“ວັນທີ 12–18 ເດືອນທັນວາ. ມາລາກີ: ‘ພຣະຜູ້ເປັນເຈົ້າໄດ້ກ່າວວ່າ ເຮົາຮັກພວກເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 12–18 ເດືອນທັນວາ. ມາລາກີ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ວັນທີ 12–18 ເດືອນທັນວາ
ມາລາກີ
“ພຣະຜູ້ເປັນເຈົ້າໄດ້ກ່າວວ່າ ເຮົາຮັກພວກເຈົ້າ”
ຊື່ ມາລາກີ ໝາຍເຖິງ “ຜູ້ສົ່ງຂ່າວຂອງເຮົາ” (Bible Dictionary, “Malachi”). ຂະນະທີ່ທ່ານສຶກສາຂ່າວສານຂອງມາລາກີກ່ຽວກັບຊາວອິດສະຣາເອນ, ຂ່າວສານໃດແດ່ທີ່ທ່ານພົບເຫັນສຳລັບຊີວິດຂອງທ່ານ? ຖ້ອຍຄຳຂອງມາລາກີກ່ຽວຂ້ອງກັບວັນເວລາຂອງທ່ານແນວໃດ?
ບັນທຶກຄວາມປະທັບໃຈຂອງທ່ານ
“ເຮົາຮັກພວກເຈົ້າ,” ພຣະຜູ້ເປັນເຈົ້າໄດ້ບອກຜູ້ຄົນຂອງພຣະອົງຜ່ານທາງສາດສະດາມາລາກີ. ແຕ່ຊາວອິດສະຣາເອນ, ຜູ້ໄດ້ທົນກັບຄວາມທຸກຍາກລຳບາກ ແລະ ການເປັນຊະເລີຍເປັນເວລາຫລາຍລຸ້ນຄົນ, ໄດ້ຖາມພຣະຜູ້ເປັນເຈົ້າວ່າ, “ພຣະອົງໄດ້ສະແດງຄວາມຮັກຂອງພຣະອົງຕໍ່ພວກຂ້ານ້ອຍຢ່າງໃດ?” (ມາລາກີ 1:2). ຫລັງຈາກທຸກສິ່ງທີ່ຊາວອິດສະຣາເອນໄດ້ປະເຊີນ, ພວກເຂົາອາດສົງໄສຖ້າຫາກວ່າປະຫວັດສາດຂອງຊາວອິດສະຣາເອນໃນສະໄໝບູຮານ ເປັນເລື່ອງລາວເຖິງຄວາມຮັກຂອງພຣະເຈົ້າຕໍ່ຜູ້ຄົນແຫ່ງພັນທະສັນຍາຂອງພຣະອົງແທ້ໆຫລືບໍ່.
ຂະນະທີ່ທ່ານສະທ້ອນຄິດກ່ຽວກັບສິ່ງທີ່ທ່ານໄດ້ອ່ານຢູ່ໃນພຣະຄຳພີເດີມໃນປີນີ້, ມີຫລັກຖານຢ່າງໃດແດ່ທີ່ທ່ານພົບເຫັນເຖິງຄວາມຮັກຂອງພຣະເຈົ້າ? ມັນງ່າຍທີ່ຈະເຫັນຫລາຍຕົວຢ່າງເຖິງຄວາມອ່ອນແອ ແລະ ການກະບົດຂອງມະນຸດ. ແຕ່ເຖິງແມ່ນທັງໝົດນັ້ນ, ພຣະເຈົ້າກໍບໍ່ເຄີຍຢຸດເອື້ອມອອກມາດ້ວຍຄວາມຮັກ. ເມື່ອພວກລູກຊາຍຂອງຢາໂຄບໄດ້ປະພຶດບໍ່ດີຕໍ່ໂຢເຊັບ ນ້ອງຊາຍຂອງພວກເຂົາ, ພຣະຜູ້ເປັນເຈົ້າຍັງໄດ້ຕຽມທາງໄວ້ເພື່ອຊ່ວຍໂຜດຊີວິດຂອງພວກເຂົາຈາກຄວາມອຶດຢາກ (ເບິ່ງ ປະຖົມມະການ 45:4–8). ເມື່ອຊາວອິດສະຣາເອນເວົ້າຈົ່ມຢູ່ໃນຖິ່ນແຫ້ງແລ້ງກັນດານ, ພຣະເຈົ້າຍັງໄດ້ລ້ຽງດູພວກເຂົາດ້ວຍມານາ (ເບິ່ງ ອົບພະຍົບ 16:1–4). ແມ່ນແຕ່ເມື່ອຊາວອິດສະຣາເອນໄດ້ປະຖິ້ມພຣະອົງໄປ, ໄດ້ຫັນໄປຫາພະອື່ນ, ແລະ ໄດ້ກະຈັດກະຈາຍໄປ, ພຣະເຈົ້າກໍບໍ່ເຄີຍປະຖິ້ມພວກເຂົາ ແຕ່ໄດ້ສັນຍາວ່າຖ້າຫາກພວກເຂົາກັບໃຈ, ພຣະອົງຈະເຕົ້າໂຮມ ແລະ ໄຖ່ພວກເຂົາ “ດ້ວຍຄວາມເມດຕາອັນຍິ່ງໃຫຍ່” (ເບິ່ງ ເອຊາຢາ 54:7).
ເມື່ອເບິ່ງໃນທາງນີ້, ພຣະຄຳພີເດີມເປັນເລື່ອງລາວເຖິງຄວາມອົດທົນ, ຄວາມຮັກທີ່ອົດກັ້ນຂອງພຣະເຈົ້າ. ແລະ ເລື່ອງນີ້ກໍສືບຕໍ່ໃນປະຈຸບັນ. “ດັ່ງດວງຕາເວັນຂຶ້ນ [ຈະ] ນຳເອົາການປິ່ນປົວມາສູ່ພວກເຂົາ,” ມາລາກີໄດ້ທຳນາຍ (ມາລາກີ 4:2). ພຣະເຢຊູຄຣິດໄດ້ສະເດັດມາ, ໄດ້ນຳການປິ່ນປົວທາງຮ່າງກາຍ ແລະ ທາງວິນຍານມາໃຫ້ທຸກຄົນຜູ້ທີ່ມາຫາພຣະອົງ. ພຣະອົງເປັນຫລັກຖານທີ່ຍິ່ງໃຫຍ່ທີ່ສຸດເຖິງຄວາມຮັກຂອງພຣະເຈົ້າຕໍ່ຊາວອິດສະຣາເອນໃນສະໄໝບູຮານ ແລະ ຕໍ່ເຮົາທຸກຄົນ.
ສຳລັບພາບລວມຂອງພຣະທຳມາລາກີ, ໃຫ້ເບິ່ງ “Malachi” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
“ຈົ່ງກັບຄືນມາຫາເຮົາເຖີດ, ແລະ ເຮົາຈະກັບຄືນໄປຫາພວກເຈົ້າ.”
ໃນວັນເວລາຂອງມາລາກີ, ຊາວອິດສະຣາເອນໄດ້ສ້າງພຣະວິຫານໃນນະຄອນເຢຣູຊາເລັມຂຶ້ນໃໝ່ແລ້ວ, ແຕ່ສ່ວນຜູ້ຄົນ ພວກເຂົາຍັງຕ້ອງໄດ້ສ້າງຄວາມສຳພັນຂອງພວກເຂົາກັບພຣະຜູ້ເປັນເຈົ້າຄືນໃໝ່ຢູ່. ຂະນະທີ່ທ່ານສຶກສາມາລາກີ, ໃຫ້ຊອກຫາຄຳຖາມທີ່ພຣະຜູ້ເປັນເຈົ້າຖາມຊາວອິດສະຣາເອນ ຫລື ຄຳຖາມທີ່ພວກເຂົາໄດ້ຖາມພຣະອົງ. ໃຫ້ພິຈາລະນາທີ່ຈະຖາມຕົວເອງກັບຄຳຖາມທີ່ຄ້າຍຄືກັນນັ້ນ (ບາງຕົວຢ່າງມີລະບຸໄວ້ຢູ່ຂ້າງລຸ່ມ) ເພື່ອຊ່ວຍທ່ານປະເມີນຄວາມສຳພັນຂອງທ່ານກັບພຣະຜູ້ເປັນເຈົ້າ ແລະ ເຂົ້າໃກ້ຊິດພຣະອົງຫລາຍຂຶ້ນ.
-
ເຮົາຮູ້ສຶກແນວໃດເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ເຮົາ? (ເບິ່ງ ມາລາກີ 1:2).
-
ການຖວາຍຂອງເຮົາຕໍ່ພຣະຜູ້ເປັນເຈົ້າເປັນການໃຫ້ກຽດແກ່ພຣະອົງແທ້ໆບໍ? (ເບິ່ງ ມາລາກີ 1:6–11).
-
ໃນທາງໃດແດ່ທີ່ເຮົາຕ້ອງໄດ້ “ກັບຄືນ” ມາຫາພຣະຜູ້ເປັນເຈົ້າ? (ເບິ່ງ ມາລາກີ 3:7).
-
ເຮົາໄດ້ຂະໂມຍຈາກພຣະເຈົ້າໃນທາງໃດແດ່? (ເບິ່ງ ມາລາກີ 3:8–11).
-
ອະຄະຕິຂອງເຮົາໃນຊ່ວງທີ່ເຮົາມີຄວາມຫຍຸ້ງຍາກສະທ້ອນເຖິງຄວາມຮູ້ສຶກຂອງເຮົາຕໍ່ພຣະຜູ້ເປັນເຈົ້າແນວໃດ? (ເບິ່ງ ມາລາກີ 3:13–15; ເບິ່ງ 2:17 ນຳອີກ).
ເບິ່ງ D.Todd Christofferson, “As Many as I Love, I Rebuke and Chasten,” Liahona, May 2011, 97–100 ນຳອີກ.
ພຣະຜູ້ເປັນເຈົ້າຂໍໃຫ້ “ຖວາຍເຄື່ອງບູຊາທີ່ເຮົາຍອມຮັບ.”
ພຣະຄຳຂອງພຣະຜູ້ເປັນເຈົ້າໃນ ມາລາກີ 1 ລະບຸວ່າ ພວກປະໂລຫິດຊາວອິດສະຣາເອນໄດ້ນຳສັດທີ່ດ່າງພ້ອຍ ແລະ ເປັນພະຍາດມາຖວາຍເປັນເຄື່ອງບູຊາໃນພຣະວິຫານ, ຊຶ່ງພຣະຜູ້ເປັນເຈົ້າໄດ້ສັ່ງຫ້າມ (ເບິ່ງ ລະບຽບພວກເລວີ 22:17–25). ການຖວາຍເຫລົ່ານີ້ແນະນຳຫຍັງແດ່ກ່ຽວກັບຄວາມຮູ້ສຶກຂອງພວກປະໂລຫິດຕໍ່ພຣະຜູ້ເປັນເຈົ້າ? (ເບິ່ງ ມາລາກີ 1:13). ເປັນຫຍັງພຣະຜູ້ເປັນເຈົ້າຈຶ່ງຂໍໃຫ້ເຮົາຖວາຍເຄື່ອງບູຊາທີ່ດີທີ່ສຸດຂອງເຮົາໃຫ້ພຣະອົງ? ໃຫ້ຄິດກ່ຽວກັບການເສຍສະລະທີ່ພຣະຜູ້ເປັນເຈົ້າໄດ້ຂໍໃຫ້ທ່ານມອບໃຫ້. ທ່ານສາມາດເຮັດຫຍັງໄດ້ແດ່ເພື່ອ “ຖວາຍເຄື່ອງບູຊາທີ່ເຮົາຍອມຮັບ” ໃຫ້ແກ່ພຣະອົງ? (ມາລາກີ 1:11; ເບິ່ງ 3:3 ນຳອີກ).
ເບິ່ງ ໂມໂຣໄນ 7:5–14 ນຳອີກ.
ຄຳທຳນາຍຂອງມາລາກີກຳລັງເກີດເປັນຈິງໃນຍຸກສຸດທ້າຍ.
ເມື່ອພຣະຜູ້ຊ່ວຍໃຫ້ລອດໄດ້ໄປຢ້ຽມຢາມອາເມຣິກາ, ພຣະອົງໄດ້ອ້າງເຖິງ ມາລາກີ 3–4 ກັບຊາວນີໄຟ (ເບິ່ງ 3 ນີໄຟ 24–25). ໃນປີ 1823, ທູດໂມໂຣໄນໄດ້ແບ່ງປັນບາງຢ່າງຈາກບົດເຫລົ່ານັ້ນຄືກັນກັບໂຈເຊັບ ສະມິດ (ເບິ່ງ ໂຈເຊັບ ສະມິດ—ປະຫວັດ 1:36–39; ເບິ່ງ ຄຳສອນ ແລະ ພັນທະສັນຍາ 2 ນຳອີກ). ທ່ານຄິດວ່າເປັນຫຍັງຖ້ອຍຄຳຂອງມາລາກີຈຶ່ງຖືກກ່າວຊ້ຳເລື້ອຍໆຢູ່ໃນພຣະຄຳພີ? (ເບິ່ງ ຄຳສອນ ແລະ ພັນທະສັນຍາ 27:9; 110:13–16; 128:17–18 ນຳອີກ). ໃນຄວາມຄິດຄວາມເຫັນຂອງທ່ານ, ຂ່າວສານຢ່າງໃດແດ່ຈາກ ມາລາກີ 3–4 ເບິ່ງຄືສຳຄັນຕໍ່ວັນເວລາຂອງເຮົາໂດຍສະເພາະ?
ເມື່ອໂມໂຣໄນອ້າງເຖິງ ມາລາກີ 4:5–6 ກັບໂຈເຊັບ ສະມິດ, ເພິ່ນໄດ້ກ່າວ “ຜິດພ້ຽນໄປຈາກທີ່ມີ” ຢູ່ໃນພຣະຄຣິສຕະທຳຄຳພີຂອງພວກເຮົາໜ້ອຍໜຶ່ງ (ໂຈເຊັບ ສະມິດ—ປະຫວັດ 1:36). ຖ້ອຍຄຳທີ່ແຕກຕ່າງຂອງໂມໂຣໄນໄດ້ຊ່ວຍໃຫ້ເຮົາເຂົ້າໃຈຫລາຍຂຶ້ນແນວໃດກ່ຽວກັບຄຳທຳນາຍຂໍ້ນີ້? ເພື່ອຮຽນຮູ້ຕື່ມອີກກ່ຽວກັບການມາຂອງເອລີຢາ, ແລະ ວິທີທີ່ຄຳທຳນາຍຂໍ້ນີ້ກຳລັງເກີດເປັນຈິງໃນປະຈຸບັນ, ໃຫ້ເບິ່ງ ຄຳສອນ ແລະ ພັນທະສັນຍາ 110:13–16 ແລະ ຂ່າວສານຂອງແອວເດີ ເດວິດ ເອ ແບ໊ດນາ “The Hearts of the Children Shall Turn” (Liahona, Nov. 2011, 24–27). ເປັນຫຍັງທ່ານຈຶ່ງມີຄວາມກະຕັນຍູທີ່ເອລີຢາໄດ້ມາ?
ຮູບພາບເອລີຢາມາປະກົດຕໍ່ໂຈເຊັບ ສະມິດ ແລະ ອໍລີເວີ ຄາວເດີຣີ ໃນພຣະວິຫານເຄີດແລນ, ໂດຍ ຣໍເບີດ ທີ ແບແຣັດ
ການຈ່າຍເງິນສ່ວນສິບໄດ້ເປີດປະຕູສະຫວັນ.
ຂະນະທີ່ທ່ານອ່ານ ມາລາກີ 3:8–12, ໃຫ້ຄິດກ່ຽວກັບປະສົບການຂອງທ່ານເອງກັບການຈ່າຍເງິນສ່ວນສິບ. ວະລີທີ່ວ່າ “ໄຂປະຕູສະຫວັນ” (ຂໍ້ທີ 10) ມີຄວາມໝາຍຕໍ່ທ່ານແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ມາລາກີ 1:2.ຄອບຄົວຂອງທ່ານຈະຕອບຄຳຖາມຢູ່ໃນ ມາລາກີ 1:2—ແນວໃດ ທີ່ວ່າ “[ພຣະຜູ້ເປັນເຈົ້າ] ໄດ້ສະແດງຄວາມຮັກຂອງພຣະອົງຕໍ່ພວກຂ້ານ້ອຍຢ່າງໃດ?” ມີຫລັກຖານຢ່າງໃດແດ່ເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ທ່ານ?
-
ມາລາກີ 3:8–12.ຂະນະທີ່ທ່ານອ່ານ ມາລາກີ 3:8–12, ໃຫ້ເຊື້ອເຊີນສະມາຊິກໃນຄອບຄົວຂອງທ່ານໃຫ້ແບ່ງປັນຄວາມຄິດ ຫລື ຄວາມຮູ້ສຶກຂອງເຂົາເຈົ້າກ່ຽວກັບເງິນສ່ວນສິບ. ພອນຝ່າຍໂລກ ແລະ ຝ່າຍວິນຍານຢ່າງໃດແດ່ທີ່ເຮົາໄດ້ເຫັນຈາກການຈ່າຍເງິນສ່ວນສິບ? (ເບິ່ງ David A. Bednar, “The Windows of Heaven,” Liahona, Nov. 2013, 17–20). ສະມາຊິກໃນຄອບຄົວອາດມັກແຕ້ມຮູບທີ່ເປັນຕົວແທນໃຫ້ແກ່ພອນເຫລົ່ານີ້ ແລະ ໃຫ້ແຂວນຮູບເຫລົ່ານີ້ໄວ້ທີ່ປ່ອງຢ້ຽມ.
-
ມາລາກີ 3:13–18.ການທີ່ເຮົາເປັນຂອງພຣະຜູ້ເປັນເຈົ້າ ແລະ ການເປັນໜຶ່ງໃນ “ກຳມະສິດ” ຂອງພຣະອົງມີຄວາມໝາຍແນວໃດຕໍ່ເຮົາ?
-
ມາລາກີ 4:5–6.ຫລັງຈາກການອ່ານຂໍ້ເຫລົ່ານີ້ແລ້ວ, ຄອບຄົວຂອງທ່ານສາມາດຊີ້ບອກຄຳຕອບຕໍ່ຄຳຖາມດັ່ງຕໍ່ໄປນີ້ ກ່ຽວກັບຄຳທຳນາຍຂອງມາລາກີ: ໃຜ? ແມ່ນຫຍັງ? ເມື່ອໃດ? ຢູ່ໃສ? ເປັນຫຍັງ? (ເບິ່ງ ຄຳສອນ ແລະ ພັນທະສັນຍາ 2 ນຳອີກ).
ເຮົາຈະຫັນຫົວໃຈມາຫາບັນພະບຸລຸດຂອງເຮົາໄດ້ແນວໃດ? ເຮົາຈະໄດ້ຮັບພອນແນວໃດເມື່ອເຮົາເຮັດ? ພວກທ່ານອາດໄຕ່ຕອງຄຳຖາມເຫລົ່ານີ້ຂະນະທີ່ເບິ່ງວິດີໂອ “The Promised Blessings of Family History” (ChurchofJesusChrist.org). ເຮົາຈະເຮັດຫຍັງເປັນຄອບຄົວເພື່ອຮັບເອົາພອນເຫລົ່ານີ້?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.
ການປັບປຸງການສຶກສາສ່ວນຕົວ
ຖາມຄຳຖາມຂະນະທີ່ທ່ານສຶກສາ. ຂະນະທີ່ທ່ານສຶກສາພຣະຄຳພີ, ຄຳຖາມອາດເຂົ້າສູ່ຈິດໃຈຂອງທ່ານ. ໃຫ້ໄຕ່ຕອງຄຳຖາມເຫລົ່ານີ້, ແລະ ຊອກຫາຄຳຕອບ.
Mourning’s Hosanna [ໂຮຊັນນາຂອງນາງໂມນນິງ], ໂດຍ ໂຣດສ໌ ເດທ໊ອກ ດອລ໌. ຜູ້ຍິງຊື່ໂມນນິງຢືນຢູ່ໃນໂລກວິນຍານ, ຫຸ້ມລ້ອມໄປດ້ວຍບັນພະບຸລຸດຂອງນາງ. ນາງສະເຫລີມສະຫລອງການປົດປ່ອຍຂອງເຂົາເຈົ້າຈາກການຈ່ອງຈຳທາງວິນຍານ.