“ວັນທີ 7–13 ເດືອນພະຈິກ. ໂຮເສອາ 1–6; 10–14; ໂຢເອນ: ‘ເຮົາຈະຮັກພວກເຂົາດ້ວຍສຸດໃຈ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 7–13 ເດືອນພະຈິກ. ໂຮເສອາ 1–6; 10–14; ໂຢເອນ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ວັນທີ 7–13 ເດືອນພະຈິກ
ໂຮເສອາ 1–6; 10–14; ໂຢເອນ
“ເຮົາຈະຮັກພວກເຂົາດ້ວຍສຸດໃຈ”
ເຊື້ອເຊີນພຣະວິນຍານໃຫ້ມາເປັນພາກສ່ວນໃນການສຶກສາ ໂຮເສອາ ແລະ ໂຢເອນຂອງທ່ານ. ໃຫ້ຂຽນຂ່າວສານທີ່ພຣະວິນຍານປະທັບໃຈ ແລະ ຈິດໃຈຂອງທ່ານໄວ້.
ບັນທຶກຄວາມປະທັບໃຈຂອງທ່ານ
ພັນທະສັນຍາຂອງຊາວອິດສະຣາເອນກັບພຣະຜູ້ເປັນເຈົ້າຄົງເປັນເລື່ອງເລິກເຊິ່ງທີ່ສຸດ ຈົນວ່າພຣະຜູ້ເປັນເຈົ້າໄດ້ປຽບທຽບມັນໃສ່ກັບການແຕ່ງງານ. ພັນທະສັນຍາ, ຄືກັນກັບການແຕ່ງງານ, ລວມທັງຄຳໝັ້ນສັນຍານິລັນດອນ, ການແບ່ງປັນປະສົບການ, ການສ້າງຊີວິດນຳກັນ, ຈົງຮັກພັກດີສະເໝີ, ແລະ ຍິ່ງກວ່າທຸກສິ່ງ, ຮັກສຸດໃຈ. ການອຸທິດຕົນແບບນີ້ຖືກຄາດໝາຍໄວ້ສູງ—ແລະ ຜົນສະທ້ອນກໍຮ້າຍແຮງທີ່ສຸດເມື່ອນອກໃຈ. ຜ່ານທາງສາດສະດາໂຮເສອາ, ພຣະເຈົ້າໄດ້ບັນຍາຍຜົນສະທ້ອນບາງຢ່າງທີ່ຊາວອິດສະຣາເອນຈະໄດ້ປະເຊີນຖ້າພວກເຂົາບໍ່ຮັກສາພັນທະສັນຍາຂອງພວກເຂົາ. ແຕ່ຂ່າວສານຂອງພຣະອົງບໍ່ແມ່ນ “ເຮົາຈະປະຕິເສດເຈົ້າຕະຫລອດໄປເພາະຄວາມບໍ່ຊື່ສັດ.” ແຕ່ແມ່ນ “ເຮົາຈະເຊື້ອເຊີນເຈົ້າໃຫ້ກັບຄືນມາ” (ເບິ່ງ ໂຮເສອາ 2:14–15). “ເຮົາຈະໃຫ້ເຈົ້າເປັນເມຍຂອງເຮົາໃນຄວາມຊອບທຳ,” ພຣະຜູ້ເປັນເຈົ້າໄດ້ປະກາດ (ໂຮເສອາ 2:19). “ເຮົາຈະນຳປະຊາຊົນຂອງເຮົາຄືນມາ, ເຮົາຈະຮັກພວກເຂົາດ້ວຍສຸດໃຈ” (ໂຮເສອາ 14:4). ນີ້ເປັນຂ່າວສານຢ່າງດຽວກັນທີ່ພຣະອົງໄດ້ມອບໃຫ້ເຮົາໃນທຸກວັນນີ້ ຂະນະທີ່ເຮົາສະແຫວງຫາທີ່ຈະດຳລົງຊີວິດຕາມພັນທະສັນຍາດ້ວຍຄວາມຮັກ ແລະ ການອຸທິດຕົນ.
ໂຢເອນໄດ້ແບ່ງປັນຂ່າວສານທີ່ຄ້າຍຄືກັນນີ້ວ່າ: “ຈົ່ງກັບມາຫາພຣະຜູ້ເປັນເຈົ້າ ພຣະເຈົ້າຂອງເຈົ້າສາ: ພຣະອົງຊົງຄຸນຄວາມດີ ແລະ ເມດຕາເຕັມລົ້ນ” (ໂຢເອນ 2:13). “ພຣະຜູ້ເປັນເຈົ້າຈະເປັນຄວາມຫວັງຂອງຜູ້ຄົນຂອງພຣະອົງ, ແລະ ເປັນພະລັງຂອງລູກຫລານຂອງອິດສະຣາເອນ” (ໂຢເອນ 3:16). ຂະນະທີ່ທ່ານອ່ານໂຮເສອາ ແລະ ໂຢເອນ, ໃຫ້ໄຕ່ຕອງຄວາມສຳພັນຂອງທ່ານກັບພຣະຜູ້ເປັນເຈົ້າ. ໃຫ້ຄິດກ່ຽວກັບວິທີທີ່ຄວາມຊື່ສັດຂອງພຣະອົງໄດ້ດົນໃຈທ່ານໃຫ້ຊື່ສັດຕໍ່ພຣະອົງແນວໃດ.
ສຳລັບພາບລວມຂອງພຣະທຳໂຮເສອາ ແລະ ໂຢເອນ, ໃຫ້ເບິ່ງ “Hosea, ຫລື Hoshea” ແລະ “Joel” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າເຊື້ອເຊີນເຮົາໃຫ້ຫັນມາຫາພຣະອົງສະເໝີ.
ນາງໂກເມ ເມຍຂອງໂຮເສອາບໍ່ຊື່ສັດຕໍ່ເພິ່ນ, ແລະ ພຣະເຈົ້າໄດ້ຊີ້ບອກເລື່ອງນີ້ເພື່ອສິດສອນຊາວອິດສະຣາເອນເຖິງຄວາມຮູ້ສຶກຂອງພຣະອົງກ່ຽວກັບພວກເຂົາ ແລະ ກ່ຽວກັບພັນທະສັນຍາຂອງພວກເຂົາກັບພຣະອົງ. ຂະນະທີ່ທ່ານອ່ານ ໂຮເສອາ 1–3, ໃຫ້ໄຕ່ຕອງວິທີທີ່ພຣະຜູ້ເປັນເຈົ້າເບິ່ງຄວາມສຳພັນຂອງພຣະອົງກັບຜູ້ຄົນແຫ່ງພັນທະສັນຍາຂອງພຣະອົງແນວໃດ. ທ່ານອາດໄຕ່ຕອງວິທີທີ່ທ່ານ, ຄືກັນກັບຊາວອິດສະຣາເອນ, ອາດບໍ່ຊື່ສັດຕໍ່ພຣະຜູ້ເປັນເຈົ້າ ແລະ ວິທີທີ່ພຣະອົງເອື້ອມອອກມາຫາທ່ານແນວໃດ. ຍົກຕົວຢ່າງ, ໂຮເສອາ 2:14–23 ແລະ ໂຮເສອາ14 ສິດສອນທ່ານຫຍັງແດ່ກ່ຽວກັບຄວາມຮັກ ແລະ ຄວາມເມດຕາຂອງພຣະຜູ້ເປັນເຈົ້າ? ທ່ານຈະສະແດງໃຫ້ພຣະອົງເຫັນເຖິງຄວາມຮັກ ແລະ ຄວາມຈົງຮັກພັກດີຂອງທ່ານແນວໃດ?
ເບິ່ງ Dieter F. Uchtdorf, “Point of Safe Return,” Liahona, May 2007, 99–101 ນຳອີກ.
ນາງໂກເມທີ່ເປັນບາບ, ຜູ້ຊຶ່ງເປັນຕົວແທນໃຫ້ແກ່ຊາວອິດສະຣາເອນ, ໄດ້ຮັບຂໍ້ສະເໜີທີ່ຈະໄຖ່ຖອນບາບໃຫ້ໂດຍພຣະຜູ້ເປັນເຈົ້າ. ຮູບພາບໂດຍ ແດບ ມິນນາດ, ໄດ້ຮັບອະນຸຍາດຈາກ goodsalt.com
ໂຮເສອາ 6:4–7; ໂຢເອນ 2:12–13
ການອຸທິດຕົນຕໍ່ພຣະເຈົ້າຈະຕ້ອງຮູ້ສຶກຢູ່ພາຍໃນ, ບໍ່ແມ່ນການສະແດງອອກພາຍນອກເທົ່ານັ້ນ.
ພຣະຜູ້ເປັນເຈົ້າໄດ້ບັນຊາຜູ້ຄົນຂອງພຣະອົງໃຫ້ຖວາຍສັດເປັນເຄື່ອງບູຊາ. ແຕ່ເຖິງແມ່ນວ່າຜູ້ຄົນຢູ່ໃນວັນເວລາຂອງໂຮເສອາໄດ້ເຊື່ອຟັງກົດນັ້ນ, ແຕ່ພວກເຂົາຍັງລະເມີດພຣະບັນຍັດທີ່ສຳຄັນກວ່າ (ເບິ່ງ ໂຮເສອາ 6:4–7). ທ່ານຄິດວ່າ ພຣະຜູ້ເປັນເຈົ້າ “ຕ້ອງການໃຫ້ພວກເຈົ້າຮັກເຮົາຢ່າງຈິງໃຈ, ບໍ່ແມ່ນນຳສັດມາຖວາຍບູຊາ; ເຮົາຢາກໃຫ້ປະຊາຊົນຂອງເຮົາຮູ້ຈັກເຮົາ ຫລາຍກວ່າທີ່ຈະເຜົາຖວາຍແກ່ເຮົາ” ໝາຍຄວາມວ່າແນວໃດ? (ໂຮເສອາ 6:6). ທ່ານຄິດວ່າຄວາມຊອບທຳທີ່ເປັນຄືກ້ອນເມກ ຫລື ນ້ຳໝອກນັ້ນໝາຍຄວາມວ່າແນວໃດ? ຄວາມຊອບທຳຂອງເຮົາຄວນເປັນຄືແບບໃດ? (ເບິ່ງ ເອຊາຢາ 48:18; 1 ນີໄຟ 2:9–10).
ທ່ານກໍສາມາດອ່ານ ມັດທາຍ 9:10–13; 12:1–8 ນຳອີກ ເພື່ອຈະໄດ້ເຫັນວິທີທີ່ພຣະຜູ້ຊ່ວຍໃຫ້ລອດໄດ້ໃຊ້ ໂຮເສອາ 6:6 ລະຫວ່າງການປະຕິບັດສາດສະໜາກິດຂອງພຣະອົງ. ຂໍ້ພຣະຄຳພີເຫລົ່ານີ້ຊ່ວຍທ່ານໃຫ້ເຂົ້າໃຈຖ້ອຍຄຳຂອງໂຮເສອາແນວໃດ?
ເມື່ອອ່ານ ໂຢເອນ 2:12–13, ມັນອາດຊ່ວຍໃຫ້ຮູ້ວ່າ ຜູ້ຄົນສີກ ຫລື ການຈີກເສື້ອຜ້າຂອງຕົນເປັນຮີດຄອງພາຍນອກເຖິງການໄວ້ທຸກ ຫລື ສຳນຶກຜິດ (ຍົກຕົວຢ່າງ, ເບິ່ງ 2 ຂ່າວຄາວ 34:14–21, 27). ການສີກໃຈຂອງເຮົາແຕກຕ່າງຈາກການສີກເສື້ອຜ້າຂອງເຮົາແນວໃດ?
ເບິ່ງ ເອຊາຢາ 1:11–17; ມັດທາຍ 23:23; 1 ໂຢຮັນ 3:17–18 ນຳອີກ.
“ເຮົາຈະເທວິນຍານຂອງເຮົາແກ່ຄົນທັງປວງ.”
ເມື່ອໂຢເອນໄດ້ທຳນາຍເຖິງ “ວັນຂອງພຣະຜູ້ເປັນເຈົ້າ,” ເພິ່ນໄດ້ບັນຍາຍວ່າ “ວັນນັ້ນຈະມືດຄຶ້ມ ແລະ ມືດມົວຫລາຍ,” “ຮ້າຍແຮງ ແລະ ໜ້າຢ້ານກົວແທ້ໆ” (ໂຢເອນ 2:1–2, 11). ອິດສະຣາເອນໄດ້ປະເຊີນກັບວັນທີ່ຮ້າຍແຮງ ແລະ ໜ້າຢ້ານກົວຫລາຍເທື່ອຕະຫລອດປະຫວັດສາດຂອງມັນ, ແລະ ຜູ້ຄົນແຫ່ງພັນທະສັນຍາຂອງພຣະເຈົ້າຈະປະເຊີນຫລາຍກວ່ານັ້ນໃນອະນາຄົດ. ແມ່ນຫຍັງທີ່ປະທັບໃຈທ່ານກ່ຽວກັບຄຳແນະນຳທີ່ພຣະຜູ້ເປັນເຈົ້າໄດ້ມອບໃຫ້ ຢູ່ໃນ ໂຢເອນ 2:12–17? ພ້ອມນີ້ກໍໃຫ້ສັງເກດເບິ່ງພອນທີ່ພຣະອົງໄດ້ສັນຍາຢູ່ໃນ ໂຢເອນ 2:18–32 ນຳອີກ. ເປັນຫຍັງພອນທີ່ສັນຍາຢູ່ໃນ ຂໍ້ທີ 27–32 ຈຶ່ງມີຄ່າຫລາຍໂດຍສະເພາະໃນວັນທີ່ຄືກັນກັບວັນທີ່ບັນຍາຍຢູ່ໃນ ໂຢເອນ 2, ລວມທັງວັນຂອງເຮົາ?
ທ່ານຄິດວ່າ ພຣະຜູ້ເປັນເຈົ້າຈະ “ເທວິນຍານ [ຂອງພຣະອົງ] ແກ່ຄົນທັງປວງ” ໝາຍຄວາມວ່າແນວໃດ? (ໂຢເອນ 2:28). ຄຳທຳນາຍຢູ່ໃນ ໂຢເອນ 2:28–29 ກຳລັງເກີດເປັນຈິງແນວໃດ? (ເບິ່ງ ກິດຈະການ 2:1–21; ໂຈເຊັບ ສະມິດ—ປະຫວັດ 1:41.)
ທ່ານອາດຢາກໄຕ່ຕອງຂໍ້ຄວາມເຫລົ່ານີ້ຈາກປະທານຣະໂຊ ເອັມ ແນວສັນ: “ໃນວັນຂ້າງໜ້າ ວິນຍານຂອງເຮົາກໍອາດຈະບໍ່ລອດ ຖ້າເຮົາບໍ່ມີອິດທິພົນຂອງພຣະວິນຍານບໍລິສຸດ ຄອຍຊີ້ນຳທິດທາງ ແລະ ໃຫ້ຄວາມປອບໂຍນ” (“Revelation for the Church, Revelation for Our Lives,” Liahona, May 2018, 96). ເປັນຫຍັງການເປີດເຜີຍຈຶ່ງສຳຄັນຕໍ່ຄວາມຢູ່ລອດທາງວິນຍານຂອງເຮົາ? ທ່ານຈະເພີ່ມຄວາມສາມາດຂອງທ່ານເພື່ອຮັບເອົາການເປີດເຜີຍສ່ວນຕົວໄດ້ແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ໂຮເສອາ 2:19–20.ພຣະຜູ້ເປັນເຈົ້າໄດ້ໃຊ້ການປຽບທຽບເລື່ອງການແຕ່ງງານເພື່ອບັນຍາຍຄວາມສຳພັນໃນພັນທະສັນຍາຂອງພຣະອົງກັບຊາວອິດສະຣາເອນ (ເບິ່ງ ຄູ່ມືພຣະຄຳພີ, “ເຈົ້າບ່າວ,” scriptures.ChurchofJesusChrist.org ນຳອີກ). ຄອບຄົວຂອງທ່ານສາມາດສົນທະນາກ່ຽວກັບວ່າ ເປັນຫຍັງການແຕ່ງງານຈຶ່ງສາມາດເອົາມາປຽບທຽບໃສ່ກັບພັນທະສັນຍາຂອງເຮົາກັບພຣະເຈົ້າແນວໃດ. ໂຮເສອາ 2:19–20 ຊ່ວຍເຮົາໃຫ້ເຂົ້າໃຈວິທີທີ່ພຣະເຈົ້າຮູ້ສຶກກ່ຽວກັບເຮົາແນວໃດ? ເຮົາຈະຊື່ສັດຕໍ່ພັນທະສັນຍາຂອງເຮົາກັບພຣະອົງແນວໃດ?
-
ໂຮເສອາ 10:12.ເດັກນ້ອຍອາດມັກແຕ້ມຮູບນາລິກາ ແລະ ວາງແຜນວິທີທີ່ພວກເຂົາສາມາດສະແຫວງຫາພຣະຜູ້ເປັນເຈົ້າໃນຫລາຍເວລາຕະຫລອດມື້.
-
ໂຢເອນ 2:12–13.ເພື່ອຊ່ວຍຄອບຄົວຂອງທ່ານໃຫ້ເວົ້າລົມກັນກ່ຽວກັບ ໂຢເອນ 2:12–13, ທ່ານສາມາດວາງຮູບພຣະຜູ້ຊ່ວຍໃຫ້ລອດໄວ້ຢູ່ເບື້ອງໜຶ່ງໃນຫ້ອງ ແລະ ໃຫ້ວາງເຈ້ຍທີ່ຂຽນຄຳວ່າ ບາບ ໄວ້ຢູ່ອີກເບື້ອງໜຶ່ງ. ເຊື້ອເຊີນສະມາຊິກໃນຄອບຄົວໃຫ້ປ່ຽນຜຽນກັນຫລຽວເບິ່ງຄຳວ່າບາບ ແລ້ວໃຫ້ຫັນໜ້າໄປຫາຮູບພຣະຜູ້ຊ່ວຍໃຫ້ລອດ ຂະນະທີ່ເຂົາເຈົ້າແບ່ງປັນສິ່ງທີ່ຊ່ວຍເຮົາໃຫ້ຫັນໄປຫາພຣະອົງຈົນ “ສຸດໃຈ [ຂອງເຮົາ].” ຊຸກຍູ້ສະມາຊິກໃນຄອບຄົວໃຫ້ຄິດກ່ຽວກັບທຸກດ້ານຂອງຊີວິດຂອງເຂົາເຈົ້າ, ລວມທັງກິດຈະກຳ, ການງານ, ໂຮງຮຽນ, ແລະ ຄວາມສຳພັນ.
-
ໂຢເອນ 2:28–29.ຄຳວ່າພຣະວິນຍານຈະຖືກ “ເທ” ໃສ່ເຮົາ ໝາຍຄວາມວ່າແນວໃດ? ບາງທີທ່ານສາມາດສາທິດກ່ຽວກັບສິ່ງນີ້ໄດ້ ໂດຍການເທນ້ຳ ແລະ ແລ້ວໃຫ້ປຽບທຽບມັນໃສ່ກັບການຢອດນ້ຳ ຫລື ການຊິດນ້ຳ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.
ການປັບປຸງການສິດສອນຂອງເຮົາ
ສິດສອນຄໍາສອນ. “ຢ່າພາດໂອກາດທີ່ຈະເຕົ້າໂຮມລູກໆ ເພື່ອຮຽນຮູ້ຄຳສອນຂອງພຣະເຢຊູຄຣິດ. ໂອກາດເຊັ່ນນັ້ນຫາຍາກ ເມື່ອປຽບທຽບໃສ່ກັບຄວາມພະຍາຍາມຂອງສັດຕູ” (Henry B. Eyring, “The Power of Teaching Doctrine,” Ensign, May 1999, 74).
Come unto Me [ຈົ່ງມາຫາເຮົາ], ໂດຍ ແຄວລີ ພູກ