“ວັນທີ 31 ເດືອນຕຸລາ–ວັນທີ 6 ເດືອນພະຈິກ. ດານີເອນ 1–6: ‘ບໍ່ມີພະອື່ນໃດທີ່ສາມາດຊ່ວຍກູ້ເອົາໄດ້ຢ່າງນີ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 31 ເດືອນຕຸລາ–ວັນທີ 6 ເດືອນພະຈິກ. ດານີເອນ 1–6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Daniel Interprets Nebuchadnezzar’s Dream [ດານີເອນແປຄວາມຝັນຂອງເນບູກາດເນັດຊາ], ໂດຍ ກະແຣ້ນ ຣອມນີ ຄະລໍສັນ
ວັນທີ 31 ເດືອນຕຸລາ–ວັນທີ 6 ເດືອນພະຈິກ
ດານີເອນ 1–6
“ບໍ່ມີພະອື່ນໃດທີ່ສາມາດຊ່ວຍກູ້ເອົາໄດ້ຢ່າງນີ້”
ແອວເດີ ຣິເຈີດ ຈີ ສະກາດ ໄດ້ອະທິບາຍວ່າ ການບັນທຶກການດົນໃຈ “ສະແດງໃຫ້ເຫັນວ່າການສື່ສານຂອງພຣະເຈົ້າແມ່ນສັກສິດຕໍ່ເຮົາ. ການບັນທຶກຈະສົ່ງເສີມຄວາມສາມາດຂອງເຮົາໃຫ້ຈື່ຈຳການເປີດເຜີຍ” (“How to Obtain Revelation and Inspiration for Your Personal Life,” Ensign ຫລື Liahona, May 2012, 46).
ບັນທຶກຄວາມປະທັບໃຈຂອງທ່ານ
ຄົງບໍ່ມີໃຜເວົ້າ ຂູ່ທ່ານວ່າຈະໂຍນທ່ານລົງໃນເຕົາໄຟ ຫລື ລົງໃນຖ້ຳສິງ ເພາະສັດທາຂອງທ່ານໃນພຣະເຢຊູຄຣິດ. ແຕ່ບໍ່ມີໃຜໃນພວກເຮົາທີ່ຈະຜ່ານຜ່າຊີວິດນີ້ໄປໄດ້ປາດສະຈາກການຖືກທົດລອງສັດທາ. ເຮົາທຸກຄົນສາມາດໄດ້ຮັບຜົນປະໂຫຍດຈາກຕົວຢ່າງຂອງຜູ້ຄົນເຊັ່ນ ດານີເອນ, ຊັດຣາກ, ເມຊາກ, ແລະ ອາເບັດເນໂກ, ຜູ້ຖືກພາໄປເປັນຊະເລີຍຕອນເປັນຊາຍໜຸ່ມ ໂດຍຈັກກະພັດບາບີໂລນທີ່ຍິ່ງໃຫຍ່ (ເບິ່ງ 2 ກະສັດ 24:10–16). ຊາຍໜຸ່ມເຫລົ່ານີ້ຖືກອ້ອມຮອບດ້ວຍວັດທະນະທຳທີ່ແປກຕ່າງ ພ້ອມດ້ວຍຄຸນຄ່າທີ່ແຕກຕ່າງ, ແລະ ພວກເຂົາໄດ້ປະເຊີນກັບການລໍ້ລວງຢ່າງໜັກເພື່ອໃຫ້ປະຖິ້ມຄວາມເຊື່ອ ແລະ ປະເພນີທີ່ຊອບທຳຂອງພວກເຂົາ. ແຕ່ພວກເຂົາໄດ້ຍຶດໝັ້ນຢູ່ກັບພັນທະສັນຍາຂອງພວກເຂົາ. ຄືກັນກັບໂຢເຊັບໃນປະເທດເອຢິບ ແລະ ນາງເອສະເທີໃນປະເທດເປີເຊຍ, ດານີເອນ ແລະ ໝູ່ເພື່ອນຂອງລາວໃນນະຄອນບາບີໂລນໄດ້ຮັກສາສັດທາຂອງພວກເຂົາໃນພຣະເຈົ້າ, ແລະ ພຣະເຈົ້າກໍໄດ້ທຳການອັດສະຈັນທີ່ຍັງໃຫ້ການດົນໃຈຜູ້ທີ່ເຊື່ອໃນທຸກວັນນີ້ຢູ່.
ພວກເຂົາພົບເຫັນພະລັງທີ່ຈະຍຶດໝັ້ນຢູ່ຢ່າງຊື່ສັດໄດ້ແນວໃດ? ພວກເຂົາໄດ້ເຮັດສິ່ງເລັກນ້ອຍ ແລະ ລຽບງ່າຍເຫລົ່ານັ້ນທີ່ພຣະເຈົ້າໄດ້ຂໍໃຫ້ເຮົາທຸກຄົນເຮັດ—ການອະທິຖານ, ການຖືສິນອົດເຂົ້າ, ການເລືອກໝູ່ເພື່ອນທີ່ດີ, ການໄວ້ວາງໃຈໃນພຣະເຈົ້າ, ແລະ ການເປັນແສງສະຫວ່າງໃຫ້ກັບຄົນອື່ນ. ຂະນະທີ່ເຮົາໄດ້ຮັບຄວາມເຂັ້ມແຂງໂດຍການເຮັດສິ່ງເລັກນ້ອຍ ແລະ ລຽບງ່າຍເຫລົ່ານີ້, ເຮົາສາມາດປະເຊີນກັບຝູງສິງ ແລະ ເຕົາໄຟຮ້ອນໃນຊີວິດດ້ວຍສັດທາຂອງເຮົາເອງໄດ້.
ສຳລັບພາບລວມຂອງພຣະທຳດານີເອນ, ໃຫ້ເບິ່ງ “Daniel, book of” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ດານີເອນ 1; 3; 6
ເຮົາສາມາດໄວ້ວາງໃຈໃນພຣະຜູ້ເປັນເຈົ້າເມື່ອສັດທາຂອງເຮົາຖືກທົດລອງ.
ຖ້າຈະເວົ້າແລ້ວ, ເຮົາທຸກຄົນກໍມີຊີວິດຢູ່ໃນບາບີໂລນ. ໂລກທີ່ຢູ່ອ້ອມຮອບເຮົາເຕັມໄປດ້ວຍການລໍ້ລວງຫລາຍຢ່າງ ເພື່ອໃຫ້ລົດມາດຕະຖານຂອງເຮົາ ແລະ ໃຫ້ເຮົາສົງໄສສັດທາຂອງເຮົາໃນພຣະເຢຊູຄຣິດ. ຂະນະທີ່ທ່ານອ່ານ ດານີເອນ 1, 3, ແລະ 6, ໃຫ້ສັງເກດເບິ່ງວິທີທີ່ດານີເອນ, ຊັດຣາກ, ເມຊາກ, ແລະ ອາເບັດເນໂກຖືກກົດດັນໃຫ້ເຮັດສິ່ງທີ່ພວກເຂົາຮູ້ວ່າບໍ່ຖືກຕ້ອງແນວໃດ. ທ່ານເຄີຍຖືກກົດດັນໃຫ້ລົດຄວາມເຊື່ອຂອງທ່ານບໍ? ທ່ານຮຽນຮູ້ຫຍັງແດ່ຈາກຊາຍເຫລົ່ານີ້ ທີ່ສາມາດຊ່ວຍທ່ານໃຫ້ໄວ້ວາງໃຈໃນພຣະຜູ້ເປັນເຈົ້າ ເມື່ອທ່ານປະເຊີນກັບສິ່ງກົງກັນຂ້າມ?
ພຣະທຳດານີເອນ ແລະ ພຣະຄຳພີອື່ນໆບັນທຶກປະສົບການທີ່ສັດທາໄດ້ນຳພາໄປຫາການອັດສະຈັນທີ່ຍິ່ງໃຫຍ່. ແຕ່ຖ້າຫາກສັດທາຂອງເຮົາບໍ່ນຳພາເຮົາໄປຫາການອັດສະຈັນທີ່ເຮົາສະແຫວງຫາ ແລ້ວຈະເປັນແນວໃດ? (ເບິ່ງ, ຍົກຕົວຢ່າງ, ແອວມາ 14:8–13). ອີງຕາມສິ່ງທີ່ທ່ານອ່ານຢູ່ໃນ ດານີເອນ 3:13–18, ທ່ານຄິດວ່າຊັດຣາກ, ເມຊາກ, ແລະ ອາເບັດເນໂກຈະຕອບຄຳຖາມນີ້ແນວໃດ? ຕົວຢ່າງຂອງພວກເຂົາມີຜົນກະທົບຕໍ່ວິທີທີ່ທ່ານປະເຊີນກັບການທົດລອງສັດທາຂອງທ່ານແນວໃດ? ສຳລັບລາຍລະອຽດເພີ່ມເຕີມກ່ຽວກັບຂໍ້ເຫລົ່ານີ້, ໃຫ້ເບິ່ງຂ່າວສານຂອງແອວເດີ ເດັນນິສ໌ ອີ ຊິມມັນສ໌ “But If Not…” (Ensign ຫລື Liahona, May 2004, 73–75).
ພຣະທຳດານີເອນກໍຍັງສະແດງໃຫ້ເຫັນວິທີທີ່ການເລືອກທີ່ຊອບທຳຂອງບຸກຄົນສາມາດນຳພາໄປຫາຄົນອື່ນທີ່ມີສັດທາອັນຍິ່ງໃຫຍ່ໃນພຣະຜູ້ເປັນເຈົ້າໄດ້. ຕົວຢ່າງໃດແດ່ເຖິງເລື່ອງນີ້ທີ່ທ່ານພົບເຫັນຢູ່ໃນ ບົດທີ 1, 3, ແລະ 6? ໃຫ້ໄຕ່ຕອງເຖິງການເລືອກຂອງທ່ານ ອາດມີຜົນກະທົບຕໍ່ຄົນອື່ນແນວໃດ (ເບິ່ງ ມັດທາຍ 5:16).
ເບິ່ງ Dieter F. Uchtdorf, “Be Not Afraid, Only Believe,” Ensign ຫລື Liahona, Nov. 2015, 76–79; David R. Stone, “Zion in the Midst of Babylon,” Ensign ຫລື Liahona, May 2006, 90–93 ນຳອີກ.
ຮູບພາບດານີເອນ ແລະ ໝູ່ເພື່ອນຂອງລາວປະຕິເສດອາຫານຂອງກະສັດ, ໂດຍ ບຣາຍແອນ ຄອລ໌
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນອານາຈັກຂອງພຣະເຈົ້າຢູ່ເທິງແຜ່ນດິນໂລກ.
ຜ່ານທາງການເປີດເຜີຍ, ດານີເອນໄດ້ເຫັນວ່າຄວາມຝັນຂອງເນບູກາດເນັດຊາ ບອກລ່ວງໜ້າເຖິງອານາຈັກຢູ່ໃນໂລກໃນອະນາຄົດ, ຕະຫລອດທັງອານາຈັກຂອງພຣະເຈົ້າໃນອະນາຄົດ, ຊຶ່ງ “ຈະບໍ່ສູນຫາຍໄປຈັກເທື່ອ” (ດານີເອນ 2:44). “ສາດສະໜາຈັກນີ້ຄືອານາຈັກຍຸກສຸດທ້າຍທີ່ຖືກທຳນາຍໄວ້,” ແອວເດີ ດີ ທອດ ຄຣິດສະໂຕເຟີສັນ ໄດ້ສິດສອນ, “ທີ່ມະນຸດບໍ່ໄດ້ສ້າງຂຶ້ນມາ ແຕ່ຖືກຈັດຕັ້ງຂຶ້ນມາໂດຍພຣະເຈົ້າແຫ່ງສະຫວັນ ແລະ ຈະກິ້ງອອກໄປດັ່ງກ້ອນຫີນທີ່ແຕກອອກມາຈາກໜ້າຜາໂດຍບໍ່ມີຜູ້ໃດເຮັດ ຈົນເຕັມແຜ່ນດິນໂລກ” (“Why the Church,” Ensign ຫລື Liahona, Nov. 2015, 111). ໃຫ້ຄິດກ່ຽວກັບອານາຈັກຂອງພຣະເຈົ້າໃນຍຸກສຸດທ້າຍ ຂະນະທີ່ທ່ານອ່ານຄຳບັນຍາຍກ່ຽວກັບກ້ອນຫີນ ຢູ່ໃນ ດານີເອນ 2:34–35, 44–45. ແມ່ນຫຍັງທີ່ຄ້າຍຄືກັນທີ່ທ່ານເຫັນລະຫວ່າງກ້ອນຫີນ ແລະ ອານາຈັກ? ທ່ານເຫັນອານາຈັກຂອງພຣະເຈົ້າເຕັມຢູ່ເທິງແຜ່ນດິນໂລກໃນທຸກວັນນີ້ແນວໃດ?
ເບິ່ງ Gordon B. Hinckley, “The Stone Cut Out of the Mountain,” Ensign ຫລື Liahona, Nov. 2007, 83–86; L.Whitney Clayton, “The Time Shall Come,” Ensign ຫລື Liahona, Nov. 2011, 11–13 ນຳອີກ.
ພຣະຜູ້ຊ່ວຍໃຫ້ລອດຈະຄ້ຳຊູເຮົາໃນການທົດລອງຂອງເຮົາ.
ຄວາມຮູ້ຢ່າງໃດແດ່ທີ່ມາສູ່ທ່ານ ຂະນະທີ່ທ່ານອ່ານກ່ຽວກັບບຸກຄົນທີສີ່ ທີ່ປະກົດຢູ່ໃນເຕົາໄຟກັບຊັດຣາກ, ເມຊາກ, ແລະ ອາເບັດເນໂກ? ເລື່ອງນີ້ຊ່ວຍທ່ານໃນການທົດລອງທີ່ທ່ານປະເຊີນແນວໃດ? ທ່ານສາມາດພົບເຫັນຄວາມຮູ້ເພີ່ມເຕີມຢູ່ໃນ ໂມໄຊຢາ 3:5–7; ແອວມາ 7:11–13; ຄຳສອນ ແລະ ພັນທະສັນຍາ 61:36–37; 121:5–8.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ດານີເອນ 1–2.ຂະນະທີ່ພວກທ່ານອ່ານ ດານີເອນ 1 ແລະ 2 ນຳກັນ, ພວກທ່ານສາມາດຊອກຫາພອນທີ່ດານີເອນ ແລະ ໝູ່ເພື່ອນຂອງລາວໄດ້ຮັບ ໂດຍການຫລີກເວັ້ນຈາກການກິນອາຫານ ແລະ ເຫລົ້າຂອງກະສັດ. (ເບິ່ງ ວິດີໂອ “God Gave Them Knowledge,” ChurchofJesusChrist.org.) ພວກທ່ານສາມາດປຽບທຽບພອນເຫລົ່ານີ້ໃສ່ກັບຄຳສັນຍາຂອງພຣະຜູ້ເປັນເຈົ້າ ຂະນະທີ່ເຮົາຮັກສາພຣະບັນຍັດຂອງພຣະອົງ, ດັ່ງເຊັ່ນພຣະວາຈາແຫ່ງປັນຍາ (ເບິ່ງ ຄຳສອນ ແລະ ພັນທະສັນຍາ 89:18–21). ພຣະຜູ້ເປັນເຈົ້າໄດ້ອວຍພອນເຮົາເພາະການດຳລົງຊີວິດຕາມພຣະວາຈາແຫ່ງປັນຍາແນວໃດ?
-
ດານີເອນ 3.ທ່ານຈະສາມາດຊ່ວຍເຫລືອຄອບຄົວຂອງທ່ານໃຫ້ຮຽນຮູ້ກ່ຽວກັບເລື່ອງລາວຢູ່ໃນ ດານີເອນ 3 ໄດ້ແນວໃດ? “ຊັດຣາກ, ເມຊາກ, ແລະ ອາເບັດເນໂກ” ໃນ ເລື່ອງພຣະຄຳພີເດີມ ສາມາດຊ່ວຍໄດ້. ແມ່ນຫຍັງທີ່ປະທັບໃຈເຮົາກ່ຽວກັບຊັດຣາກ, ເມຊາກ, ແລະ ອາເບັດເນໂກ? ມີສະຖານະການໃດແດ່ທີ່ເຮົາປະເຊີນ ທີ່ທ້າທາຍ ແລະ ຮຽກຮ້ອງເຮົາໃຫ້ສະແດງວ່າເຮົາໄວ້ວາງໃຈໃນພຣະເຈົ້າ?
-
ດານີເອນ 6:1–23.ຄອບຄົວຂອງທ່ານອາດມັກຫລິ້ນສະແດງບາງສ່ວນຂອງເລື່ອງລາວຢູ່ໃນ ດານີເອນ 6:1–23 (ຍົກຕົວຢ່າງ, ຂໍ້ທີ 10–12 ຫລື 16–23). ເຮົາຮຽນຮູ້ຫຍັງແດ່ຈາກຕົວຢ່າງຂອງດານີເອນ? ເຮົາສາມາດເຮັດຫຍັງໄດ້ແດ່ເພື່ອຈະໄດ້ກາຍເປັນເໝືອນດັ່ງລາວຫລາຍຂຶ້ນ?
-
ດານີເອນ 6:25–27.ອີງຕາມຂໍ້ເຫລົ່ານີ້, ມັນມີຜົນກະທົບຕໍ່ກະສັດດາຣິອຸດແນວໃດ ເມື່ອພຣະຜູ້ເປັນເຈົ້າໄດ້ປົດປ່ອຍດານີເອນຈາກຝູງສິງ? ທ່ານກໍສາມາດອ່ານຢູ່ໃນ ດານີເອນ 2:47; 3:28–29 ນຳອີກ ກ່ຽວກັບຜົນກະທົບໃນທາງທີ່ຄ້າຍຄືກັນນີ້ຕໍ່ກະສັດເນບູກາດເນັດຊາ. ມີໂອກາດໃດແດ່ທີ່ເຮົາສາມາດເປັນອິດທິພົນໃຫ້ກັບຄົນອື່ນ? ໃຫ້ສົນທະນາຕົວຢ່າງທີ່ທ່ານພົບເຫັນເຖິງວິທີທີ່ສັດທາຂອງຄົນອື່ນ, ລວມທັງສະມາຊິກໃນຄອບຄົວ, ໄດ້ເປັນອິດທິພົນໃຫ້ກັບຄົນອື່ນໃນທາງທີ່ດີແນວໃດ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.
ການປັບປຸງການສິດສອນຂອງເຮົາ
ສິດສອນຄໍາສອນ. ພຣະກິດຕິຄຸນຂອງພຣະຜູ້ເປັນເຈົ້າແມ່ນງົດງາມ ໃນຄວາມລຽບງ່າຍຂອງມັນ (ເບິ່ງ ຄຳສອນ ແລະ ພັນທະສັນຍາ 133:57). ກິດຈະກຳ ແລະ ການສົນທະນາທີ່ລຽບງ່າຍກ່ຽວກັບຄຳສອນ ສາມາດເຊື້ອເຊີນພຣະວິນຍານບໍລິສຸດໃຫ້ນຳຂ່າວສານພຣະກິດຕິຄຸນເຂົ້າສູ່ຈິດໃຈຂອງຄອບຄົວທ່ານໄດ້.
Daniel in the Lion’s Den [ດານີເອນຢູ່ໃນຖ້ຳສິງ], 1872. ຣິວິແອ ບຣິທັນ (1840–1920). ການຮັບຮູ້: ຫໍສະແດງສິລະປະ ວອກເກີ, ຮູບພາບຈາກຫໍພິພິດທະພັນແຫ່ງຊາດ ລີເວີພູນ/ບຣີຈ໌ແມນ