“ວັນທີ 5–11 ເດືອນກັນຍາ. ເອຊາຢາ 1–12: ‘ພຣະເຈົ້າຄືພຣະຜູ້ໂຜດຊ່ວຍໃຫ້ລອດຂອງຂ້ານ້ອຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 5–11 ເດືອນກັນຍາ. ເອຊາຢາ 1–12,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
The Prophet Isaiah Foretells Christ’s Birth [ສາດສະດາເອຊາຢາບອກລ່ວງໜ້າເຖິງການກຳເນີດຂອງພຣະຄຣິດ], ໂດຍ ແຮຣີ ແອນເດີສັນ
ວັນທີ 5–11 ເດືອນກັນຍາ
ເອຊາຢາ 1–12
“ພຣະເຈົ້າຄືພຣະຜູ້ໂຜດຊ່ວຍໃຫ້ລອດຂອງຂ້ານ້ອຍ”
ໃຫ້ສະແຫວງຫາການນຳພາທາງວິນຍານຂະນະທີ່ທ່ານສຶກສາ. ເຮົາຈະເຂົ້າໃຈຖ້ອຍຄຳຂອງເອຊາຢາໄດ້ຫລາຍທີ່ສຸດເມື່ອເຮົາ “ເຕັມໄປດ້ວຍວິນຍານແຫ່ງການທຳນາຍ,” ດັ່ງທີ່ນີໄຟໄດ້ສິດສອນ (2 ນີໄຟ 25:4).
ບັນທຶກຄວາມປະທັບໃຈຂອງທ່ານ
ແມ່ນແຕ່ຖ້າຫາກນີ້ແມ່ນເທື່ອທຳອິດທີ່ທ່ານໄດ້ອ່ານພຣະທຳເອຊາຢາ, ທ່ານອາດພົບເຫັນຂໍ້ຄວາມທີ່ຄຸ້ນຫູ. ມັນເປັນແນວນັ້ນກໍເພາະວ່າ, ໃນບັນດາສາດສະດາຂອງພຣະຄຳພີເດີມທັງໝົດ, ເອຊາຢາເປັນຜູ້ດຽວທີ່ຖືກອ້າງເຖິງເລື້ອຍໆໃນພຣະທຳເຫລັ້ມອື່ນໆ, ລວມທັງໂດຍພຣະຜູ້ຊ່ວຍໃຫ້ລອດເອງ. ຖ້ອຍຄຳຂອງເອຊາຢາກໍໄດ້ປະກົດເລື້ອຍໆຢູ່ໃນເພງສວດ ແລະ ເພງສັກສິດອື່ນໆນຳອີກ. ເປັນຫຍັງເອຊາຢາຈຶ່ງຖືກອ້າງເຖິງເລື້ອຍໆ?
ແນ່ນອນເຫດຜົນໜຶ່ງຄື ເອຊາຢາມີພອນສະຫວັນທາງດ້ານການກ່າວພຣະຄຳຂອງພຣະເຈົ້າຢ່າງແຈ່ມແຈ້ງ, ໃນພາສາທີ່ໜ້າຊົງຈຳ. ແຕ່ມັນເປັນຫລາຍກວ່ານັ້ນ. ເອຊາຢາໄດ້ດົນໃຈບັນດາສາດສະດາເປັນເວລາຫລາຍລຸ້ນຄົນ ເພາະຄວາມຈິງທີ່ເພິ່ນໄດ້ສິດສອນຢູ່ເໜືອສິ່ງອື່ນໃດໃນລຸ້ນຄົນຂອງເພິ່ນເອງ—ຊາວອິດສະຣາເອນທີ່ມີຊີວິດຢູ່ລະຫວ່າງ 740 ປີ ແລະ 701 ປີກ່ອນ ຄ.ສ. ບົດບາດຂອງເພິ່ນຄືທີ່ຈະເປີດຕາເຮົາຕໍ່ວຽກງານແຫ່ງການໄຖ່ທີ່ຍິ່ງໃຫຍ່ຂອງພຣະເຈົ້າ, ຊຶ່ງໃຫຍ່ກວ່າປະຊາຊາດດຽວ ຫລື ສະໄໝດຽວ. ຈາກເອຊາຢາ, ນີໄຟໄດ້ຮຽນຮູ້ວ່າ ເພິ່ນ ແລະ ຜູ້ຄົນຂອງເພິ່ນ, ເຖິງແມ່ນໄດ້ແຍກອອກຈາກຊາວອິດສະຣາເອນສ່ວນທີ່ເຫລືອຢູ່, ກໍຍັງເປັນພາກສ່ວນໜຶ່ງໃນຜູ້ຄົນແຫ່ງພັນທະສັນຍາຂອງພຣະເຈົ້າຢູ່. ໃນເອຊາຢາ, ຜູ້ຂຽນພຣະຄຳພີໃໝ່ໄດ້ພົບເຫັນຄຳທຳນາຍກ່ຽວກັບພຣະເມຊີອາ ທີ່ກຳລັງຈະເກີດເປັນຈິງຢູ່ຕໍ່ໜ້າພວກເພິ່ນ. ແລະ ໃນເອຊາຢາ, ໂຈເຊັບ ສະມິດ ໄດ້ພົບເຫັນຄຳດົນໃຈສຳລັບວຽກງານໃນຍຸກສຸດທ້າຍຂອງການເຕົ້າໂຮມອິດສະຣາເອນ ແລະ ການສ້າງສາຊີໂອນ. ເມື່ອທ່ານອ່ານເອຊາຢາ, ທ່ານຈະພົບເຫັນຫຍັງແດ່?
ສຳລັບຂໍ້ມູນເພີ່ມເຕີມກ່ຽວກັບເອຊາຢາ ແລະ ການຂຽນຂອງເພິ່ນ, ໃຫ້ເບິ່ງ “Isaiah” ໃນ Bible Dictionary. ສຳລັບລາຍລະອຽດກ່ຽວກັບວັນເວລາຕອນເອຊາຢາມີຊີວິດຢູ່, ໃຫ້ເບິ່ງ 2 ກະສັດ 15–20 ແລະ 2 ຂ່າວຄາວ 26–32.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຮົາຈະສາມາດເຂົ້າໃຈຄຳສອນຂອງເອຊາຢາຫລາຍຂຶ້ນກວ່າເກົ່າໄດ້ແນວໃດ?
ເມື່ອກ່າວເຖິງການຂຽນຂອງເອຊາຢາ, ພຣະຜູ້ຊ່ວຍໃຫ້ລອດໄດ້ກ່າວວ່າ, “ໃຫ້ຄົ້ນຫາສິ່ງເຫລົ່ານີ້ຢ່າງພາກພຽນ; ເພາະວ່າຄຳເວົ້າຂອງເອຊາຢານັ້ນໃຫຍ່ຍິ່ງ” (ເບິ່ງ 3 ນີໄຟ 23:1–3). ເຖິງຢ່າງໃດກໍຕາມ ຕໍ່ຫລາຍຄົນ, ເອຊາຢາອາດຍາກທີ່ຈະເຂົ້າໃຈໄດ້. ຕໍ່ໄປນີ້ແມ່ນຄຳແນະນຳບາງຢ່າງເພື່ອຊ່ວຍທ່ານໃຫ້ພົບເຫັນຄວາມໝາຍທີ່ຍິ່ງໃຫຍ່ກວ່າ ຢູ່ໃນຖ້ອຍຄຳຂອງເອຊາຢາ:
-
ໄຕ່ຕອງເຄື່ອງໝາຍ ແລະ ການປຽບທຽບທີ່ເອຊາຢາໄດ້ໃຊ້. ຍົກຕົວຢ່າງ, ໃຫ້ໄຕ່ຕອງສິ່ງທີ່ທ່ານຄິດວ່າເອຊາຢາຢາກສື່ສານຫຍັງແດ່ ເມື່ອເພິ່ນຂຽນກ່ຽວກັບສວນອະງຸ່ນ (ເບິ່ງ ເອຊາຢາ 5:1–7), ຫ້ວຍນ້ຳຊີໂລອາ (ເບິ່ງ ເອຊາຢາ 8:5–10), ການເຮັດສັນຍາ (ເບິ່ງ ເອຊາຢາ 5:26), ແລະ ສັນຍາລັກ (ເບິ່ງ ເອຊາຢາ 11:10, 12).
-
ສຳລັບທຸກບົດທີ່ທ່ານອ່ານ, ໃຫ້ຖາມຕົວເອງວ່າ, “ເຮົາໄດ້ຮຽນຮູ້ຫຍັງແດ່ກ່ຽວກັບພຣະເຢຊູຄຣິດ?” (ເບິ່ງ 1 ນີໄຟ 19:23).
-
ໃຫ້ຊອກຫາຫົວຂໍ້ທີ່ຮູ້ສຶກວ່າກ່ຽວຂ້ອງກັບວັນເວລາຂອງເຮົາ, ດັ່ງເຊັ່ນພຣະຊົນຊີບ ແລະ ພາລະກິດຂອງພຣະເຢຊູຄຣິດ, ການກະຈັດກະຈາຍ ແລະ ການເຕົ້າໂຮມຂອງຊາວອິດສະຣາເອນ, ຍຸກສຸດທ້າຍ, ແລະ ຊ່ວງໜຶ່ງພັນປີ. ທ່ານກໍສາມາດຂຽນແຫລ່ງອ້າງອີງລົງໄວ້ນຳອີກ ຈາກເອຊາຢາທີ່ສິດສອນກ່ຽວກັບຫົວຂໍ້ເຫລົ່ານີ້.
-
ໃຫ້ໃຊ້ສິ່ງຊ່ວຍເຫລືອການສຶກສາເມື່ອມີໃຫ້ໃຊ້, ດັ່ງເຊັ່ນວັດຈະນະນຸກົມ, ໝາຍເຫດໃນພຣະຄຣິສຕະທຳຄຳພີ, ຫົວບົດ, ແລະ ຄູ່ມືພຣະຄຳພີ.
ເບິ່ງ 2 ນີໄຟ 25:1–8 ນຳອີກ.
ເອຊາຢາ 1; 3; 5
“ຈົ່ງເລີກຈາກການຊົ່ວຊ້າ.”
ເອຊາຢາໄດ້ສືບຕໍ່ເຕືອນອານາຈັກຢູດາຍກ່ຽວກັບສະພາບທາງວິນຍານຂອງພວກເຂົາ. ຫລັງຈາກການອ່ານ ເອຊາຢາ 1, 3, ແລະ 5, ທ່ານຈະອະທິບາຍສະພາບທາງວິນຍານຂອງຜູ້ຄົນແນວໃດ? ຄຳເຕືອນຢ່າງໃດແດ່ທີ່ທ່ານພົບເຫັນວ່າກ່ຽວຂ້ອງກັບວັນເວລາຂອງເຮົາ?
ນອກເໜືອຈາກຄຳເຕືອນແລ້ວ, ທ່ານກໍສາມາດຂຽນຂ່າວສານແຫ່ງຄວາມຫວັງສຳລັບຊາວອິດສະຣາເອນທີ່ເຮັດບາບນຳອີກ (ເບິ່ງ, ຍົກຕົວຢ່າງ, ເອຊາຢາ 1:16–20, 25–27; 3:10). ທ່ານຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າ ຈາກຂ່າວສານເຫລົ່ານີ້?
ເອຊາຢາ 2; 4; 11–12
ພຣະເຈົ້າຈະເຮັດວຽກງານຍິ່ງໃຫຍ່ໃນຍຸກສຸດທ້າຍ.
ການຂຽນຫລາຍຢ່າງຂອງເອຊາຢາເປັນຄຳທຳນາຍທີ່ມີຄວາມໝາຍສະເພາະວັນເວລາຂອງເຮົາ. ຂໍ້ໃດໃນຄຳບັນຍາຍເຖິງຍຸກສຸດທ້າຍຂອງເອຊາຢາ ໃນ ບົດທີ 2; 4; 11–12 ທີ່ດົນໃຈທ່ານໂດຍສະເພາະ? (ຄຳສອນ ແລະ ພັນທະສັນຍາ 113:1–6 ໃຫ້ຄວາມຮູ້ທີ່ເປັນປະໂຫຍດກ່ຽວກັບ ເອຊາຢາ 11.) ທ່ານຮຽນຮູ້ຫຍັງແດ່ກ່ຽວກັບການເຕົ້າໂຮມອິດສະຣາເອນ ແລະ ການໄຖ່ຊີໂອນ? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ຫລັງຈາກທີ່ໄດ້ອ່ານບົດເຫລົ່ານີ້?
ເບິ່ງ ເອຊາຢາ 5:26; 10:20 ນຳອີກ.
ບັນດາສາດສະດາຖືກເອີ້ນຈາກພຣະເຈົ້າ.
ໃນ ບົດທີ 6, ເອຊາຢາໄດ້ເລົ່າເຖິງການເອີ້ນໃຫ້ເປັນສາດສະດາຂອງເພິ່ນ. ຂະນະທີ່ທ່ານອ່ານບົດນີ້, ແມ່ນຫຍັງທີ່ປະທັບໃຈທ່ານກ່ຽວກັບສິ່ງທີ່ເອຊາຢາໄດ້ປະສົບການ? ບົດນີ້ມີອິດທິພົນຕໍ່ວິທີທີ່ທ່ານຄິດກ່ຽວກັບພຣະຜູ້ເປັນເຈົ້າ, ບັນດາສາດສະດາຂອງພຣະອົງ, ແລະ ວຽກງານທີ່ພວກເພິ່ນໄດ້ຖືກເອີ້ນໃຫ້ເຮັດແນວໃດແດ່?
“ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ, ມີລູກຊາຍຜູ້ໜຶ່ງຖືກມອບໝາຍໃຫ້ພວກເຮົາແລ້ວ” (ເອຊາຢາ 9:6).
ເອຊາຢາໄດ້ທຳນາຍເຖິງພຣະເຢຊູຄຣິດ.
ການປະຕິບັດສາດສະໜາກິດໃນຕອນຕົ້ນຂອງເອຊາຢາ, ອານາຈັກອິດສະຣາເອນ (ຖືກເອີ້ນອີກວ່າ ເອຟະຣາອີມ) ໄດ້ສ້າງຕັ້ງພັນທະມິດກັບຊີເຣຍ ເພື່ອປ້ອງກັນຕົວເອງຈາກອັດຊີເຣຍ. ອິດສະຣາເອນ ແລະ ຊີເຣຍຢາກບັງຄັບອາຮາດ, ກະສັດຢູດາຍ, ໃຫ້ເຂົ້າເປັນພັນທະມິດກັບພວກເຂົາ. ແຕ່ເອຊາຢາໄດ້ທຳນາຍວ່າ ພັນທະມິດຈະລົ້ມເຫລວ ແລະ ໄດ້ແນະນຳອາຮາດໃຫ້ໄວ້ວາງໃຈໃນພຣະຜູ້ເປັນເຈົ້າ (ເບິ່ງ ເອຊາຢາ 7–9, ໂດຍສະເພາະ ເອຊາຢາ 7:7–9; 8:12–13).
ດັ່ງທີ່ເອຊາຢາໄດ້ແນະນຳອາຮາດ, ເພິ່ນໄດ້ທຳນາຍຫລາຍຢ່າງທີ່ຜູ້ຄົນຮູ້ຈັກກັນດີ, ດັ່ງເຊັ່ນອັນທີ່ມີຢູ່ໃນ ເອຊາຢາ 7:14; 8:13–14; 9:2, 6–7. ເຖິງແມ່ນບໍ່ຮູ້ຢ່າງແຈ່ມແຈ້ງວ່າ ຄຳທຳນາຍເຫລົ່ານີ້ໝາຍເຖິງສິ່ງໃດໃນວັນເວລາຂອງອາຮາດ, ແຕ່ກໍເຫັນໄດ້ຢ່າງແຈ່ມແຈ້ງວ່າມັນໝາຍເຖິງພຣະເຢຊູຄຣິດ (ເບິ່ງ ມັດທາຍ 1:21–23; 4:16; 21:44; ລູກາ 1:31–33 ນຳອີກ). ທ່ານຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ຈາກຂໍ້ເຫລົ່ານີ້?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເອຊາຢາ 1:16–18.ເພື່ອຊ່ວຍສະມາຊິກໃນຄອບຄົວໃຫ້ເຂົ້າໃຈຂໍ້ເຫລົ່ານີ້, ທ່ານສາມາດອ່ານພາກ “ເຮົາບາງຄົນກໍຮູ້ສຶກວ່າ ເຮົາຈະບໍ່ມີວັນດີພໍເລີຍ” ຈາກຂ່າວສານຂອງຊິດສະເຕີ ແຊຣັນ ຢູແບ້ງ “Christ: The Light That Shines in Darkness” (Ensign ຫລື Liahona, May 2019, 75). ຫລື ທ່ານສາມາດສະແດງວິທີລຶບຮອຍເປື້ອນອອກຈາກເຄື່ອງນຸ່ງ. ຂ່າວສານຂອງພຣະຜູ້ເປັນເຈົ້າໃນຂໍ້ເຫລົ່ານີ້ແຕກຕ່າງຈາກສິ່ງທີ່ຊາຕານຢາກໃຫ້ເຮົາເຊື່ອແນວໃດ?
-
ເອຊາຢາ 2:1–5.ສະມາຊິກໃນຄອບຄົວສາມາດເລືອກເອົາຂໍ້ໜຶ່ງຈາກຂໍ້ເຫລົ່ານີ້ ແລະ ແຕ້ມສິ່ງທີ່ມັນບັນຍາຍ. ພຣະວິຫານສິດສອນເຮົາຫຍັງແດ່ກ່ຽວກັບວິທີຂອງພຣະຜູ້ເປັນເຈົ້າ? ເຮົາໄດ້ຮັບພອນແນວໃດແດ່ ຂະນະທີ່ເຮົາ “ເດີນໄປໃນຄວາມສະຫວ່າງຂອງພຣະຜູ້ເປັນເຈົ້າ”? (ເອຊາຢາ 2:5).
-
ເອຊາຢາ 4:5–6.ພຣະຜູ້ເປັນເຈົ້າສັນຍາຫຍັງແດ່ກັບເຮົາໃນຂໍ້ເຫລົ່ານີ້? ຄຳສັນຍາເຫລົ່ານີ້ອາດໝາຍຄວາມວ່າແນວໃດ? ພຣະອົງບັນລຸມັນໃນທາງໃດແດ່? (ເບິ່ງ ອົບພະຍົບ 13:21–22 ນຳອີກ.)
-
ເອຊາຢາ 7:14; 9:1–7.ໂດຍການໃຊ້ຮູບແຕ້ມ ຫລື ຮູບພາບຈາກວາລະສານຂອງສາດສະໜາຈັກ, ທ່ານສາມາດເຮັດໂປສເຕີ້ສະແດງບາງສິ່ງທີ່ເຮົາຮຽນຮູ້ກ່ຽວກັບພຣະເຢຊູຄຣິດຈາກຂໍ້ເຫລົ່ານີ້.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຂໍເພິ່ງພຣະທຸກຊົ່ວໂມງ,” ເພງສວດ ແລະ ເພງຂອງເດັກນ້ອຍ, 12.
ການປັບປຸງການສຶກສາສ່ວນຕົວ
ທູນຂໍໃຫ້ພຣະຜູ້ເປັນເຈົ້າຊ່ວຍເຫລືອ. ເພື່ອຈະເຂົ້າໃຈພຣະຄຳພີ, ເຮົາຕ້ອງການ ການເປີດເຜີຍສ່ວນຕົວ. ພຣະຜູ້ເປັນເຈົ້າໄດ້ສັນຍາວ່າ, “ຈົ່ງໝັ່ນຂໍແລ້ວເຈົ້າຈະໄດ້ຮັບ, ຈົ່ງໝັ່ນຊອກຫາແລ້ວເຈົ້າກໍຈະໄດ້ພົບ; ຈົ່ງໝັ່ນເຄາະແລ້ວຈະມີຜູ້ໄຂໃຫ້ເຈົ້າ” (ມັດທາຍ 7:7).
ເອຊາຢາໄດ້ສິດສອນວ່າ ຫໍເຕັນສັກສິດຈະ “ເປັນບ່ອນປອດໄພ” ແລະ “ຫລົບຝົນ ແລະ ພະຍຸຮ້າຍ” (ເອຊາຢາ 4:6). ພຣະວິຫານໄອດາໂຮຟໍ ໄອດາໂຮ