“ວັນທີ 29 ເດືອນສິງຫາ–ວັນທີ 4 ເດືອນກັນຍາ. ສຸພາສິດ 1–4; 15–16; 22; 31; ປັນຍາຈານ 1–3; 11–12: ‘ຄວາມຢຳເກງພຣະຜູ້ເປັນເຈົ້າເປັນບໍ່ເກີດແຫ່ງສະຕິປັນຍາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 29 ເດືອນສິງຫາ–ວັນທີ 4 ເດືອນກັນຍາ. ສຸພາສິດ 1–4; 15–16; 22; 31; ປັນຍາຈານ 1–3; 11–12,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ຜູ້ຊາຍກຳລັງສຶກສາພຣະຄຳພີ

ວັນທີ 29 ເດືອນສິງຫາ–ວັນທີ 4 ເດືອນກັນຍາ

ສຸພາສິດ 1–4; 15–16; 22; 31; ປັນຍາຈານ 1–3; 11–12

“ຄວາມຢຳເກງພຣະຜູ້ເປັນເຈົ້າເປັນບໍ່ເກີດແຫ່ງສະຕິປັນຍາ”

ໃຫ້ພິຈາລະນາວິທີທີ່ການສຶກສາສຸພາສິດ ແລະ ປັນຍາຈານຂອງທ່ານ ສາມາດຊ່ວຍທ່ານໃຫ້ “ໃຊ້ຫູຟັງສິ່ງທີ່ມີປັນຍາ, ແລະ ໃສ່ໃຈປະຕິບັດຕາມຄວາມເຂົ້າໃຈໃນປັນຍານັ້ນ” ແນວໃດ (ສຸພາສິດ 2:2).

ບັນທຶກຄວາມປະທັບໃຈຂອງທ່ານ

ໃນບົດທຳອິດຂອງພຣະທຳສຸພາສິດ, ເຮົາເຫັນຂໍ້ຄວາມເຫລົ່ານີ້: “ລູກເອີຍ, ຈົ່ງເອົາໃຈໃສ່ຕໍ່ສິ່ງທີ່ພໍ່ແມ່ບອກສອນ” (ສຸພາສິດ 1:8). ເຮົາອາດເຫັນວ່າສຸພາສິດເຕັມໄປດ້ວຍຄຳເວົ້າທີ່ສະຫລາດຈາກພໍ່ແມ່ທີ່ຮັກແພງ, ຜູ້ຊຶ່ງຂ່າວສານຕົ້ນຕໍແມ່ນ ພອນແຫ່ງຄວາມສະຫງົບສຸກ ແລະ ຄວາມຈະເລີນຮຸ່ງເຮືອງມາສູ່ຜູ້ທີ່ສະແຫວງຫາປັນຍາ—ໂດຍສະເພາະປັນຍາທີ່ພຣະເຈົ້າສະເໜີມອບໃຫ້. ແຕ່ສຸພາສິດຕິດຕາມດ້ວຍພຣະທຳປັນຍາຈານ, ຊຶ່ງເບິ່ງຄືເວົ້າວ່າ, “ມັນບໍ່ງ່າຍປານນັ້ນ.” ນັກເທດສະໜາຜູ້ທີ່ອ້າງເຖິງຢູ່ໃນປັນຍາຈານໄດ້ສັງເກດເຫັນວ່າ ເພິ່ນ “ໄດ້ຕັ້ງໃຈຮຽນຮູ້ປັນຍາ” ແຕ່ກໍຍັງ “ວິຕົກກັງວົນ” ແລະ “ເຈັບປວດຫລາຍ” (ປັນຍາຈານ 1:17–18). ໃນຫລາຍວິທີທາງ, ພຣະທຳໄດ້ຖາມວ່າ, “ມີຫຍັງບໍ່ທີ່ມີຄວາມໝາຍແທ້ຈິງໃນໂລກທີ່ເບິ່ງຄືວ່າ ທຸກສິ່ງອະນິຈັງ, ຊົ່ວຄາວ, ແລະ ບໍ່ແນ່ນອນ?”

ແລະ ເຖິງແມ່ນພຣະທຳສອງເຫລັ້ມເຫລົ່ານີ້ເບິ່ງຊີວິດຈາກມຸມມອງທີ່ແຕກຕ່າງ, ແຕ່ທັງສອງສິດສອນຄວາມຈິງທີ່ເໝືອນກັນ. ປັນຍາຈານປະກາດວ່າ: “ໃນທີ່ສຸດນີ້, ຍັງມີພຽງສິ່ງດຽວທີ່ຈະເວົ້າ: ຈົ່ງຢຳເກງພຣະເຈົ້າ, ແລະ ຮັກສາພຣະບັນຍັດຂອງພຣະອົງ: ເພາະພຣະອົງໄດ້ສ້າງມະນຸດຂຶ້ນມາກໍເພື່ອສິ່ງທັງໝົດນີ້” (ປັນຍາຈານ 12:13). ນີ້ຄືຫລັກທຳດຽວກັນທີ່ມີຢູ່ຕະຫລອດທົ່ວສຸພາສິດ: “ຈົ່ງໄວ້ວາງໃຈໃນພຣະຜູ້ເປັນເຈົ້າດ້ວຍສຸດໃຈຂອງເຈົ້າ. … ຢ່າຄິດເລີຍວ່າຕົນເປັນຄົນມີປັນຍາກວ່າທີ່ຕົນມີຢູ່: ຈົ່ງຢຳເກງພຣະຜູ້ເປັນເຈົ້າ” (ສຸພາສິດ 3:5, 7). ບໍ່ວ່າຊີວິດນີ້ຈະເປັນແນວໃດ, ເຖິງແມ່ນມັນເບິ່ງຄືວ່າສັບສົນ ແລະ ບໍ່ເປັນລະບຽບກໍຕາມ, ແຕ່ມັນຈະດີຂຶ້ນເມື່ອເຮົາໄວ້ວາງໃຈໃນອົງພຣະເຢຊູຄຣິດເຈົ້າ.

ສຳລັບພາບລວມຂອງພຣະທຳເຫລົ່ານີ້, ໃຫ້ເບິ່ງ “Proverbs, book of” ແລະ “Ecclesiastes” ໃນ Bible Dictionary.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ສຸພາສິດ 1–4; 15–16

“ໃຊ້ຫູຟັງສິ່ງທີ່ມີປັນຍາ.”

ພຣະທຳສຸພາສິດເຕັມໄປດ້ວຍຄວາມຮູ້ກ່ຽວກັບປັນຍາ. ໃຫ້ຄິດທີ່ຈະໝາຍຄຳວ່າ “ປັນຍາ” ແລະ ເຊື່ອມຕໍ່ມັນໃສ່ກັບຄຳອື່ນ, ເຊັ່ນ “ຄວາມຮູ້” ແລະ “ຄວາມເຂົ້າໃຈ,” ເມື່ອທ່ານພົບເຫັນມັນໃນ ບົດທີ 1–4 ແລະ 15–16. ບົດເຫລົ່ານີ້ມີຜົນກະທົບຕໍ່ວິທີທີ່ທ່ານຄິດກ່ຽວກັບປັນຍາແນວໃດ? ອີງຕາມສິ່ງທີ່ທ່ານພົບເຫັນ, ທ່ານຈະບັນຍາຍປັນຍາວ່າເປັນສິ່ງທີ່ “ພຣະຜູ້ເປັນເຈົ້າໂຜດໃຫ້” ແນວໃດ? (ສຸພາສິດ 2:6). ໃຫ້ພິຈາລະນາວິທີທີ່ທ່ານສະແຫວງຫາຄວາມຊ່ວຍເຫລືອຈາກພຣະຜູ້ເປັນເຈົ້າ ເພື່ອຈະໄດ້ “ເຂົ້າໃຈດີ” ແນວໃດ (ສຸພາສິດ 16:21). ພອນຢ່າງໃດແດ່ທີ່ມາຈາກປັນຍາຂອງພຣະເຈົ້າ?

ເບິ່ງ ສຸພາສິດ 8–9; ມັດທາຍ 7:24–27; 25:1–13 ນຳອີກ.

ສຸພາສິດ 1:7; 2:5; 16:6; 31:30; ປັນຍາຈານ 12:13

“ຢຳເກງພຣະຜູ້ເປັນເຈົ້າ” ໝາຍຄວາມວ່າແນວໃດ?

ແອວເດີ ເດວິດ ເອ ແບ໊ດນາ ໄດ້ອະທິບາຍວ່າ: “ຕ່າງຈາກຄວາມຢ້ານທຳມະດາທີ່ເຮັດໃຫ້ເຮົາຕົກໃຈ ແລະ ກະວົນກະວາຍໃຈ, ຄວາມຢ້ານພຣະເຈົ້າແມ່ນແຫລ່ງທີ່ເຮັດໃຫ້ເຮົາມີຄວາມສະຫງົບ, ມີຄວາມອຸ່ນໃຈ, ແລະ ມີຄວາມໝັ້ນໃຈ. … [ມັນ] ລວມທັງຄວາມຮູ້ສຶກຊາບຊຶ້ງໃນຄວາມຄາລະວະ, ຄວາມນັບຖື, ແລະ ຄວາມຢຳເກງອົງພຣະເຢຊູຄຣິດເຈົ້າ; ການເຊື່ອຟັງພຣະບັນຍັດຂອງພຣະອົງ; ແລະ ຕັ້ງໃຈລໍຄອຍການພິພາກສາຄັ້ງສຸດທ້າຍ ແລະ ຄວາມເປັນທຳຈາກພຣະຫັດຂອງພຣະອົງ. … ການຢຳເກງພຣະເຈົ້າແມ່ນການຮັກ ແລະ ການໄວ້ວາງໃຈໃນພຣະອົງ.” (“Therefore They Hushed Their Fears,” Liahona, May 2015, 48–49).

ເບິ່ງ ສຸພາສິດ 8:13 ນຳອີກ.

ສຸພາສິດ 4

“ຈົ່ງວາງແຜນຢ່າງຮອບຄອບໃນສິ່ງທີ່ເຈົ້າກະທຳ.”

ສຸພາສິດ 4 ບັນຍາຍປັນຍາ ແລະ ຄວາມຊອບທຳເປັນ “ການວາງແຜນ” ຫລື “ການກະທຳ” (ເບິ່ງ ສຸພາສິດ 3:5–6) ນຳອີກ. ຂະນະທີ່ທ່ານອ່ານບົດນີ້, ທ່ານອາດພົບເຫັນຂໍ້ຄວາມທີ່ຊ່ວຍທ່ານໄຕ່ຕອງ “ໃນສິ່ງທີ່ເຈົ້າກະທຳ” (ຂໍ້ທີ 26) ແລະ ວິທີທີ່ບາດກ້າວຂອງທ່ານນຳພາທ່ານເຂົ້າໃກ້ພຣະຜູ້ເປັນເຈົ້າຫລາຍຂຶ້ນແນວໃດ. ຍົກຕົວຢ່າງ, ແມ່ນໃຜ ຂໍ້ທີ 11–12 ແລະ 18–19 ສິດສອນກ່ຽວກັບພອນຈາກການເດີນຕາມໃນເສັ້ນທາງທີ່ຖືກຕ້ອງ? ຂໍ້ທີ 26 ແລະ 27 ມີຄວາມໝາຍຕໍ່ທ່ານແນວໃດ?

ເບິ່ງ 2 ນີໄຟ 31:18–21 ນຳອີກ.

ສຸພາສິດ 15:1–2, 4, 18, 28; 16:24–32

“ຄຳຕອບອັນອ່ອນຫວານລະງັບຄວາມໂກດໄວ້.”

ສຸພາສິດບາງຂໍ້ໃນ ບົດທີ 15 ແລະ 16 ອາດດົນໃຈທ່ານໃຫ້ປັບປຸງວິທີທີ່ທ່ານສື່ສານກັບຄົນອື່ນ, ໂດຍສະເພາະຄົນທີ່ທ່ານຮັກ. ຍົກຕົວຢ່າງ, ໃຫ້ຄິດກ່ຽວກັບເວລາໃດໜຶ່ງໂດຍສະເພາະຕອນທ່ານສາມາດໃຊ້ “ຄຳຕອບອັນອ່ອນຫວານ” ແທນທີ່ຈະເປັນ “ຄຳເວົ້າຫຍາບຊ້າ” (ສຸພາສິດ 15:1). ຄຳແນະນຳໃນ ສຸພາສິດ 16:24–32 ຊ່ວຍທ່ານຄິດກ່ຽວກັບຄຳເວົ້າທີ່ທ່ານໃຊ້ແນວໃດ?

ໃຫ້ພິຈາລະນາຄວາມຮູ້ນີ້ຈາກແອວເດີ ດັບເບິນຢູ ຄະເຣກ ຊະວິກ ທີ່ວ່າ: “‘ຄຳເວົ້າອ່ອນຫວານ’ ປະກອບດ້ວຍຄຳຕອບທີ່ມີເຫດຜົນ—ຄຳເວົ້າທີ່ມີລະບຽບວິໄນຈາກຫົວໃຈທີ່ຖ່ອມຕົວ. ມັນບໍ່ໄດ້ໝາຍຄວາມວ່າເຮົາຈະບໍ່ກ່າວກົງໄປກົງມາ ຫລື ວ່າເຮົາຍອມໃຫ້ຄຳສອນທີ່ເປັນຈິງຕົກຢູ່ໃນຂັ້ນອັນຕະລາຍ. ຖ້ອຍຄຳທີ່ອາດກົງໄປກົງມາກໍສາມາດເປັນຄຳອ່ອນຫວານທາງວິນຍານໄດ້” (“What Are You Thinking?” Liahona, May 2014, 42).

ໃຜສາມາດພົບເຫັນຜູ້ຍິງທີ່ມີຄຸນນະທຳ? II, ໂດຍ ຫລູອີສ໌ ພາກເກີ

ສຸພາສິດ 31:10–31

“ຍິງທີ່ຢຳເກງພຣະຜູ້ເປັນເຈົ້າ, ສົມຄວນໄດ້ຮັບຄຳຊົມເຊີຍ.”

ສຸພາສິດ 31:10–31 ບັນຍາຍເຖິງ “ຜູ້ຍິງທີ່ມີຄຸນນະທຳ,” ຫລື ຜູ້ຍິງທີ່ເຂັ້ມແຂງທາງວິນຍານ, ມີຄວາມສາມາດ, ແລະ ມີອິດທິພົນ. ທ່ານອາດພະຍາຍາມສະຫລຸບແຕ່ລະຂໍ້ເຫລົ່ານີ້ດ້ວຍຄຳຂອງທ່ານເອງວ່າ ມັນກ່າວກ່ຽວກັບນາງແນວໃດ. ນາງມີລັກສະນະພິເສດຢ່າງໃດແດ່ທີ່ທ່ານຢາກຮຽນແບບ?

ປັນຍາຈານ 1–3;12

ຊີວິດມະຕະເປັນພຽງຊົ່ວຄາວ.

ມີສິ່ງໃດແດ່ຢູ່ໃນໂລກນີ້ທີ່ມີຄ່າຫລາຍພໍໃຫ້ທ່ານຈື່ຈຳ, ເຊັ່ນ ປັນຍາຈານ 1–2 ຢືນຢັນ, ວ່າ “ອະນິຈັງ” (ຫລື ຊົ່ວຄາວ ແລະ ສ່ວນຫລາຍບໍ່ສຳຄັນ)? ທ່ານພົບເຫັນຫຍັງແດ່ໃນ ບົດທີ 12 ທີ່ໃຫ້ຄຸນຄ່າແກ່ຊີວິດນິລັນດອນ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ສຸພາສິດ.ຄອບຄົວຂອງທ່ານອາດມັກປະດິດ “ພຣະທຳສຸພາສິດ” ຂອງຕົວເອງ—ການຮວບຮວມຄຳແນະນຳທີ່ສະຫລາດຈາກພຣະຄຳພີ ແລະ ບັນດາສາດສະດາໃນຍຸກສຸດທ້າຍ.

ສຸພາສິດ 1:7; 2:5; 16:6; ປັນຍາຈານ 12:13–14.ເພື່ອຊ່ວຍສະມາຊິກໃນຄອບຄົວໃຫ້ເຂົ້າໃຈ ສຸພາສິດ 1:7; 2:5; 16:6; ປັນຍາຈານ 12:13, ມັນອາດຈະເປັນປະໂຫຍດທີ່ຈະປ່ຽນໃຊ້ ຢຳເກງ ກັບຄຳເຊັ່ນ ຄາລະວະ, ຄວາມຮັກ, ຫລື ການເຊື່ອຟັງ (ເບິ່ງ ເຮັບເຣີ 12:28) ນຳອີກ. ສິ່ງນີ້ມີຜົນກະທົບຕໍ່ວິທີທີ່ເຮົາຄິດກ່ຽວກັບຂໍ້ເຫລົ່ານີ້ແນວໃດ? ເຮົາຈະສະແດງວ່າເຮົາຢຳເກງພຣະຜູ້ເປັນເຈົ້າແນວໃດ?

ສຸພາສິດ 3:5–7.ເພື່ອຊ່ວຍສະມາຊິກໃນຄອບຄົວວາດພາບເຫັນສິ່ງທີ່ຂໍ້ເຫລົ່ານີ້ສິດສອນ, ທ່ານສາມາດເຊື້ອເຊີນເຂົາເຈົ້າໃຫ້ເນີ້ງໂຕອີງບາງສິ່ງທີ່ແຂງແກ່ນ ແລະ ໝັ້ນຄົງ, ເຊັ່ນ ຝາ. ແລ້ວໃຫ້ເຂົາເຈົ້າພະຍາຍາມເນີ້ງໂຕອີງບາງສິ່ງທີ່ບໍ່ແຂງແກ່ນ, ເຊັ່ນ ຟອຍກວດເຮືອນ. ເປັນຫຍັງເຮົາຈຶ່ງບໍ່ຄວນ “ເຊື່ອໝັ້ນຈັກເທື່ອໃນສິ່ງທີ່ [ເຮົາ] ຮູ້ຈັກ”? ເຮົາຈະສະແດງວ່າເຮົາໄວ້ວາງໃຈໃນພຣະເຢຊູຄຣິດດ້ວຍສຸດໃຈຂອງເຮົາແນວໃດ?

ສຸພາສິດ 15:1–2, 18; 16:24, 32.ຄຳເວົ້າຂອງເຮົາມີຜົນກະທົບຕໍ່ຄວາມຮູ້ສຶກຂອງຜູ້ຄົນຢູ່ໃນບ້ານເຮືອນຂອງເຮົາແນວໃດ ບາງທີສະມາຊິກໃນຄອບຄົວສາມາດລອງໃຊ້ “ຄຳຕອບອັນອ່ອນຫວານ” ເພື່ອຕອບ “ຄຳເວົ້າຫຍາບຊ້າ” ແລະ ພະຍາຍາມໃຊ້ສິ່ງທີ່ເຂົາເຈົ້າຮຽນຮູ້ໃນການປະຕິສຳພັນນຳກັນແລະກັນ. ເພງເຊັ່ນ “ຄວາມເມດຕາເລີ່ມຈາກເຮົາ” (ເພງສວດ ແລະ ເພງຂອງເດັກນ້ອຍ, 69) ສາມາດຊ່ວຍຢືນຢັນຫລັກທຳຂໍ້ນີ້.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮັດແຕ່ຄວາມດີ,” ເພງສວດ ແລະ ເພງຂອງເດັກນ້ອຍ, 38.

ການປັບປຸງການສຶກສາສ່ວນຕົວ

ຂໍ້ຄວາມໃນພຣະຄຳພີກ່ຽວກັບທຸກຄົນ. ພຣະຄຳພີບາງຂໍ້ອາດໝາຍເຖິງຜູ້ຊາຍເທົ່ານັ້ນ ຫລື ຜູ້ຍິງເທົ່ານັ້ນ (ດັ່ງເຊັ່ນ ສຸພາສິດ 3:13; 31:10). ເຖິງຢ່າງໃດກໍຕາມ, ໃນຫລາຍໆກໍລະນີ, ຫລັກທຳຢູ່ໃນຂໍ້ພຣະຄຳພີໝາຍເຖິງທຸກຄົນ.