“ວັນທີ 26 ເດືອນກັນຍາ–ວັນທີ 2 ເດືອນຕຸລາ. ເອຊາຢາ 50–57: ‘ທ່ານທົນຕໍ່ຄວາມທຸກທີ່ເປັນຂອງພວກເຮົາ, ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 26 ເດືອນກັນຍາ–ວັນທີ 2 ເດືອນຕຸລາ. ເອຊາຢາ 50–57,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ພຣະຄຣິດສວມມຸງກຸດທີ່ເປັນໜາມ ແລະ ຖືກເຍາະເຍີ້ຍໂດຍພວກທະຫານ

The Mocking of Christ [ການເຍາະເຍີ້ຍພຣະຄຣິດ], ໂດຍ ຄາລ ເຮັນຣິກ ບະລ່າ

ວັນທີ 26 ເດືອນກັນຍາ–ວັນທີ 2 ເດືອນຕຸລາ

ເອຊາຢາ 50–57

“ທ່ານທົນຕໍ່ຄວາມທຸກທີ່ເປັນຂອງພວກເຮົາ, ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ”

ໃຫ້ໄຕ່ຕອງຄວາມຮູ້ຈາກ ເອຊາຢາ 50–57 ທີ່ຊ່ວຍທ່ານໃຫ້ເຂົ້າໃກ້ຊິດພຣະຜູ້ຊ່ວຍໃຫ້ລອດຫລາຍຂຶ້ນ. ບັນທຶກຄວາມປະທັບໃຈທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ຕະຫລອດທົ່ວການປະຕິບັດສາດສະໜາກິດຂອງເພິ່ນ, ເອຊາຢາໄດ້ກ່າວເຖິງການປົດປ່ອຍທີ່ຍິ່ງໃຫຍ່ (ເບິ່ງ, ຍົກຕົວຢ່າງ, ເອຊາຢາ 9:3–7). ຄຳທຳນາຍເຫລົ່ານີ້ຄົງເປັນສິ່ງທີ່ປະເສີດລ້ຳຕໍ່ຊາວອິດສະຣາເອນ ຫລາຍສັດຕະວັດຕໍ່ມາ ເມື່ອພວກເຂົາຢູ່ໃນການເປັນຊະເລີຍໃນບາບີໂລນ. ບຸກຄົນທີ່ສາມາດພັງກຳແພງນະຄອນບາບີໂລນຄົງເປັນຜູ້ຊະນະທີ່ເກັ່ງກ້າທີ່ສຸດ. ແຕ່ນັ້ນບໍ່ແມ່ນບຸກຄົນທີ່ພຣະເມຊີອາເປັນ ຊຶ່ງເອຊາຢາໄດ້ບັນຍາຍຢູ່ໃນ ບົດທີ 52–53: “ພວກເຮົາດູໝິ່ນປະໝາດ ແລະ ປະຖິ້ມທ່ານໄປ; ທ່ານໄດ້ທົນທຸກນາໆ, ແລະ ທົນຕໍ່ຄວາມເຈັບປວດ: ບໍ່ມີຜູ້ໃດແມ່ນແຕ່ຈະຫລຽວແລເບິ່ງທ່ານເລີຍ.… ຄວາມລຳບາກທີ່ທ່ານຮັບເອົານັ້ນ ພວກເຮົາຄິດຢູ່ສະເໝີວ່າເປັນການລົງໂທດມາຈາກພຣະເຈົ້າ” (ເອຊາຢາ 53:3–4). ໂດຍການສົ່ງຜູ້ປົດປ່ອຍເຊັ່ນນັ້ນມາໃຫ້ຢ່າງບໍ່ຄາດຄິດ, ພຣະເຈົ້າໄດ້ສິດສອນເຮົາກ່ຽວກັບການປົດປ່ອຍທີ່ແທ້ຈິງ. ເພື່ອກູ້ເຮົາຈາກການກົດຂີ່ຂົ່ມເຫັງ ແລະ ຄວາມທຸກ, ພຣະເຈົ້າໄດ້ສົ່ງຜູ້ໜຶ່ງມາ ຜູ້ຊຶ່ງ “ຖືກທາລຸນໜັກ, ແຕ່ກໍ … ທົນເອົາ.” ເມື່ອບາງຄົນຄາດວ່າຈະເປັນພະຍາສິງ, ແຕ່ພຣະອົງໄດ້ສົ່ງລູກແກະມາໃຫ້ (ເບິ່ງ ເອຊາຢາ 53:7). ແນ່ນອນ, ວິທີຂອງພຣະເຈົ້າບໍ່ຄືກັນກັບວິທີຂອງເຮົາ (ເບິ່ງ ເອຊາຢາ 55:8–9). ພຣະເຢຊູຄຣິດປົດປ່ອຍເຮົາ ບໍ່ແມ່ນພຽງແຕ່ດ້ວຍການເປີດປາກຄຸກເທົ່ານັ້ນ ແຕ່ໂດຍການເຂົ້າຄຸກແທນ. ພຣະອົງປົດປ່ອຍເຮົາຈາກສາຍໂສ້ແຫ່ງຄວາມໂສກເສົ້າ ແລະ ຄວາມເສຍໃຈ ໂດຍການຮັບເອົາມັນດ້ວຍຕົວເອງ (ເບິ່ງ ເອຊາຢາ 53:4–5, 12). ພຣະອົງບໍ່ໄດ້ຊ່ວຍກູ້ເຮົາຢູ່ໄກໆ. ພຣະອົງຮັບທຸກທໍລະມານກັບເຮົາ, ໃນການ “ສະແດງຄວາມຮັກສືບໄປ” ວ່າ “ໝັ້ນຄົງບໍ່ສິ້ນສຸດ” (ເອຊາຢາ 54:8, 10).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເອຊາຢາ 50–52

ອະນາຄົດແມ່ນຮຸ່ງເຫລື້ອມສຳລັບຜູ້ຄົນຂອງພຣະຜູ້ເປັນເຈົ້າ.

ເຖິງແມ່ນວ່າຊາວອິດສະຣາເອນໄດ້ຢູ່ໃນການເປັນຊະເລີຍເປັນເວລາຫລາຍປີ—ແລະ ເຖິງແມ່ນວ່າການເປັນຊະເລີຍເພາະການເລືອກຜິດຂອງພວກເຂົາ—ແຕ່ພຣະຜູ້ເປັນເຈົ້າກໍຍັງປະສົງໃຫ້ພວກເຂົາເບິ່ງອະນາຄົດດ້ວຍຄວາມຫວັງຢູ່. ຂ່າວສານທີ່ໃຫ້ຄວາມຫວັງຢ່າງໃດແດ່ທີ່ທ່ານພົບເຫັນຢູ່ໃນ ເອຊາຢາ 50–52? ພຣະຜູ້ເປັນເຈົ້າສິດສອນເຮົາຫຍັງແດ່ກ່ຽວກັບພຣະອົງເອງ ໃນບົດເຫລົ່ານີ້, ແລະ ເປັນຫຍັງສິ່ງນີ້ຈຶ່ງໃຫ້ຄວາມຫວັງແກ່ທ່ານ? (ເບິ່ງ, ຍົກຕົວຢ່າງ, ເອຊາຢາ 50:2, 5–9; 51:3–8, 15–16; 52:3, 9–10).

ທ່ານກໍສາມາດຂຽນທຸກສິ່ງຢູ່ໃນ ບົດທີ 51–52 ທີ່ພຣະຜູ້ເປັນເຈົ້າເຊື້ອເຊີນຊາວອິດສະຣາເອນ ເພື່ອເຮັດໃຫ້ອະນາຄົດທີ່ເປັນຄວາມຫວັງນີ້ເກີດເປັນຈິງໄດ້ນຳອີກ. ທ່ານຮູ້ສຶກວ່າພຣະຜູ້ເປັນເຈົ້າກຳລັງເຊື້ອເຊີນທ່ານໃຫ້ເຮັດສິ່ງໃດ ຈາກຂໍ້ຄວາມເຫລົ່ານີ້? ຍົກຕົວຢ່າງ, ທ່ານຄິດວ່າ “ຈົ່ງຕື່ນຂຶ້ນ” ແລະ “ຊ່ວຍຊູແດ່” ໝາຍຄວາມວ່າແນວໃດ? (ເອຊາຢາ 51:9; ເບິ່ງ ເອຊາຢາ 52:1; ຄຳສອນ ແລະ ພັນທະສັນຍາ 113:7–10 ນຳອີກ). ທ່ານຄິດວ່າເປັນຫຍັງຄຳເຊື້ອເຊີນໃຫ້ “ຟັງສຽງ” (ຫລື “ຮັບຟັງດ້ວຍຄວາມຕັ້ງໃຈທີ່ຈະເຊື່ອຟັງ”) ຖືກກ່າວຊ້ຳເລື້ອຍໆ? (Russell M. Nelson, “Hear Him,” Liahona, May 2020, 89).

ເບິ່ງ ໂມໄຊຢາ 12:20–24; 15:13–18; 3 ນີໄຟ 20:29–46 ນຳອີກ.

Because of Love [ເປັນເພາະຮັກ], ໂດຍ ຊ່າງປັ້ນ ແອນຈີລາ ຈອນສັນ

ເອຊາຢາ 53

ພຣະເຢຊູຄຣິດໄດ້ຮັບເອົາບາບ ແລະ ຄວາມໂສກເສົ້າຂອງເຮົາໄປ.

ສອງສາມບົດຢູ່ໃນພຣະຄຳພີບັນຍາຍເຖິງພາລະກິດແຫ່ງການໄຖ່ຂອງພຣະເຢຊູຄຣິດ ໄດ້ຢ່າງສວຍງາມກວ່າ ເອຊາຢາ 53. ໃຫ້ໃຊ້ເວລາໄຕ່ຕອງຂໍ້ຄວາມເຫລົ່ານີ້. ກັບແຕ່ລະຂໍ້, ໃຫ້ຢຸດບຶດໜຶ່ງເພື່ອຄິດໄຕ່ຕອງສິ່ງທີ່ພຣະຜູ້ຊ່ວຍໃຫ້ລອດໄດ້ຮັບທຸກທໍລະມານ—“ການທົນທຸກ,” “ຄວາມໂສກເສົ້າ,” ແລະ “ການລ່ວງລະເມີດ” ພຣະອົງໄດ້ທົນ—ແທນທຸກຄົນ ແລະ ໂດຍສະເພາະແທນທ່ານ. ທ່ານສາມາດປ່ຽນ “ພວກເຮົາ” ແລະ “ຂອງພວກເຮົາ” ກັບຄຳວ່າ “ຂ້ອຍ” ແລະ “ຂອງຂ້ອຍ” ຂະນະທີ່ທ່ານອ່ານ. ທ່ານຮູ້ສຶກ ຫລື ຄິດວ່າ ຂໍ້ເຫລົ່ານີ້ດົນໃຈທ່ານແນວໃດແດ່? ໃຫ້ຄິດທີ່ຈະຂຽນມັນໄວ້.

ທ່ານອາດຢາກທົບທວນ ໂມໄຊຢາ 14; 15:1–13 ເພື່ອເບິ່ງວິທີທີ່ສາດສະດາອະບີນາໄດໄດ້ໃຊ້ຖ້ອຍຄຳຂອງເອຊາຢາເພື່ອສິດສອນກ່ຽວກັບພຣະຜູ້ຊ່ວຍໃຫ້ລອດແນວໃດ.

ເອຊາຢາ 54; 57:15–19

ພຣະເຢຊູຄຣິດປະສົງໃຫ້ເຮົາກັບຄືນມາຫາພຣະອົງ.

ເຮົາທຸກຄົນຈະມີເວລາໃດເວລາໜຶ່ງທີ່ເຮົາຮູ້ສຶກຢູ່ຫ່າງໄກຈາກພຣະຜູ້ເປັນເຈົ້າ ຍ້ອນບາບ ຫລື ຄວາມອ່ອນແອຂອງເຮົາ. ບາງຄົນອາດເລີກຫວັງວ່າ ພຣະອົງຈະໃຫ້ອະໄພພວກເຂົາ. ເອຊາຢາ 54 ແລະ 57 ເປັນບົດທີ່ຍິ່ງໃຫຍ່ທີ່ໃຫ້ຄວາມໝັ້ນໃຈ ແລະ ການຊຸກຍູ້ໃນເວລາເຊັ່ນນັ້ນ. ໂດຍສະເພາະໃນ ເອຊາຢາ 54:4–10; 57:15–19, ທ່ານຮຽນຮູ້ຫຍັງແດ່ກ່ຽວກັບຄວາມເມດຕາຂອງພຣະຜູ້ຊ່ວຍໃຫ້ລອດ ແລະ ຄວາມຮູ້ສຶກຂອງພຣະອົງກ່ຽວກັບທ່ານ? ແມ່ນຫຍັງທີ່ແຕກຕ່າງໃນຊີວິດຂອງທ່ານ ເມື່ອຮູ້ຈັກສິ່ງເຫລົ່ານີ້ກ່ຽວກັບພຣະອົງ?

ພອນທີ່ບັນຍາຍຢູ່ໃນ ເອຊາຢາ 54:11–17 ກ່ຽວຂ້ອງກັບທ່ານແນວໃດ?

ເອຊາຢາ 55–56

ພຣະຜູ້ເປັນເຈົ້າເຊື້ອເຊີນທຸກຄົນໃຫ້ “ຮັກສາພັນທະສັນຍາຂອງເຮົາ.”

ເປັນເວລາຫລາຍລຸ້ນຄົນ, ຊາວອິດສະຣາເອນຖືກນັບວ່າເປັນຜູ້ຄົນແຫ່ງພັນທະສັນຍາຂອງພຣະເຈົ້າ. ເຖິງຢ່າງໃດກໍຕາມ, ແຜນຂອງພຣະເຈົ້າໄດ້ລວມຫລາຍກວ່າພຽງແຕ່ປະຊາຊາດດຽວສະເໝີ, ເພາະ “ທຸກຄົນທີ່ຫິວນ້ຳ” ຖືກເຊື້ອເຊີນໃຫ້ “ມາ … ຫານ້ຳ” (ເອຊາຢາ 55:1). ຈົ່ງເກັບສິ່ງນີ້ໄວ້ໃນໃຈ ຂະນະທີ່ທ່ານອ່ານ ເອຊາຢາ 55 ແລະ 56, ແລະ ໄຕ່ຕອງວ່າການເປັນຜູ້ຄົນຂອງພຣະເຈົ້ານັ້ນໝາຍເຖິງສິ່ງໃດ. ຂ່າວສານຂອງພຣະເຈົ້າຕໍ່ຜູ້ທີ່ຮູ້ສຶກຖືກ “ແຍກອອກ” ຈາກພຣະອົງຄືຫຍັງ? (ເອຊາຢາ 56:3). ໃຫ້ຄິດທີ່ຈະໝາຍຂໍ້ທີ່ບັນຍາຍເຖິງທັດສະນະ ແລະ ການກະທຳຂອງຜູ້ທີ່ “ຮັກສາພັນທະສັນຍາຂອງເຮົາ” (ເບິ່ງ ເອຊາຢາ 56:4–7).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເອຊາຢາ 51–52.ຂະນະທີ່ທ່ານສົນທະນາຄຳເຊື້ອເຊີນຂອງພຣະຜູ້ເປັນເຈົ້າຢູ່ໃນບົດນີ້, ທ່ານສາມາດເຊື້ອເຊີນສະມາຊິກໃນຄອບຄົວໃຫ້ຫລິ້ນສະແດງ. ຍົກຕົວຢ່າງ, “ຈົ່ງແນມສູ່ທ້ອງຟ້າ,” “ຈົ່ງຕື່ນຂຶ້ນ, ແລະ ລຸກຂຶ້ນສາເຖີດ,” ຫລື “ຈົ່ງສັ່ນຂີ້ຝຸ່ນ” ສະແດງໃນແບບໃດ? (ເອຊາຢາ 51:6, 17; 52:2). ວະລີເຫລົ່ານີ້ສິດສອນເຮົາຫຍັງແດ່ກ່ຽວກັບການຕິດຕາມພຣະເຢຊູຄຣິດ?

ເອຊາຢາ 52:9.ຫລັງຈາກໄດ້ອ່ານຂໍ້ນີ້ແລ້ວ, ຄອບຄົວຂອງທ່ານສາມາດ “ຮ້ອງ” ເພງສວດ ຫລື ເພງຂອງເດັກນ້ອຍນຳກັນ ອັນທີ່ນຳຄວາມສຸກມາໃຫ້ເຂົາເຈົ້າ. ຄຳສັນຍາໃດແດ່ຢູ່ໃນ ເອຊາຢາ 52 ທີ່ເຮັດໃຫ້ເຮົາ “ເປັ່ງສຽງຮ້ອງຍິນດີ”?

ເອຊາຢາ 52:11; 55:7.ຂໍ້ເຫລົ່ານີ້ສາມາດນຳພາໄປສູ່ການສົນທະນາກ່ຽວກັບວະລີທີ່ວ່າ “ຈົ່ງຮັກສາຕົວໃຫ້ບໍລິສຸດ” ອາດໝາຍເຖິງສິ່ງໃດ. ພາກສ່ວນໜຶ່ງຂອງການສົນທະນານີ້, ທ່ານສາມາດທົບທວນຫົວຂໍ້ໃນ ສຳລັບຄວາມເຂັ້ມແຂງຂອງຊາວໜຸ່ມ (ປຶ້ມນ້ອຍ, 2011) ຫລື ອ່ານພຣະຄຳພີກ່ຽວກັບພອນຂອງການມີຄວາມສະອາດທາງວິນຍານ (ເບິ່ງ 3 ນີໄຟ 12:8; ຄຳສອນ ແລະ ພັນທະສັນຍາ 121:45–46).

ເອຊາຢາ 53.ເພື່ອແນະນຳຄຳບັນຍາຍຂອງເອຊາຢາເຖິງພຣະຜູ້ຊ່ວຍໃຫ້ລອດ, ຄອບຄົວຂອງທ່ານສາມາດເວົ້າລົມກັນກ່ຽວກັບວິທີທີ່ເລື່ອງລາວ, ຮູບເງົາ, ແລະ ສື່ຕ່າງໆ ມັກອ້າງເຖິງວິລະຊົນຜູ້ຊ່ວຍເຫລືອຄົນອື່ນແນວໃດ. ທ່ານສາມາດປຽບທຽບວິລະຊົນເຫລົ່ານັ້ນໃສ່ກັບຄຳບັນຍາຍເຖິງພຣະຜູ້ຊ່ວຍໃຫ້ລອດ ທີ່ທ່ານອ່ານຢູ່ໃນ ເອຊາຢາ 53. ພວກທ່ານກໍຍັງສາມາດເບິ່ງວິດີໂອຊື່ “My Kingdom Is Not of This World” (ChurchofJesusChrist.org) ນຳອີກ ແລະ ເວົ້າລົມກັນກ່ຽວກັບວິທີທີ່ຄຳທຳນາຍຢູ່ໃນ ເອຊາຢາ 53 ສຳເລັດຄົບຖ້ວນແນວໃດ. ຄວາມໂສກເສົ້າ ແລະ ຄວາມເສຍໃຈຢ່າງໃດແດ່ທີ່ພຣະຜູ້ຊ່ວຍໃຫ້ລອດຮັບເອົາແທນເຮົາ?

ເອຊາຢາ 55:8–9.ສິ່ງຕ່າງໆເບິ່ງຄືແຕກຕ່າງແນວໃດ ເມື່ອທ່ານຢືນຢູ່ບ່ອນສູງ? ວິທີ ແລະ ຄວາມຄິດຂອງພຣະເຈົ້າຢູ່ສູງກວ່າຂອງເຮົາແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຂ້າເຝົ້າພິສະຫວົງ,” ເພງສວດ ແລະ ເພງຂອງເດັກນ້ອຍ, 24.

ການປັບປຸງການສຶກສາສ່ວນຕົວ

ໃຊ້ເພງ. ເພງສວດສິດສອນຫລັກທຳພຣະກິດຕິຄຸນຢ່າງມີພະລັງ. ໃຫ້ຄິດທີ່ຈະຟັງ ຫລື ອ່ານເພງສວດ ເພື່ອຊ່ວຍທ່ານໃຫ້ເຂົ້າໃຈຄວາມຈິງກ່ຽວກັບການຊົດໃຊ້ຂອງພຣະເຢຊູຄຣິດ ທີ່ສິດສອນຢູ່ໃນ ເອຊາຢາ 53. (ເບິ່ງ Teaching in the Savior’s Way, 22.)