“ວັນທີ 10–16 ເດືອນຕຸລາ. ເຢເຣມີຢາ 1–3; 7; 16–18; 20: ‘ກ່ອນເຈົ້າໄດ້ເກີດມາ ເຮົາໄດ້ເລືອກເອົາເຈົ້າໄວ້ແລ້ວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 10–16 ເດືອນຕຸລາ. ເຢເຣມີຢາ 1–3; 7; 16–18; 20,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Jeremiah [ເຢເຣມີຢາ], ໂດຍ ວາວເຕີ ເຣນ
ວັນທີ 10–16 ເດືອນຕຸລາ
ເຢເຣມີຢາ 1–3; 7; 16–18; 20
“ກ່ອນເຈົ້າໄດ້ເກີດມາ ເຮົາໄດ້ເລືອກເອົາເຈົ້າໄວ້ແລ້ວ”
ແອວເດີ ເດວິດ ເອ ແບ໊ດນາ ໄດ້ກ່າວວ່າ: “ວິທີໜຶ່ງທີ່ຂ້າພະເຈົ້າໄດ້ຍິນ [ພຣະຜູ້ເປັນເຈົ້າ] ແມ່ນຢູ່ໃນພຣະຄຳພີ. ພຣະຄຳພີໄດ້ບັນທຶກສຸລະສຽງຂອງພຣະຜູ້ເປັນເຈົ້າໄວ້ລ່ວງໜ້າ” (“‘Hear Him’ in Your Heart and in Your Mind,” ChurchofJesusChrist.org).
ບັນທຶກຄວາມປະທັບໃຈຂອງທ່ານ
ທຳອິດ, ເຢເຣມີຢາບໍ່ໄດ້ຄິດວ່າເພິ່ນຈະເປັນສາດສະດາທີ່ດີ. “ຂ້ານ້ອຍບໍ່ຮູ້ວ່າຈະກ່າວຢ່າງໃດ,” ເພິ່ນຕອບໄປ ເມື່ອພຣະຜູ້ເປັນເຈົ້າໄດ້ເອີ້ນເພິ່ນເປັນເທື່ອທຳອິດ (ເຢເຣມີຢາ 1:6). ພຣະຜູ້ເປັນເຈົ້າໄດ້ເຮັດໃຫ້ເພິ່ນໝັ້ນໃຈວ່າ, “ເຮົາພວມເອົາຖ້ອຍຄຳຂອງເຮົາໃສ່ເຂົ້າໄປໃນປາກເຈົ້າ” (ຂໍ້ທີ 9). ເຢເຣມີຢາຮູ້ສຶກວ່າເພິ່ນ “ຍັງໜຸ່ມ” ບໍ່ມີປະສົບການ (ຂໍ້ທີ 6), ແຕ່ພຣະຜູ້ເປັນເຈົ້າໄດ້ອະທິບາຍວ່າ ເພິ່ນໄດ້ກຽມພ້ອມຫລາຍກວ່າທີ່ເພິ່ນຮູ້—ເພິ່ນໄດ້ຖືກແຕ່ງຕັ້ງສູ່ການເອີ້ນນີ້ກ່ອນເພິ່ນໄດ້ມາເກີດ (ເບິ່ງ ຂໍ້ທີ 5). ສະນັ້ນເຢເຣມີຢາຈຶ່ງໄດ້ປະຖິ້ມຄວາມຢ້ານກົວຂອງເພິ່ນ ແລະ ໄດ້ຮັບເອົາການເອີ້ນ. ເພິ່ນໄດ້ເຕືອນກະສັດຂອງນະຄອນເຢຣູຊາເລັມ ແລະ ພວກປະໂລຫິດວ່າ ການທຳທ່າເປັນຄົນມີສິນທຳຂອງເຂົາເຈົ້າຈະບໍ່ຊ່ວຍຊີວິດເຂົາເຈົ້າຈາກຄວາມພິນາດໄດ້. “ຊາຍໜຸ່ມ” ຜູ້ຄິດວ່າຕົວເອງບໍ່ສາມາດກ່າວ ໄດ້ຮູ້ສຶກເຖິງພຣະຄຳຂອງພຣະເຈົ້າວ່າ “ຮ້ອນຮົນຢູ່ພາຍໃນ [ເພິ່ນ] ດັ່ງໄຟລຸກໄໝ້ເຜົາຜານຈິດໃຈ” ແລະ ບໍ່ສາມາດມິດງຽບຢູ່ (ເຢເຣມີຢາ 20:9).
ເລື່ອງລາວຂອງເຢເຣມີຢາກໍເປັນເລື່ອງລາວຂອງເຮົາຄືກັນ. ພຣະເຈົ້າຮູ້ຈັກເຮົາ, ເຊັ່ນດຽວກັນ, ກ່ອນເຮົາໄດ້ເກີດມາ ແລະ ໄດ້ກະກຽມເຮົາເພື່ອເຮັດວຽກງານຂອງພຣະອົງຢູ່ເທິງແຜ່ນດິນໂລກ. ໃນບັນດາສິ່ງອື່ນໆ, ວຽກງານນັ້ນແມ່ນລວມທັງບາງສິ່ງທີ່ເຢເຣມີຢາໄດ້ເຫັນລ່ວງໜ້າ: ການເຕົ້າໂຮມຜູ້ຄົນຂອງພຣະເຈົ້າ, ເທື່ອລະຄົນ, ເພື່ອ “ນຳ [ພວກເຂົາ] ກັບຄືນມາສູ່ຊີໂອນ” (ເຢເຣມີຢາ 3:14). ແລະ ເຖິງແມ່ນຖ້າຫາກເຮົາບໍ່ຮູ້ຈັກແນ່ນອນວ່າຈະເຮັດ ຫລື ກ່າວສິ່ງໃດ, ແຕ່ “ຢ່າສູ່ຢ້ານກົວ…; ເພາະເຮົາຈະຢູ່ກັບເຈົ້າ, ພຣະຜູ້ເປັນເຈົ້າໄດ້ກ່າວ” (ເຢເຣມີຢາ 1:8, 19).
ສຳລັບພາບລວມຂອງພຣະທຳເຢເຣມີຢາ, ໃຫ້ເບິ່ງ “Jeremiah” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຢເຣມີຢາ 1:4–19; 7:1–7; 20:8–10
ບັນດາສາດສະດາໄດ້ຖືກເອີ້ນໃຫ້ກ່າວພຣະຄຳຂອງພຣະຜູ້ເປັນເຈົ້າ.
ຂະນະທີ່ທ່ານອ່ານໃນ ເຢເຣມີຢາ 1:4–19 ກ່ຽວກັບການເອີ້ນຂອງເຢເຣມີຢາ ເພື່ອໃຫ້ເປັນສາດສະດາ, ໃຫ້ໄຕ່ຕອງບົດບາດຂອງບັນດາສາດສະດາໃນຊີວິດຂອງທ່ານ. ທ່ານຮຽນຮູ້ຫຍັງແດ່ກ່ຽວກັບບັນດາສາດສະດາຈາກພຣະຄຳຂອງພຣະຜູ້ເປັນເຈົ້າກັບເຢເຣມີຢາ? (ເບິ່ງ ເຢເຣມີຢາ 7:1–7 ນຳອີກ). ການສັ່ງສອນຂອງເຢເຣມີຢາໄດ້ຖືກປະຕິເສດເລື້ອຍໆ (ເບິ່ງ ເຢເຣມີຢາ 20:8, 10). ທ່ານຮຽນຮູ້ຫຍັງແດ່ຈາກຖ້ອຍຄຳຂອງເຢເຣມີຢາ ໃນ ເຢເຣມີຢາ 20:9? ໃຫ້ເກັບຄວາມຄິດເຫລົ່ານີ້ໄວ້ຢູ່ໃນໃຈຕະຫລອດທົ່ວການສຶກສາຄຳສອນຂອງເຢເຣມີຢາ. ທ່ານພົບເຫັນສິ່ງໃດແດ່ຢູ່ໃນຄຳສອນເຫລົ່ານີ້ ທີ່ດົນໃຈທ່ານໃຫ້ເຮັດຕາມບັນດາສາດສະດາໃນຍຸກສຸດທ້າຍຂອງເຮົາ?
ພຣະເຈົ້າຮູ້ຈັກເຮົາກ່ອນເຮົາໄດ້ມາເກີດ.
ກ່ອນເຢເຣມີຢາໄດ້ມາເກີດ, ພຣະເຈົ້າຮູ້ຈັກເພິ່ນ ແລະ ໄດ້ເລືອກເອົາເພິ່ນ, ຫລື ແຕ່ງຕັ້ງເພິ່ນລ່ວງໜ້າ, ເພື່ອບັນລຸພາລະກິດພິເສດຢູ່ເທິງແຜ່ນດິນໂລກ (ເບິ່ງ ເຢເຣມີຢາ 1:5). ທ່ານຄິດວ່າເປັນຫຍັງມັນຈຶ່ງສຳຄັນຕໍ່ເຢເຣມີຢາທີ່ຈະຮູ້ກ່ຽວກັບສິ່ງນີ້?
ພຣະເຈົ້າກໍຍັງຮູ້ຈັກທ່ານກ່ອນທ່ານໄດ້ມາເກີດ ແລະ ໄດ້ແຕ່ງຕັ້ງທ່ານລ່ວງໜ້າສູ່ໜ້າທີ່ຮັບຜິດຊອບພິເສດຄືກັນ (ເບິ່ງ ແອວມາ 13:1–4; ຄຳສອນ ແລະ ພັນທະສັນຍາ 138:53–56; ອັບຣາຮາມ 3:22–23). ຄວາມຮູ້ນີ້ສາມາດສ້າງຄວາມແຕກຕ່າງແນວໃດແດ່ໃນຊີວິດຂອງທ່ານ? ຖ້າຫາກທ່ານໄດ້ຮັບປິຕຸພອນຂອງທ່ານແລ້ວ, ທ່ານຄວນທົບທວນມັນດ້ວຍການອະທິຖານ ແລະ ທູນຖາມພຣະເຈົ້າເຖິງວິທີທີ່ຈະບັນລຸສິ່ງທີ່ພຣະອົງໄດ້ແຕ່ງຕັ້ງທ່ານລ່ວງໜ້າແນວໃດ.
ເບິ່ງ Gospel Topics, “Foreordination,” “Premortality,” topics.ChurchofJesusChrist.org ນຳອີກ.
ຜູ້ຄົນໃນອິດສະຣາເອນສະໄໝບູຮານໄດ້ໃຊ້ອ່າງເພື່ອເກັບນ້ຳທີ່ມີຄ່າໄວ້.
“ພວກເຂົາໄດ້ຫັນໜີຈາກເຮົາ ຜູ້ເປັນບໍ່ນ້ຳພຸແຫ່ງຊີວິດ.”
ໃນພາກພື້ນແຫ້ງແລ້ງບ່ອນທີ່ຊາວອິດສະຣາເອນໄດ້ອາໄສຢູ່, ຜູ້ຄົນໄດ້ເກັບນ້ຳທີ່ມີຄ່າໄວ້ໃນບ່ອນເກັບນ້ຳໃຕ້ດິນທີ່ເອີ້ນວ່າ ອ່າງ. ການໄດ້ນ້ຳຈາກບໍ່ນ້ຳພຸ ກໍດີກວ່າການເພິ່ງອາໄສອ່າງນ້ຳແນວໃດ? ການຫັນໜີຈາກ “ບໍ່ນ້ຳພຸແຫ່ງຊີວິດ” ໝາຍຄວາມວ່າແນວໃດ? ທ່ານຄິດວ່າ “ອ່າງແຕກ” ທີ່ກ່າວເຖິງຢູ່ໃນ ເຢເຣມີຢາ 2:13 ອາດເປັນສັນຍາລັກເຖິງສິ່ງໃດ? ຂະນະທີ່ທ່ານອ່ານ ເຢເຣມີຢາ 2 ແລະ 7, ໃຫ້ສັງເກດເບິ່ງວິທີທີ່ຜູ້ຄົນໄດ້ປະຖິ້ມນ້ຳພຸແຫ່ງຊີວິດຂອງພຣະຜູ້ເປັນເຈົ້າ, ແລະ ຄິດກ່ຽວກັບວິທີທີ່ທ່ານກຳລັງໄດ້ຮັບນ້ຳພຸແຫ່ງຊີວິດໃນຊີວິດຂອງທ່ານແນວໃດ.
ເຢເຣມີຢາ 7 ໄດ້ກ່າວຕໍ່ຜູ້ທີ່ກຳລັງເຂົ້າໄປໃນ “ປະຕູພຣະວິຫານຂອງພຣະຜູ້ເປັນເຈົ້າ … ເພື່ອນະມັດສະການພຣະຜູ້ເປັນເຈົ້າ” (ເຢເຣມີຢາ 7:2). ເຖິງແມ່ນວ່າ ຂ້າງນອກພວກເຂົາເບິ່ງຄືເປັນຄົນອຸທິດຕົນ, ແຕ່ຂ້າງໃນ ພວກເຂົາເປັນຄົນຊົ່ວຮ້າຍຫລາຍທີ່ສຸດ (ເບິ່ງ ຂໍ້ທີ 2–11). ຂ່າວສານໃດແດ່ທີ່ທ່ານຮູ້ສຶກວ່າພຣະຜູ້ເປັນເຈົ້າອາດມີໃຫ້ທ່ານ ຢູ່ໃນ ຂໍ້ທີ 21–23?
ພຣະຜູ້ເປັນເຈົ້າຈະເຕົ້າໂຮມຜູ້ຄົນຂອງພຣະອົງ.
ເມື່ອເຢເຣມີຢາໄດ້ທຳນາຍເຖິງການເຕົ້າໂຮມຂອງຊາວອິດສະຣາເອນທີ່ກະຈັດກະຈາຍໄປ, ເພິ່ນເວົ້າວ່າ ມັນຈະເປັນເຫດການທີ່ຍິ່ງໃຫຍ່ກວ່າ ການອົບພະຍົບຈາກປະເທດເອຢິບ (ເບິ່ງ ເຢເຣມີຢາ 16:14–15). ໃນຄວາມຮູ້ສຶກທີ່ຄ້າຍຄືກັນນີ້, ປະທານຣະໂຊ ເອັມ ແນວສັນ ໄດ້ກ່າວວ່າ: “ພວກເຈົ້າຖືກສົ່ງມາສູ່ໂລກໃນວັນເວລາທີ່ປະເສີດນີ້ … ເພື່ອຊ່ວຍເຕົ້າໂຮມອິດສະຣາເອນ. ບໍ່ມີ ສິ່ງໃດ ທີ່ກຳລັງເກີດຂຶ້ນຢູ່ໃນໂລກປະຈຸບັນນີ້ ທີ່ສຳຄັນຫລາຍໄປກວ່າ [ການເຕົ້າໂຮມ] ນັ້ນ. … ການເຕົ້າໂຮມນີ້ຄວນເປັນ ທຸກສິ່ງ ຕໍ່ພວກເຈົ້າ” (Russell M. Nelson and Wendy W. Nelson, “Hope of Israel” [worldwide youth devotional, June 3, 2018], supplement to the New Era ແລະ Ensign, Aug. 2018, 12, ChurchofJesusChrist.org).
ຂະນະທີ່ທ່ານສຶກສາ ເຢເຣມີຢາ 3:14–18; 16:14–21, ແມ່ນຫຍັງທີ່ດົນໃຈທ່ານກ່ຽວກັບການເຕົ້າໂຮມອິດສະຣາເອນໃນຍຸກສຸດທ້າຍ? ຂໍ້ເຫລົ່ານີ້ແນະນຳຫຍັງແດ່ກ່ຽວກັບວ່າການເຕົ້າໂຮມຈະເກີດຂຶ້ນແນວໃດ? ຄວາມຮູ້ອື່ນອີກຢ່າງໃດແດ່ທີ່ທ່ານພົບເຫັນໃນຂ່າວສານສ່ວນທີ່ເຫລືອຢູ່ຂອງປະທານແນວສັນ ຊຶ່ງລະບຸຢູ່ຂ້າງເທິງ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເຢເຣມີຢາ 1:5.ທ່ານສາມາດໃຊ້ຂໍ້ນີ້ເພື່ອເວົ້າລົມກັນກ່ຽວກັບຊີວິດຂອງເຮົາກັບພຣະບິດາເທິງສະຫວັນ ກ່ອນເຮົາໄດ້ມາເກີດ. ແຫລ່ງຊ່ວຍເຫລືອເຊັ່ນ “ເຮົາເປັນລູກຂອງພຣະເຈົ້າ” (ເພງສວດ ແລະ ເພງຂອງເດັກນ້ອຍ, 64) ແລະ “ຄຳນຳ: ແຜນຂອງພຣະບິດາເທິງສະຫວັນ” (ໃນ ເລື່ອງພຣະຄຳພີໃໝ່, 1–5) ສາມາດຊ່ວຍໄດ້. ການຮູ້ຈັກກ່ຽວກັບຊີວິດກ່ອນມະຕະຂອງເຮົາມີຜົນກະທົບຕໍ່ວິທີທີ່ເຮົາດຳລົງຊີວິດໃນຊ່ວງມະຕະຂອງເຮົາແນວໃດ?
-
ເຢເຣມີຢາ 2:13; 17:13–14.ເພື່ອຊ່ວຍສະມາຊິກໃນຄອບຄົວໃຫ້ວາດພາບຂໍ້ເຫລົ່ານີ້, ທ່ານສາມາດສາທິດສິ່ງທີ່ເກີດຂຶ້ນເມື່ອທ່ານເທນ້ຳໃສ່ສິ່ງເກັບນ້ຳທີ່ແຕກແຫງ ຫລື ເພພັງ. “ບໍ່ນ້ຳພຸແຫ່ງຊີວິດ” ແລະ “ອ່າງແຕກ” ເປັນຕົວແທນໃຫ້ສິ່ງໃດ? (ເຢເຣມີຢາ 2:13). ເຮົາຈະດື່ມຈາກນ້ຳພຸແຫ່ງຊີວິດຂອງພຣະຜູ້ເປັນເຈົ້າໄດ້ແນວໃດ?
-
ເຢເຣມີຢາ 16:16.ປະທານຣະໂຊ ເອັມ ແນວສັນ ໄດ້ປຽບທຽບຄົນຫາປາ ແລະ ນາຍພານໃນຂໍ້ນີ້ໃສ່ກັບຜູ້ສອນສາດສະໜາໃນຍຸກສຸດທ້າຍແນວໃດ (ເບິ່ງ “The Gathering of Scattered Israel,” Ensign ຫລື Liahona, Nov. 2006, 81). ສະມາຊິກໃນຄອບຄົວສາມາດ “ຊອກ” ສິ່ງທີ່ຢູ່ອ້ອມເຮືອນຂອງທ່ານ ແລະ ເວົ້າລົມກັນກ່ຽວກັບວິທີທີ່ພວກທ່ານສາມາດຊ່ວຍ “ຫາ” ແລະ “ຊອກ” ຊາວອິດສະຣາເອນທີ່ກະຈັດກະຈາຍໄປແນວໃດ.
-
ເຢເຣມີຢາ 18:1–6.ເພື່ອຄົ້ນຄວ້າຂໍ້ເຫລົ່ານີ້, ທ່ານສາມາດສົນທະນາ ຫລື ສະແດງວິທີປັ້ນໝໍ້. ແມ່ນຫຍັງຄືຂ່າວສານທີ່ພຣະຜູ້ເປັນເຈົ້າມີໃຫ້ຊາວອິດສະຣາເອນໃນ ເຢເຣມີຢາ 18:1–6? ການເປັນດິນໜຽວໃນພຣະຫັດຂອງພຣະຜູ້ເປັນເຈົ້າໝາຍຄວາມວ່າແນວໃດ? (ເບິ່ງ ເອຊາຢາ 64:8 ນຳອີກ). ສຳລັບເລື່ອງລາວອີກເລື່ອງໜຶ່ງທີ່ປຽບທຽບເຮົາໃສ່ກັບດິນໜຽວຂອງຊ່າງປັ້ນໝໍ້, ໃຫ້ເບິ່ງຂ່າວສານຂອງ ແອວເດີ ຣິເຈີດ ເຈ ເມນສ໌ “The Joy of Living a Christ-Centered Life” (Ensign ຫລື Liahona, Nov. 2015, 27–30).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.
ການປັບປຸງການສິດສອນຂອງເຮົາ
ໃຊ້ເລື່ອງເລົ່າ. ພຣະຜູ້ຊ່ວຍໃຫ້ລອດມັກສິດສອນໂດຍການໃຊ້ເລື່ອງເລົ່າ. ໃຫ້ຄິດກ່ຽວກັບເລື່ອງເລົ່າຈາກຊີວິດຂອງທ່ານເອງ ທີ່ສາມາດເຮັດໃຫ້ຫລັກທຳພຣະກິດຕິຄຸນເປັນຕົນເປັນໂຕຂຶ້ນມາ. (ເບິ່ງ Teaching in the Savior’s Way, 22.)
“ດິນໜຽວຢູ່ໃນມືຂອງຊ່າງປັ້ນໝໍ້ສັນໃດ, ພວກເຈົ້າກໍຢູ່ໃນກຳມືຂອງເຮົາສັນນັ້ນ, ໂອ ເຊື້ອສາຍອິດສະຣາເອນ” (ເຢເຣມີຢາ 18:6).