“ວັນທີ 12–18 ເດືອນກັນຍາ. ເອຊາຢາ 13–14; 24–30; 35: ‘ງານແປກປະຫລາດ ແລະ ອັດສະຈັນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 12–18 ເດືອນກັນຍາ. ເອຊາຢາ 13–14; 24–30; 35,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ໂຈເຊັບ ສະມິດ ເຫັນພຣະບິດາເທິງສະຫວັນ ແລະ ພຣະເຢຊູຄຣິດໃນປ່າສັກສິດ

Sacred Grove [ປ່າສັກສິດ], ໂດຍ ບະເຣັ້ນ ໂບຣັບ

ວັນທີ 12–18 ເດືອນກັນຍາ

ເອຊາຢາ 13–14; 24–30; 35

“ງານແປກປະຫລາດ ແລະ ອັດສະຈັນ”

ປະທານ ບອນນີ ເອັຈ ຄໍດອນ ໄດ້ສິດສອນວ່າ, “ພຣະຄຳພີຈະເພີ່ມຄວາມຮູ້ໃຫ້ຈິດໃຈ, ບຳລຸງລ້ຽງວິນຍານ, ຕອບຄຳຖາມ, ເພີ່ມຄວາມໄວ້ວາງໃຈຂອງເຮົາໃນພຣະຜູ້ເປັນເຈົ້າ, ແລະ ຊ່ວຍເຮົາໃຫ້ດຳລົງຊີວິດຢ່າງຊື່ຕົງຕໍ່ພຣະອົງ” (“Trust in the Lord and Lean Not,” Ensign ຫລື Liahona, May 2017, 7).

ບັນທຶກຄວາມປະທັບໃຈຂອງທ່ານ

ບາງສິ່ງທີ່ພຣະຜູ້ເປັນເຈົ້າໃຫ້ບັນດາສາດສະດາເຮັດຄື ເພື່ອເຕືອນກ່ຽວກັບຜົນສະທ້ອນຂອງບາບ. ໃນກໍລະນີຂອງບັນດາສາດສະດາໃນພຣະຄຳພີເດີມ, ສິ່ງນີ້ໝາຍເຖິງການບອກຜູ້ປົກຄອງທີ່ມີອິດທິພົນຂອງອານາຈັກທີ່ຍິ່ງໃຫຍ່ວ່າ ພວກເພິ່ນຕ້ອງກັບໃຈ ຖ້າບໍ່ດັ່ງນັ້ນຈະຖືກທຳລາຍ. ມັນເປັນວຽກງານທີ່ອັນຕະລາຍ, ແຕ່ເອຊາຢາບໍ່ມີຄວາມຢ້ານກົວ, ແລະ ຄຳເຕືອນຂອງເພິ່ນຕໍ່ອານາຈັກຕ່າງໆໃນວັນເວລາຂອງເພິ່ນ—ລວມທັງອິດສະຣາເອນ, ຢູດາຍ, ແລະ ປະຊາຊາດທີ່ຢູ່ອ້ອມຮອບ—ແມ່ນກ້າຫານ (ເບິ່ງ ເອຊາຢາ 13–23).

ເຖິງຢ່າງໃດກໍຕາມ, ເອຊາຢາກໍມີຂ່າວສານທີ່ໃຫ້ຄວາມຫວັງນຳອີກ. ເຖິງແມ່ນວ່າຄຳທຳນາຍເຖິງຄວາມພິນາດ ໃນທີ່ສຸດກໍໄດ້ມາເຖິງອານາຈັກເຫລົ່ານີ້, ແຕ່ເອຊາຢາໄດ້ບອກລ່ວງໜ້າເຖິງໂອກາດສຳລັບການຟື້ນຟູ ແລະ ການສ້າງສາຄືນໃໝ່. ພຣະຜູ້ເປັນເຈົ້າຈະເຊື້ອເຊີນຜູ້ຄົນຂອງພຣະອົງໃຫ້ກັບຄືນມາຫາພຣະອົງ. ພຣະອົງຈະເຮັດໃຫ້ “ດິນຊາຍທີ່ອົບເອົ້າ … ກາຍເປັນໜອງ, ແລະ ພື້ນທີ່ອັນແຫ້ງແລ້ງກໍຈະເຕັມໄປດ້ວຍນ້ຳພຸ” (ເອຊາຢາ 35:7). ພຣະອົງຈະທຳ “ງານແປກປະຫລາດ ແລະ ອັດສະຈັນ” (ເອຊາຢາ 29:14), ຟື້ນຟູພອນທີ່ພຣະອົງໄດ້ສັນຍາກັບອິດສະຣາເອນຄືນໃຫ້ພວກເຂົາ. ບໍ່ມີຄົນໃດ ທັງເອຊາຢາ ທີ່ມີຊີວິດໃນເວລານັ້ນ ໄດ້ມີຊີວິດຢູ່ຕໍ່ໄປຈົນໄດ້ເຫັນງານແປກປະຫລາດນີ້. ແຕ່ເຮົາກໍເຫັນວ່າ ໃນທີ່ສຸດມັນໄດ້ສຳເລັດຄົບຖ້ວນໃນທຸກວັນນີ້. ຕາມຈິງແລ້ວ, ເຮົາມີພາກສ່ວນໃນນັ້ນ!

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເອຊາຢາ 13:1–11, 19–22; 14:1–20

ອານາຈັກທີ່ຊົ່ວຮ້າຍຂອງໂລກ ແລະ ຜູ້ປົກຄອງຂອງມັນຈະປະລາໄຊ.

ເອຊາຢາ 13–14 ຖືກເອີ້ນວ່າ “ໂທດຂອງ” (ຂ່າວສານຂອງສາດສະດາກ່ຽວກັບ) ບາບີໂລນ (ເອຊາຢາ 13:1). ຄັ້ງໜຶ່ງເຄີຍເປັນອານາຈັກທີ່ຍິ່ງໃຫຍ່ພ້ອມດ້ວຍຜູ້ປົກຄອງທີ່ມີອິດທິພົນ, ປະຈຸບັນນີ້ບາບີໂລນເປັນພຽງປະຫວັດສາດເກົ່າແກ່ເທົ່ານັ້ນ. ສະນັ້ນເປັນຫຍັງຂ່າວສານຕໍ່ບາບີໂລນຈຶ່ງສຳຄັນຕໍ່ເຮົາໃນທຸກວັນນີ້? ໃນພຣະຄຳພີ, ບາບີໂລນເປັນສັນຍາລັກເຖິງຄວາມທະນົງໃຈ, ສິ່ງຂອງທາງໂລກ, ແລະ ບາບ, ແລະ ທຸກວັນນີ້ເຮົາຖືກອ້ອມຮອບໄປດ້ວຍທຸກສິ່ງເຫລົ່ານີ້. ໃຫ້ຄິດກ່ຽວກັບສັນຍາລັກນີ້ ຂະນະທີ່ທ່ານອ່ານ ເອຊາຢາ 13:1–11, 19–22; 14:1–20. ທ່ານອາດພິຈາລະນາຄຳຖາມທີ່ຄືກັນກັບຕໍ່ໄປນີ້ນຳອີກ:

ຄຳເຕືອນຂອງເອຊາຢາຕໍ່ບາບີໂລນຄ້າຍຄືກັນກັບຄຳທຳນາຍກ່ຽວກັບໂລກ ກ່ອນການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດແນວໃດ? (ເບິ່ງ ເອຊາຢາ 13:1–11; ຄຳສອນ ແລະ ພັນທະສັນຍາ 45:26–42).
ມີສິ່ງໃດແດ່ທີ່ຄ້າຍຄືກັນ ທີ່ທ່ານເຫັນລະຫວ່າງຄວາມທະນົງໃຈຂອງກະສັດບາບີໂລນ ແລະ ຄວາມທະນົງໃຈຂອງຊາຕານ? (ເບິ່ງ ເອຊາຢາ 14:4–20; ໂມເຊ 4:1–4). ຄຳເຕືອນໃດແດ່ທີ່ທ່ານພົບເຫັນໃຫ້ກັບຕົວເອງ ຢູ່ໃນຂໍ້ເຫລົ່ານີ້?
ພຣະຜູ້ຊ່ວຍໃຫ້ລອດໄດ້ຊ່ວຍທ່ານ “ບັນເທົາຈາກຄວາມໂສກເສົ້າ, ແລະ ຈາກຄວາມຢ້ານກົວ” ແນວໃດ? (ເອຊາຢາ 14:3).

He Comes Again to Rule and Reign [ພຣະອົງສະເດັດຄືນມາອີກເພື່ອປົກຄອງ ແລະ ຄອບຄອງ], ໂດຍ ແມຣີ ອາ ຊາວເອີ

ເອຊາຢາ 24:21–23; 25:6–8; 26:19; 28:16

ການຂຽນຂອງເອຊາຢາຊີ້ບອກເຮົາໃຫ້ໄປຫາພຣະເຢຊູຄຣິດ.

ຄຳສອນຂອງເອຊາຢາມັກອ້າງເຖິງພາລະກິດຂອງພຣະຜູ້ຊ່ວຍໃຫ້ລອດເລື້ອຍໆ, ລວມທັງການເສຍສະລະຊົດໃຊ້ຂອງພຣະອົງ, ການຟື້ນຄືນພຣະຊົນ, ແລະ ການສະເດັດມາຄັ້ງທີສອງ. ລັກສະນະພິເສດໃດແດ່ຂອງພາລະກິດຂອງພຣະອົງທີ່ທ່ານຄິດໄດ້ຂະນະທີ່ທ່ານອ່ານຂໍ້ດັ່ງຕໍ່ໄປນີ້: ເອຊາຢາ 24:21–23; 25:6–8; 26:19; 28:16? ມີຂໍ້ພຣະຄຳພີອື່ນໃດແດ່ທີ່ທ່ານພົບເຫັນວ່າ ເຕືອນທ່ານເຖິງພຣະຜູ້ຊ່ວຍໃຫ້ລອດ?

ເບິ່ງ ເອຊາຢາ 22:22–25 ນຳອີກ.

ເອຊາຢາ 24:1–12; 28:7–8; 29:7–10; 30:8–14

ການປະຖິ້ມຄວາມເຊື່ອໝາຍເຖິງການຫັນໜີຈາກພຣະຜູ້ເປັນເຈົ້າ ແລະ ບັນດາສາດສະດາຂອງພຣະອົງ.

ເພື່ອເຕືອນກ່ຽວກັບຜົນສະທ້ອນຂອງການຫັນໜີຈາກພຣະຜູ້ເປັນເຈົ້າ ແລະ ປະຕິເສດບັນດາສາດສະດາຂອງພຣະອົງ, ເອຊາຢາໄດ້ໃຊ້ຄຳປຽບທຽບຫລາຍໆຢ່າງ. ຄຳປຽບທຽບລວມທັງແຜ່ນດິນໂລກທີ່ເປົ່າປ່ຽວ (ເອຊາຢາ 24:1–12), ຄວາມມຶນເມົາ (ເອຊາຢາ 28:7–8), ຫິວເຂົ້າ ແລະ ກະຫາຍນ້ຳ (ເອຊາຢາ 29:7–10), ແລະ ກຳແພງ ຫລື ໝໍ້ດິນທີ່ມີຮອຍແຕກ (ເອຊາຢາ 30:8–14). ອີງຕາມສິ່ງທີ່ທ່ານໄດ້ອ່ານຢູ່ໃນຂໍ້ເຫລົ່ານີ້, ເປັນຫຍັງມັນຈຶ່ງສຳຄັນທີ່ຈະຮັກສາພັນທະສັນຍາຂອງເຮົາ? ໃຫ້ພິຈາລະນາສິ່ງທີ່ທ່ານກຳລັງເຮັດຢູ່ ເພື່ອຈະໄດ້ຍຶດໝັ້ນຢູ່ກັບພຣະຜູ້ເປັນເຈົ້າ ແລະ ຜູ້ຮັບໃຊ້ຂອງພຣະອົງ.

ເບິ່ງ M. Russell Ballard, “Stay in the Boat and Hold On!” Ensign ຫລື Liahona, Nov. 2014, 89–92; Gospel Topics, “Apostasy,” topics.ChurchofJesusChrist.org ນຳອີກ.

ເອຊາຢາ 29; 30:18–26; 35

ພຣະຜູ້ເປັນເຈົ້າສາມາດຟື້ນຟູສິ່ງທີ່ສູນເສຍໄປ ຫລື ແຕກຫັກ.

ເມື່ອຜູ້ຄົນ ຫລື ສັງຄົມຫັນໜີຈາກພຣະຜູ້ເປັນເຈົ້າ, ຊາຕານຢາກໃຫ້ເຮົາຄິດວ່າ ຜົນສະທ້ອນນັ້ນບໍ່ສາມາດປ່ຽນແປງໄດ້. ເຖິງຢ່າງໃດກໍຕາມ, ເອຊາຢາໄດ້ບັນຍາຍເຖິງງານແປກປະຫລາດບາງຢ່າງທີ່ພຣະຜູ້ເປັນເຈົ້າຈະກະທຳ ເມື່ອຜູ້ຄົນກັບໃຈ ແລະ ຫັນມາຫາພຣະອົງ. ທ່ານຮຽນຮູ້ຫຍັງແດ່ຈາກ ເອຊາຢາ 29:13–24; 30:18–26; 35 ກ່ຽວກັບພຣະຜູ້ເປັນເຈົ້າ, ຄວາມຮັກຂອງພຣະອົງ, ແລະ ອຳນາດຂອງພຣະອົງ?

ວິທີໜຶ່ງທີ່ພຣະຜູ້ເປັນເຈົ້າໄດ້ສະແດງອຳນາດຂອງພຣະອົງໃຫ້ປະຈັກໃນວັນເວລາຂອງເຮົາ ແມ່ນຜ່ານທາງການຟື້ນຟູພຣະກິດຕິຄຸນຂອງພຣະອົງ. ເອຊາຢາ 29 ບັນຈຸຂໍ້ພຣະຄຳພີຫລາຍຂໍ້ທີ່ຄຽງຄູ່ໄປກັບເຫດການຂອງການຟື້ນຟູນັ້ນ. ຍົກຕົວຢ່າງ:

ໃຫ້ປຽບທຽບ ເອຊາຢາ 29:11–12 ກັບ 2 ນີໄຟ 27:6–26 ແລະ ໂຈເຊັບ ສະມິດ—ປະຫວັດ 1:63–65.
ໃຫ້ປຽບທຽບ ເອຊາຢາ 29:13–14 ກັບ ຄຳສອນ ແລະ ພັນທະສັນຍາ 4 ແລະ ໂຈເຊັບ ສະມິດ—ປະຫວັດ 1:17–19.
ໃຫ້ປຽບທຽບ ເອຊາຢາ 29:18–24 ກັບ ໜ້າວິເຄາະສະບັບຂອງພຣະຄຳພີມໍມອນ.

ຄວາມຄິດ ຫລື ຄວາມປະທັບໃຈໃດແດ່ທີ່ທ່ານມີກ່ຽວກັບການຟື້ນຟູພຣະກິດຕິຄຸນ ຂະນະທີ່ທ່ານອ່ານຂໍ້ເຫລົ່ານີ້?

ເບິ່ງ “ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ: ການປະກາດຕໍ່ໂລກເນື່ອງໃນວາລະຄົບຮອບສອງຮ້ອຍປີ” (ChurchofJesusChrist.org) ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເອຊາຢາ 25:4–9.ຄອບຄົວຂອງທ່ານເຄີຍມີປະສົບການກັບພອນຂອງບ່ອນຫລົບໄພລະຫວ່າງຝົນຕົກຟ້າລົມ ຫລື ມີຮົ່ມພັກເຊົາໃນມື້ທີ່ຮ້ອນອົບເອົ້າຫລືບໍ່? (ເບິ່ງ ຂໍ້ທີ 4). ໃຫ້ເວົ້າລົມກັນກ່ຽວກັບສິ່ງນີ້ຂະນະທີ່ທ່ານອ່ານຂໍ້ເຫລົ່ານີ້ ແລະ ຄຳອະທິບາຍອື່ນໆເຖິງພຣະຜູ້ເປັນເຈົ້າ ຢູ່ໃນ ເອຊາຢາ 25:4–9. ພຣະຜູ້ເປັນເຈົ້າຄືກັນກັບສິ່ງເຫລົ່ານີ້ແນວໃດ?

ເອຊາຢາ 25:8–9; 26:19.ການສະແດງຮູບພາບຂອງພຣະຜູ້ຊ່ວຍໃຫ້ລອດໃນເຄັດເຊມາເນ, ຢູ່ເທິງໄມ້ກາງແຂນ, ແລະ ຫລັງຈາກການຟື້ນຄືນພຣະຊົນຂອງພຣະອົງ ສາມາດຊ່ວຍຄອບຄົວຂອງທ່ານໃຫ້ເຫັນຄວາມພົວພັນລະຫວ່າງຂໍ້ເຫລົ່ານີ້ກັບພຣະເຢຊູຄຣິດແນວໃດ (ເບິ່ງ ປຶ້ມຮູບພາບພຣະກິດຕິຄຸນ, ນ້ຳເບີ 56, 57, 58, 59). ເຊື້ອເຊີນຄອບຄົວຂອງທ່ານໃຫ້ແບ່ງປັນວ່າ ເປັນຫຍັງເຂົາເຈົ້າຈຶ່ງ “ມີຄວາມສຸກຫລາຍທີ່ພຣະອົງໄດ້ຊ່ວຍຊູ” (ເອຊາຢາ 25:9).

ເອຊາຢາ 29:11–18.ຂໍ້ເຫລົ່ານີ້ສາມາດຊ່ວຍຄອບຄົວຂອງທ່ານໃຫ້ສົນທະນາກ່ຽວກັບ “ງານແປກປະຫລາດ ແລະ ອັດສະຈັນ” (ຂໍ້ທີ 14) ຂອງການຟື້ນຟູພຣະກິດຕິຄຸນ ແລະ ການອອກມາຂອງພຣະຄຳພີມໍມອນແນວໃດ. ເປັນຫຍັງສິ່ງເຫລົ່ານີ້ຈຶ່ງແປກປະຫລາດ ແລະ ໜ້າອັດສະຈັນຕໍ່ເຮົາ? ເຊື້ອເຊີນສະມາຊິກໃນຄອບຄົວໃຫ້ຊອກຫາສິ່ງຂອງຢູ່ໃນເຮືອນຂອງທ່ານ ທີ່ເປັນຕົວແທນໃຫ້ແກ່ພອນທີ່ແປກປະຫລາດຂອງການຟື້ນຟູ.

ເອຊາຢາ 35.ຄອບຄົວຂອງທ່ານອາດມັກແຕ້ມຮູບຂອງພາບໃນບົດນີ້ ທີ່ຊ່ວຍເຮົາໃຫ້ເຂົ້າໃຈເຖິງວິທີທີ່ພຣະເຢຊູຄຣິດກຳລັງສ້າງສາຊີໂອນໃນວັນເວລາຂອງເຮົາ. ເຮົາຮຽນຮູ້ຫຍັງແດ່ ຈາກພາບເຫລົ່ານີ້? ເຮົາສາມາດເຮັດຫຍັງແດ່ ເພື່ອຊ່ວຍສ້າງສາຊີໂອນ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຈົ່ງມາຊື່ນຊົມຍິນດີ,” ເພງສວດ ແລະ ເພງຂອງເດັກນ້ອຍ, 36.

ການປັບປຸງການສິດສອນຂອງເຮົາ

ປ່ອຍໃຫ້ລູກໆສະແດງການປະດິດຄິດສ້າງຂອງເຂົາ. ເມື່ອເດັກນ້ອຍປະດິດບາງສິ່ງທີ່ກ່ຽວພັນກັບຫລັກທຳພຣະກິດຕິຄຸນ, ມັນຊ່ວຍເຂົາໃຫ້ເຂົ້າໃຈຫລັກທຳຫລາຍຂຶ້ນກວ່າເກົ່າ. ປ່ອຍໃຫ້ເຂົາສ້າງ, ແຕ້ມ, ລະບາຍສີ, ຂຽນ, ແລະ ປະດິດ. (ເບິ່ງ Teaching in the Savior’s Way, 25.)