“ວັນທີ 21–27 ເດືອນພະຈິກ. ໂຢນາ; ມີກາ: ‘ພຣະອົງຍິນດີທີ່ຈະສະແດງຄວາມເມດຕາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 21–27 ເດືອນພະຈິກ. ໂຢນາ; ມີກາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

Jonah on the Beach at Nineveh [ໂຢນາຢູ່ແຄມຝັ່ງທະເລທີ່ເມືອງນີເນເວ], ໂດຍ ແດນໂຍ ເອ ຫລຸຍ

ວັນທີ 21–27 ເດືອນພະຈິກ

ໂຢນາ; ມີກາ

“ພຣະອົງຍິນດີທີ່ຈະສະແດງຄວາມເມດຕາ”

ຂະນະທີ່ທ່ານບັນທຶກຄວາມປະທັບໃຈຂອງທ່ານ, ໃຫ້ຄິດກ່ຽວກັບວິທີທີ່ຫລັກທຳໃນໂຢນາ ແລະ ມີກາກ່ຽວຂ້ອງກັບສິ່ງທີ່ທ່ານໄດ້ຮຽນຮູ້ໃນພຣະຄຳພີແນວໃດ.

ບັນທຶກຄວາມປະທັບໃຈຂອງທ່ານ

ໂຢນາຢູ່ໃນເຮືອທີ່ມຸ້ງໄປຫາເມືອງທາຣາສິດ. ການນັ່ງເຮືອໄປເມືອງທາຣາສິດກໍບໍ່ມີຄວາມຜິດແນວໃດ, ຍົກເວັ້ນແຕ່ມັນຢູ່ຫ່າງໄກຈາກເມືອງນີເນເວ, ບ່ອນທີ່ໂຢນາຄວນໄປຫາເພື່ອປະກາດຂ່າວສານຂອງພຣະເຈົ້າ. ສະນັ້ນເມື່ອເຮືອປະເຊີນກັບລົມພະຍຸຮ້າຍ, ໂຢນາຮູ້ວ່າ ມັນເປັນເພາະການບໍ່ເຊື່ອຟັງຂອງເພິ່ນ. ດ້ວຍຄຳຮຽກຮ້ອງຂອງໂຢນາ, ໝູ່ໃນເຮືອໄດ້ໂຍນເພິ່ນລົງໃນນ້ຳທະເລເລິກ ເພື່ອໃຫ້ລົມພະຍຸຢຸດຕິລົງ. ເບິ່ງຄືວ່າມັນເປັນທີ່ສຸດຂອງໂຢນາ ແລະ ການປະຕິບັດສາດສະໜາກິດຂອງເພິ່ນ. ແຕ່ພຣະຜູ້ເປັນເຈົ້າບໍ່ໄດ້ປະຖິ້ມໂຢນາ—ເຊັ່ນດຽວກັບທີ່ພຣະອົງບໍ່ໄດ້ປະຖິ້ມປະຊາຊົນຂອງເມືອງນີເນເວ ແລະ ພຣະອົງບໍ່ໄດ້ປະຖິ້ມຄົນໃດໃນພວກເຮົາ. ດັ່ງທີ່ມີກາໄດ້ສິດສອນ, ພຣະຜູ້ເປັນເຈົ້າບໍ່ຍິນດີກັບການກ່າວໂທດເຮົາ, ແຕ່ “ພຣະອົງຍິນດີທີ່ຈະສະແດງຄວາມເມດຕາ.” ເມື່ອເຮົາຫັນມາຫາພຣະອົງ, “ພຣະອົງຍັງຈະເມດຕາເຮົາອີກເທື່ອໜຶ່ງ; ພຣະອົງຈະຢຽບຍ່ຳການບາບຕ່າງໆຂອງເຮົາລົງໃຕ້ພຣະບາດຂອງພຣະອົງ; ແລະ [ພຣະອົງຈະ] ໂຍນບາບທັງໝົດ [ຂອງເຮົາ] ລົງໃນພື້ນທະເລເລິກ” (ມີກາ 7:18–19).

ສຳລັບພາບລວມຂອງພຣະທຳໂຢນາ ແລະ ມີກາ, ໃຫ້ເບິ່ງ “Jonah” ແລະ “Micah” ໃນ Bible Dictionary.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢນາ 1–4; ມີກາ 7:18–19

ພຣະຜູ້ເປັນເຈົ້າມີເມດຕາຕໍ່ທຸກຄົນທີ່ຫັນມາຫາພຣະອົງ.

ພຣະທຳໂຢນາສະແດງໃຫ້ເຫັນ, ໃນບັນດາສິ່ງອື່ນໆ, ວ່າພຣະຜູ້ເປັນເຈົ້າມີເມດຕາຫລາຍຂະໜາດໃດເມື່ອເຮົາກັບໃຈ. ຂະນະທີ່ທ່ານອ່ານໂຢນາ, ໃຫ້ຊອກຫາຕົວຢ່າງຂອງຄວາມເມດຕາຂອງພຣະອົງ. ໃຫ້ໄຕ່ຕອງວ່າທ່ານໄດ້ຮັບຄວາມເມດຕານັ້ນໃນຊີວິດຂອງທ່ານແນວໃດ. ທ່ານຮຽນຮູ້ຫຍັງແດ່ທີ່ຊ່ວຍທ່ານໃຫ້ມີຄວາມເມດຕາຫລາຍກວ່າເກົ່າກັບຄົນອື່ນ?

ການໄດ້ເຫັນຄວາມເມດຕາຂອງພຣະຜູ້ເປັນເຈົ້າດົນໃຈຄວາມຮູ້ສຶກໃຫ້ມີຄວາມຮັກ ແລະ ຄວາມກະຕັນຍູແນວໃດ. ເຖິງຢ່າງໃດກໍຕາມ, ໂຢນາຍັງ “ຄຽດ” ແລະ “ບໍ່ພໍໃຈຫລາຍ” (ໂຢນາ 4:1) ເມື່ອພຣະຜູ້ເປັນເຈົ້າມີຄວາມເມດຕາຕໍ່ປະຊາຊົນຂອງເມືອງນີເນເວ, ຜູ້ເປັນສັດຕູຂອງຊາວອິດສະຣາເອນ. ເປັນຫຍັງໂຢນາຈຶ່ງຮູ້ສຶກແບບນີ້? ທ່ານເຄີຍຮູ້ສຶກທີ່ຄ້າຍຄືກັນນີ້ບໍ? ທ່ານຮູ້ສຶກວ່າພຣະຜູ້ເປັນເຈົ້າພະຍາຍາມຊ່ວຍໂຢນາໃຫ້ເຂົ້າໃຈສິ່ງໃດ ຢູ່ໃນ ບົດທີ 4?

ໃຫ້ໄຕ່ຕອງຄຳສອນຢູ່ໃນ ມີກາ 7:18–19. ຄວາມຈິງເຫລົ່ານີ້ໄດ້ຊ່ວຍໂຢນາປ່ຽນອະຄະຕິຂອງເພິ່ນກ່ຽວກັບພຣະຜູ້ເປັນເຈົ້າ ແລະ ປະຊາຊົນຂອງເມືອງນີເນເວແນວໃດ?

ເບິ່ງ ລູກາ 15:11–32; Jeffrey R. Holland, “The Justice and Mercy of God,” Ensign, Sept. 2013, 16–21 ນຳອີກ.

ເຮົາສາມາດແບ່ງປັນພຣະກິດຕິຄຸນກັບລູກໆຂອງພຣະເຈົ້າ.

ໂຢນາ 1; 3–4

ລູກໆຂອງພຣະເຈົ້າທຸກຄົນຕ້ອງໄດ້ຍິນພຣະກິດຕິຄຸນ.

ເມືອງນີເນເວເປັນພາກສ່ວນໜຶ່ງຂອງຈັກກະພັດອັດຊີເຣຍ, ສັດຕູຂອງຊາວອິດສະຣາເອນ ຊຶ່ງຮູ້ຈັກກັນດີເພາະຄວາມຮຸນແຮງ ແລະ ຄວາມຮ້າຍກາດຂອງພວກເຂົາ. ຕໍ່ໂຢນາແລ້ວ, ມັນເບິ່ງຄືວ່າເປັນໄປບໍ່ໄດ້ທີ່ປະຊາຊົນຂອງເມືອງນີເນເວພ້ອມແລ້ວທີ່ຈະຮັບເອົາພຣະຄຳຂອງພຣະເຈົ້າ ແລະ ກັບໃຈ. ແຕ່, ດັ່ງທີ່ປະທານດາລິນ ເອັຈ ໂອກສ໌ ໄດ້ສິດສອນ: “ເຮົາບໍ່ຄວນຕັ້ງຕົວເອງຂຶ້ນເພື່ອເປັນຜູ້ຕັດສິນວ່າໃຜພ້ອມແລ້ວ ແລະ ໃຜຍັງບໍ່ພ້ອມທີ່ຈະຍອມຮັບ. ພຣະຜູ້ເປັນເຈົ້າຮູ້ຈັກຄວາມປາດຖະໜາຂອງລູກໆຂອງພຣະອົງທຸກຄົນ, ແລະ ຖ້າຫາກເຮົາອະທິຖານເພື່ອຂໍການດົນໃຈ, ພຣະອົງຈະຊ່ວຍເຮົາໃຫ້ພົບເຫັນຜູ້ຄົນທີ່ພຣະອົງຮູ້ວ່າ ຄົນໃດ ‘ຢູ່ໃນການຕຽມພ້ອມທີ່ຈະຮັບຟັງພຣະຄຳ’ (ແອວມາ 32:6)” (“Sharing the Restored Gospel,” Ensign ຫລື Liahona, Nov. 2016, 58–59). ທ່ານຮຽນຮູ້ຫຍັງແດ່ຈາກ ໂຢນາ 3 ທີ່ດົນໃຈທ່ານໃຫ້ແບ່ງປັນພຣະກິດຕິຄຸນກັບຄົນທີ່ອາດຍັງບໍ່ພ້ອມທີ່ຈະປ່ຽນເທື່ອ?

ມັນອາດເປັນປະໂຫຍດທີ່ຈະປຽບທຽບອະຄະຕິຂອງໂຢນາ (ເບິ່ງ ໂຢນາ 1; 3–4) ໃສ່ກັບຄວາມຮູ້ສຶກຂອງແອວມາ ແລະ ພວກລູກຊາຍຂອງໂມໄຊຢາ (ເບິ່ງ ໂມໄຊຢາ 28:1–5; ແອວມາ 17:23–25).

ເບິ່ງ 3 ນີໄຟ 18:32 ນຳອີກ.

ມີກາ 4:11–13; 5:8–15; 7:5–7

ພຣະເຢຊູຄຣິດໄດ້ອ້າງເຖິງການຂຽນຂອງມີກາ.

ເປັນທີ່ຮູ້ຈັກກັນດີວ່າ ພຣະຜູ້ຊ່ວຍໃຫ້ລອດໄດ້ອ້າງເຖິງເອຊາຢາ ແລະ ເພງສັນລະເສີນ. ທ່ານຮູ້ບໍວ່າພຣະອົງກໍໄດ້ກ່າວເຖິງມີກາຫລາຍເທື່ອຄືກັນ? ໃຫ້ພິຈາລະນາຕົວຢ່າງດັ່ງຕໍ່ໄປນີ້, ແລະ ໄຕ່ຕອງວ່າເປັນຫຍັງຂໍ້ພຣະຄຳພີເຫລົ່ານີ້ອາດສຳຄັນຕໍ່ພຣະຜູ້ຊ່ວຍໃຫ້ລອດແນວໃດ. ເປັນຫຍັງມັນຈຶ່ງສຳຄັນຕໍ່ທ່ານ?

ມີກາ 4:11–13 (ເບິ່ງ 3 ນີໄຟ 20:18–20). ພຣະຜູ້ເປັນເຈົ້າໄດ້ປຽບທຽບການເຕົ້າໂຮມໃນຍຸກສຸດທ້າຍໃສ່ກັບການເກັບກ່ຽວເຂົ້າຫວີດ (ເບິ່ງ ແອວມາ 26:5–7; ຄຳສອນ ແລະ ພັນທະສັນຍາ 11:3–4 ນຳອີກ). ການປຽບທຽບນີ້ແນະນຳທ່ານຫຍັງແດ່ ກ່ຽວກັບການເຕົ້າໂຮມອິດສະຣາເອນ?

ມີກາ 5:8–15 (ເບິ່ງ 3 ນີໄຟ 21:12–21). ຂໍ້ເຫລົ່ານີ້ແນະນຳທ່ານກ່ຽວກັບຜູ້ຄົນຂອງພຣະເຈົ້າ (“ຜູ້ທີ່ເຫລືອຢູ່ຂອງຢາໂຄບ”) ໃນວັນເວລາສຸດທ້າຍແນວໃດ?

ມີກາ 7:5–7 (ເບິ່ງ ມັດທາຍ 10:35–36). ອີງຕາມຂໍ້ເຫລົ່ານີ້, ເປັນຫຍັງມັນຈຶ່ງສຳຄັນທີ່ຈະ “ເຝົ້າຄອງຄອຍຫາພຣະຜູ້ເປັນເຈົ້າ” ກ່ອນ? ເປັນຫຍັງຄຳແນະນຳນີ້ຈຶ່ງສຳຄັນໃນທຸກວັນນີ້?

ມີກາ 6:1–8

“ສິ່ງທີ່ພຣະຜູ້ເປັນເຈົ້າຕ້ອງການຈາກເຈົ້ານັ້ນແມ່ນຫຍັງ?”

ມີກາເຊື້ອເຊີນເຮົາໃຫ້ວາດພາບເຫັນວ່າ ການ “ມານະມັດສະການພຣະຜູ້ເປັນເຈົ້າ, ແລະ ກົ້ມຂາບ … ຢູ່ຕໍ່ພຣະພັກຂອງພຣະເຈົ້າແຫ່ງຟ້າສະຫວັນ” ນັ້ນຈະເປັນແບບໃດ (ມີກາ 6:6). ຂໍ້ທີ 6–8 ແນະນຳທ່ານກ່ຽວກັບສິ່ງທີ່ສຳຄັນຕໍ່ພຣະຜູ້ເປັນເຈົ້າ ຂະນະທີ່ພຣະອົງປະເມີນຊີວິດຂອງທ່ານແນວໃດ?

ເບິ່ງ ມັດທາຍ 7:21–23; 25:31–40; Dale G. Renlund, “Do Justly, Love Mercy, and Walk Humbly with God,” Ensign ຫລື Liahona, Nov. 2020, 109–12 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຢນາ 1–4.ລູກໆຂອງທ່ານອາດມັກສະແດງທີ່ເລົ່າກ່ຽວກັບໂຢນາ, ເຊັ່ນການທຳທ່າທີ່ຈະແລ່ນໜີ, ເຮັດສຽງຄືກັນກັບຝົນຕົກຟ້າລົມໃນທະເລ, ຫລື ທຳທ່າຖືກປາກືນກິນ (ເບິ່ງ “ສາດສະດາໂຢນາ” ໃນ ເລື່ອງພຣະຄຳພີເດີມ). ຖາມສະມາຊິກໃນຄອບຄົວເຖິງສິ່ງທີ່ເຂົາເຈົ້າໄດ້ຮຽນຮູ້ຈາກປະສົບການຂອງໂຢນາ. ສຳລັບຕົວຢ່າງໜຶ່ງໃນບົດຮຽນຈາກໂຢນາ, ໃຫ້ເບິ່ງບາດທີ 1 ຂອງເພງ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40).

ໂຢນາ 3.ໂຢນາໄດ້ຮຽນຮູ້ຫຍັງແດ່ກ່ຽວກັບການແບ່ງປັນພຣະກິດຕິຄຸນ? ເຮົາຮູ້ຈັກໃຜແດ່ທີ່ຈະໄດ້ຮັບພອນໂດຍການໄດ້ຍິນຂ່າວສານຂອງຫລັກທຳພຣະກິດຕິຄຸນຂອງພຣະເຢຊູຄຣິດ?

ມີກາ 4:1–5.ອີງຕາມຂໍ້ເຫລົ່ານີ້, ແມ່ນຫຍັງທີ່ຈະນຳສັນຕິສຸກ ແລະ ຄວາມຈະເລີນຮຸ່ງເຮືອງມາໃຫ້ຜູ້ຄົນຂອງພຣະຜູ້ເປັນເຈົ້າ? ເຮົາສາມາດເຮັດສິ່ງໃດເພື່ອຊ່ວຍບັນລຸຄຳທຳນາຍນີ້ຢູ່ໃນບ້ານເຮືອນຂອງເຮົາ?

ມີກາ 5:2.ທ່ານສາມາດວາງສະແດງຮູບພຣະເຢຊູຕອນເປັນແອນ້ອຍ ກັບມານດາຂອງພຣະອົງ (ເບິ່ງ ປຶ້ມຮູບພາບພຣະກິດຕິຄຸນ, ນ້ຳເບີ 33) ໄວ້ຢູ່ເບື້ອງໜຶ່ງຂອງຫ້ອງ ແລະ ວາງຮູບພວກໂຫລາຈານໄວ້ອີກເບື້ອງໜຶ່ງ. ໃຫ້ອ່ານ ມີກາ 5:2 ແລະ ມັດທາຍ 2:1–6 ນຳອີກ. ຄຳທຳນາຍຂອງມີກາຊ່ວຍພວກໂຫລາຈານໃຫ້ຊອກເຫັນພຣະເຢຊູໄດ້ແນວໃດ? ສະມາຊິກໃນຄອບຄົວສາມາດຍ້າຍຮູບພວກໂຫລາຈານໄປໃກ້ຮູບພຣະເຢຊູ. ຄອບຄົວຂອງທ່ານອາດມັກເບິ່ງວິດີໂອ “The Christ Child: A Nativity Story” (ChurchofJesusChrist.org).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.

ການປັບປຸງການສຶກສາສ່ວນຕົວ

ຊອກຫາຄວາມຮັກຂອງພຣະເຈົ້າ. ຂະນະທີ່ທ່ານອ່ານຂໍ້ພຣະຄຳພີ, ໃຫ້ຄິດທີ່ຈະສັງເກດເບິ່ງຫລັກຖານເຖິງຄວາມຮັກຂອງພຣະເຈົ້າທີ່ເດັ່ນຕໍ່ທ່ານ. ຍົກຕົວຢ່າງ, ໃຫ້ຊອກຫາວິທີທີ່ພຣະເຈົ້າສະແດງຄວາມຮັກຂອງພຣະອົງຕໍ່ລູກໆຂອງພຣະອົງໃນເລື່ອງລາວຂອງໂຢນາ.

ຜູ້ຊາຍກຳລັງຖືກໂຍນຈາກເຮືອລົງທະເລ — ຮູບພາບປະກອບໂດຍ ແຄວິນ ຄາເດັນ