“ວັນທີ 24–30 ເດືອນຕຸລາ. ເອເຊກຽນ 1–3; 33–34; 36–37; 47: ‘ເຮົາຈະໃຫ້ພວກເຂົາມີຄວາມຄິດໃໝ່,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 24–30 ເດືອນຕຸລາ. ເອເຊກຽນ 1–3; 33–34; 36–37; 47,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Come, Follow Me [ຈົ່ງຕາມເຮົາມາ], ໂດຍ ສະກາດ ຊຳເນີ
ວັນທີ 24–30 ເດືອນຕຸລາ
ເອເຊກຽນ 1–3; 33–34; 36–37; 47
“ເຮົາຈະໃຫ້ພວກເຂົາມີຄວາມຄິດໃໝ່”
ເອເຊກຽນໄດ້ຖືກເຊື້ອເຊີນໃຫ້ “ກິນ” ພຣະຄຳຂອງພຣະເຈົ້າແບບເປັນການປຽບທຽບ—ເພື່ອໃຫ້ເພິ່ນເຕັມໄປດ້ວຍພຣະຄຳ (ເບິ່ງ ເອເຊກຽນ 2:9–3:3, 10). ທ່ານຈະໃຫ້ຕົວເອງເຕັມໄປດ້ວຍພຣະຄຳຂອງພຣະເຈົ້າໃນອາທິດນີ້ໄດ້ແນວໃດ?
ບັນທຶກຄວາມປະທັບໃຈຂອງທ່ານ
ເອເຊກຽນເປັນສາດສະດາຜູ້ຖືກເນລະເທດ. ພ້ອມກັບຊາວອິດສະຣາເອນຄົນອື່ນໆ, ເພິ່ນໄດ້ຖືກຈັບໄປ ແລະ ຖືກສົ່ງໄປທີ່ບາບີໂລນເປັນເວລາຫລາຍປີ ກ່ອນເຢຣູຊາເລັມໄດ້ຖືກທຳລາຍໃນທີ່ສຸດ. ໃນເຢຣູຊາເລັມ, ເອເຊກຽນຄົງໄດ້ເປັນປະໂລຫິດຮັບໃຊ້ຢູ່ໃນພຣະວິຫານ. ໃນບາບີໂລນ, ເພິ່ນໄດ້ຢູ່ກັບບັນດາ “ພວກຊະເລີຍ,” ແລະ ເພິ່ນ “ໄດ້ພັກເຊົາຢູ່ທີ່ນັ້ນ” (ເອເຊກຽນ 3:15), ເປັນໄລຍະໄກຫລາຍຮ້ອຍກິໂລແມັດຈາກພຣະວິຫານ ແລະ ມີຄວາມຫວັງໜ້ອຍທີ່ຈະໄດ້ກັບຄືນສູ່ບ້ານທີ່ຮັກຂອງພຣະເຈົ້າ. ແລ້ວມື້ໜຶ່ງເອເຊກຽນໄດ້ມີພາບນິມິດ. ເພິ່ນໄດ້ເຫັນ “ສະຫງ່າລາສີຂອງພຣະຜູ້ເປັນເຈົ້າ” (ເອເຊກຽນ 1:28)—ບໍ່ແມ່ນຢູ່ໃນພຣະວິຫານທີ່ເຢຣູຊາເລັມ ແຕ່ໃນບາບີໂລນໃນບັນດາຜູ້ຖືກເນລະເທດ. ເພິ່ນໄດ້ເຫັນວ່າ ຄວາມຊົ່ວຢູ່ໃນເຢຣູຊາເລັມຮ້າຍແຮງທີ່ສຸດ ຈົນວ່າພຣະເຈົ້າບໍ່ປະທັບຢູ່ທີ່ນັ້ນອີກຕໍ່ໄປ (ເບິ່ງ ເອເຊກຽນ 8–11; 33:21).
ໜ້າທີ່ຢ່າງໜຶ່ງຂອງເອເຊກຽນແມ່ນທີ່ຈະເຕືອນຊາວອິດສະຣາເອນກ່ຽວກັບຜົນສະທ້ອນຂອງການກະບົດຂອງພວກເຂົາ—ເປັນຄຳເຕືອນທີ່ຜູ້ຄົນສ່ວນຫລາຍບໍ່ສົນໃຈ. ແຕ່ຂ່າວສານຂອງເອເຊກຽນມີຫລາຍກວ່ານັ້ນ: ເພິ່ນໄດ້ທຳນາຍວ່າ, ເຖິງແມ່ນສະຖານະການຈະຮ້າຍແຮງເທົ່າໃດກໍຕາມ, ແຕ່ກໍມີທາງຫວນກັບຄືນມາໄດ້ຢູ່. ຖ້າຫາກຜູ້ຄົນຂອງພຣະເຈົ້າຮັບເອົາຄຳເຊື້ອເຊີນທີ່ຈະ “ຮັບຟັງພຣະຄຳຂອງພຣະຜູ້ເປັນເຈົ້າ” (ເອເຊກຽນ 37:4), ແລ້ວ ສິ່ງທີ່ຄັ້ງໜຶ່ງເຄີຍຕາຍໄປ ຈະຄືນມີຊີວິດອີກ. “ໃຈແຂງດັ່ງຫີນ” ສາມາດປ່ຽນເປັນ “ຈິດໃຈໃໝ່” ໄດ້ (ເອເຊກຽນ 36:26). “[ເຮົາ] ຈະເປົ່າລົມຫາຍໃຈເຂົ້າໄປໃນເຈົ້າ,” ພຣະຜູ້ເປັນເຈົ້າໄດ້ບອກພວກເຂົາ, “ແລະ ພວກເຈົ້າຈະຄືນມີຊີວິດອີກ” (ເອເຊກຽນ 37:14). ແລະ ໃນວັນເວລາສຸດທ້າຍ, ພຣະຜູ້ເປັນເຈົ້າຈະສະຖາປະນາພຣະວິຫານຫລັງໃໝ່ ແລະ ເຢຣູຊາເລັມໃໝ່ຂຶ້ນ, “ຕັ້ງແຕ່ນີ້ຕໍ່ໄປຊື່ຂອງນະຄອນນີ້ແມ່ນ, ພຣະຜູ້ເປັນເຈົ້າສະຖິດຢູ່ທີ່ນີ້” (ເອເຊກຽນ 48:35).
ແນວຄິດສຳລັບການສຶກສາພຣະຄຳພີເປັນສ່ວນຕົວ
“ເຈົ້າຈະຕ້ອງບອກສິ່ງທີ່ເຮົາບອກເຈົ້າໃຫ້ກ່າວ.”
ການອ່ານກ່ຽວກັບການເອີ້ນຂອງເອເຊກຽນສູ່ການປະຕິບັດສາດສະໜາກິດຢູ່ໃນ ເອເຊກຽນ 1–3 ອາດກະຕຸ້ນທ່ານໃຫ້ຄິດກ່ຽວກັບໂອກາດທີ່ພຣະເຈົ້າໄດ້ມອບໃຫ້ທ່ານ ເພື່ອ “ສິ່ງທີ່ [ພຣະອົງ] ບອກໃຫ້ກ່າວ” ກັບຄົນອື່ນ (ເອເຊກຽນ 3:4). ໃນ ເອເຊກຽນ 2–3, ໃຫ້ສັງເກດເບິ່ງພຣະຄຳຂອງພຣະອົງ ໃນການຊຸກຍູ້ ແລະ ແນະນຳເອເຊກຽນ. ເຖິງແມ່ນວ່າຜູ້ຄົນທີ່ທ່ານຮັບໃຊ້ອາດບໍ່ກະບົດຄືກັນກັບຜູ້ຄົນຂອງເອເຊກຽນ, ໃຫ້ພິຈາລະນາວິທີທີ່ພຣະຄຳຂອງພຣະເຈົ້າຕໍ່ເອເຊກຽນມີຜົນກະທົບຕໍ່ວິທີທີ່ທ່ານທົບທວນການຮັບໃຊ້ຂອງທ່ານໃນສາດສະໜາຈັກ, ແລະ ໃນບ່ອນອື່ນໆແນວໃດ.
ເບິ່ງ ເອເຊກຽນ 33:1–9; D. Todd Christofferson, “The Voice of Warning,” Ensign ຫລື Liahona, May 2017, 108–11 ນຳອີກ.
ພຣະຜູ້ເປັນເຈົ້າປະສົງທີ່ຈະໃຫ້ອະໄພ.
“ຖ້າຫາກ … ບາບກຳຂອງພວກເຮົາຢູ່ເທິງພວກເຮົາ,” ຊາວອິດສະຣາເອນທີ່ເປັນຊະເລີຍຄິດສົງໄສ, “ເຮັດແນວໃດພວກເຮົາຈຶ່ງຈະມີຊີວິດຢູ່ໄດ້?” (ເອເຊກຽນ 33:10). ໃນການຕອບຄຳຖາມນັ້ນ, ພຣະຜູ້ເປັນເຈົ້າໄດ້ສິດສອນພວກເຂົາເຖິງຄວາມຈິງທີ່ສຳຄັນກ່ຽວກັບການກັບໃຈ ແລະ ການໃຫ້ອະໄພ. ຄຳຖາມເຫລົ່ານີ້ອາດຊ່ວຍທ່ານໃຫ້ໄຕ່ຕອງຄວາມຈິງເຫລົ່ານີ້:
-
ທ່ານຄິດວ່າ “ໄວ້ວາງໃຈໃນຄວາມຊອບທຳ [ຂອງທ່ານ] ເອງ” ໝາຍຄວາມວ່າແນວໃດ? (ເບິ່ງ ເອເຊກຽນ 33:12–13).
-
ທ່ານຈະເວົ້າແນວໃດກັບບາງຄົນທີ່ຮູ້ສຶກວ່າ ຄົນຊອບທຳ ແລະ ຄົນຊົ່ວຮ້າຍທີ່ບັນຍາຍຢູ່ໃນ ເອເຊກຽນ 33:12–19 ບໍ່ໄດ້ຖືກປະຕິບັດຕໍ່ແບບຍຸດຕິທຳ? (ເບິ່ງ ມັດທາຍ 21:28–31; ລູກາ 18:9–14) ນຳອີກ.
-
ວະລີຂໍ້ໃດແດ່ທີ່ທ່ານພົບເຫັນຢູ່ໃນຂໍ້ເຫລົ່ານີ້ ທີ່ຊ່ວຍທ່ານໃຫ້ເຂົ້າໃຈເຖິງຄວາມໝາຍຂອງການກັບໃຈ? ຄວາມຮູ້ເພີ່ມເຕີມຢ່າງໃດແດ່ທີ່ທ່ານພົບເຫັນຢູ່ໃນ ເອເຊກຽນ 36:26–27 ແລະ ແອວມາ 7:14–16?
ພຣະຜູ້ເປັນເຈົ້າເຊື້ອເຊີນເຮົາໃຫ້ລ້ຽງແກະຂອງພຣະອົງ.
ໃນ ເອເຊກຽນ 34, ພຣະຜູ້ເປັນເຈົ້າອ້າງເຖິງບັນດາຜູ້ນຳຜູ້ຄົນຂອງພຣະອົງ ວ່າເປັນ “ຜູ້ລ້ຽງແກະ.” ຂະນະທີ່ທ່ານອ່ານ, ໃຫ້ພິຈາລະນາສິ່ງທີ່ຫົວຂໍ້ນີ້ແນະນຳທ່ານກ່ຽວກັບວ່າການເປັນຜູ້ນຳໝາຍຄວາມວ່າແນວໃດ. ແມ່ນໃຜແມ່ນ “ຝູງແກະ” ທີ່ພຣະຜູ້ເປັນເຈົ້າປະສົງໃຫ້ທ່ານລ້ຽງດູ? ທ່ານຈະເຮັດຕາມຕົວຢ່າງທີ່ພຣະຜູ້ຊ່ວຍໃຫ້ລອດຕັ້ງໄວ້ສຳລັບຜູ້ລ້ຽງແກະໄດ້ແນວໃດ? (ເບິ່ງ ຂໍ້ທີ 11–31).
ເບິ່ງ ໂຢຮັນ 21:15–17 ນຳອີກ.
ເອເຊກຽນໄດ້ເຫັນພາບນິມິດ ວ່ານ້ຳໄດ້ໄຫລອອກມາຈາກພຣະວິຫານ ແລະ ປິ່ນປົວທະເລຕາຍ.
ພຣະຜູ້ເປັນເຈົ້າກຳລັງເຕົ້າໂຮມຜູ້ຄົນຂອງພຣະອົງ ແລະ ກຳລັງມອບຊີວິດໃໝ່ໃຫ້ພວກເຂົາ.
ການເຕົ້າໂຮມອິດສະຣາເອນຖືກສະແດງໃຫ້ເຫັນຢູ່ໃນ ເອເຊກຽນ 37 ຜ່ານທາງສັນຍາລັກສອງຢ່າງ. ຂະນະທີ່ທ່ານອ່ານກ່ຽວກັບຢ່າງທີໜຶ່ງ—ກະດູກຫລ້ອນຖືກເຮັດໃຫ້ຄືນມີຊີວິດອີກ (ເບິ່ງ ຂໍ້ທີ 1–14)—ໃຫ້ໄຕ່ຕອງເຖິງສິ່ງທີ່ທ່ານໄດ້ຮຽນຮູ້ກ່ຽວກັບການເຕົ້າໂຮມອິດສະຣາເອນຢູ່ທັງສອງຟາກມ່ານ (ເບິ່ງ ເອເຊກຽນ 36:24–30 ນຳອີກ).
ສັນຍາລັກຢ່າງທີສອງ (ເບິ່ງ ຂໍ້ທີ 15–28) ກ່ຽວພັນກັບໄມ້ສອງທ່ອນ, ຊຶ່ງນັກປາດອາຈານຫລາຍຄົນແປຄວາມໝາຍວ່າເປັນແຜ່ນໄມ້ສອງແຜ່ນທີ່ຕໍ່ເຂົ້າກັນດ້ວຍບານພັບ. ທ່ອນໄມ້ແຫ່ງຢູດາສາມາດເປັນຕົວແທນໃຫ້ແກ່ພຣະຄຣິສຕະທຳຄຳພີ (ເນື່ອງດ້ວຍວ່າພຣະຄຣິສຕະທຳຄຳພີສ່ວນຫລາຍຖືກຂຽນໂດຍລູກຫລານຂອງຢູດາ), ແລະ ທ່ອນໄມ້ຂອງໂຢເຊັບສາມາດເປັນຕົວແທນໃຫ້ພຣະຄຳພີມໍມອນ (ເນື່ອງດ້ວຍວ່າຄອບຄົວຂອງລີໄຮເປັນລູກຫລານຂອງໂຢເຊັບແຫ່ງເອຢິບ). ໂດຍທີ່ມີສິ່ງນີ້ຢູ່ໃນໃຈ, ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບບົດບາດຂອງພຣະຄຳພີໃນການເຕົ້າໂຮມອິດສະຣາເອນ? 2 ນີໄຟ 3:11–13 (ຄຳທຳນາຍກ່ຽວກັບໂຈເຊັບ ສະມິດ ແລະ ພຣະຄຳພີມໍມອນ) ຊ່ວຍທ່ານໃຫ້ເຂົ້າໃຈຫລາຍຂຶ້ນແນວໃດແດ່?
ເບິ່ງ 2 ນີໄຟ 29:14; “The Book of Mormon Gathers Scattered Israel” (ວິດີໂອ, ChurchofJesusChrist.org) ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເອເຊກຽນ 33:1–5.ເພື່ອສາທິດຂໍ້ເຫລົ່ານີ້, ສະມາຊິກໃນຄອບຄົວຄົນໜຶ່ງສາມາດທຳທ່າເປັນ “ຄົນຍາມ” ໂດຍການຫລຽວເບິ່ງອອກໄປທາງປ່ອງຢ້ຽມ ແລະ ບອກຄົນອື່ນໆໃນຄອບຄົວວ່າ ມີຫຍັງກຳລັງເກີດຂຶ້ນຢູ່ຂ້າງນອກ. ສາດສະດາທີ່ມີຊີວິດຢູ່ຂອງເຮົາເປັນຄືກັນກັບຄົນຍາມຂອງເຮົາແນວໃດ?
-
ເອເຊກຽນ 33:15–16.ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບການໃຫ້ອະໄພ ທີ່ເຮົາສາມາດໄດ້ຮັບຜ່ານທາງພຣະເຢຊູຄຣິດ?
-
ເອເຊກຽນ 36:26–27.ໃຫ້ສະແດງກ້ອນຫີນສອງສາມກ້ອນໃຫ້ຄອບຄົວຂອງທ່ານເບິ່ງ ຂະນະທີ່ພວກທ່ານສົນທະນາເຖິງຄວາມໝາຍຂອງການມີ “ໃຈແຂງດັ່ງຫີນ.” ປ່ອຍໃຫ້ເຂົາເຈົ້າແນະນຳຄຳທີ່ບັນຍາຍເຖິງ “ຈິດໃຈໃໝ່” ແລະ “ຄວາມຄິດໃໝ່” ທີ່ພຣະຜູ້ຊ່ວຍໃຫ້ລອດມອບໃຫ້ເຮົາ (ເບິ່ງ ໂມໄຊຢາ 3:19; 5:2).
-
ເອເຊກຽນ 37:15–28.ສະມາຊິກໃນຄອບຄົວສາມາດຊອກຫາໄມ້ສອງທ່ອນ ແລະ ຂຽນໃສ່ທ່ອນໜຶ່ງວ່າ ສຳລັບຢູດາ (ພຣະຄຣິສຕະທຳຄຳພີ) ແລະ ໃສ່ອີກທ່ອນໜຶ່ງວ່າ ສຳລັບໂຢເຊັບ (ພຣະຄຳພີມໍມອນ) (ເບິ່ງ ຂໍ້ທີ 16–19). ແລ້ວເຂົາເຈົ້າສາມາດແບ່ງປັນເລື່ອງເລົ່າ ຫລື ຂໍ້ພຣະຄຳພີຈາກພຣະຄຣິສຕະທຳຄຳພີ ແລະ ພຣະຄຳພີມໍມອນ ທີ່ຊ່ວຍເຂົາເຈົ້າຮູ້ສຶກໃກ້ຊິດກັບພຣະຜູ້ຊ່ວຍໃຫ້ລອດ ແລະ ກາຍເປັນ “ຜູ້ຄົນ [ຂອງພຣະອົງ]” (ຂໍ້ທີ 23).
-
ເອເຊກຽນ 47:1–12.ຂໍ້ເຫລົ່ານີ້ບັນຍາຍພາບນິມິດຂອງເອເຊກຽນ ກ່ຽວກັບນ້ຳທີ່ໄຫລອອກມາຈາກພຣະວິຫານ ແລະ ປິ່ນປົວທະເລຕາຍ—ທະເລທີ່ເຄັມທີ່ສຸດ ຈົນວ່າປາ ແລະ ພືດພັນບໍ່ສາມາດມີຊີວິດຢູ່ໃນນັ້ນໄດ້. ເດັກນ້ອຍອາດມັກແຕ້ມຮູບກ່ຽວກັບພາບນິມິດນີ້. ນ້ຳທີ່ໄຫລອອກມາຈາກພຣະວິຫານເປັນສັນຍາລັກເຖິງສິ່ງໃດ? (ເບິ່ງ ວິດີໂອ “And the River Will Grow,” ChurchofJesusChrist.org). ພຣະວິຫານຊ່ວຍປິ່ນປົວເຮົາໄດ້ແນວໃດ? (ເບິ່ງ ເອເຊກຽນ 47:8–9, 11).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.
ການປັບປຸງການສິດສອນຂອງເຮົາ
ຢ່າພະຍາຍາມສອນທຸກສິ່ງ. ທ່ານອາດບໍ່ສາມາດຄົ້ນພົບຄວາມຈິງທຸກຢ່າງໃນເອເຊກຽນກັບຄອບຄົວຂອງທ່ານ. ໃຫ້ສະແຫວງຫາການນຳພາທາງວິນຍານ ເພື່ອພິຈາລະນາວ່າຄວນເອົາໃຈໃສ່ຕໍ່ສິ່ງໃດ. (ເບິ່ງ Teaching in the Savior’s Way, 7.)
“ມີນ້ຳໄຫລອອກມາຈາກລຸ່ມທາງປະຕູເຂົ້າພຣະວິຫານ.… ແລະ ເມື່ອມັນໄຫລໄປທີ່ໃດ ກໍຈະນຳຊີວິດໄປສູ່ທີ່ນັ້ນ” (ເອເຊກຽນ 47:1, 9). ຮູບພາບຖືກນຳໃຊ້ໂດຍໄດ້ຮັບອະນຸຍາດຈາກ shutterstock.com.