:

Ang Ginuo:

Jeremias:

Baruc:

Jehudi kag Haring Joaquim:

Elnatan, Delaya, kag Gemarias:

Binagbinaga kon ano ang imo nabatyagan parte sa balaan nga mga kasulatan kag sa papel sang mga ini sa imo kabuhi. Paano ang mga ini nakabulig sa imo nga magtalikod sa kalainan?

   

Mga Panalabiton 1; 3

Ang Ginuo sarang magpaumpaw sang kasubo nga aton naeksperiyensyahan bangud sa sala.

Ang Mga Panalabiton isa ka koleksyon sang mga binalaybay nga ginsulat pagkatapos maguba ang Jerusalem kag ang templo sini. Ngaa sa banta mo nga importante nga gintipigan kag ginlakip ining mga panalabiton sa Daan nga Katipan? Pamensara kon ano ang ginabulig paintiendi sa imo sang mga paanggid sa Mga Panalabiton 1 kag 3 parte sa dako nga kasubo nga nabatyagan sang Israel. Ano nga mga mensahe sang paglaum kay Cristo ang imo makita? (tan-awa ilabi na sa Mga Panalabiton 3:20–33; tan-awa man sa Mateo 5:4; Santiago 4:8–10; Alma 36:17–20).

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Jeremias 31:3.Paano ginpakita sang Amay nga Langitnon kag ni Jesucristo ang Ila “gugma nga dayon” para sa aton? Ang pagpakita sang mga butang nga gintuga ni Cristo para sa aton ukon ginhimo sa Iya dutan-on nga pag-alagad makabulig sa inyo pamilya nga mabatyagan ang Iya “mahigugmaon nga kalulo.”

Jeremias 31:31–34; 32:38–41.Pamensara ang paghimo sang lista sang mga butang sa sining mga bersikulo nga ginpromisa sang Ginuo kon maghimo kita sang mga kasugtanan upod sa Iya. Ano ang ginatudlo sa aton sining mga bersikulo parte sa importansya sang aton mga kasugtanan?

Pwede man nga isulat (ukon drowingon) sang mga miyembro sang pamilya sa papel nga korte tagipusuon ang bagay nga nagapakita kon ano ang ila nabatyagan parte sa Manluluwas. Ano ang buot silingon sang masulat ang Iya layi sa aton mga tagipusuon? (tan-awa sa Jeremias 31:33). Paano naton ipakita sa Ginuo nga gusto naton nga mangin Iya katawhan?

Jeremias 36.Paano mo ayhan gamiton ang Jeremias 36 para buligan ang imo pamilya nga matun-an ang importansya sang balaan nga mga kasulatan? (tan-awa halimbawa, sa mga bersikulo 1–6, 10, 23–24, 27–28, 32). Pwede mo pangabayon ang isa ka miyembro sang pamilya nga basahon ang isa ka bersikulo sa sining kapitulo samtang ang isa ka miyembro sang pamilya nagasulat sini, pareho sang ginhimo ni Baruc para kay Jeremias. Ngaa nagapasalamat kita sa pagpaninguha sang mga tawo pareho kay Baruc, nga nagtipig sang mga pulong sang mga propeta? Ano ang pwede naton himuon para ipakita sa Ginuo nga ginahatagan naton sang bili ang Iya mga pulong sa balaan nga mga kasulatan?

Mga Panalabiton 3:1–17, 21–25, 31–32.Bilang pamilya, pwede ninyo hambalan kon paano maangot ang mga balatyagon nga ginhambal sa Mga Panalabiton 3:1–17 sa aton mga nabatyagan kon makasala kita. Paano makaimpluwensya ang mga mensahe sa mga bersikulo 21–25, 31–32 sa aton mga kabuhi?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “I Know My Father Lives [Buhi ang Amay Ko],” Mga Himno kag mga Ambahanon sang Kabataan, 59.

Pagpauswag sang Personal nga Pagtuon

Maghandum sang rebelasyon. Sa imo pagbinagbinag sa bilog nga adlaw, mahimo nga makabaton kag sang dugang nga mga ideya kag mga pagpabatyag parte sa balaan nga mga kasulatan nga imo gintun-an. Indi pagpamensara ang pagtuon sang ebanghelyo nga isa ka butang nga ginahatagan mo sang tion kundi isa ka butang nga pirme mo ginahimo. (Tan-awa sa Teaching in the Savior’s Way, 12.)

Jeremiah Lamenting the Destruction of Jerusalem [Si Jeremias nga Ginakasubo ang Kalaglagan sang Jerusalem], ni Rembrandt van Rijn