“ວັນທີ 3–9 ເດືອນຕຸລາ. ເອຊາຢາ 58–66: ‘ພຣະຜູ້ໄຖ່ຈະມາທີ່ຊີໂອນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 3–9 ເດືອນຕຸລາ. ເອຊາຢາ 58–66,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Jesus in the Synagogue at Nazareth [ພຣະເຢຊູຢູ່ໃນທຳມະສາລາທີ່ນາຊາເຣັດ], ໂດຍ ກະເຣກ ເຄ ອໍເຊັນ
ວັນທີ 3–9 ເດືອນຕຸລາ
ເອຊາຢາ 58–66
“ພຣະຜູ້ໄຖ່ຈະມາທີ່ຊີໂອນ”
ຂະນະທີ່ທ່ານສຶກສາ ເອຊາຢາ 58–66, ໃຫ້ພິຈາລະນາວິທີທີ່ຖ້ອຍຄຳຂອງເອຊາຢານຳຄວາມສຸກ ແລະ ຄວາມຫວັງມາໃຫ້ອະນາຄົດແນວໃດ.
ບັນທຶກຄວາມປະທັບໃຈຂອງທ່ານ
ໃນຕອນຕົ້ນຂອງການປະຕິບັດສາດສະໜາກິດຢູ່ໃນໂລກຂອງພຣະອົງ, ພຣະເຢຊູຄຣິດໄດ້ໄປຢ້ຽມຢາມທຳມະສາລາໃນນາຊາເຣັດ, ຊຶ່ງເປັນໝູ່ບ້ານບ່ອນທີ່ພຣະອົງໄດ້ເຕີບໃຫຍ່ຂຶ້ນ. ຢູ່ທີ່ນັ້ນພຣະອົງໄດ້ຢືນອ່ານຈາກພຣະຄຳພີ, ເປີດໄປຫາພຣະທຳເອຊາຢາ, ແລະ ອ່ານສິ່ງທີ່ໃນປະຈຸບັນຮູ້ຈັກກັນວ່າ ເອຊາຢາ 61:1–2. ແລ້ວພຣະອົງໄດ້ປະກາດວ່າ, “ພຣະທຳຕອນນີ້ໄດ້ສຳເລັດເປັນຈິງໃນວັນນີ້ ຕາມທີ່ພວກເຈົ້າໄດ້ຍິນນັ້ນແຫລະ.” ນີ້ຄືສິ່ງໜຶ່ງທີ່ພຣະຜູ້ຊ່ວຍໃຫ້ລອດໄດ້ປະກາດຢ່າງກົງໄປກົງມາວ່າ ພຣະອົງຄືຜູ້ທີ່ຖືກເຈີມໄວ້, ຜູ້ທີ່ຈະ “ປິ່ນປົວຫົວໃຈທີ່ຊອກຊ້ຳ” ແລະ “ປະກາດອິດສະລະແກ່ຄົນທັງຫລາຍທີ່ຖືກຈ່ອງຈຳ” (ເບິ່ງ ລູກາ 4:16–21). ພຣະຄຳພີຂໍ້ນີ້ໄດ້ສຳເລັດຄົບຖ້ວນໃນມື້ນັ້ນແທ້ໆ. ແລະ, ເຊັ່ນດຽວກັບຄຳທຳນາຍຫລາຍໆຂໍ້ຂອງເອຊາຢາ, ມັນສືບຕໍ່ເກີດເປັນຈິງໃນວັນເວລາຂອງເຮົາ. ພຣະຜູ້ຊ່ວຍໃຫ້ລອດສືບຕໍ່ປິ່ນປົວຫົວໃຈທີ່ຊອກຊ້ຳ ຜູ້ທີ່ມາຫາພຣະອົງ. ກໍຍັງມີຫລາຍຄົນທີ່ຖືກຈ່ອງຈຳ ຊຶ່ງການເປັນອິດສະລະຈະຕ້ອງຖືກປະກາດແກ່ພວກເຂົາ. ແລະ ກໍມີອະນາຄົດທີ່ຮຸ່ງເຫລື້ອມຖືກຈັດຕຽມໄວ້ແລ້ວສຳລັບ—ເວລາເມື່ອພຣະຜູ້ເປັນເຈົ້າຈະ “ສ້າງຟ້າສະຫວັນໃໝ່ ແລະ ແຜ່ນດິນໂລກໃໝ່” (ເອຊາຢາ 65:17) ແລະ “ຈະໄດ້ຊ່ວຍຄົນຂອງພຣະອົງ ແລະ ທຸກຊົນຊາດກໍຈະຍ້ອງຍໍສັນລະເສີນພຣະອົງ” (ເອຊາຢາ 61:11). ການອ່ານເອຊາຢາເປີດຕາເຮົາໃຫ້ເຫັນສິ່ງທີ່ພຣະຜູ້ເປັນເຈົ້າໄດ້ກະທຳຜ່ານມາ, ສິ່ງທີ່ພຣະອົງກຳລັງກະທຳຢູ່, ແລະ ສິ່ງທີ່ພຣະອົງຍັງບໍ່ໄດ້ກະທຳເທື່ອສຳລັບຜູ້ຄົນຂອງພຣະອົງ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ການຖືສິນອົດເຂົ້ານຳພອນມາໃຫ້.
ຂໍ້ເຫລົ່ານີ້ແນະນຳວ່າ ຕໍ່ຊາວອິດສະຣາເອນໃນສະໄໝບູຮານຢ່າງຫລວງຫລາຍ, ຖືວ່າການຖືສິນອົດເຂົ້າເປັນພາລະ ແທນທີ່ຈະເປັນພອນ. ພວກເຮົາຫລາຍຄົນກໍຮູ້ສຶກແນວນັ້ນຄືກັນເປັນບາງຄັ້ງ. ຖ້າຫາກທ່ານຢາກພົບເຫັນຄວາມໝາຍ ແລະ ຈຸດປະສົງໃນການຖືສິນອົດເຂົ້າຂອງທ່ານ, ໃຫ້ອ່ານ ເອຊາຢາ 58:3–12 ເພື່ອຊອກຫາຄຳຕອບຂອງພຣະຜູ້ເປັນເຈົ້າໃຫ້ກັບຄຳຖາມທີ່ວ່າ “ເປັນຫຍັງເຮົາຈຶ່ງຖືສິນອົດເຂົ້າ?” ໃນປະສົບການຂອງທ່ານ, ການຖືສິນອົດເຂົ້າສາມາດ “ແກ້ໂສ້ແຫ່ງການກົດຂີ່” ແລະ “ປົດແອກທັງໝົດ” ໄດ້ແນວໃດ? (ເອຊາຢາ 58:6). ການຖືສິນອົດເຂົ້າໄດ້ນຳພອນທີ່ບັນຍາຍຢູ່ໃນ ເອຊາຢາ 58:8–12 ມາໃຫ້ທ່ານແນວໃດ? ເອຊາຢາ 58:3–12 ມີຜົນກະທົບຕໍ່ວິທີທີ່ທ່ານຄິດກ່ຽວກັບການຖືສິນອົດເຂົ້າແນວໃດ?
ໃນຂ່າວສານຂອງເພິ່ນ “Is Not This the Fast That I Have Chosen?” (Liahona, May 2015, 22–25), ປະທານເຮັນຣີ ບີ ໄອຣິງ ໄດ້ແບ່ງປັນຫລາຍຕົວຢ່າງເຖິງວິທີທີ່ຜູ້ຄົນໄດ້ຮັບພອນໂດຍການຖືສິນອົດເຂົ້າ ແລະ ການບໍລິຈາກເງິນຖືສິນອົດເຂົ້າ. ທ່ານເຄີຍເຫັນພອນທີ່ຄ້າຍຄືກັນໃນຊີວິດຂອງທ່ານແນວໃດ?
ເບິ່ງ Gospel Topics, “Fasting and Fast Offerings” (topics.ChurchofJesusChrist.org) ນຳອີກ.
ເອຊາຢາ 59:9–21; 61:1–3; 63:1–9
ພຣະເຢຊູຄຣິດເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ.
ໃນ ເອຊາຢາ 58–66 ທ່ານຈະພົບເຫັນແຫລ່ງອ້າງອີງຫລາຍຂໍ້ກ່ຽວກັບພາລະກິດແຫ່ງການຊົດໃຊ້ຂອງພຣະເຢຊູຄຣິດ. ຕໍ່ໄປນີ້ແມ່ນສອງສາມຕົວຢ່າງ, ພ້ອມທັງບາງຄຳຖາມເພື່ອຊ່ວຍທ່ານໄຕ່ຕອງກ່ຽວກັບມັນ.
-
ເອຊາຢາ 59:9–21. ທ່ານຈະສະຫລຸບສະພາບທາງວິນຍານຂອງຜູ້ຄົນທີ່ບັນຍາຍຢູ່ໃນ ຂໍ້ທີ 9–15 ວ່າແນວໃດ? ແມ່ນຫຍັງທີ່ປະທັບໃຈທ່ານກ່ຽວກັບການບັນຍາຍກ່ຽວກັບ “ຜູ້ຊ່ວຍ” ໃນ ຂໍ້ທີ 16–21 ແລະ ພັນທະສັນຍາທີ່ພຣະອົງກະທຳກັບຜູ້ທີ່ຫັນກັບມາຫາພຣະອົງ?
-
ເອຊາຢາ 61:1–3. ພຣະເຢຊູຄຣິດໄດ້ອວຍພອນທ່ານໃນວິທີທີ່ບັນຍາຍຢູ່ໃນຂໍ້ເຫລົ່ານີ້ແນວໃດ? “ຂ່າວດີ” ຢ່າງໃດແດ່ທີ່ພຣະອົງໄດ້ນຳມາໃຫ້ທ່ານ? ພຣະອົງໄດ້ມອບຄວາມງາມແທນເຖົ່າຖ່ານໃຫ້ແກ່ທ່ານແນວໃດ?
-
ເອຊາຢາ 63:7–9. “ຄຸນຄວາມດີຂອງພຣະຜູ້ເປັນເຈົ້າ” ຢ່າງໃດແດ່ທີ່ທ່ານສາມາດກ່າວເຖິງ? ມີຄວາມຮູ້ສຶກຢ່າງໃດແດ່ເຖິງພຣະຜູ້ຊ່ວຍໃຫ້ລອດທີ່ຂໍ້ເຫລົ່ານີ້ໄດ້ດົນໃຈທ່ານ?
ມີແຫລ່ງອ້າງອີງຢ່າງໃດແດ່ເຖິງພຣະຜູ້ຊ່ວຍໃຫ້ລອດທີ່ທ່ານພົບເຫັນຢູ່ໃນ ເອຊາຢາ 58–66?
ເບິ່ງ ໂມໄຊຢາ 3:7; ຄຳສອນ ແລະ ພັນທະສັນຍາ 133:46–53 ນຳອີກ.
“ພຣະຜູ້ເປັນເຈົ້າຈະເປັນແສງແຈ້ງສືບໄປ” (ເອຊາຢາ 60:19). A Gift of Light [ຂອງປະທານທີ່ເປັນແສງແຈ້ງ], ໂດຍ ອີວາ ທິມະຕີ
“ພຣະຜູ້ເປັນເຈົ້າຈະເປັນແສງແຈ້ງສືບໄປ.”
ເອຊາຢາ 60 ແລະ 62 ກ່າວເຖິງແສງສະຫວ່າງ ແລະ ຄວາມມືດ, ຕາ ແລະ ການຫລຽວເຫັນ, ເພື່ອສິດສອນກ່ຽວກັບວິທີທີ່ພຣະກິດຕິຄຸນຂອງພຣະເຢຊູຄຣິດຈະເປັນພອນໃຫ້ແກ່ໂລກໃນວັນເວລາສຸດທ້າຍ. ໃຫ້ຊອກຫາແນວຄິດເຫລົ່ານີ້ ໂດຍສະເພາະໃນ ເອຊາຢາ 60:1–5, 19–20; 62:1–2. ຂະນະທີ່ທ່ານອ່ານບົດເຫລົ່ານີ້, ໃຫ້ໄຕ່ຕອງວິທີທີ່ພຣະເຈົ້າກຳລັງເຕົ້າໂຮມລູກໆຂອງພຣະອົງຈາກຄວາມມືດ ໃຫ້ມາຫາແສງສະຫວ່າງຂອງພຣະອົງ. ແມ່ນຫຍັງຄືບົດບາດຂອງທ່ານໃນວຽກງານນີ້?
ເບິ່ງ 1 ນີໄຟ 22:3–12; 3 ນີໄຟ 18:24; ຄຳສອນ ແລະ ພັນທະສັນຍາ 14:9; Bonnie H. Cordon, “That They May See,” Liahona, May 2020, 78–80 ນຳອີກ.
ພຣະຄຣິດຈະປົກຄອງແຜ່ນດິນໂລກລະຫວ່າງຊ່ວງໜຶ່ງພັນປີ.
ເອຊາຢາໄດ້ກ່າວເຖິງວັນເວລາ ເມື່ອ “ຄວາມເດືອດຮ້ອນໃນອະດີດຈະໝົດໄປ” (ເອຊາຢາ 65:16). ຂະນະທີ່ຄຳທຳນາຍນີ້ມີຄວາມໝາຍເຖິງການບັນລຸຫລາຍຢ່າງ, ໃນຄວາມໝາຍທີ່ແທ້ຈິງຂອງມັນ, ວັນນັ້ນຍັງບໍ່ມາເຖິງເທື່ອ—ເມື່ອພຣະເຢຊູຄຣິດຈະກັບຄືນມາສູ່ໂລກ ແລະ ສະຖາປະນາຍຸກສະໄໝທີ່ສະຫງົບສຸກ ແລະ ຄວາມຊອບທຳ ທີ່ເອີ້ນວ່າ ຊ່ວງໜຶ່ງພັນປີ. ເອຊາຢາໄດ້ບັນຍາຍວັນເວລາໃນອະນາຄົດຢູ່ໃນ ເອຊາຢາ 64:1–5; 65:17–25; 66. ໃຫ້ສັງເກດເບິ່ງວິທີທີ່ເພິ່ນໄດ້ໃຊ້ຄຳເຊັ່ນ “ຍິນດີ” ແລະ “ຊົມຊື່ນຍິນດີ.” ໃຫ້ໄຕ່ຕອງວ່າເປັນຫຍັງການສະເດັດກັບມາຂອງພຣະຜູ້ຊ່ວຍໃຫ້ລອດ ຈະເປັນວັນທີ່ຊົມຊື່ນຍິນດີສຳລັບທ່ານ. ທ່ານສາມາດເຮັດຫຍັງແດ່ເພື່ອກຽມພ້ອມສຳລັບການສະເດັດມາຂອງພຣະອົງ?
ເບິ່ງ ຫລັກແຫ່ງຄວາມເຊື່ອ 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Apr. 2020, 13–17 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເອຊາຢາ 58:3–11.ສະມາຊິກໃນຄອບຄົວອາດເຂົ້າໃຈຂ່າວສານຂອງເອຊາຢາໄດ້ດີກວ່າເກົ່າກ່ຽວກັບການຖືສິນອົດເຂົ້າ ຖ້າຫາກເຂົາເຈົ້າຫລິ້ນສະແດງຕາມການຖືສິນອົດເຂົ້າທີ່ບັນຍາຍຢູ່ໃນ ເອຊາຢາ 58:3–5 ແລະ ຕາມການຖືສິນອົດເຂົ້າທີ່ບັນຍາຍຢູ່ໃນ ເອຊາຢາ 58:6–8. ເຮົາຈະເຮັດໃຫ້ການຖືສິນອົດເຂົ້າຂອງເຮົາ ເປັນຄືກັນກັບ “ການຖືສິນອົດເຂົ້າທີ່ [ພຣະເຈົ້າ] ຕ້ອງການໄດ້ແນວໃດ”? ພອນຢ່າງໃດແດ່ທີ່ທ່ານໄດ້ເຫັນຈາກການຖືສິນອົດເຂົ້າ?
-
ເອຊາຢາ 58:13–14.ແມ່ນຫຍັງຄືຄວາມແຕກຕ່າງລະຫວ່າງ “[ເຮົາ] ມ່ວນຊື່ນເບີກບານໃຈ” ກັບ “ຊົມຊື່ນຍິນດີ … ໃນພຣະຜູ້ເປັນເຈົ້າ” ໃນວັນຊະບາໂຕ? ເຮົາຈະເຮັດໃຫ້ວັນຊະບາໂຕເປັນວັນທີ່ “ຊົມຊື່ນຍິນດີ” ໄດ້ແນວໃດ?
-
ເອຊາຢາ 60:1–5.ຂະນະທີ່ທ່ານອ່ານ ເອຊາຢາ 60:1–3, ສະມາຊິກໃນຄອບຄົວສາມາດເປີດໄຟ ເມື່ອຂໍ້ໃດກ່າວເຖິງແສງສະຫວ່າງ ແລະ ປິດໄຟເມື່ອຂໍ້ໃດກ່າວເຖິງຄວາມມືດ. ພຣະກິດຕິຄຸນຂອງພຣະເຢຊູຄຣິດເປັນຄືກັນກັບແສງສະຫວ່າງຕໍ່ເຮົາແນວໃດ? ເອຊາຢາເຫັນລ່ວງໜ້າວ່າຈະມີຫຍັງເກີດຂຶ້ນ ເມື່ອຜູ້ຄົນຂອງພຣະເຈົ້າແບ່ງປັນແສງສະຫວ່າງຂອງພຣະກິດຕິຄຸນ? (ເບິ່ງ ເອຊາຢາ 60:3–5).
-
ເອຊາຢາ 61:1–3.ພຣະຜູ້ຊ່ວຍໃຫ້ລອດໄດ້ສຳເລັດຄຳທຳນາຍຂອງເອຊາຢາຢູ່ໃນຂໍ້ເຫລົ່ານີ້ແນວໃດ? ທ່ານສາມາດເຊື້ອເຊີນສະມາຊິກໃນຄອບຄົວໃຫ້ຊອກຫາຮູບພຣະຜູ້ຊ່ວຍໃຫ້ລອດທີ່ສະແດງເຖິງລັກສະນະພາລະກິດເຫລົ່ານີ້ຂອງພຣະອົງ (ຮູບພາບມີຢູ່ໃນວາລະສານຂອງສາດສະໜາຈັກ ຫລື ຢູ່ໃນ ປຶ້ມຮູບພາບພຣະກິດຕິຄຸນ). ພວກທ່ານກໍສາມາດຮ້ອງເພງກ່ຽວກັບວິທີທີ່ພຣະຜູ້ຊ່ວຍໃຫ້ລອດອວຍພອນເຮົານຳອີກ, ດັ່ງເຊັ່ນ “ນັບພຣະພອນຂອງທ່ານ” (ເພງສວດ ແລະ ເພງຂອງເດັກນ້ອຍ, 8).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສຶກສາສ່ວນຕົວ
ກະກຽມສິ່ງທີ່ຢູ່ອ້ອມຮອບ. ສິ່ງທີ່ຢູ່ອ້ອມຮອບເຮົາສາມາດມີຜົນກະທົບຕໍ່ຄວາມສາມາດທີ່ຈະຮຽນຮູ້ຂອງເຮົາໄດ້. ໃຫ້ຊອກຫາບ່ອນສຶກສາພຣະຄຳພີທີ່ທ່ານສາມາດຮູ້ສຶກເຖິງອິດທິພົນຂອງພຣະວິນຍານ. (ເບິ່ງ Teaching in the Savior’s Way, 15.)
“ຈົ່ງລຸກຂຶ້ນ, ສ່ອງແຈ້ງດັ່ງດວງຕາເວັນ, ພຣະຜູ້ເປັນເຈົ້າຈະໃຫ້ສະຫງ່າລາສີສ່ອງໃສ່ເຈົ້າ” (ເອຊາຢາ 60:1). Light and Life [ແສງສະຫວ່າງ ແລະ ຊີວິດ], ໂດຍ ມາກ ມາບຣີ