“ວັນທີ 28 ເດືອນພະຈິກ–ວັນທີ 4 ເດືອນທັນວາ. ນາຮູມ; ຮາບາກຸກ; ເຊຟານີຢາ: ‘ວິທີຂອງພຣະອົງຢັ້ງຢືນນິລັນດອນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 28 ເດືອນພະຈິກ–ວັນທີ 4 ເດືອນທັນວາ. ນາຮູມ; ຮາບາກຸກ; ເຊຟານີຢາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
“ວິທີຂອງພຣະອົງຢັ້ງຢືນນິລັນດອນ” (ຮາບາກຸກ 3:6). In the Beginning Was the Word [ເມື່ອຕົ້ນເດີມນັ້ນ ພຣະທຳຊົງເປັນຢູ່ແລ້ວ], ໂດຍ ອີວາ ທິມະຕີ
ວັນທີ 28 ເດືອນພະຈິກ–ວັນທີ 4 ເດືອນທັນວາ
ນາຮູມ; ຮາບາກຸກ; ເຊຟານີຢາ
“ວິທີຂອງພຣະອົງຢັ້ງຢືນນິລັນດອນ”
ເຖິງແມ່ນວ່າທ່ານສຶກສາພຣະຄຳພີໄປຕະຫລອດຊີວິດ ແຕ່ກໍຍັງຈະພົບເຫັນຄວາມຮູ້ໃໝ່ຢູ່. ຢ່າຮູ້ສຶກວ່າທ່ານເຂົ້າໃຈທຸກສິ່ງທຸກຢ່າງແລ້ວໃນເວລານີ້. ຈົ່ງອະທິຖານຂໍຄວາມຊ່ວຍເຫລືອ ເພື່ອຈະໄດ້ຮັບຮູ້ຂ່າວສານທີ່ທ່ານຕ້ອງການໃນປະຈຸບັນ.
ບັນທຶກຄວາມປະທັບໃຈຂອງທ່ານ
ການອ່ານພຣະຄຳພີເດີມ ສ່ວນຫລາຍແລ້ວມັນ ໝາຍເຖິງການອ່ານຄຳທຳນາຍເຖິງຄວາມພິນາດ. ພຣະຜູ້ເປັນເຈົ້າໄດ້ເອີ້ນເອົາບັນດາສາດສະດາຢູ່ສະເໝີ ເພື່ອເຕືອນຄົນຊົ່ວຮ້າຍວ່າ ການພິພາກສາຂອງພຣະອົງກຳລັງຈະມາສູ່ພວກເຂົາ. ການປະຕິບັດສາດສະໜາກິດຂອງນາຮູມ, ຮາບາກຸກ, ແລະ ເຊຟານີຢາ ເປັນຕົວຢ່າງທີ່ດີ. ໃນລາຍລະອຽດທີ່ເປັນຕາຢ້ານ, ສາດສະດາເຫລົ່ານີ້ໄດ້ບອກລ່ວງໜ້າເຖິງການຕົກຂອງນະຄອນຕ່າງໆທີ່, ໃນເວລານັ້ນ, ເບິ່ງຄືວ່າເຂັ້ມແຂງ ແລະ ຍິ່ງໃຫຍ່—ນີເນເວ, ບາບີໂລນ, ແລະ ແມ່ນແຕ່ເຢຣູຊາເລັມ. ແຕ່ນັ້ນເປັນເວລາຫລາຍພັນປີມາແລ້ວ. ເປັນຫຍັງມັນຈຶ່ງສຳຄັນທີ່ຈະອ່ານຄຳທຳນາຍເຫລົ່ານີ້ໃນປະຈຸບັນ?
ເຖິງແມ່ນວ່ານະຄອນທີ່ທະນົງຕົວ ແລະ ຊົ່ວຮ້າຍເຫລົ່ານັ້ນໄດ້ຖືກທຳລາຍໄປແລ້ວ, ແຕ່ຄວາມທະນົງຕົວ ແລະ ຄວາມຊົ່ວຮ້າຍກໍຍັງມີຢູ່. ໃນໂລກທຸກວັນນີ້, ບາງເທື່ອເຮົາກໍສາມາດຮູ້ສຶກຖືກອ້ອມຮອບໄປດ້ວຍຄວາມຊົ່ວຮ້າຍທີ່ຖືກກ່າວໂທດໂດຍບັນດາສາດສະດາໃນສະໄໝບູຮານ. ເຮົາອາດຈະກວດພົບຮ່ອງຮອຍຂອງມັນຢູ່ໃນໃຈເຮົາເອງ. ຄຳທຳນາຍໃນພຣະຄຳພີເດີມເຫລົ່ານີ້ເປີດເຜີຍເຖິງວິທີທີ່ພຣະຜູ້ເປັນເຈົ້າຮູ້ສຶກກ່ຽວກັບຄວາມທະນົງຕົວ ແລະ ຄວາມຊົ່ວຮ້າຍ, ແລະ ພຣະຄຳພີສອນວ່າເຮົາສາມາດຫັນໜີຈາກຄວາມຊົ່ວຮ້າຍເຫລົ່ານີ້ໄດ້ ບາງທີນັ້ນຄືເຫດຜົນໜຶ່ງທີ່ເຮົາຍັງອ່ານຄຳທຳນາຍບູຮານເຫລົ່ານີ້ ໃນປະຈຸບັນ. ນາຮູມ, ຮາບາກຸກ, ເຊຟານີຢາ, ແລະ ຄົນອື່ນໆ ບໍ່ໄດ້ເປັນພຽງສາດສະດາແຫ່ງການລົງໂທດເທົ່ານັ້ນ—ພວກເພິ່ນເປັນສາດສະດາແຫ່ງການປົດປ່ອຍນຳອີກ. ຄຳບັນຍາຍເຖິງຄວາມພິນາດລົດຄວາມຮ້າຍແຮງລົງໂດຍຄຳເຊື້ອເຊີນໃຫ້ມາຫາພຣະຄຣິດ ແລະ ຮັບເອົາຄວາມເມດຕາຂອງພຣະອົງ ທີ່ວ່າ: “ຈົ່ງຫັນມາຫາພຣະຜູ້ເປັນເຈົ້າ …; ສະແຫວງຫາຄວາມຊອບທຳ, ສະແຫວງຫາຄວາມອ່ອນໂຍນ” (ເຊຟານີຢາ 2:3). ນີ້ຄືວິທີຂອງພຣະຜູ້ເປັນເຈົ້າໃນສະໄໝບູຮານ, ແລະ ມັນກໍເປັນວິທີຂອງພຣະອົງໃນປະຈຸບັນຄືກັນ. “ວິທີຂອງພຣະອົງຢັ້ງຢືນນິລັນດອນ” (ຮາບາກຸກ 3:6).
ສຳລັບພາບລວມຂອງພຣະທຳເຫລົ່ານີ້, ໃຫ້ເບິ່ງ “Nahum,” “Habakkuk,” ແລະ “Zephaniah” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າທັງມີອຳນາດຍິ່ງໃຫຍ່ ແລະ ມີເມດຕາ.
ພາລະກິດຂອງນາຮູມຄືໃຫ້ບອກລ່ວງໜ້າເຖິງຄວາມພິນາດຂອງເມືອງນີເນເວ—ນະຄອນຫລວງຈັກກະພັດອັດຊີເຣຍທີ່ຮຸນແຮງ, ທີ່ໄດ້ກະຈັດກະຈາຍຊາວອິດສະຣາເອນ ແລະ ຂົ່ມເຫັງທາລຸນຊາວຢູດາ. ນາຮູມໄດ້ເລີ່ມຕົ້ນດ້ວຍການບັນຍາຍເຖິງພຣະພິໂລດ ແລະ ອຳນາດອັນຫາທີ່ປຽບບໍ່ໄດ້ຂອງພຣະເຈົ້າ, ແຕ່ພຣະອົງກໍຍັງໄດ້ກ່າວກ່ຽວກັບຄວາມເມດຕາ ແລະ ພຣະກະລຸນາທິຄຸນຂອງພຣະເຈົ້ານຳອີກ. ທ່ານອາດຢາກຊອກຫາບາງຂໍ້ຢູ່ໃນ ບົດທີ 1 ທີ່ຊ່ວຍທ່ານໃຫ້ເຂົ້າໃຈຄຸນລັກສະນະເຫລົ່ານີ້ແຕ່ລະຢ່າງ—ແລະ ຄຸນລັກສະນະຢ່າງອື່ນໆຂອງພຣະເຈົ້າທີ່ທ່ານສັງເກດເຫັນ. ທ່ານຄິດວ່າເປັນຫຍັງມັນຈຶ່ງສຳຄັນທີ່ຈະຮູ້ຈັກສິ່ງເຫລົ່ານີ້ແຕ່ລະຢ່າງກ່ຽວກັບພຣະຜູ້ເປັນເຈົ້າ?
ບາງຄົນອາດພົບເຫັນວ່າມັນຍາກທີ່ຈະເຫັນດ້ວຍກັບຄຳສອນໃນພຣະຄຳພີ ທີ່ວ່າ “ພຣະຜູ້ເປັນເຈົ້າດີເລີດ” (ນາຮູມ 1:7) ກັບຄຳສອນທີ່ວ່າ “ຈະລົງໂທດພວກທີ່ຕໍ່ຕ້ານພຣະອົງ” (ນາຮູມ 1:2). ໃນພຣະຄຳພີມໍມອນ, ໂຄຣິອານທັນ ລູກຊາຍຂອງແອວມາກໍມີຄຳຖາມທີ່ຄ້າຍຄືກັນນີ້ “ກ່ຽວກັບຄວາມຍຸດຕິທຳຂອງພຣະເຈົ້າໃນການລົງໂທດຄົນບາບ” (ແອວມາ 42:1). ເພື່ອຮຽນຮູ້ຕື່ມອີກກ່ຽວກັບຄວາມເມດຕາຂອງພຣະເຈົ້າ ແລະ ເຖິງວິທີທີ່ມັນກ່ຽວຂ້ອງກັບຄວາມຍຸດຕິທຳຂອງພຣະອົງ, ໃຫ້ອ່ານຄຳຕອບຂອງແອວມາຕໍ່ໂຄຣິນອານທັນ ຢູ່ໃນ ແອວມາ 42.
“ພຣະຜູ້ເປັນເຈົ້າດີເລີດ, ເປັນບ່ອນຄຸ້ມຄອງໃນຄາວລຳບາກ” (ນາຮູມ 1:7).
ເຮົາສາມາດໄວ້ວາງໃຈໃນພຣະປະສົງຂອງພຣະຜູ້ເປັນເຈົ້າ ແລະ ເວລາຂອງພຣະອົງ.
ແມ່ນແຕ່ບັນດາສາດສະດາ ບາງເທື່ອກໍຍັງມີຄຳຖາມກ່ຽວກັບວິທີຂອງພຣະຜູ້ເປັນເຈົ້າ. ຮາບາກຸກ, ຜູ້ມີຊີວິດຢູ່ໃນວັນເວລາທີ່ເຕັມໄປດ້ວຍຄວາມຊົ່ວຮ້າຍຢູ່ໃນຢູດາຍ, ໄດ້ເລີ່ມຕົ້ນການບັນທຶກຂອງເພິ່ນດ້ວຍຄຳຖາມກັບພຣະຜູ້ເປັນເຈົ້າ (ເບິ່ງ ຮາບາກຸກ 1:1–4). ທ່ານຈະສະຫລຸບຄວາມເປັນຫ່ວງຂອງຮາບາກຸກແນວໃດ? ທ່ານເຄີຍມີຄວາມຮູ້ສຶກທີ່ຄ້າຍຄືກັນນີ້ບໍ?
ພຣະຜູ້ເປັນເຈົ້າໄດ້ຕອບຄຳຖາມຂອງຮາບາກຸກໂດຍການກ່າວວ່າ ພຣະອົງຈະສົ່ງຊາວຄັນເດອາ (ຊາວບາບີໂລນ) ມາລົງໂທດຊາວຢູດາ (ເບິ່ງ ຮາບາກຸກ 1:5–11). ແຕ່ຮາບາກຸກຍັງບໍ່ພໍໃຈ, ເພາະເບິ່ງຄືວ່າມັນບໍ່ຍຸດຕິທຳທີ່ພຣະຜູ້ເປັນເຈົ້າຈະທົນເບິ່ງ “ເມື່ອຄົນຊົ່ວຮ້າຍ [ບາບີໂລນ] ທຳລາຍຜູ້ຄົນທີ່ຊອບທຳກວ່າ [ຢູດາ]” (ເບິ່ງ ຂໍ້ທີ 12–17). ທ່ານພົບເຫັນຫຍັງແດ່ຢູ່ໃນ ຮາບາກຸກ 2:1–4 ທີ່ດົນໃຈທ່ານໃຫ້ໄວ້ວາງໃຈໃນພຣະຜູ້ເປັນເຈົ້າ ເມື່ອທ່ານບໍ່ໄດ້ຮັບຄຳຕອບຕໍ່ຄຳອະທິຖານ?
ບົດທີ 3 ຂອງຮາບາກຸກແມ່ນຄຳອະທິຖານທີ່ສັນລະເສີນພຣະເຈົ້າ ແລະ ການສະແດງສັດທາໃນພຣະອົງ. ແມ່ນຫຍັງທີ່ປະທັບໃຈທ່ານຫລາຍກ່ຽວກັບຖ້ອຍຄຳຂອງຮາບາກຸກ ຢູ່ໃນ ຂໍ້ທີ 17–9? ນ້ຳສຽງຂອງຂໍ້ເຫລົ່ານີ້ແຕກຕ່າງຈາກ ຮາບາກຸກ 1:1–4 ແນວໃດ? ໃຫ້ໄຕ່ຕອງວິທີທີ່ທ່ານສາມາດພັດທະນາສັດທາອັນຍິ່ງໃຫຍ່ໃນພຣະເຈົ້າ, ແມ່ນແຕ່ຕອນຊີວິດເບິ່ງຄືບໍ່ຍຸດຕິທຳກໍຕາມ.
ເບິ່ງ ເຮັບເຣີ 10:32–39; 11; ຄຳສອນ ແລະ ພັນທະສັນຍາ 121:1–6; Robert D. Hales, “Waiting upon the Lord: Thy Will Be Done,” Liahona, Nov. 2011, 71–74 ນຳອີກ.
“ຈົ່ງຫັນມາຫາພຣະຜູ້ເປັນເຈົ້າ, ພວກເຈົ້າທຸກຄົນທີ່ຖ່ອມໃຈຂອງແຜ່ນດິນໂລກ.”
ເຊຟານີຢາໄດ້ທຳນາຍວ່າ ປະຊາຊົນຂອງຢູດາຍຈະຖືກທຳລາຍຈົນໝົດກ້ຽງ ໂດຍຊາວບາບີໂລນ ເພາະຄວາມຊົ່ວຮ້າຍຂອງພວກເຂົາ. “ເຮົາກຳລັງຈະທຳລາຍທຸກໆສິ່ງຢູ່ເທິງແຜ່ນດິນໂລກ, ພຣະຜູ້ເປັນເຈົ້າໄດ້ກ່າວ” (ເຊຟານີຢາ 1:2). ແຕ່ເຊຟານີຢາກໍໄດ້ກ່າວວ່າ “ຜູ້ທີ່ເຫລືອຢູ່” ຈະຖືກຮັກສາໄວ້ (ເຊຟານີຢາ 3:13). ຂະນະທີ່ທ່ານອ່ານຄຳທຳນາຍເຫລົ່ານີ້, ໃຫ້ສັງເກດເບິ່ງຄຸນລັກສະນະ ແລະ ພຶດຕິກຳທີ່ນຳພາຊາວຢູດາ ແລະ ກຸ່ມຜູ້ຄົນອື່ນໆໄປສູ່ຄວາມພິນາດແນວໃດ—ເບິ່ງ ໂດຍສະເພາະ ເຊຟານີຢາ 1:4–6, 12; 2:8, 10, 15; 3:1–4. ແລ້ວໃຫ້ຊອກຫາບຸກຄະລິກລັກສະນະຂອງຜູ້ຄົນທີ່ພຣະເຈົ້າຈະຮັກສາໄວ້—ເບິ່ງ ເຊຟານີຢາ 2:1–3; 3:12–13, 18–19. ຂ່າວສານໃດທີ່ທ່ານຮູ້ສຶກວ່າພຣະຜູ້ເປັນເຈົ້າມີໃຫ້ສຳລັບທ່ານ ຢູ່ໃນຂໍ້ເຫລົ່ານີ້?
ເຊຟານີຢາ 3:14–20 ບັນຍາຍເຖິງຄວາມສຸກຂອງຄົນຊອບທຳຫລັງຈາກພຣະຜູ້ເປັນເຈົ້າ “ໄດ້ກຳຈັດສັດຕູທັງໝົດ” (ຂໍ້ທີ 15). ພອນຢ່າງໃດແດ່ທີ່ສັນຍາຢູ່ໃນຂໍ້ເຫລົ່ານີ້ ຊຶ່ງເດັ່ນສຳລັບທ່ານ? ເປັນຫຍັງມັນຈຶ່ງສຳຄັນຕໍ່ທ່ານທີ່ຮູ້ຈັກກ່ຽວກັບພອນເຫລົ່ານີ້? ທ່ານສາມາດປຽບທຽບຂໍ້ເຫລົ່ານີ້ໃສ່ກັບປະສົບການທີ່ບັນຍາຍຢູ່ໃນ 3 ນີໄຟ 17 ແລະ ໄຕ່ຕອງເຖິງວິທີທີ່ພຣະເຢຊູຄຣິດຮູ້ສຶກກ່ຽວກັບຜູ້ຄົນຂອງພຣະອົງ—ລວມທັງຕົວທ່ານແນວໃດ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ນາຮູມ 1:7.ພຣະຜູ້ເປັນເຈົ້າເປັນເໝືອນດັ່ງ “ບ່ອນຄຸ້ມຄອງ” ແນວໃດ? ບາງທີຄອບຄົວຂອງທ່ານອາດຢາກສ້າງບ່ອນຄຸ້ມຄອງທີ່ລຽບງ່າຍ ຫລື ສ້າງຄ້າຍຢູ່ໃນເຮືອນຂອງທ່ານ ແລະ ສົນທະນາ ນາຮູມ 1:7 ຂະນະທີ່ຢູ່ໃນນັ້ນ. ແມ່ນຫຍັງທີ່ເຮັດໃຫ້ວັນເວລາຂອງເຮົາເປັນ “ຄາວລຳບາກ”? ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງປົກປ້ອງເຮົາແນວໃດ? ເຮົາຈະສະແດງວ່າ ເຮົາ “ໄວ້ວາງໃຈໃນພຣະອົງ” ແນວໃດ?
-
ຮາບາກຸກ 2:14.ເຮົາຈະຊ່ວຍບັນລຸຄຳທຳນາຍຢູ່ໃນຂໍ້ນີ້ໄດ້ແນວໃດ?
-
ຮາບາກຸກ 3:17–19.ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງຮາບາກຸກ ຢູ່ໃນຂໍ້ເຫລົ່ານີ້?
-
ເຊຟານີຢາ 2:3.ພວກທ່ານສາມາດຫລິ້ນເກມ ຊຶ່ງສະມາຊິກໃນຄອບຄົວຕ້ອງຊອກຫາຄຳສັບເຊັ່ນ “ຄວາມຊອບທຳ” ແລະ “ຄວາມອ່ອນໂຍນ” ຢູ່ໃນເຈ້ຍທີ່ມີຄຳອື່ນໆປົນຢູ່ນຳ. ແລ້ວເຂົາເຈົ້າສາມາດເວົ້າລົມກັນກ່ຽວກັບຕົວຢ່າງຂອງຄວາມຊອບທຳ ແລະ ຄວາມອ່ອນໂຍນ ທີ່ເຂົາເຈົ້າເຫັນໃນກັນແລະກັນ. ການສະແຫວງຫາຄວາມຊອບທຳ ແລະ ຄວາມອ່ອນໂຍນໝາຍຄວາມວ່າແນວໃດ?
-
ເຊຟານີຢາ 3:14–20.ເຮົາພົບເຫັນຫຍັງແດ່ຢູ່ໃນ ເຊຟານີຢາ 3:14–20 ທີ່ເຮັດໃຫ້ເຮົາຢາກ “ຮ້ອງລຳທຳເພງ, … ຍິນດີດ້ວຍສຸດຫົວໃຈ”? ບາງທີຄອບຄົວຂອງທ່ານຢາກຮ້ອງເພງສວດ ຫລື ເພງອື່ນໆທີ່ຄິດອອກ ຂະນະທີ່ເຂົາເຈົ້າອ່ານຂໍ້ເຫລົ່ານີ້.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຂໍເພິ່ງພຣະທຸກຊົ່ວໂມງ,” ເພງສວດ ແລະ ເພງຂອງເດັກນ້ອຍ, 12.
ການປັບປຸງການສຶກສາສ່ວນຕົວ
ມີຄວາມອົດທົນ. ບາງເທື່ອເຮົາຢາກໃຫ້ຄຳຖາມຂອງເຮົາໄດ້ຮັບຄຳຕອບໄວໆດຽວນີ້, ແຕ່ຄວາມຮູ້ທາງວິນຍານຈະໃຊ້ເວລາ ແລະ ບໍ່ສາມາດບັງຄັບໄດ້. ດັ່ງທີ່ພຣະຜູ້ເປັນເຈົ້າໄດ້ບອກຮາບາກຸກ, “ຈົ່ງລໍຄອຍເບິ່ງ, ມັນຈະມາຮອດຕາມເວລາທີ່ເຮົາໄດ້ກຳນົດໄວ້ແທ້” (ຮາບາກຸກ 2:3).
“ພຣະຜູ້ເປັນເຈົ້າ ພຣະເຈົ້າຂອງພວກເຈົ້າ ທີ່ສະຖິດຢູ່ກັບພວກເຈົ້ານັ້ນຍິ່ງໃຫຍ່” (ເຊຟານີຢາ 3:17). He Comes Again to Rule and Reign [ພຣະອົງສະເດັດຄືນມາອີກເພື່ອປົກຄອງ ແລະ ຄອບຄອງ], ໂດຍ ແມຣີ ອາ ຊາວເອີ