“ວັນທີ 22–28 ເດືອນສິງຫາ. ເພງສັນລະເສີນ 102–103; 110; 116–119; 127–128; 135–139; 146–150: ‘ຂໍໃຫ້ທຸກສິ່ງທີ່ຫາຍໃຈຢູ່ນັ້ນ ຈົ່ງສັນລະເສີນພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 22–28 ເດືອນສິງຫາ. ເພງສັນລະເສີນ 102–103; 110; 116–119; 127–128; 135–139; 146–150,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ພຣະຄຣິດໃສ່ເສື້ອຄຸມສີແດງ ຫຸ້ມລ້ອມດ້ວຍຜູ້ຄົນທີ່ນັ່ງຄຸເຂົ່າ

Every Knee Shall Bow [ທຸກຫົວເຂົ່າຈະຄຸລົງ], ໂດຍ ເຈ ເຄີກ ຣິເຈີດສ໌

ວັນທີ 22–28 ເດືອນສິງຫາ

ເພງສັນລະເສີນ 102–103; 110; 116–119; 127–128; 135–139; 146–150

“ຂໍໃຫ້ທຸກສິ່ງທີ່ຫາຍໃຈຢູ່ນັ້ນ ຈົ່ງສັນລະເສີນພຣະຜູ້ເປັນເຈົ້າ”

ເພງສັນລະເສີນ 119:105 ສິດສອນວ່າພຣະຄຳຂອງພຣະເຈົ້າເປັນ “ແສງໂຄມນຳທາງ [ຂອງທ່ານ].” ຂະນະທີ່ທ່ານອ່ານເພງສັນລະເສີນ, ໃຫ້ບັນທຶກວະລີ ແລະ ແນວຄິດທີ່ດົນໃຈທ່ານ ແລະ ຊ່ວຍເຍືອງທາງໃຫ້ທ່ານກັບໄປຫາພຣະບິດາເທິງສະຫວັນ.

ບັນທຶກຄວາມປະທັບໃຈຂອງທ່ານ

ຊື່ພື້ນບ້ານຂອງຊາວຢິວສຳລັບ ເພງສັນລະເສີນ ມີຄວາມໝາຍເປັນພາສາເຮັບເຣີວ່າ “ສັນລະເສີນ.” ຄຳວ່າ, Tehillim [ເທຮີລຳ], ກໍກ່ຽວພັນກັບການອຸທານ “ອາເລລູຢາ” (ໝາຍເຖິງ “ສັນລະເສີນພຣະເຢໂຮວາ” ຫລື “ສັນລະເສີນພຣະຜູ້ເປັນເຈົ້າ”). ຖ້າຫາກທ່ານຕ້ອງໄດ້ເລືອກເອົາຄຳໜຶ່ງ ເພື່ອສະຫລຸບຂ່າວສານຕົ້ນຕໍຂອງເພງສັນລະເສີນ, ຄຳວ່າ “ສັນລະເສີນ” ຈະເປັນຄຳທີ່ເໝາະສົມທີ່ສຸດ. ເພງສັນລະເສີນບາງຈຳນວນບັນຈຸຄຳເຊື້ອເຊີນໂດຍກົງ ເພື່ອໃຫ້ “ສັນລະເສີນພຣະຜູ້ເປັນເຈົ້າ” (ເບິ່ງ ໂດຍສະເພາະ ເພງສັນລະເສີນ 146–50), ແລະ ທັງໝົດສາມາດດົນໃຈຄວາມຮູ້ສຶກເຖິງການນະມັດສະການ ແລະ ການສັນລະເສີນ. ເພງສັນລະເສີນເຊື້ອເຊີນເຮົາໃຫ້ສະທ້ອນຄິດເຖິງອຳນາດຂອງພຣະຜູ້ເປັນເຈົ້າ, ເຖິງຄວາມເມດຕາຂອງພຣະອົງ, ແລະ ເຖິງສິ່ງທີ່ຍິ່ງໃຫຍ່ທີ່ພຣະອົງໄດ້ກະທຳ. ເຮົາຄົງບໍ່ສາມາດຕອບແທນບຸນຄຸນພຣະອົງຈັກເທື່ອສຳລັບສິ່ງໃດໆເຫລົ່ານີ້, ແຕ່ເຮົາສາມາດສັນລະເສີນພຣະອົງສຳລັບສິ່ງເຫລົ່ານີ້. ການສັນລະເສີນນັ້ນອາດແຕກຕ່າງສຳລັບແຕ່ລະຄົນ—ມັນອາດຮ່ວມດ້ວຍການຮ້ອງເພງ, ການອະທິຖານ, ຫລື ການສະແດງປະຈັກພະຍານ. ສ່ວນຫລາຍມັນຈະນຳໄປສູ່ການເຮັດຄຳໝັ້ນສັນຍາຢ່າງເລິກເຊິ່ງຕໍ່ພຣະຜູ້ເປັນເຈົ້າ ແລະ ເພື່ອເຮັດຕາມຄຳສອນຂອງພຣະອົງ. ບໍ່ວ່າການ “ສັນລະເສີນພຣະຜູ້ເປັນເຈົ້າ” ມີຄວາມໝາຍແບບໃດໃນຊີວິດຂອງທ່ານກໍຕາມ, ທ່ານສາມາດພົບການດົນໃຈຫລາຍຂຶ້ນ ເພື່ອຈະເຮັດ ຂະນະທີ່ທ່ານອ່ານ ແລະ ໄຕ່ຕອງເພງສັນລະເສີນ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເພງສັນລະເສີນ 102–3; 116

ພຣະຜູ້ເປັນເຈົ້າສາມາດປອບໂຍນເວລາເຮົາທຸກທໍລະມານ.

ໃຫ້ສັງເກດເບິ່ງວິທີທີ່ ເພງສັນລະເສີນ 102:1–11 ບັນຍາຍຄວາມຮູ້ສຶກກັງວົນ ແລະ ຄວາມເປົ່າປ່ຽວ ທີ່ເກີດຂຶ້ນເລື້ອຍໆລະຫວ່າງຄວາມທຸກທໍລະມານແນວໃດ. ບາງທີທ່ານເຄີຍມີຄວາມຮູ້ສຶກເຊັ່ນນັ້ນ, ແລະ ການບັນຍາຍເຫລົ່ານີ້ຈະຊ່ວຍທ່ານໃຫ້ເຂົ້າໃຈປະສົບການຂອງທ່ານດີຂຶ້ນກວ່າເກົ່າ. ຫລື ຂໍ້ເຫລົ່ານີ້ອາດຊ່ວຍທ່ານໃຫ້ເຂົ້າໃຈຄວາມຮູ້ສຶກຂອງຄົນອື່ນທີ່ກຳລັງທຸກທໍລະມານ.

ຂະນະທີ່ທ່ານອ່ານ ເພງສັນລະເສີນ 102:12–28; 103; 116, ໃຫ້ຊອກຫາວະລີຕ່າງໆທີ່ໃຫ້ຄວາມໝັ້ນໃຈແກ່ທ່ານ ວ່າທ່ານສາມາດ “ເອີ້ນຫາພຣະນາມຂອງພຣະຜູ້ເປັນເຈົ້າ” ໃນການທົດລອງຂອງທ່ານ (ເພງສັນລະເສີນ 116:13). ທ່ານອາດຢາກໝາຍ, ທ່ອງຈຳ, ຫລື ແບ່ງປັນວະລີກັບຄົນອື່ນ ທີ່ໃຫ້ຄວາມຫວັງແກ່ທ່ານໃນພຣະອົງ.

ເບິ່ງ ເອຊາຢາ 25:8; 2 ໂກຣິນໂທ 1:3–7; ເຮັບເຣີ 2:17–18; ແອວມາ 7:11–13; Evan A. Schmutz, “God Shall Wipe Away All Tears,” Liahona, Nov. 2016, 116–18 ນຳອີກ.

ຮູບພາບ

ພຣະເຢຊູໃຫ້ການປິ່ນປົວ

Healing [ການປິ່ນປົວ], ໂດຍ ເຈ ເຄີກ ຣິເຈີດສ໌

ເພງສັນລະເສີນ 110; 118

ເພງສັນລະເສີນສາມາດຊີ້ບອກເຮົາໄປຫາພຣະຜູ້ຊ່ວຍໃຫ້ລອດ.

ເພງສັນລະເສີນບັນຈຸຂໍ້ພຣະຄຳພີທີ່ຊີ້ໄປຫາພຣະຊົນຊີບ ແລະ ການປະຕິບັດສາດສະໜາກິດຂອງພຣະເຢຊູຄຣິດ. ຕໍ່ໄປນີ້ແມ່ນບາງຕົວຢ່າງ:

ເພງສັນລະເສີນ 110:1–4 (ເບິ່ງ ມັດທາຍ 22:41–45; ເຮັບເຣີ 5:4–10; 6:20)
ເພງສັນລະເສີນ 118:22 (ເບິ່ງ ມັດທາຍ 21:42; ກິດຈະການ 4:10–11; 1 ເປໂຕ 2:7)
ເພງສັນລະເສີນ 118:25–26 (ເບິ່ງ ມັດທາຍ 21:9)

ຄວາມຈິງໃດແດ່ທີ່ຂໍ້ເຫລົ່ານີ້ສິດສອນທ່ານກ່ຽວກັບພຣະເຢຊູຄຣິດ? ການຮູ້ຈັກຄວາມຈິງເຫລົ່ານີ້ເປັນພອນຕໍ່ທ່ານແນວໃດ?

ຂະນະທີ່ທ່ານອ່ານເພງສັນລະເສີນ ໃນອາທິດນີ້, ໃຫ້ສືບຕໍ່ໝາຍເຫດຂໍ້ພຣະຄຳພີອື່ນໆ ທີ່ສິດສອນທ່ານກ່ຽວກັບພຣະຜູ້ຊ່ວຍໃຫ້ລອດ. ທ່ານອາດຢາກອ່ານ ຫລື ຟັງເພງສວດທີ່ທ່ານມັກນຳອີກ ອັນທີ່ຊ່ວຍທ່ານຄິດກ່ຽວກັບພຣະອົງ.

ເພງສັນລະເສີນ 119

ພຣະຄຳຂອງພຣະເຈົ້າຈະຮັກສາເຮົາໃຫ້ຢູ່ໃນເສັ້ນທາງຂອງພຣະອົງ.

ເພງສັນລະເສີນບົດນີ້ບັນຈຸວະລີທີ່ປຽບທຽບຊີວິດຂອງເຮົາໃສ່ກັບການເດີນທາງກັບໄປຫາພຣະບິດາເທິງສະຫວັນ. ຂະນະທີ່ທ່ານອ່ານ, ໃຫ້ຊອກຫາຖ້ອຍຄຳເຊັ່ນ ດຳເນີນ, ເຮັດຕາມຂໍ້ຄຳສັ່ງ, ທາງ, ເຮັດຕາມຖ້ອຍຄຳ, ແລະ ຢ່າໃຫ້ຝ່າຝືນ. ໃຫ້ໄຕ່ຕອງການເດີນທາງໃນຊີວິດຂອງທ່ານເອງ—ບ່ອນທີ່ທ່ານເຄີຍໄປ, ບ່ອນທີ່ທ່ານຢູ່ໃນເວລານີ້, ແລະ ບ່ອນທີ່ທ່ານຈະເດີນໄປຫາ. ທ່ານຮຽນຮູ້ຫຍັງແດ່ຈາກເພງສັນລະເສີນບົດນີ້ກ່ຽວກັບການເດີນທາງກັບບ້ານຂອງທ່ານ? ອີງຕາມເພງສັນລະເສີນບົດນີ້, ພຣະເຈົ້າໄດ້ຈັດຕຽມຫຍັງໄວ້ ເພື່ອຊ່ວຍທ່ານຢູ່ໃນເສັ້ນທາງທີ່ຖືກຕ້ອງ?

ທ່ານອາດສົນໃຈຢາກຮູ້ວ່າ ໃນພາສາເຮັບເຣີດັ້ງເດີມ, ແປດຂໍ້ທຳອິດຢູ່ໃນ ເພງສັນລະເສີນ 119 ເລີ່ມຕົ້ນດ້ວຍອັກຂະລະຕົວທຳອິດໃນຕົວໜັງສືພາສາເຮັບເຣີ. ແປດຂໍ້ຕໍ່ໄປ ໄດ້ເລີ່ມຕົ້ນດ້ວຍອັກຂະລະຕົວທີສອງ, ແລະ ຕໍ່ໆໄປຈົນເຖິງອັກຂະລະຕົວສຸດທ້າຍ.

ເບິ່ງ ເອຊາຢາ 42:16; 2 ນີໄຟ 31:17–21; ແອວມາ 7:19–20 ນຳອີກ.

ເພງສັນລະເສີນ 134–36

ພຣະຜູ້ເປັນເຈົ້າມີອຳນາດຍິ່ງໃຫຍ່ຫລາຍກວ່າຮູບເຄົາລົບໃດໆ.

ໃຫ້ສັງເກດເບິ່ງເຫດຜົນຢູ່ໃນ ເພງສັນລະເສີນ 135:15–18 ກ່ຽວກັບເຫດຜົນທີ່ວ່າມັນເປັນເລື່ອງທີ່ໂງ່ຈ້າທີ່ຈະໄວ້ວາງໃຈໃນພະປອມ. ທ່ານອາດຖືກລໍ້ລວງໃຫ້ໄວ້ວາງໃຈໃນສິ່ງທີ່ຄ້າຍຄືກັນກັບຮູບເຄົາລົບທີ່ບັນຍາຍຢູ່ໃນຂໍ້ເຫລົ່ານີ້ແນວໃດ?

ທ່ານອາດຂຽນສິ່ງຍິ່ງໃຫຍ່ທີ່ພຣະຜູ້ເປັນເຈົ້າສາມາດກະທຳລົງໄວ້, ດັ່ງທີ່ບັນຍາຍຢູ່ໃນ ເພງສັນລະເສີນ 134–36. ສິ່ງຍິ່ງໃຫຍ່ຢ່າງໃດແດ່ທີ່ພຣະອົງໄດ້ກະທຳເພື່ອທ່ານ?

ເພງສັນລະເສີນ 146–50

“ສັນລະເສີນພຣະຜູ້ເປັນເຈົ້າ.”

ຂະນະທີ່ທ່ານອ່ານຄຳສັນລະເສີນສຸດທ້າຍເຫລົ່ານີ້ໃນເພງສັນລະເສີນ, ໃຫ້ຄິດກ່ຽວກັບເຫດຜົນທີ່ທ່ານໄດ້ສັນລະເສີນພຣະຜູ້ເປັນເຈົ້າ. ເປັນຫຍັງຈຶ່ງສຳຄັນທີ່ຈະສັນລະເສີນພຣະອົງ? ມີທາງໃດແດ່ທີ່ທ່ານສາມາດສັນລະເສີນພຣະອົງ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເພງສັນລະເສີນ 119:105.ບາງທີຄອບຄົວຂອງທ່ານສາມາດເຮັດເສັ້ນທາງ ແລະ ຍ່າງໄປຕາມທາງນັ້ນໃນຄວາມມືດ, ໂດຍການໃຊ້ໄຟສາຍເຍືອງທາງໄປ. ຂະນະທີ່ພວກທ່ານຍ່າງໄປ, ທ່ານສາມາດຖາມຄຳຖາມເຊັ່ນ “ແມ່ນຫຍັງໃນຊີວິດຂອງເຮົາທີ່ເປັນເໝືອນດັ່ງຄວາມມືດ?” ຫລື “ພຣະຄຳຂອງພຣະເຈົ້າເປັນເໝືອນດັ່ງຄວາມສະຫວ່າງແນວໃດ?” ການຮ້ອງເພງກ່ຽວກັບຄວາມສະຫວ່າງຂອງພຣະເຈົ້າ, ດັ່ງເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72), ສາມາດຊ່ວຍພວກທ່ານໃຫ້ຍຶດໝັ້ນຢູ່ກັບຫລັກທຳທີ່ສິດສອນຢູ່ໃນ ເພງສັນລະເສີນ 119:105 ໄດ້.

ເພງສັນລະເສີນ 127–28.ຄຳວ່າ ພຣະຜູ້ເປັນເຈົ້າຊ່ວຍເຮົາ “ສ້າງບ້ານເຮືອນ [ຂອງເຮົາ]” ໝາຍຄວາມວ່າແນວໃດ? (ເພງສັນລະເສີນ 127:1). ເຮົາຈະໃຫ້ພຣະອົງມີພາກສ່ວນໃນຄວາມພະຍາຍາມຂອງເຮົາ ເພື່ອສ້າງບ້ານເຮືອນທີ່ຊອບທຳໄດ້ແນວໃດ? ເພື່ອຊ່ວຍຄອບຄົວຂອງທ່ານໃຫ້ຕອບຄຳຖາມນີ້, ທ່ານສາມາດແຕ້ມຮູບເຮືອນໃສ່ເຈ້ຍໃບໜຶ່ງ ແລະ ຕັດມັນເປັນຕ່ອນຮູບປິດສະໜາຫລາຍໆຕ່ອນ. ຢູ່ຂ້າງຫລັງຂອງແຕ່ລະຕ່ອນ, ສະມາຊິກໃນຄອບຄົວສາມາດຂຽນ ຫລື ແຕ້ມຮູບທີ່ເຮັດໃຫ້ພຣະຜູ້ເປັນເຈົ້າເປັນພາກສ່ວນໜຶ່ງໃນບ້ານເຮືອນຂອງພວກທ່ານ. ແລ້ວພວກທ່ານສາມາດຕໍ່ຕ່ອນຮູບປິດສະໜາເຂົ້າກັນ. ເຮົາພົບເຫັນຫຍັງອີກແດ່ຢູ່ໃນເພງສັນລະເສີນເຫລົ່ານີ້ ທີ່ດົນໃຈເຮົາໃຫ້ເດີນໄປໃນເສັ້ນທາງຂອງພຣະຜູ້ເປັນເຈົ້າ?

ເພງສັນລະເສີນ 139.ຫລັງຈາກການອ່ານ ຂໍ້ທີ 1–4, ສະມາຊິກໃນຄອບຄົວສາມາດເວົ້າລົມກັນກ່ຽວກັບວິທີທີ່ເຂົາເຈົ້າຮູ້ຈັກວ່າພຣະເຈົ້າຮູ້ເຂົາເຈົ້າເປັນສ່ວນຕົວໄດ້ແນວໃດ (ເບິ່ງ ຂໍ້ທີ 14–15, 23–24 ນຳອີກ).

ເພງສັນລະເສີນ 146–50.ທ່ານສາມາດເຊື້ອເຊີນຄອບຄົວໃຫ້ອ່ານສອງສາມຂໍ້ ຂອງ ເພງສັນລະເສີນ 146–50 ອອກສຽງ, ພະຍາຍາມຖ່າຍທອດຄວາມຮູ້ສຶກຂອງຜູ້ຂຽນ. ເຮົາຈະສະແດງການສັນລະເສີນຂອງເຮົາຕໍ່ພຣະຜູ້ເປັນເຈົ້າແນວໃດ? ສະມາຊິກໃນຄອບຄົວອາດຢາກຂຽນເພງສັນລະເສີນຂອງຕົວເອງ ແລະ ແບ່ງປັນມັນກັບກັນແລະກັນ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສິດສອນຂອງເຮົາ

ໃຊ້ສິ່ງບັນທຶກສຽງ. ຂະນະທີ່ທ່ານສິດສອນຄອບຄົວຂອງທ່ານ, ໃຫ້ຄິດທີ່ຈະຟັງການອ່ານພຣະຄຳພີ, ຢູ່ໃນ ChurchofJesusChrist.org ຫລື ໃນແອັບຫ້ອງສະໝຸດພຣະກິດຕິຄຸນ. ການຟັງເພງສັນລະເສີນສາມາດເປັນສິ່ງທີ່ມີພະລັງຫລາຍໂດຍສະເພາະ ຍ້ອນວ່າມັນມີເຈດຕະນາໃຫ້ທ່ອງຈຳອອກສຽງ.