“ວັນທີ 19–25 ເດືອນກັນຍາ. ເອຊາຢາ 40–49: ‘ຈົ່ງເລົ້າໂລມປະຊາຊົນຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 19–25 ເດືອນກັນຍາ. ເອຊາຢາ 40–49,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Healing the Blind Man [ການປິ່ນປົວຊາຍທີ່ຕາບອດ], ໂດຍ ຄາລ ເຮັນຣິກ ບະລ໊ອກ
ວັນທີ 19–25 ເດືອນກັນຍາ
ເອຊາຢາ 40–49
“ຈົ່ງເລົ້າໂລມປະຊາຊົນຂອງເຮົາ”
ເອຊາຢາມັກໃຊ້ພາສາທີ່ເປັນສັນຍາລັກ. ໃຫ້ເອົາໃຈໃສ່ຕໍ່ຄວາມຄິດ ແລະ ຄວາມຮູ້ສຶກທີ່ສັນຍາລັກເຫລົ່ານີ້ນຳມາສູ່ຈິດໃຈ ແລະ ໃຈຂອງທ່ານ. ສິ່ງນີ້ອາດຊ່ວຍທ່ານໃຫ້ເຂົ້າໃຈດີຂຶ້ນກວ່າເກົ່າເຖິງສິ່ງທີ່ເພິ່ນສິດສອນ.
ບັນທຶກຄວາມປະທັບໃຈຂອງທ່ານ
“ເລົ້າໂລມ” ແມ່ນຄຳທຳອິດຂອງເອຊາຢາ ບົດທີ 40. ມັນເລີ່ມຕົ້ນດ້ວຍນ້ຳສຽງທີ່ແຕກຕ່າງ, ເປັນການເນັ້ນຂ່າວສານຂອງສາດສະດາໃນແບບທີ່ແຕກຕ່າງ. ຂະນະທີ່ການຂຽນພາກສ່ວນທຳອິດຂອງເອຊາຢາໄດ້ເຕືອນອິດສະຣາເອນ ແລະ ຢູດາຍກ່ຽວກັບຄວາມພິນາດ ແລະ ການເປັນຊະເລີຍທີ່ຈະມາເຖິງ ຍ້ອນການບາບຂອງພວກເຂົາ, ແຕ່ຄຳທຳນາຍສ່ວນຫລັງໆເຫລົ່ານີ້ມີເຈດຕະນາທີ່ຈະປອບໂຍນຊາວຢິວຫລາຍກວ່າ 150 ປີໃນອະນາຄົດ—ຫລັງຈາກເຢຣູຊາເລັມໄດ້ຖືກທຳລາຍ, ພຣະວິຫານໄດ້ຖືກທຳລາຍ, ແລະ ຜູ້ຄົນກໍໄດ້ຖືກຈັບໄປເປັນຊະເລີຍໂດຍບາບີໂລນ. ຄຳທຳນາຍເຫລົ່ານີ້ບໍ່ແມ່ນສຳລັບຊາວອິດສະຣາເອນທີ່ຜ່າຍແພ້ ແລະ ທໍ້ແທ້ໃຈເທົ່ານັ້ນ, ແຕ່ມັນໄດ້ລາມໄປເຖິງອະນາຄົດນຳອີກ. ຄຳທຳນາຍກ່າວກັບເຮົາ, ຜູ້ຊຶ່ງບາງເທື່ອກໍຮູ້ສຶກຜ່າຍແພ້, ທໍ້ແທ້ໃຈ, ແລະ ແມ່ນແຕ່ສິ້ນຫວັງ.
ຂ່າວສານຂອງເອຊາຢາຕໍ່ພວກເຂົາ ແລະ ຕໍ່ເຮົາແມ່ນລຽບງ່າຍທີ່ວ່າ: “ຢ່າຢ້ານກົວ” (ເອຊາຢາ 43:1). ຍັງມີຄວາມຫວັງຢູ່. ພຣະຜູ້ເປັນເຈົ້າບໍ່ໄດ້ລືມໄລທ່ານ, ແລະ ພຣະອົງມີອຳນາດທີ່ຈະເອົາຊະນະສະຖານະການທີ່ເບິ່ງຄືວ່າເຮົາບໍ່ສາມາດຄວບຄຸມໄດ້. ພຣະຜູ້ເປັນເຈົ້າບໍ່ໄດ້ເປັນ “ຜູ້ສ້າງສະຫວັນຊັ້ນຟ້າ, ແລະ … ເປັນຜູ້ອອກແບບແຜ່ນດິນໂລກ, ແລະ … ໃຫ້ຊີວິດ ແລະ ລົມຫາຍໃຈແກ່ທຸກຄົນຢູ່ໃນນັ້ນບໍ”? (ເອຊາຢາ 42:5). ພຣະອົງບໍ່ມີພະລັງຫລາຍກວ່າບາບີໂລນ, ຫລາຍກວ່າບາບ, ຫລາຍກວ່າສິ່ງໃດກໍຕາມທີ່ຍຶດທ່ານໄວ້ເປັນຊະເລີຍບໍ? “ຈົ່ງກັບມາຫາເຮົາ,” ພຣະອົງອ້ອນວອນ, “ເພາະເຮົາຜູ້ດຽວທີ່ຊ່ວຍເຈົ້າໄດ້” (ເອຊາຢາ 44:22). ພຣະອົງສາມາດປິ່ນປົວ, ຟື້ນຟູ, ໃຫ້ກຳລັງ, ອະໄພ, ແລະ ປອບໂຍນ—ແມ່ນຫຍັງກໍຕາມທີ່ທ່ານຕ້ອງການ, ໃນກໍລະນີຂອງທ່ານ, ທີ່ຕ້ອງຖືກໄຖ່.
ເພື່ອຮຽນຮູ້ວິທີທີ່ນີໄຟ ແລະ ຢາໂຄບໄດ້ປຽບທຽບ ເອຊາຢາ 48–49 ໃສ່ກັບຜູ້ຄົນຂອງພວກເພິ່ນ, ໃຫ້ເບິ່ງ 1 ນີໄຟ 22 ແລະ 2 ນີໄຟ 6.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຢຊູຄຣິດສາມາດປອບໂຍນເຮົາ ແລະ ໃຫ້ຄວາມຫວັງແກ່ເຮົາ.
ມັນຄົງເປັນສິ່ງທໍ້ຖອຍໃຈ, ແມ່ນແຕ່ຮ້າຍກາດ, ສຳລັບຊາວອິດສະຣາເອນ ທີ່ໄດ້ພົບເຫັນຕົວເອງເປັນຊະເລີຍຢູ່ໃນບາບີໂລນ. ຫລາຍຄົນອາດສົງໄສຖ້າຫາກວ່າເຂົາເຈົ້າຈະສູນເສຍຖານະຜູ້ທີ່ຖືກເລືອກຂອງພຣະເຈົ້າ, ຜູ້ຄົນແຫ່ງພັນທະສັນຍາຕະຫລອດໄປ. ຂະນະທີ່ທ່ານອ່ານ ເອຊາຢາ 40–49, ໃຫ້ຊອກຫາຂໍ້ພຣະຄຳພີທີ່ອາດໃຫ້ການປອບໂຍນ ແລະ ໃຫ້ຄວາມຫວັງ. ສຳລັບຂໍ້ພຣະຄຳພີທຸກຂໍ້ທີ່ທ່ານພົບເຫັນ, ໃຫ້ໄຕ່ຕອງ ແລະ ບັນທຶກສິ່ງທີ່ພຣະຜູ້ເປັນເຈົ້າອາດກ່າວກັບ ທ່ານ ໃນຂໍ້ເຫລົ່ານີ້. ຕໍ່ໄປນີ້ແມ່ນບາງຂໍ້ທີ່ທ່ານສາມາດເລີ່ມຕົ້ນ:
ທ່ານສາມາດແບ່ງປັນຂ່າວສານເຫລົ່ານີ້ກັບບາງຄົນຜູ້ທີ່ຕ້ອງການກຳລັງໃຈ ຫລື ຄວາມຫວັງໄດ້ແນວໃດ? (ເບິ່ງ ເອຊາຢາ 40:1–2).
ເບິ່ງ Jeffrey R. Holland, “A Perfect Brightness of Hope,” Ensign ຫລື Liahona, May 2020, 81–84 ນຳອີກ.
ໂດຍການເຊື່ອຟັງພຣະຜູ້ເປັນເຈົ້າ, ເຮົາສາມາດມີ “ຄວາມສະຫງົບ … ດັ່ງສາຍນ້ຳ” (ເອຊາຢາ 48:18).
ເອຊາຢາ 40:3–8, 15–23; 42:15–16; 47:7–11
ອຳນາດຂອງພຣະເຈົ້າຍິ່ງໃຫຍ່ກວ່າອຳນາດຂອງໂລກ.
ເອຊາຢາໄດ້ເຕືອນໃຈຜູ້ຄົນຂອງເພິ່ນຢູ່ສະເໝີເຖິງອຳນາດທີ່ຫາອັນປຽບບໍ່ໄດ້ຂອງພຣະເຈົ້າ, ແມ່ນແຕ່ໄດ້ປຽບທຽບໃສ່ກັບອຳນາດກົງກັນຂ້າມຂອງໂລກທີ່ຢູ່ອ້ອມຮອບພວກເຂົາ. ໃຫ້ຊອກຫາຂ່າວສານນີ້ ຂະນະທີ່ທ່ານອ່ານ ເອຊາຢາ 40:3–8, 15–23; 42:15–16; ແລະ 47:7–11 (ໃຫ້ສັງເກດເບິ່ງວ່າ ບົດທີ 47 ກ່າວເຖິງບາບີໂລນ ຜູ້ຈັບຊາວອິດສະຣາເອນໄປເປັນຊະເລີຍ). ຂໍ້ພຣະຄຳພີເຫລົ່ານີ້ສິດສອນທ່ານຫຍັງແດ່ກ່ຽວກັບສິ່ງຂອງທາງໂລກ? ມັນສິດສອນທ່ານຫຍັງແດ່ກ່ຽວກັບພຣະເຈົ້າ? ໃຫ້ໄຕ່ຕອງວ່າ ເປັນຫຍັງຂ່າວສານນີ້ຈຶ່ງມີຄ່າຕໍ່ຊາວຢິວໃນຄວາມເປັນຊະເລີຍແນວໃດ. ເປັນຫຍັງມັນຈຶ່ງມີຄ່າຕໍ່ທ່ານ?
ເບິ່ງ “ຂໍເພິ່ງພຣະທຸກຊົ່ວໂມງ!” ເພງສວດ ແລະ ເພງຂອງເດັກນ້ອຍ, 12 ນຳອີກ.
ເອຊາຢາ 41:8–13; 42:1–7; 43:9–12; 44:21–28; 45:1–4; 48:10; 49:1–9
“ເຈົ້າເປັນຜູ້ຮັບໃຊ້ຂອງເຮົາ.”
ຕະຫລອດທົ່ວ ເອຊາຢາ 40–49 ພຣະຜູ້ເປັນເຈົ້າກ່າວເຖິງ “ຜູ້ຮັບໃຊ້” ແລະ “ພະຍານ” ຂອງພຣະອົງ. ໃນຂໍ້ພຣະຄຳພີບາງຂໍ້ ຄຳເຫລົ່ານີ້ເບິ່ງຄືວ່າກ່າວເຖິງພຣະເຢຊູຄຣິດ (ເບິ່ງ ເອຊາຢາ 42:1–7), ບາງຄຳກ່າວເຖິງຊາວອິດສະຣາເອນ (ເບິ່ງ ເອຊາຢາ 45:4), ແລະ ບາງຄຳກໍກ່າວເຖິງກະສັດໄຊຣັດ, ຜູ້ໄດ້ອະນຸຍາດໃຫ້ຊາວຢິວກັບຄືນໄປນະຄອນເຢຣູຊາເລັມ ແລະ ສ້າງພຣະວິຫານຂຶ້ນໃໝ່ (ເບິ່ງ 44:26–45:4). ເຖິງຢ່າງໃດກໍຕາມ, ໃນແຕ່ລະກໍລະນີ, ທ່ານອາດພິຈາລະນາວິທີທີ່ຂໍ້ພຣະຄຳພີກ່ຽວຂ້ອງກັບທ່ານ ໃນຖານະຜູ້ຮັບໃຊ້ ແລະ ພະຍານຂອງພຣະຜູ້ເປັນເຈົ້າແນວໃດ. ຍົກຕົວຢ່າງ, ໃຫ້ໄຕ່ຕອງຄຳຖາມດັ່ງເຊັ່ນ:
ເອຊາຢາ 41:8–13; 42:6; 44:21. ພຣະຜູ້ເປັນເຈົ້າໄດ້ເອີ້ນທ່ານໃຫ້ເຮັດຫຍັງ? ໃຫ້ພິຈາລະນາການເອີ້ນຢ່າງເປັນທາງການຢູ່ໃນສາດສະໜາຈັກ ຕະຫລອດທັງໜ້າທີ່ຮັບຜິດຊອບແຫ່ງພັນທະສັນຍາ ເພື່ອຮັບໃຊ້ພຣະອົງ. ພຣະອົງສະໜັບສະໜູນທ່ານ ແລະ “ຈູງມື [ທ່ານ] ໄປ” ໃນວິທີໃດແດ່ (ເອຊາຢາ 42:6) ຂະນະທີ່ທ່ານຮັບໃຊ້? ພຣະອົງເຄີຍ “ທົດສອບ” ທ່ານເພື່ອໃຫ້ກາຍເປັນຜູ້ຮັບໃຊ້ຂອງພຣະອົງໃນວິທີໃດແດ່? (ເບິ່ງ ເອຊາຢາ 48:10 ນຳອີກ).
ເອຊາຢາ 43:9–12. ທ່ານເປັນພະຍານຂອງພຣະເຢຊູຄຣິດໃນທາງໃດແດ່? ມີປະສົບການໃດແດ່ໃນຊີວິດຂອງທ່ານທີ່ສະແດງໃຫ້ເຫັນວ່າ ພຣະອົງເປັນພຣະຜູ້ຊ່ວຍໃຫ້ລອດ?
ເອຊາຢາ 49:1–9. ທ່ານພົບເຫັນຂ່າວສານຢ່າງໃດແດ່ຢູ່ໃນຂໍ້ເຫລົ່ານີ້ ທີ່ສາມາດຊ່ວຍໄດ້ເມື່ອຄວາມພະຍາຍາມ ແລະ ການຮັບໃຊ້ຂອງທ່ານເບິ່ງຄືວ່າ “ບໍ່ມີປະໂຫຍດ, ແລະ ບໍ່ສຳເລັດ”? (ຂໍ້ທີ 4).
ເບິ່ງ ໂມໄຊຢາ 18:9; Henry B. Eyring, “A Child and a Disciple,” Ensign ຫລື Liahona, May 2003, 29–32 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເອຊາຢາ 40:3–4.ເພື່ອຄົ້ນຫາສິ່ງທີ່ອາດໝາຍເຖິງ “ການຕຽມ … ທາງໃຫ້ພຣະຜູ້ເປັນເຈົ້າ,” ຄອບຄົວຂອງທ່ານສາມາດແປງບາງສິ່ງທີ່ເອ່ນອຽງໃຫ້ຊື່ຕົງ, ມ້ຽນມັດພື້ນເຮືອນທີ່ຮົກເຮື້ອ, ຫລື ເກັບກ້ອນຫີນອອກຈາກເດີ່ນ. ທ່ານກໍສາມາດສະແດງຮູບໂຢຮັນບັບຕິສະໂຕ ແລະ ໂຈເຊັບ ສະມິດນຳອີກ (ເບິ່ງ ປຶ້ມຮູບພາບພຣະກິດຕິຄຸນ, ນ້ຳເບີ 35, 87). ພວກເພິ່ນໄດ້ຈັດຕຽມທາງໄວ້ສຳລັບການສະເດັດມາຂອງພຣະຜູ້ເປັນເຈົ້າແນວໃດ? (ເບິ່ງ ລູກາ 3:2–18; ຄຳສອນ ແລະ ພັນທະສັນຍາ 135:3). ເຮົາຈະຊ່ວຍຕຽມທາງໃຫ້ພຣະອົງແນວໃດ? (ຍົກຕົວຢ່າງ, ເບິ່ງ ຄຳສອນ ແລະ ພັນທະສັນຍາ 33:10).
-
ເອຊາຢາ 40:28; 43:14–15; 44:6.ພຣະນາມໃດ ຫລື ຕຳແໜ່ງໃດຂອງພຣະເຢຊູຄຣິດທີ່ເຮົາພົບເຫັນຢູ່ໃນຂໍ້ເຫລົ່ານີ້? ແຕ່ລະພຣະນາມສິດສອນເຮົາຫຍັງແດ່ກ່ຽວກັບພຣະອົງ?
-
ເອຊາຢາ 41:10; 43:2–5; 46:4.ຂໍ້ເຫລົ່ານີ້ສະທ້ອນຢູ່ໃນເພງສວດ “ພື້ນໝັ້ນຄົງໜັກໜາ” (ເພງສວດ ແລະ ເພງຂອງເດັກນ້ອຍ, 6). ຄອບຄົວຂອງທ່ານອາດມັກຮ້ອງເພງສວດນຳກັນ ແລະ ຊອກຫາວະລີໃນນັ້ນ ອັນທີ່ຄ້າຍຄືກັນກັບວະລີທີ່ຢູ່ໃນຂໍ້ເຫລົ່ານີ້. ວະລີເຫລົ່ານີ້ສິດສອນເຮົາຫຍັງແດ່ກ່ຽວກັບພຣະເຢຊູຄຣິດ?
-
ເອຊາຢາ 44:3–4; 45:8.ຫລັງຈາກທີ່ໄດ້ອ່ານຂໍ້ເຫລົ່ານີ້ແລ້ວ, ຄອບຄົວຂອງທ່ານສາມາດຫົດນ້ຳໃສ່ຕົ້ນໄມ້ ຂະນະທີ່ທ່ານເວົ້າລົມກັນກ່ຽວກັບພອນທີ່ພຣະຜູ້ເປັນເຈົ້າໄດ້ຖອກເທລົງເທິງເຂົາເຈົ້າ. ຕົ້ນໄມ້ເປັນແນວໃດເມື່ອເຮົາຫົດນ້ຳມັນ? ພຣະຜູ້ເປັນເຈົ້າຄາດໝາຍສິ່ງໃດຈາກເຮົາ ຂະນະທີ່ພຣະອົງອວຍພອນເຮົາ?
-
ເອຊາຢາ 48:17–18.ໃຫ້ຄິດທີ່ຈະສະແດງຮູບພາບ ແລະ ວິດີໂອກ່ຽວກັບສາຍນ້ຳ ແລະ ຄື້ນທະເລ. ຄວາມສະຫງົບເປັນເໝືອນດັ່ງສາຍນ້ຳແນວໃດ? ຄວາມຊອບທຳເປັນເໝືອນດັ່ງຄື້ນທະເລແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພື້ນໝັ້ນຄົງໜັກໜາ,” ເພງສວດ ແລະ ເພງຂອງເດັກນ້ອຍ, 6.
ການປັບປຸງການສຶກສາສ່ວນຕົວ
ອະທິບາຍຄຳສັບ. ໃຫ້ພະຍາຍາມຊອກຫາຄວາມໝາຍຂອງຄຳສັບຢູ່ໃນພຣະຄຳພີທີ່ທ່ານບໍ່ເຂົ້າໃຈ—ແລະ ແມ່ນແຕ່ຄຳສັບທີ່ທ່ານຄິດວ່າທ່ານເຂົ້າໃຈ. ບາງເທື່ອຄວາມໝາຍສາມາດຊ່ວຍທ່ານໃຫ້ອ່ານຂໍ້ພຣະຄຳພີຢ່າງແຕກຕ່າງ ແລະ ໄດ້ຮັບຄວາມຮູ້ໃໝ່ທາງວິນຍານ.
“ພຣະຜູ້ເປັນເຈົ້າຈະອອຍໃຈປະຊາຊົນຂອງພຣະອົງ ແລະ ຈະເມດຕາປະຊາຊົນຂອງພຣະອົງຜູ້ທີ່ໄດ້ທົນທຸກທໍລະມານ” (ເອຊາຢາ 49:13). Balm of Gilead [ຫວ້ານຢາທີ່ກີເລອາດ], ໂດຍ ແອນ ອາແດວ ເຮັນຣີ