“ວັນທີ 19–25 ເດືອນທັນວາ. ຄຣິດສະມາດ: ‘ພວກຂ້ານ້ອຍໄດ້ລໍຖ້າພຣະອົງ, ແລະ ພຣະອົງຈະຊ່ວຍກູ້ເອົາພວກຂ້ານ້ອຍໄວ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 19–25 ເດືອນທັນວາ. ຄຣິດສະມາດ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ກຸມມານນ້ອຍເຢຊູຖືກຕູ້ມໄວ້ດ້ວຍຜ້າຂາວ ແລະ ນອນຢູ່ໃນຟາງ

For unto Us a Child Is Born [ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ], ໂດຍ ຊາຍມັນ ດູວີ

ວັນທີ 19–25 ເດືອນທັນວາ

ຄຣິດສະມາດ

“ພວກຂ້ານ້ອຍໄດ້ລໍຖ້າພຣະອົງ, ແລະ ພຣະອົງຈະຊ່ວຍກູ້ເອົາພວກຂ້ານ້ອຍໄວ້”

ລະຫວ່າງເທດສະການຄຣິດສະມາດນີ້, ໃຫ້ພິຈາລະນາວິທີທີ່ພຣະຄຳພີເດີມໄດ້ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານເຖິງພຣະເຢຊູຄຣິດຕະຫລອດປີແນວໃດ.

ບັນທຶກຄວາມປະທັບໃຈຂອງທ່ານ

ພຣະຄຳພີເດີມມີວິນຍານແຫ່ງການເປັນພາກສ່ວນທີ່ກະຕືລືລົ້ນ. ໃນທາງນັ້ນ, ມັນກໍເປັນຄືກັນກັບເທດສະການຄຣິດສະມາດເລັກນ້ອຍ. ເລີ່ມຕົ້ນແຕ່ອາດາມ ແລະ ເອວາ, ປິຕຸ, ສາດສະດາ, ນັກກະວີ, ແລະ ຜູ້ຄົນໃນພຣະຄຳພີເດີມໄດ້ລໍຄອຍວັນທີ່ດີກວ່າເກົ່າ, ເຕັມໄປດ້ວຍຄວາມຫວັງສຳລັບການເລີ່ມຕົ້ນໃໝ່ ແລະ ການປົດປ່ອຍໂດຍພຣະເມຊີອາ. ແລະ ຊາວອິດສະຣາເອນກໍຕ້ອງການຄວາມຫວັງນັ້ນເລື້ອຍໆ—ບໍ່ວ່າຈະເປັນຕອນທີ່ພວກເຂົາເປັນຊະເລີຍຢູ່ໃນເອຢິບ ຫລື ບາບີໂລນ ຫລື ຖືກຈ່ອງຈຳໂດຍບາບຂອງຕົນເອງ ຫລື ໂດຍການການກະບົດ. ໂດຍທັງໝົດນີ້, ບັນດາສາດສະດາໄດ້ເຕືອນພວກເຂົາວ່າ ພຣະເມຊີອາ, ພຣະຜູ້ປົດປ່ອຍ, ຈະສະເດັດມາ “ເພື່ອປະກາດການປົດປ່ອຍແກ່ຊະເລີຍເສິກ” (ເອຊາຢາ 61:1).

ຄວາມຫວັງນັ້ນເລີ່ມເກີດເປັນຈິງເມື່ອພຣະເຢຊູຄຣິດໄດ້ມາກຳເນີດໃນເມືອງເບັດເລເຮັມ. ພຣະຜູ້ປົດປ່ອຍທີ່ຍິ່ງໃຫຍ່ຂອງອິດສະຣາເອນໄດ້ກຳເນີດຢູ່ໃນຄອກສັດ ແລະ ຖືກວາງໄວ້ໃນຮາງຫຍ້າ (ເບິ່ງ ລູກາ 2:7). ແຕ່ພຣະອົງບໍ່ພຽງເປັນຜູ້ປົດປ່ອຍຂອງຊາວອິດສະຣາເອນໃນສະໄໝບູຮານເທົ່ານັ້ນ. ພຣະອົງໄດ້ສະເດັດມາເພື່ອປົດປ່ອຍທ່ານ—ເພື່ອຮັບເອົາຄວາມໂສກເສົ້າຂອງທ່ານ, ເພື່ອແບກຫາບຄວາມເສຍໃຈຂອງທ່ານ, ຖືກຂ້ຽນຕີເພື່ອຄວາມຊົ່ວຮ້າຍຂອງທ່ານ, ເພື່ອວ່າດ້ວຍຮອຍໄມ້ແສ້ຂອງພຣະອົງ ທ່ານຈະໄດ້ຮັບການປິ່ນປົວ (ເບິ່ງ ເອຊາຢາ 53:4–5). ນີ້ຄືເຫດຜົນທີ່ບຸນຄຣິດສະມາດເຕັມໄປດ້ວຍການມີພາກສ່ວນທີ່ມີຄວາມສຸກ ແມ່ນແຕ່ໃນທຸກວັນນີ້. ພຣະເມຊີອາໄດ້ສະເດັດມາຫລາຍກວ່າ 2,000 ປີຜ່ານມາແລ້ວ, ແລະ ພຣະອົງຍັງຄົງສືບຕໍ່ເຂົ້າມາໃນຊີວິດຂອງເຮົາ ເມື່ອໃດກໍຕາມທີ່ເຮົາສະແຫວງຫາພຣະອົງ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເຮົາປິຕິຍິນດີໃນພຣະຜູ້ໄຖ່ຂອງເຮົາ.

ຄຣິດສະມາດເປັນທີ່ຮູ້ຈັກກັນວ່າ ເທດສະການທີ່ມີຄວາມສຸກ ເພາະຄວາມສຸກທີ່ພຣະເຢຊູຄຣິດໄດ້ນຳມາສູ່ໂລກ. ແມ່ນແຕ່ຜູ້ຄົນທີ່ບໍ່ນັບຖືພຣະເຢຊູວ່າ ເປັນພຣະບຸດຂອງພຣະເຈົ້າ ກໍສາມາດຮູ້ສຶກເຖິງຄວາມສຸກຂອງບຸນຄຣິດສະມາດສະເໝີ. ໃຫ້ໄຕ່ຕອງຄວາມສຸກທີ່ທ່ານຮູ້ສຶກ ຍ້ອນວ່າພຣະບິດາເທິງສະຫວັນໄດ້ສົ່ງພຣະບຸດຂອງພຣະອົງມາ.

ຫລາຍສັດຕະວັດກ່ອນພຣະຜູ້ຊ່ວຍໃຫ້ລອດໄດ້ມາກຳເນີດ, ບັນດາສາດສະດາໃນພຣະຄຳພີເດີມກໍຮູ້ສຶກເຖິງຄວາມສຸກຄືກັນ ຂະນະທີ່ພວກເພິ່ນກ່າວເຖິງການສະເດັດມາຂອງພຣະເມຊີອາ. ໃຫ້ອ່ານພຣະຄຳພີບາງຂໍ້ດັ່ງຕໍ່ໄປນີ້, ແລະ ຄິດກ່ຽວກັບວ່າເປັນຫຍັງມັນຈຶ່ງມີຄ່າຕໍ່ຜູ້ທີ່ຄອຍຖ້າການປະຕິບັດພາລະກິດຂອງພຣະຜູ້ຊ່ວຍໃຫ້ລອດ: ເພງສັນລະເສີນ 35:9; ເອຊາຢາ 25:8–9; 44:21–24; 51:11; ເຊຟານີຢາ 3:14–20; ໂມເຊ 5:5–11. ເປັນຫຍັງຂໍ້ພຣະຄຳພີເຫລົ່ານີ້ຈຶ່ງມີຄ່າຕໍ່ທ່ານ?

ເບິ່ງ Russell M. Nelson, “Joy and Spiritual Survival,” Ensign ຫລື Liahona, Nov. 2016, 81–84 ນຳອີກ.

ສັນຍາລັກສາມາດຊ່ວຍເຮົາໃຫ້ຈື່ຈຳພຣະເຢຊູຄຣິດ.

ປະເພນີຕ່າງໆທີ່ກ່ຽວຂ້ອງກັບບຸນຄຣິດສະມາດສາມາດມີຄວາມໝາຍທີ່ເປັນສັນຍາລັກ ຊີ້ບອກເຮົາໄປຫາພຣະຄຣິດໄດ້. ເຄື່ອງປະດັບທີ່ເປັນຮູບດາວ ເປັນຕົວແທນໃຫ້ແກ່ດວງດາວທີ່ສ່ອງແສງແຈ້ງໃນຄືນທີ່ພຣະເຢຊູກຳເນີດ (ເບິ່ງ ມັດທາຍ 2:2). ຜູ້ຮ້ອງເພງສາມາດເຕືອນເຮົາເຖິງເຫລົ່າທູດຜູ້ໄດ້ມາປະກົດຕໍ່ຄົນລ້ຽງແກະ (ເບິ່ງ ລູກາ 2:13–14). ຂະນະທີ່ທ່ານສຶກສາພຣະຄຳພີເດີມໃນປີນີ້, ທ່ານອາດສັງເກດເຫັນສັນຍາລັກຫລາຍຢ່າງເຖິງພຣະຜູ້ຊ່ວຍໃຫ້ລອດ. ຈຳນວນໜ້ອຍໜຶ່ງໄດ້ຖືກລະບຸໄວ້ຢູ່ຂ້າງລຸ່ມ. ໃຫ້ຄິດທີ່ຈະສຶກສາຂໍ້ເຫລົ່ານີ້ ແລະ ບັນທຶກສິ່ງທີ່ມັນສິດສອນທ່ານກ່ຽວກັບພຣະອົງໄວ້.

ລູກແກະ (ປະຖົມມະການ 22:8; ອົບພະຍົບ 12:5; 1 ເປໂຕ 1:18–20).

ມານາ (ອົບພະຍົບ 16:4, 12–21, 31; ພຣະບັນຍັດສອງ 8:3; ໂຢຮັນ 6:30–40).

ນ້ຳ (ອົບພະຍົບ 17:1–6; ເຢເຣມີຢາ 2:13; ເອເຊກຽນ 47:1–12; ໂຢຮັນ 4:7–14).

ງູທອງສຳລິດ (ຈົດບັນຊີ 21:4–9; ໂຢຮັນ 3:14–15).

ຫີນ (1 ຊາມູເອນ 2:2; 2 ຊາມູເອນ 22:2–3; ເພງສັນລະເສີນ 118:22–23; ເອຊາຢາ 28:16; ເອເຟໂຊ 2:20).

ກິ່ງ (ເອຊາຢາ 11:1–2; ເຢເຣມີຢາ 23:5; 33:15).

ຄວາມສະຫວ່າງ (ເພງສັນລະເສີນ 27:1; ເອຊາຢາ 9:2; 60:19; ມີກາ 7:8; ໂຢຮັນ 8:12).

ສັນຍາລັກ, ຂໍ້ພຣະຄຳພີ, ແລະ ເລື່ອງລາວອື່ນອີກໃດແດ່ທີ່ທ່ານພົບເຫັນຢູ່ໃນພຣະຄຳພີ ທີ່ເປັນພະຍານເຖິງພຣະເຢຊູຄຣິດ?

ເບິ່ງ 2 ນີໄຟ 11:4; ໂມໄຊຢາ 3:14–15; ໂມເຊ 6:63; “ຮູບແບບ ຫລື ເຄື່ອງໝາຍເຖິງພຣະຄຣິດ,” ໃນ ຄູ່ມືພຣະຄຳພີ, “ພຣະເຢຊູຄຣິດ,” scriptures.ChurchofJesusChrist.org ນຳອີກ.

“ພຣະອົງຈະຊົງນາມວ່າ ອັດສະຈັນ.”

ພຣະເຢຊູຄຣິດຖືກກ່າວເຖິງໃນຫລາຍພຣະນາມ ແລະ ຫລາຍຕຳແໜ່ງ. ຕຳແໜ່ງໃດແດ່ທີ່ທ່ານພົບເຫັນຢູ່ໃນຂໍ້ດັ່ງຕໍ່ໄປນີ້? ເພງສັນລະເສີນ 23:1; 83:18; ເອຊາຢາ 7:14; 9:6; 12:2; 63:16; ອາໂມດ 4:13; ເຊກາຣີຢາ 14:16; ໂມເຊ 7:53. ຕຳແໜ່ງອື່ນໃດແດ່ທີ່ທ່ານຄິດອອກ? ທ່ານອາດມັກຂຽນຕຳແໜ່ງຂອງພຣະເຢຊູຄຣິດທີ່ທ່ານພົບເຫັນຢູ່ໃນເພງຄຣິດສະມາດລົງໄວ້. ແຕ່ລະຕຳແໜ່ງມີອິດທິພົນຕໍ່ວິທີທີ່ທ່ານຄິດກ່ຽວກັບພຣະອົງແນວໃດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ປະເພນີສະຫລອງບຸນຄຣິດສະມາດຊີ້ບອກເຮົາໄປຫາພຣະເຢຊູຄຣິດ.ຄອບຄົວຊາວອິດສະຣາເອນມີປະເພນີ, ດັ່ງເຊັ່ນງານປັດສະຄາ ແລະ ງານລ້ຽງອື່ນໆ, ທີ່ມີເຈດຕະນານຳພາໃຈ ແລະ ຈິດໃຈຂອງພວກເຂົາໄປຫາພຣະຜູ້ເປັນເຈົ້າ (ເບິ່ງ ອົບພະຍົບ 12). ຄອບຄົວຂອງທ່ານມີປະເພນີແນວໃດແດ່ ໃນຊ່ວງບຸນຄຣິດສະມາດ ເພື່ອຊ່ວຍພວກທ່ານໃຫ້ເອົາໃຈໃສ່ຕໍ່ພຣະເຢຊູຄຣິດ? ພວກທ່ານຮູ້ຈັກປະເພນີໃດແດ່ຈາກປະຫວັດຄອບຄົວ? ພວກທ່ານອາດຄິດທີ່ຈະເວົ້າລົມກັນເປັນຄອບຄົວກ່ຽວກັບປະເພນີບາງຢ່າງທີ່ພວກທ່ານຢາກເລີ່ມຕົ້ນເຮັດ. ແນວຄິດບາງຢ່າງອາດລວມທັງການຮັບໃຊ້ຄົນອື່ນທີ່ຂັດສົນ (ສຳລັບແນວຄິດ, ໃຫ້ເບິ່ງ ComeuntoChrist.org/light-the-world), ເຊື້ອເຊີນໝູ່ເພື່ອນໃຫ້ຊົມລາຍການໃຫ້ຄຳດົນໃຈຂອງຝ່າຍປະທານສູງສຸດເນື່ອງໃນໂອກາດເທດສະການຄຣິດສະມາດກັບທ່ານ (broadcasts.ChurchofJesusChrist.org), ແຕ່ງເພງຄຣິດສະມາດເອງ, ຫລື ຊອກຫາວິທີພິເສດເພື່ອແບ່ງປັນຂ່າວສານເຖິງການກຳເນີດຂອງພຣະຄຣິດ.

“The Christ Child: A Nativity Story.”ທ່ານຈະສາມາດຊ່ວຍສະມາຊິກໃນຄອບຄົວໃຫ້ຮູ້ສຶກມີຄວາມຄາລະວະ ແລະ ມີຄວາມສຸກກັບການກຳເນີດຂອງພຣະຄຣິດໄດ້ແນວໃດ? ພວກທ່ານສາມາດເບິ່ງວິດີໂອ “The Christ Child: A Nativity Story” (ChurchofJesusChrist.org) ຫລື ອ່ານ ມັດທາຍ 1:18–25; 2:1–12; ລູກາ 1:26–38; 2:1–20 ນຳອີກ. ສະມາຊິກໃນຄອບຄົວແຕ່ລະຄົນສາມາດເລືອກເອົາຄົນໜຶ່ງຈາກວິດີໂອ ຫລື ຈາກເລື່ອງລາວໃນພຣະຄຳພີ ແລະ ແບ່ງປັນວິທີທີ່ບຸກຄົນນັ້ນຮູ້ສຶກກ່ຽວກັບພຣະຜູ້ຊ່ວຍໃຫ້ລອດແນວໃດ. ສະມາຊິກໃນຄອບຄົວກໍສາມາດແບ່ງປັນຄວາມຮູ້ສຶກຂອງເຂົາເຈົ້າກ່ຽວກັບພຣະອົງນຳອີກ.

ການຊອກຫາພຣະຜູ້ຊ່ວຍໃຫ້ລອດຢູ່ໃນພຣະຄຳພີເດີມ.ຂະນະທີ່ທ່ານກະກຽມທີ່ຈະສຶກສາພຣະຊົນຊີບຂອງພຣະເຢຊູຄຣິດຢູ່ໃນພຣະຄຳພີໃໝ່, ໃຫ້ຄິດທີ່ຈະທົບທວນກັບຄອບຄົວຂອງທ່ານ ເຖິງສິ່ງທີ່ເຂົາເຈົ້າໄດ້ຮຽນຮູ້ກ່ຽວກັບພຣະອົງໃນປີນີ້ ຢູ່ໃນພຣະຄຳພີເດີມ. ທ່ານສາມາດທົບທວນໂຄງຮ່າງຢູ່ໃນແຫລ່ງນີ້ ແລະ ຂໍ້ໝາຍເຫດຈາກການສຶກສາເປັນສ່ວນຕົວໃດໆ ເພື່ອຊ່ວຍທ່ານຈື່ຈຳສິ່ງທີ່ທ່ານໄດ້ຮຽນຮູ້. ລູກຜູ້ນ້ອຍອາດໄດ້ຮັບຜົນປະໂຫຍດຈາກການເບິ່ງປຶ້ມ ເລື່ອງພຣະຄຳພີເດີມ ຫລື ຮູບພາບຢູ່ໃນແຫລ່ງນີ້. ຄຳທຳນາຍ ຫລື ເລື່ອງລາວໃດແດ່ທີ່ເດັ່ນຕໍ່ເຮົາ? ເຮົາໄດ້ຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສິດສອນຂອງເຮົາ

ຮັບຟັງສະມາຊິກໃນຄອບຄົວຂອງທ່ານ. “ການຮັບຟັງເປັນການກະທຳດ້ວຍຄວາມຮັກ. ມັນຮຽກຮ້ອງໃຫ້ເຮົາສົນໃຈກັບສິ່ງທີ່ຢູ່ໃນໃຈຂອງຄົນອື່ນ ຫລາຍກວ່າການສົນໃຈກັບວ່າ ແມ່ນຫຍັງຢູ່ໃນລາຍການ ຫລື ໂຄງຮ່າງຕໍ່ໄປຂອງເຮົາ. … ຂະນະທີ່ທ່ານຕັ້ງໃຈຟັງຂ່າວສານ [ຂອງສະມາຊິກໃນຄອບຄົວ] ທີ່ໄດ້ກ່າວໄປ ຫລື ຍັງບໍ່ໄດ້ກ່າວເທື່ອ, ທ່ານຈະເຂົ້າໃຈຫລາຍຂຶ້ນເຖິງຄວາມຕ້ອງການ, ຄວາມເປັນຫ່ວງ, ແລະ ຄວາມປາດຖະໜາຂອງເຂົາເຈົ້າ. ພຣະວິນຍານຈະຊ່ວຍທ່ານໃຫ້ຮູ້ຈັກວິທີທີ່ຈະສິດສອນເຂົາເຈົ້າ”(Teaching in the Savior’s Way, 34).