“ວັນທີ 17–23 ເດືອນຕຸລາ. ເຢເຣມີຢາ 30–33; 36; ເພງຄ່ຳຄວນ 1; 3: ‘ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 17–23 ເດືອນຕຸລາ. ເຢເຣມີຢາ 30–33; 36; ເພງຄ່ຳຄວນ 1; 3,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
The Cry of Jeremiah the Prophet [ການຄ່ຳຄວນຂອງສາດສະດາເຢເຣມີຢາ], ຈາກການແກະສະຫລັກໂດຍໂຮງຮຽນນາຊາຣີນ
ວັນທີ 17–23 ເດືອນຕຸລາ
ເຢເຣມີຢາ 30–33; 36; ເພງຄ່ຳຄວນ 1; 3
“ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ”
ຂະນະທີ່ທ່ານບັນທຶກຄວາມປະທັບໃຈຂອງທ່ານ, ໃຫ້ຄິດກ່ຽວກັບວິທີທີ່ຫລັກທຳຢູ່ໃນເຢເຣມີຢາ ແລະ ເພງຄ່ຳຄວນກ່ຽວຂ້ອງກັບສິ່ງທີ່ທ່ານໄດ້ຮຽນຮູ້ໃນພຣະຄຳພີເດີມແນວໃດ.
ບັນທຶກຄວາມປະທັບໃຈຂອງທ່ານ
ເມື່ອພຣະຜູ້ເປັນເຈົ້າໄດ້ເອີ້ນເຢເຣມີຢາເທື່ອທຳອິດເພື່ອໃຫ້ເປັນສາດສະດາ, ພຣະອົງໄດ້ບອກເພິ່ນວ່າ ພາລະກິດຂອງເພິ່ນຈະ “ຖອນຮາກ, ແລະ ຮື້ຖິ້ມ” (ເຢເຣມີຢາ 1:10)—ແລະ ໃນນະຄອນເຢຣູຊາເລັມ, ມີຄວາມຊົ່ວຮ້າຍຢ່າງຫລວງຫລາຍທີ່ຈະຕ້ອງຖອນຮາກ ແລະ ຮື້ຖິ້ມ. ແຕ່ນີ້ເປັນພຽງພາກສ່ວນໜຶ່ງເທົ່ານັ້ນໃນພາລະກິດຂອງເຢເຣມີຢາ—ເພິ່ນຍັງໄດ້ຖືກເອີ້ນ “ເພື່ອໃຫ້ກໍ່ສ້າງ, ແລະ ປູກຝັງ” ນຳອີກ (ເຢເຣມີຢາ 1:10). ຈະສ້າງ ຫລື ປູກຝັງຫຍັງຂຶ້ນໄດ້ແດ່ໃນບ່ອນຮົກຮ້າງ ທີ່ຖືກປະຖິ້ມໂດຍການກະບົດຂອງຊາວອິດສະຣາເອນ? ຄ້າຍຄືກັນນີ້, ເມື່ອການບາບ ຫລື ຄວາມຍາກລຳບາກໄດ້ເຮັດໃຫ້ຊີວິດຂອງເຮົາເສື່ອມເສຍ, ເຮັດແນວໃດເຮົາຈຶ່ງຈະສາມາດສ້າງ ຫລື ປູກຝັງມັນຄືນໄດ້ອີກ? ຄຳຕອບແມ່ນຢູ່ໃນ “ຜູ້ຊອບທຳຄົນໜຶ່ງຈາກເຊື້ອສາຍອິດສະຣາເອນ” (ເຢເຣມີຢາ 33:15), ພຣະເມຊີອາທີ່ສັນຍາໄວ້. ພຣະເມຊີອານຳ “ພັນທະສັນຍາໃໝ່” ມາໃຫ້ (ເຢເຣມີຢາ 31:31)—ພັນທະສັນຍາທີ່ຮຽກຮ້ອງຫລາຍກວ່າພຽງຄຳໝັ້ນສັນຍາ ຫລື ການອຸທິດຕົນທີ່ສະແດງອອກພາຍນອກເທົ່ານັ້ນ. ກົດຂອງພຣະອົງຈະຕ້ອງຢູ່ “ພາຍໃນ [ພວກເຮົາ],” ຖືກຂຽນໄວ້ “ໃນຫົວໃຈ [ຂອງພວກເຮົາ].” ນັ້ນຄືຄວາມໝາຍອັນແທ້ຈິງ ເພື່ອພຣະຜູ້ເປັນເຈົ້າຈະໄດ້ “ເປັນພຣະເຈົ້າ [ຂອງເຮົາ]” ແລະ ເພື່ອເຮົາຈະໄດ້ “ເປັນຜູ້ຄົນ [ຂອງພຣະອົງ]” (ເຢເຣມີຢາ 31:33). ມັນເປັນຂະບວນການຕະຫລອດຊີວິດ, ແລະ ເຮົາຈະຍັງເຮັດຄວາມຜິດພາດ ແລະ ມີສາເຫດທີ່ຈະເປັນທຸກເປັນບາງຄັ້ງບາງຄາວຢູ່. ແຕ່ເມື່ອເຮົາເຮັດ, ເຮົາຈະມີຄຳສັນຍານີ້ຈາກພຣະຜູ້ເປັນເຈົ້າ: “ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ” (ເຢເຣມີຢາ 31:13).
ສຳລັບພາບລວມຂອງເພງຄ່ຳຄວນ, ໃຫ້ເບິ່ງ “ເພງຄ່ຳຄວນ, ພຣະທຳ” ໃນຄູ່ມືພຣະກິດຕິຄຸນ (scriptures.ChurchofJesusChrist.org).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າຈະນຳພາຊາວອິດສະຣາເອນອອກຈາກການເປັນຊະເລີຍ ແລະ ເຕົ້າໂຮມພວກເຂົາ.
ໃນ ເຢເຣມີຢາ 30–31; 33 ພຣະຜູ້ເປັນເຈົ້າໄດ້ຮັບຮູ້ “ສຽງຮ້ອງໄຫ້ຄວນຄາງ, ແລະ ລະທົມຂົມຂື່ນ” (ເຢເຣມີຢາ 31:15) ທີ່ຊາວອິດສະຣາເອນໄດ້ປະເຊີນ ຂະນະທີ່ພວກເຂົາໄປສູ່ການເປັນຊະເລີຍ. ເຖິງຢ່າງໃດກໍຕາມ, ພຣະອົງກໍຍັງສະເໜີມອບຄຳປອບໂຍນ ແລະ ຄວາມຫວັງໃຫ້ຢູ່. ວະລີຂໍ້ໃດໃນບົດເຫລົ່ານີ້ທີ່ທ່ານຄິດວ່າ ຈະໃຫ້ຄວາມປອບໂຍນ ແລະ ຄວາມຫວັງແກ່ຊາວອິດສະຣາເອນໄດ້? ທ່ານພົບເຫັນຄຳສັນຍາໃດແດ່ຈາກພຣະຜູ້ເປັນເຈົ້າກັບຜູ້ຄົນຂອງພຣະອົງ? ຄຳສັນຍາເຫລົ່ານີ້ກ່ຽວຂ້ອງກັບທ່ານໃນທຸກວັນນີ້ແນວໃດ?
ເຢເຣມີຢາ 31:31–34; 32:37–42
“ພວກເຂົາຈະເປັນປະຊາຊົນຂອງເຮົາ, ແລະ ເຮົາຈະເປັນພຣະເຈົ້າຂອງພວກເຂົາ.”
ເຖິງແມ່ນວ່າຊາວອິດສະຣາເອນໄດ້ລະເມີດພັນທະສັນຍາຂອງພວກເຂົາກັບພຣະຜູ້ເປັນເຈົ້າ, ເຢເຣມີຢາໄດ້ທຳນາຍວ່າ ພຣະຜູ້ເປັນເຈົ້າຈະສະຖາປະນາ “ພັນທະສັນຍາໃໝ່” ແລະ “ເປັນນິດ” ກັບຜູ້ຄົນຂອງພຣະອົງອີກ (ເຢເຣມີຢາ 31:31; 32:40). ພັນທະສັນຍາໃໝ່ ແລະ ເປັນນິດຄື “ຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ [ເບິ່ງ ຄຳສອນ ແລະ ພັນທະສັນຍາ 66:2]. ມັນ ໃໝ່ ທຸກເທື່ອທີ່ມັນຖືກເປີດເຜີຍໃໝ່ ຫລັງຈາກໄລຍະຂອງການປະຖິ້ມຄວາມເຊື່ອ. ມັນ ເປັນນິດ ໃນແບບທີ່ວ່າ ມັນເປັນພັນທະສັນຍາຂອງພຣະເຈົ້າ ແລະ ມີຢູ່ໃນທຸກຍຸກຂອງພຣະກິດຕິຄຸນ ໃນບ່ອນທີ່ຜູ້ຄົນເຕັມໃຈທີ່ຈະຮັບເອົາມັນ” (ຄູ່ມືພຣະຄຳພີ, “ພັນທະສັນຍາໃໝ່ ແລະ ເປັນນິດ,” scriptures.ChurchofJesusChrist.org; ເນັ້ນຄຳເນີ້ງ).
ຂະນະທີ່ທ່ານອ່ານ ເຢເຣມີຢາ 31:31–34; 32:37–42, ໃຫ້ໄຕ່ຕອງຄວາມໝາຍຂອງມັນທີ່ມີຕໍ່ທ່ານ ໃນການເປັນພາກສ່ວນໃນຜູ້ຄົນແຫ່ງພັນທະສັນຍາຂອງພຣະເຈົ້າ. ຂໍ້ເຫລົ່ານີ້ມີຜົນກະທົບຕໍ່ວິທີທີ່ທ່ານທົບທວນຄວາມສຳພັນແຫ່ງພັນທະສັນຍາຂອງທ່ານກັບພຣະເຈົ້າແນວໃດ? ການມີກົດຂອງພຣະອົງຂຽນໄວ້ຢູ່ໃນໃຈຂອງທ່ານໝາຍຄວາມວ່າແນວໃດ? (ເບິ່ງ ເຢເຣມີຢາ 31:33).
ເບິ່ງ ເຢເຣມີຢາ 24:7; ເຮັບເຣີ 8:6–12 ນຳອີກ.
ພຣະຄຳພີສາມາດດົນໃຈເຮົາໃຫ້ກັບໃຈ ແລະ ຫັນມາຫາພຣະຜູ້ເປັນເຈົ້າ.
ພຣະຄຳພີມີພະລັງທີ່ຈະຫັນເຮົາໃຫ້ໜີຈາກຄວາມຊົ່ວຮ້າຍ.
ພຣະຜູ້ເປັນເຈົ້າໄດ້ບັນຊາເຢເຣມີຢາໃຫ້ບັນທຶກຄຳທຳນາຍໄວ້ໃນ “ເຈ້ຍມ້ວນໜຶ່ງ,” ຫລື ມ້ວນໜັງສື, ອະທິບາຍວ່າ ຖ້າຫາກຜູ້ຄົນຮັບຟັງຄຳທຳນາຍເຫລົ່ານີ້, “ບາງທີ … ພວກເຂົາອາດຈະຫັນຈາກທາງຊົ່ວຮ້າຍກໍໄດ້; ແລ້ວເຮົາກໍຈະຍົກໂທດຄວາມຊົ່ວຮ້າຍຂອງພວກເຂົາ” (ເຢເຣມີຢາ 36:2–3). ຂະນະທີ່ທ່ານອ່ານ ເຢເຣມີຢາ 36, ໃຫ້ຄິດທີ່ຈະສັງເກດເບິ່ງວິທີທີ່ຜູ້ຄົນດັ່ງຕໍ່ໄປນີ້ຮູ້ສຶກແນວໃດກ່ຽວກັບຄຳທຳນາຍເຫລົ່ານີ້:
ພຣະຜູ້ເປັນເຈົ້າ:
ເຢເຣມີຢາ:
ບາຣຸກ:
ເຢຮູດີ ແລະ ກະສັດເຢໂຮຍອາກິມ:
ເອນນາທານ, ເດລາອີຢາ, ແລະ ເກມາຣີຢາ:
ໃຫ້ໄຕ່ຕອງວິທີທີ່ທ່ານຮູ້ສຶກກ່ຽວກັບພຣະຄຳພີ ແລະ ບົດບາດຂອງມັນໃນຊີວິດຂອງທ່ານ. ມັນຊ່ວຍທ່ານໃຫ້ຫັນໜີຈາກຄວາມຊົ່ວຮ້າຍແນວໃດ?
ເບິ່ງ Julie B. Beck, “My Soul Delighteth in the Scriptures,” Ensign ຫລື Liahona, May 2004, 107–9 ນຳອີກ.
ພຣະຜູ້ເປັນເຈົ້າສາມາດບັນເທົາຄວາມໂສກເສົ້າທີ່ເຮົາປະເຊີນເພາະການບາບໄດ້.
ພຣະທຳເພງຄ່ຳຄວນເປັນການຮວບຮວມບົດກະວີທີ່ຖືກຂຽນຫລັງຈາກນະຄອນເຢຣູຊາເລັມ ແລະ ພຣະວິຫານຂອງມັນໄດ້ຖືກທຳລາຍ. ທ່ານຄິດວ່າເປັນຫຍັງມັນຈຶ່ງສຳຄັນທີ່ເພງຄ່ຳຄວນເຫລົ່ານີ້ໄດ້ຖືກຮັກສາໄວ້ ແລະ ຖືກລວມໄວ້ຢູ່ໃນພຣະຄຳພີເດີມ? ໃຫ້ພິຈາລະນາຄຳປຽບທຽບຢູ່ໃນ ເພງຄ່ຳຄວນ 1 ແລະ 3 ຊ່ວຍທ່ານໃຫ້ເຂົ້າໃຈກ່ຽວກັບຄວາມໂສກເສົ້າອັນໃຫຍ່ຫລວງທີ່ຊາວອິດສະຣາເອນໄດ້ຮູ້ສຶກແນວໃດ. ຂ່າວສານໃດແດ່ເຖິງຄວາມຫວັງໃນພຣະຄຣິດທີ່ທ່ານພົບເຫັນ? (ເບິ່ງ ໂດຍສະເພາະ ເພງຄ່ຳຄວນ 3:20–33; ເບິ່ງ ມັດທາຍ 5:4; ຢາໂກໂບ 4:8–10; ແອວມາ 36:17–20 ນຳອີກ).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເຢເຣມີຢາ 31:3.ພຣະບິດາເທິງສະຫວັນ ແລະ ພຣະເຢຊູຄຣິດໄດ້ສະແດງ “ຄວາມຮັກແພງສະເໝີມາ” ຕໍ່ເຮົາແນວໃດ? ການສະແດງຮູບພາບເຖິງສິ່ງທີ່ພຣະຄຣິດໄດ້ສ້າງເພື່ອເຮົາ ຫລື ໄດ້ກະທຳລະຫວ່າງການປະຕິບັດສາດສະໜາກິດໃນຊ່ວງມະຕະຂອງພຣະອົງ ສາມາດຊ່ວຍຄອບຄົວຂອງທ່ານໃຫ້ຮູ້ສຶກເຖິງ “ຄວາມຮັກອັນໝັ້ນຄົງ” ຂອງພຣະອົງໄດ້.
-
ເຢເຣມີຢາ 31:31–34; 32:38–41.ໃຫ້ຄິດທີ່ຈະຂຽນສິ່ງທີ່ຢູ່ໃນຂໍ້ເຫລົ່ານີ້ທີ່ພຣະຜູ້ເປັນເຈົ້າສັນຍາ ເມື່ອເຮົາເຮັດພັນທະສັນຍາກັບພຣະອົງ. ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບຄວາມສຳຄັນຂອງພັນທະສັນຍາຂອງເຮົາ?
ສະມາຊິກໃນຄອບຄົວກໍສາມາດຂຽນ (ຫລື ແຕ້ມ) ບາງສິ່ງໃສ່ເຈ້ຍທີ່ເປັນຮູບຫົວໃຈ ທີ່ສະແດງຄວາມຮູ້ສຶກຂອງພວກເຂົາກ່ຽວກັບພຣະຜູ້ຊ່ວຍໃຫ້ລອດ. ການມີກົດຂອງພຣະອົງຂຽນໄວ້ຢູ່ໃນໃຈຂອງເຮົາໝາຍຄວາມວ່າແນວໃດ? (ເບິ່ງ ເຢເຣມີຢາ 31:33). ເຮົາຈະສະແດງໃຫ້ພຣະຜູ້ເປັນເຈົ້າເຫັນວ່າເຮົາຢາກເປັນຜູ້ຄົນຂອງພຣະອົງໄດ້ແນວໃດ?
-
ເຢເຣມີຢາ 36.ທ່ານຈະໃຊ້ ເຢເຣມີຢາ 36 ເພື່ອຊ່ວຍຄອບຄົວຂອງທ່ານຮຽນຮູ້ກ່ຽວກັບຄວາມສຳຄັນຂອງພຣະຄຳພີໄດ້ແນວໃດ? (ເບິ່ງ, ຍົກຕົວຢ່າງ, ຂໍ້ທີ 1–6, 10, 23–24, 27–28, 32). ທ່ານອາດຂໍໃຫ້ສະມາຊິກໃນຄອບຄົວຄົນໜຶ່ງອ່ານຂໍ້ໜຶ່ງຈາກບົດນີ້ ຂະນະທີ່ສະມາຊິກໃນຄອບຄົວອີກຄົນໜຶ່ງຂຽນມັນລົງໄວ້, ຄືກັນກັບທີ່ບາຣຸກໄດ້ເຮັດໃຫ້ເຢເຣມີຢາ. ເປັນຫຍັງເຮົາຈຶ່ງມີຄວາມຮູ້ບຸນຄຸນຕໍ່ຄວາມພະຍາຍາມຂອງຄົນອື່ນເຊັ່ນ ບາຣຸກ, ຜູ້ໄດ້ຮັກສາຖ້ອຍຄຳຂອງບັນດາສາດສະດາໄວ້? ເຮົາສາມາດເຮັດສິ່ງໃດເພື່ອສະແດງໃຫ້ພຣະຜູ້ເປັນເຈົ້າເຫັນວ່າ ເຮົາເຫັນຄຸນຄ່າຂອງພຣະຄຳຂອງພຣະອົງຢູ່ໃນພຣະຄຳພີ?
-
ເພງຄ່ຳຄວນ 3:1–17, 21–25, 31–32.ນຳກັນເປັນຄອບຄົວ, ພວກທ່ານສາມາດເວົ້າລົມກັນກ່ຽວກັບຄວາມຮູ້ສຶກທີ່ສະແດງອອກຢູ່ໃນ ເພງຄ່ຳຄວນ 3:1–17 ສາມາດກ່ຽວຂ້ອງກັບຄວາມຮູ້ສຶກຂອງເຮົາແນວໃດເມື່ອເຮົາເຮັດບາບ. ຂ່າວສານຢູ່ໃນ ຂໍ້ທີ 21–25, 31–32 ມີອິດທິພົນຕໍ່ຊີວິດຂອງເຮົາແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສຶກສາສ່ວນຕົວ
ສະແຫວງຫາການເປີດເຜີຍ. ຂະນະທີ່ທ່ານໄຕ່ຕອງຕະຫລອດມື້, ທ່ານອາດໄດ້ຮັບແນວຄິດ ແລະ ຄວາມປະທັບໃຈເພີ່ມເຕີມກ່ຽວກັບຂໍ້ພຣະຄຳພີທີ່ທ່ານໄດ້ສຶກສາ. ຢ່າຄິດວ່າການສຶກສາພຣະກິດຕິຄຸນເປັນສິ່ງທີ່ທ່ານຕ້ອງຫາເວລາໃຫ້ກັບມັນ ແຕ່ໃຫ້ເປັນບາງສິ່ງທີ່ທ່ານເຮັດຢູ່ສະເໝີ. (ເບິ່ງ Teaching in the Savior’s Way, 12.)
Jeremiah Lamenting the Destruction of Jerusalem [ເຢເຣມີຢາຄ່ຳຄວນກັບນະຄອນເຢຣູຊາເລັມທີ່ຖືກທຳລາຍ], ໂດຍ ເຣັມບະແຣ້ນ ວານ ຣີ