“ວັນທີ 5–11 ເດືອນທັນວາ. ຮັກກາຍ; ເຊກາຣີຢາ 1–3; 7–14: ‘ສັກສິດແດ່ພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 5–11 ເດືອນທັນວາ. ຮັກກາຍ; ເຊກາຣີຢາ 1–3; 7–14,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ພຣະວິຫານລາອີເອ ຮາວາຍ
ວັນທີ 5–11 ເດືອນທັນວາ
ຮັກກາຍ; ເຊກາຣີຢາ 1–3; 7–14
“ສັກສິດແດ່ພຣະຜູ້ເປັນເຈົ້າ”
ການອ່ານພຣະຄຳພີເຊື້ອເຊີນການເປີດເຜີຍ. ຈົ່ງເປີດໃຈຕໍ່ຂ່າວສານທີ່ພຣະວິນຍານບໍລິສຸດເປີດເຜີຍຕໍ່ທ່ານ ຂະນະທີ່ທ່ານອ່ານ ຮັກກາຍ ແລະ ເຊກາຣີຢາ.
ບັນທຶກຄວາມປະທັບໃຈຂອງທ່ານ
ຫລັງຈາກຫລາຍທົດສະວັດຂອງການເປັນຊະເລີຍ, ຊາວອິດສະຣາເອນກຸ່ມໜຶ່ງ, ບາງທີລວມທັງສາດສະດາຮັກກາຍ ແລະ ສາດສະດາເຊກາຣີຢາ, ໄດ້ຖືກອະນຸຍາດໃຫ້ກັບໄປນະຄອນເຢຣູຊາເລັມ. ບາງຄົນຢູ່ໃນກຸ່ມນີ້ຍັງຈື່ວ່ານະຄອນເຢຣູຊາເລັມເຄີຍເປັນຈັ່ງໃດ ກ່ອນມັນຖືກທຳລາຍ. ໃຫ້ວາດພາບເບິ່ງຄວາມຮູ້ສຶກຂອງພວກເຂົາ ຂະນະທີ່ພວກເຂົາຫລຽວເບິ່ງເມືອງຮ້າງ ຊຶ່ງຄັ້ງໜຶ່ງເຄີຍເປັນບ້ານເຮືອນຂອງພວກເຂົາ, ເປັນສະຖານທີ່ນະມັດສະການ, ແລະ ເປັນພຣະວິຫານຂອງພວກເຂົາ. ຕໍ່ຜູ້ທີ່ສົງໄສວ່າ ພຣະວິຫານຈະ “ສະຫງ່າງາມຄືພຣະວິຫານຄັ້ງທຳອິດ” ຂອງພຣະຜູ້ເປັນເຈົ້າຫລືບໍ່ (ຮັກກາຍ 2:3), ສາດສະດາຮັກກາຍໄດ້ກ່າວພຣະຄຳຂອງພຣະຜູ້ເປັນເຈົ້າ ທີ່ໃຫ້ກຳລັງໃຈວ່າ: “ຢ່າສູ່ໃຫ້ຜູ້ໃດທໍ້ຖອຍໃຈ, ພຣະຜູ້ເປັນເຈົ້າໄດ້ກ່າວ, ແລະ ຈົ່ງເຮັດວຽກ: ເພາະເຮົາຈະຢູ່ກັບພວກເຈົ້າ, … ຢ່າສູ່ຢ້ານ.” “ມັນຈະສະຫງ່າງາມ, … ແລະ ເຮົາຈະໃຫ້ສະຖານທີ່ແຫ່ງນີ້ມີສັນຕິສຸກ.” (ຮັກກາຍ 2:4–5, 7, 9.)
ບໍ່ແມ່ນພຽງແຕ່ພຣະວິຫານສັກສິດເທົ່ານັ້ນທີ່ຕ້ອງໄດ້ສ້າງຂຶ້ນໃໝ່. ໃນຫລາຍວິທີທາງ, ຜູ້ຄົນຂອງພຣະເຈົ້າກໍຖືກທຳລາຍທາງວິນຍານຄືກັນ. ແລະ ການສ້າງຜູ້ຄົນໃຫ້ບໍລິສຸດຄືນໃໝ່ ຕ້ອງເຮັດຫລາຍກວ່າການຕັດກ້ອນຫີນ ແລະ ລຽນມັນໃສ່ກັນເພື່ອສ້າງຝາພຣະວິຫານເທົ່ານັ້ນ. ໃນປະຈຸບັນ, ພຣະວິຫານມີຄຳນີ້ສະຫລັກໄວ້ “ສັກສິດແດ່ພຣະຜູ້ເປັນເຈົ້າ,” ແລະ ຄຳນີ້ບໍ່ພຽງແຕ່ກ່ຽວຂ້ອງກັບການສ້າງພຣະວິຫານເທົ່ານັ້ນ ແຕ່ກ່ຽວຂ້ອງກັບວິຖີຊີວິດນຳອີກ. ຄຳນີ້ທີ່ຖືກສະຫລັກໄວ້ກັບ “ໝາກກະດິງທີ່ມັດຄໍມ້າ” ແລະ “ໝໍ້ຄົວກິນທຸກໜ່ວຍໃນເຢຣູຊາເລັມ” (ເຊກາຣີຢາ 14:20–21) ຈະເປັນປະໂຫຍດກໍຕໍ່ເມື່ອຖ້າຫາກມັນຖືກສະຫລັກໄວ້ໃນທຸກຫົວໃຈນຳອີກ. ຄວາມບໍລິສຸດແທ້ໆຮຽກຮ້ອງເຮົາໃຫ້ “ເອົາໃຈໃສ່” ຕໍ່ພຣະຄຳ ແລະ ກົດຂອງພຣະຜູ້ເປັນເຈົ້າ (ເຊກາຣີຢາ 1:6), ອະນຸຍາດໃຫ້ອຳນາດຂອງພຣະອົງປ່ຽນທຳມະຊາດຂອງເຮົາ ເພື່ອວ່າເຮົາຈະກັບກາຍບໍລິສຸດຄືກັນກັບພຣະອົງ (ເບິ່ງ ລະບຽບພວກເລວີ 19:2).
ສຳລັບພາບລວມຂອງພຣະທຳຮັກກາຍ ແລະ ເຊກາຣີຢາ, ໃຫ້ເບິ່ງ “Haggai” ແລະ “Zechariah” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
“ພິຈາລະນາທິດທາງຂອງທ່ານ.”
ມີຫລາຍສິ່ງທີ່ສຳຄັນທີ່ຈະເຮັດ ເພື່ອສ້າງສານະຄອນເຢຣູຊາເລັມ. ແຕ່ຫລັງຈາກ 15 ປີປາຍ ນັບແຕ່ຊາວອິດສະຣາເອນໄດ້ກັບຄືນມາ, ພຣະຜູ້ເປັນເຈົ້າບໍ່ພໍພຣະໄທທີ່ເຫັນວ່າ ການສ້າງພຣະວິຫານບໍ່ມີຄວາມສຳຄັນອັນດັບສູງ (ເບິ່ງ ຮັກກາຍ 1:2–5; ເບິ່ງ ເອຊະຣາ 4:24 ນຳອີກ). ຂະນະທີ່ທ່ານອ່ານ ຮັກກາຍ 1; 2:1–9, ໃຫ້ພິຈາລະນາຄຳຖາມດັ່ງເຊັ່ນ: ຜົນສະທ້ອນຢ່າງໃດແດ່ທີ່ຊາວອິດສະຣາເອນປະເຊີນ ຍ້ອນວ່າພວກເຂົາບໍ່ໄດ້ສຳເລັດການສ້າງພຣະວິຫານ? ພອນຢ່າງໃດແດ່ທີ່ພຣະຜູ້ເປັນເຈົ້າໄດສັນຍາກັບພວກເຂົາ ຖ້າຫາກພວກເຂົາສຳເລັດການສ້າງບ້ານຂອງພຣະອົງ? ທ່ານອາດໃຊ້ໂອກາດນີ້ເພື່ອ “ພິຈາລະນາທິດທາງຂອງທ່ານ”—ເພື່ອຄິດກ່ຽວກັບສິ່ງທີ່ມີຄວາມສຳຄັນຫລາຍຕໍ່ທ່ານ ແລະ ວິທີທີ່ທ່ານສາມາດເຮັດໃຫ້ມັນສອດຄ່ອງກັບສິ່ງທີ່ມີຄວາມສຳຄັນຫລາຍຕໍ່ພຣະຜູ້ເປັນເຈົ້າ.
ເບິ່ງ ຄຳສອນ ແລະ ພັນທະສັນຍາ 95; Terence M. Vinson, “True Disciples of the Savior,” Ensign ຫລື Liahona, Nov. 2019, 9–11.
ພຣະຜູ້ເປັນເຈົ້າສາມາດເຮັດໃຫ້ເຮົາບໍລິສຸດ.
ຊິດສະເຕີ ແຄໂຣ ແອັຟ ມັກຄອງກີ ໄດ້ສິດສອນວ່າ: “ຄວາມບໍລິສຸດຄືການເລືອກທີ່ຈະຮັກສາພຣະວິນຍານບໍລິສຸດໄວ້ເປັນຜູ້ນຳພາ. ຄວາມບໍລິສຸດຄືການບໍ່ໂນ່ມອຽງຕາມທຳມະຊາດ ແລະ ກາຍເປັນໄພ່ພົນຂອງພຣະເຈົ້າ ຜ່ານທາງການຊົດໃຊ້ຂອງອົງພຣະຄຣິດ’ [ໂມໄຊຢາ 3:19]. … ຄວາມຫວັງຂອງເຮົາສຳລັບຄວາມບໍລິສຸດ ຄືການຈົດຈໍ່ຢູ່ທີ່ພຣະຄຣິດ, ໃນຄວາມເມດຕາ ແລະ ໃນພຣະຄຸນຂອງພຣະອົງ” (“The Beauty of Holiness,” Ensign ຫລື Liahona, May 2017, 9–10). ໃຫ້ເກັບຄຳສອນນີ້ໄວ້ໃນໃຈ ຂະນະທີ່ທ່ານອ່ານພຣະຄຳຂອງພຣະຜູ້ເປັນເຈົ້າ, ຊຶ່ງມອບໃຫ້ຜ່ານທາງສາດສະດາເຊກາຣີຢາ, ຊຸກຍູ້ຊາວອິດສະຣາເອນໃຫ້ກາຍເປັນຜູ້ຄົນບໍລິສຸດຫລາຍກວ່າເກົ່າ: ເຊກາຣີຢາ 1:1–6; 3:1–7; 7:8–10; 8:16–17. ໃຫ້ສັງເກດເບິ່ງສິ່ງທີ່ພຣະຜູ້ເປັນເຈົ້າໄດ້ຂໍໃຫ້ຊາວອິດສະຣາເອນເຮັດ ເພື່ອວ່າພຣະອົງຈະສາມາດເຮັດໃຫ້ພວກເຂົາບໍລິສຸດ. ພຣະອົງກຳລັງຊ່ວຍທ່ານໃຫ້ກາຍເປັນຄົນບໍລິສຸດຫລາຍກວ່າເກົ່າແນວໃດ?
ເຊກາຣີຢາ 2:10–11; 8:1–8; 14:9–11, 20–21 ບັນຍາຍວ່າ ຊີວິດຈະເປັນແບບໃດໃນອະນາຄົດ ເມື່ອເຮົາທຸກຄົນອາໄສຢູ່ກັບພຣະຜູ້ເປັນເຈົ້າ ໃນສະພາບທີ່ບໍລິສຸດ. ການບັນຍາຍເຫລົ່ານີ້ມີຄວາມໝາຍແນວໃດຕໍ່ຜູ້ທີ່ໄດ້ສ້າງນະຄອນເຢຣູຊາເລັມ ໃນວັນເວລາຂອງເຊກາຣີຢາ? ມັນມີຄວາມໝາຍແນວໃດຕໍ່ທ່ານ?
“ຈົ່ງເບິ່ງດູວ່າກະສັດຂອງພວກເຈົ້າກຳລັງມາ: ເພິ່ນມາຢ່າງຜູ້ມີໄຊ ແລະ ຢ່າງຜູ້ຍຸດຕິທຳດ້ວຍ ແຕ່ພັດຖ່ອມຕົວລົງມານັ່ງທີ່ເທິງຫລັງລໍ” (ເຊກາຣີຢາ 9:9). Triumphal Entry [ການເດີນເຂົ້ານະຄອນຢ່າງຜູ້ມີໄຊ], ໂດຍ ແຮຣີ ແອນເດີສັນ
ເຊກາຣີຢາ 9:9–11; 11:12–13; 12:10; 13:6–7; 14:1–9
ພຣະເຢຊູຄຣິດຄືພຣະເມຊີອາທີ່ສັນຍາໄວ້.
ການຂຽນຫລາຍຢ່າງຂອງເຊກາຣີຢາຊີ້ໄປຫາການປະຕິບັດສາດສະໜາກິດຂອງພຣະເຢຊູຄຣິດ ແລະ ໃນທີ່ສຸດ ການສະເດັດມາຄັ້ງທີສອງຂອງພຣະອົງນຳອີກ. ໃຫ້ປຽບທຽບຄຳທຳນາຍດັ່ງຕໍ່ໄປນີ້ ຈາກເຊກາຣີຢາ ກັບຂໍ້ພຣະຄຳພີຈາກພຣະທຳເຫລັ້ມອື່ນໆ ໃນພຣະຄຳພີ:
-
ເຊກາຣີຢາ 11:12–13 (ເບິ່ງ ມັດທາຍ 26:14–16; 27:1–7)
-
ເຊກາຣີຢາ 12:10 (ເບິ່ງ ໂຢຮັນ 19:37; ພຣະນິມິດ 1:7)
-
ເຊກາຣີຢາ 13:6–7; 14:1–9 (ເບິ່ງ ມັດທາຍ 26:31; ຄຳສອນ ແລະ ພັນທະສັນຍາ 45:47–53)
ທ່ານຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດຂະນະທີ່ທ່ານສຶກສາຂໍ້ພຣະຄຳພີເຫລົ່ານີ້? ເປັນຫຍັງມັນຈຶ່ງສຳຄັນທີ່ທ່ານເຂົ້າໃຈຂໍ້ພຣະຄຳພີເຫລົ່ານີ້?
ເບິ່ງ ຄູ່ມືພຣະຄຳພີ, “ພຣະເມຊີອາ” (scriptures.ChurchofJesusChrist.org ນຳອີກ).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຮັກກາຍ 1:2–7.ຂໍ້ເຫລົ່ານີ້ອາດກະຕຸ້ນຄອບຄົວຂອງທ່ານໃຫ້ “ພິຈາລະນາທິດທາງຂອງທ່ານ.” ບາງທີສະມາຊິກໃນຄອບຄົວສາມາດສະແດງຕາມວະລີຢູ່ໃນ ຂໍ້ທີ 6. ຂໍ້ນີ້ສິດສອນຫຍັງແດ່ກ່ຽວກັບການນັບຖືຄຸນຄ່າສິ່ງທີ່ເປັນຂອງໂລກແທນຄຸນຄ່າສິ່ງທີ່ເປັນຂອງພຣະເຈົ້າ? ພວກທ່ານອາດຢາກປຶກສານຳກັນກ່ຽວກັບສິ່ງທີ່ສຳຄັນຫລາຍທີ່ສຸດສຳລັບຄອບຄົວທ່ານ. ການຮ້ອງເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດຊ່ວຍຄອບຄົວຂອງທ່ານໃຫ້ປະເມີນເບິ່ງສິ່ງທີ່ພວກທ່ານກຳລັງເຮັດໄດ້ດີ ແລະ ຈຸດທີ່ພວກທ່ານສາມາດປັບປຸງໃຫ້ດີຂຶ້ນ.
-
ຮັກກາຍ 2:1–9.ເພື່ອແນະນຳຂໍ້ເຫລົ່ານີ້, ທ່ານສາມາດແບ່ງປັນເລື່ອງເລົ່າກ່ຽວກັບພຣະວິຫານໂພຣໂວ ຊີທີ ເຊັນເທີ, ຊຶ່ງໄດ້ຖືກສ້າງຂຶ້ນໃໝ່ຈາກຕຶກແທັບເບີແນັກໂກທີ່ແສນຮັກ ທີ່ຖືກໄຟໄໝ້ (ເບິ່ງ ວິດີໂອ “Provo City Center Temple Completed,” ChurchofJesusChrist.org). ຂະນະທີ່ຄອບຄົວຂອງທ່ານອ່ານ ຮັກກາຍ 2:1–9, ທ່ານອາດຢາກຂໍໃຫ້ສະມາຊິກໃນຄອບຄົວຄິດເຖິງບາງສິ່ງໃນຊີວິດຂອງເຮົາທີ່ອາດເປັນຄືກັນກັບວຽກງານການສ້າງພຣະວິຫານທີ່ໄດ້ຖືກທຳລາຍຂຶ້ນໃໝ່. ພຣະຜູ້ເປັນເຈົ້າສ້າງເຮົາຄືນໃໝ່ຫລັງຈາກເລື່ອງໂສກເສົ້າ ຫລື ຄວາມຍາກລຳບາກແນວໃດ?
-
ເຊກາຣີຢາ 3:1–7.ຂະນະທີ່ທ່ານອ່ານຂໍ້ເຫລົ່ານີ້, ທ່ານສາມາດສະແດງເຄື່ອງນຸ່ງທີ່ເປື້ອນເປິໃຫ້ຄອບຄົວຂອງທ່ານເບິ່ງ. ໂຢຊວຍຄົງຮູ້ສຶກແນວໃດເມື່ອເພິ່ນຢືນຢູ່ຕໍ່ໜ້າທູດ ດ້ວຍເຄື່ອງນຸ່ງທີ່ເປື້ອນເປິ? ບາບເປັນຄືກັນກັບເຄື່ອງນຸ່ງທີ່ເປື້ອນເປິແນວໃດ? ເຊກາຣີຢາ 3:1–7 ສິດສອນເຮົາຫຍັງແດ່ກ່ຽວກັບການໃຫ້ອະໄພ? ພວກທ່ານສາມາດຊັກເຄື່ອງນຳກັນ ແລະ ເວົ້າລົມກັນກ່ຽວກັບອຳນາດແຫ່ງການຊຳລະລ້າງຂອງການຊົດໃຊ້ຂອງພຣະຜູ້ຊ່ວຍໃຫ້ລອດ.
-
ເຊກາຣີຢາ 8:1–8.ແມ່ນຫຍັງທີ່ປະທັບໃຈເຮົາກ່ຽວກັບພາບນິມິດຂອງເຊກາຣີຢາເຖິງອະນາຄົດຂອງນະຄອນເຢຣູຊາເລັມ? ເຮົາເຫັນຫຍັງແດ່ທີ່ເຮົາຢາກເຫັນຢູ່ໃນຊຸມຊົນຂອງເຮົາ? ເຮົາຈະສາມາດເຊື້ອເຊີນພຣະຜູ້ຊ່ວຍໃຫ້ລອດໃຫ້ມາ “ສະຖິດຢູ່ໃນທ່າມກາງ [ເຮົາ]” ໄດ້ແນວໃດ? (ເບິ່ງ Gary E. Stevenson, “Sacred Homes, Sacred Temples,” Ensign ຫລື Liahona, May 2009, 101–3).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສຶກສາສ່ວນຕົວ
ຫາໂອກາດເພື່ອປະເມີນຕົວເອງ. ຂະນະທີ່ທ່ານສຶກສາພຣະຄຳພີ, ທ່ານຈະໄດ້ຮັບການດົນໃຈເລື້ອຍໆເພື່ອໃຫ້ໄຕ່ຕອງຄຳສັນຍາຂອງທ່ານເອງຕໍ່ພຣະບິດາເທິງສະຫວັນ ແລະ ພຣະເຢຊູຄຣິດ. ເຮັດຕາມຄວາມປະທັບໃຈທີ່ທ່ານໄດ້ຮັບ.