“ວັນທີ 8–14 ເດືອນສິງຫາ. ເພງສັນລະເສີນ 1–2; 8; 19–33; 40; 46: ‘ພຣະຜູ້ເປັນເຈົ້າເປັນຜູ້ລ້ຽງຂ້ານ້ອຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 8–14 ເດືອນສິງຫາ. ເພງສັນລະເສີນ 1–2; 8; 19–33; 40; 46,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
The Lord Is My Shepherd [ພຣະຜູ້ເປັນເຈົ້າເປັນຜູ້ລ້ຽງຂ້ານ້ອຍ], ໂດຍ ຢອງຊຸງ ຄິມ, havenlight.com
ວັນທີ 8–14 ເດືອນສິງຫາ
ເພງສັນລະເສີນ 1–2; 8; 19–33; 40; 46
“ພຣະຜູ້ເປັນເຈົ້າເປັນຜູ້ລ້ຽງຂ້ານ້ອຍ”
ຢ່າຮູ້ສຶກວ່າຕ້ອງຈຳກັດຢູ່ໃນຂອບເຂດຂອງເພງສັນລະເສີນທີ່ຖືກເລືອກ ຫລື ຫລັກທຳທີ່ແນະນຳຢູ່ໃນໂຄງຮ່າງນີ້. ຈົ່ງໃຫ້ພຣະວິນຍານນຳພາທ່ານໄປຫາຄວາມຈິງທີ່ຊ່ວຍເຫລືອທ່ານໃຫ້ຮູ້ສຶກເຂົ້າໃກ້ພຣະຜູ້ເປັນເຈົ້າຫລາຍຂຶ້ນ.
ບັນທຶກຄວາມປະທັບໃຈຂອງທ່ານ
ເຮົາບໍ່ຮູ້ແນ່ນອນວ່າ ແມ່ນໃຜເປັນຜູ້ຂຽນ ເພງສັນລະເສີນ. ບາງຄົນຄິດວ່າກະສັດດາວິດເປັນຜູ້ຂຽນ, ແຕ່ສ່ວນຫລາຍແລ້ວ, ບໍ່ຮູ້ວ່າແມ່ນໃຜເປັນຜູ້ຂຽນແທ້ໆ. ແຕ່ເມື່ອຫລັງຈາກໄດ້ອ່ານ ເພງສັນລະເສີນ, ເຮົາອາດຮູ້ສຶກຄືກັນກັບວ່າເຮົາຮູ້ຈັກຈິດໃຈຂອງຜູ້ຂຽນເພງສັນລະເສີນ, ເຖິງແມ່ນເຮົາບໍ່ຮູ້ຊື່ຂອງພວກເພິ່ນກໍຕາມ. ສິ່ງທີ່ເຮົາຮູ້ແມ່ນວ່າ ເພງສັນລະເສີນເປັນພາກສ່ວນສຳຄັນຂອງການນະມັດສະການໃນບັນດາຊາວອິດສະຣາເອນ, ແລະ ເຮົາຮູ້ວ່າ ພຣະຜູ້ຊ່ວຍໃຫ້ລອດໄດ້ອ້າງເຖິງຂໍ້ຄວາມຢູ່ໃນນີ້ເລື້ອຍໆ. ໃນເພງສັນລະເສີນ, ເຮົາສາມາດຫລຽວເຂົ້າໄປໃນຈິດວິນຍານຂອງຜູ້ຄົນຂອງພຣະເຈົ້າໃນສະໄໝບູຮານ. ເຮົາເຫັນວ່າພວກເຂົາຮູ້ສຶກແນວໃດກ່ຽວກັບພຣະເຈົ້າ, ສິ່ງທີ່ພວກເຂົາເປັນຫ່ວງ, ແລະ ວິທີທີ່ພວກເຂົາພົບຄວາມສຸກ. ໃນຖານະຜູ້ທີ່ເຊື່ອໃນທຸກວັນນີ້, ຕະຫລອດທົ່ວໂລກ, ເຮົາຍັງໃຊ້ຖ້ອຍຄຳເຫລົ່ານີ້ຢູ່ໃນການນະມັດສະການພຣະເຈົ້າຂອງເຮົາ. ຜູ້ຂຽນເພງສັນລະເສີນເບິ່ງຄືສາມາດຫລຽວເຂົ້າມາໃນຈິດວິນຍານ ຂອງເຮົາ ແລະ ເບິ່ງຄືວ່າ ໄດ້ພົບເຫັນວິທີທີ່ຈະກ່າວເຖິງຄວາມຮູ້ສຶກຂອງເຮົາກ່ຽວກັບພຣະເຈົ້າ, ສິ່ງທີ່ເຮົາເປັນຫ່ວງ, ແລະ ວິທີທີ່ເຮົາພົບເຫັນຄວາມສຸກ.
ສຳລັບພາບລວມຂອງພຣະທຳເພງສັນລະເສີນ, ໃຫ້ເບິ່ງ “Psalms” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເພງສັນລະເສີນ 1; 23; 26–28; 46
ເພງສັນລະເສີນສິດສອນເຮົາໃຫ້ໄວ້ວາງໃຈໃນພຣະຜູ້ເປັນເຈົ້າ.
ທ່ານອາດສັງເກດເຫັນວ່າ ຂະນະທີ່ທ່ານອ່ານເພງສັນລະເສີນ ທ່ານເຫັນຜູ້ຂຽນກ່າວເຖິງຄວາມຢ້ານກົວ, ຄວາມໂສກເສົ້າ, ຫລື ຄວາມກັງວົນເລື້ອຍປານໃດ. ຄວາມຮູ້ສຶກເຊັ່ນນັ້ນ ເປັນເລື່ອງທຳມະດາ, ແມ່ນແຕ່ສຳລັບຜູ້ຄົນແຫ່ງສັດທາ. ແຕ່ສິ່ງທີ່ເຮັດໃຫ້ເພງສັນລະເສີນເປັນຄຳດົນໃຈຄືສິ່ງທີ່ມັນສະເໜີມອບໃຫ້, ລວມທັງຄວາມໄວ້ວາງໃຈທັງໝົດໃນພຣະຜູ້ເປັນເຈົ້າ. ໃຫ້ພິຈາລະນາຂ່າວສານບາງຢ່າງທີ່ດົນໃຈເຫລົ່ານີ້ຂະນະທີ່ທ່ານອ່ານ ເພງສັນລະເສີນ 1; 23; 26–28; 46. ໃຫ້ຊອມເບິ່ງສິ່ງດັ່ງຕໍ່ໄປນີ້, ແລະ ຂຽນສິ່ງທີ່ທ່ານຄົ້ນພົບລົງໄວ້:
-
ການເຊື້ອເຊີນໃຫ້ໄວ້ວາງໃຈໃນພຣະຜູ້ເປັນເຈົ້າ:
-
ຖ້ອຍຄຳທີ່ບັນຍາຍພຣະຜູ້ເປັນເຈົ້າ:
-
ຖ້ອຍຄຳທີ່ບັນຍາຍສັນຕິສຸກ, ພະລັງ, ແລະ ພອນອື່ນໆທີ່ພຣະອົງມີໃຫ້:
-
ຖ້ອຍຄຳທີ່ບັນຍາຍຜູ້ທີ່ໄວ້ວາງໃຈໃນພຣະອົງ:
ເພງສັນລະເສີນຊີ້ບອກແນວຄິດຂອງເຮົາໄປຫາພຣະຊົນຊີບ ແລະ ການປະຕິບັດສາດສະໜາກິດຂອງພຣະເຢຊູຄຣິດ.
ເພງສັນລະເສີນຫລາຍບົດຊີ້ໄປຫາພຣະຊົນຊີບໃນຊ່ວງມະຕະຂອງພຣະເຢຊູຄຣິດ. ຊາວຄຣິດຢູ່ໃນວັນເວລາຂອງພຣະຄຳພີໃໝ່ ໄດ້ເຫັນການກ່ຽວຂ້ອງເຫລົ່ານີ້ຄືກັນ—ຍົກຕົວຢ່າງ, ພວກເຂົາຮັບຮູ້ວ່າ ຢູ່ໃນ ເພງສັນລະເສີນ 2 ມີຄຳອ້າງອີງເຖິງການນຳພຣະເຢຊູໄປຢູ່ຕໍ່ໜ້າກະສັດເຮໂຣດກັບປົນທຽວປີລາດ (ເບິ່ງ ກິດຈະການ 4:24–30). ໃຫ້ຄິດທີ່ຈະອ່ານ ເພງສັນລະເສີນ 2 ແລະ 22 ພ້ອມດ້ວຍ ມັດທາຍ 27:35–46; ລູກາ 23:34–35; ແລະ ໂຢຮັນ 19:23–24. ໃຫ້ຊອກຫາສິ່ງທີ່ກ່ຽວຂ້ອງກັນລະຫວ່າງຖ້ອຍຄຳຢູ່ໃນເພງສັນລະເສີນເຫລົ່ານີ້ ແລະ ພຣະຊົນຊີບຂອງພຣະຜູ້ຊ່ວຍໃຫ້ລອດ, ແລະ ໃຫ້ຊອກຫາການກ່ຽວຂ້ອງທີ່ຄ້າຍຄືກັນນີ້ ຂະນະທີ່ທ່ານສຶກສາພຣະທຳເພງສັນລະເສີນ ລະຫວ່າງສອງສາມອາທິດຂ້າງໜ້າ.
ໃຫ້ວາດພາບໃນໃຈເຫັນຕົວທ່ານເອງເປັນຄົນຢິວ ຢູ່ໃນວັນເວລາຂອງພຣະເຢຊູ ທີ່ຮູ້ຈັກເພງສັນລະເສີນດີສົມຄວນ ແລະ ຮູ້ເຖິງສິ່ງທີ່ກ່ຽວຂ້ອງກັບພຣະຊົນຊີບຂອງພຣະຜູ້ຊ່ວຍໃຫ້ລອດ. ຄວາມຮູ້ນີ້ໄດ້ເປັນພອນຕໍ່ທ່ານແນວໃດ?
ເບິ່ງ ເພງສັນລະເສີນ 31:5; 34:20; 41:9; ລູກາ 24:44; ເຮັບເຣີ 2:9–12 ນຳອີກ.
“ຄວາມຮັກອັນໝັ້ນຄົງຂອງພຣະຜູ້ເປັນເຈົ້າເຕັມທົ່ວທັງແຜ່ນດິນໂລກ.”
ການອ່ານ ເພງສັນລະເສີນ 8; 19; ແລະ 33 ອາດດົນໃຈທ່ານໃຫ້ພິຈາລະນາການສ້າງທີ່ດີເລີດຫລາຍຢ່າງຂອງພຣະຜູ້ເປັນເຈົ້າ. ໃຫ້ເອົາໃຈໃສ່ຕໍ່ຄວາມຄິດ ແລະ ຄວາມຮູ້ສຶກຂອງທ່ານ ຂະນະທີ່ທ່ານເຮັດແນວນັ້ນ. ການສ້າງຂອງພຣະຜູ້ເປັນເຈົ້າ “ເປີດເຜີຍສະຫງ່າລາສີຂອງພຣະເຈົ້າ” ຕໍ່ທ່ານແນວໃດ? (ເພງສັນລະເສີນ 19:1).
ພຣະຄຳຂອງພຣະຜູ້ເປັນເຈົ້າເປັນສິ່ງທີ່ມີພະລັງ, ແລະ “ເບີກບານໃຈ.”
ໃນເພງສັນລະເສີນ, ຖ້ອຍຄຳເຊັ່ນ ປະຈັກພະຍານ, ຂໍ້ຄຳສັ່ງ, ພຣະບັນຍັດ, ແລະ ການຕັດສິນ ສາມາດອ້າງເຖິງພຣະຄຳຂອງພຣະຜູ້ເປັນເຈົ້າ. ໃຫ້ຈື່ຈຳສິ່ງນັ້ນໄວ້ໃນໃຈຂະນະທີ່ທ່ານອ່ານ ເພງສັນລະເສີນ 19:7–11. ຂໍ້ເຫລົ່ານີ້ແນະນຳຫຍັງແດ່ຕໍ່ທ່ານກ່ຽວກັບພຣະຄຳຂອງພຣະຜູ້ເປັນເຈົ້າ? ເພງສັນລະເສີນ 29 ສິດສອນທ່ານຫຍັງແດ່ກ່ຽວກັບສຸລະສຽງຂອງພຣະອົງ? ໃນປະສົບການຂອງທ່ານ, ພຣະຄຳ ຫລື ສຸລະສຽງຂອງພຣະຜູ້ເປັນເຈົ້າກົງກັບການບັນຍາຍເຫລົ່ານີ້ແນວໃດ?
ເຮົາຕ້ອງມີຄວາມສະອາດ ແລະ ບໍລິສຸດທາງວິນຍານ ກ່ອນຈະເຂົ້າໄປທີ່ປະທັບຂອງພຣະຜູ້ເປັນເຈົ້າໄດ້.
ການເຂົ້າໄປໃນທີ່ປະທັບຂອງພຣະຜູ້ເປັນເຈົ້າຮຽກຮ້ອງຄວາມບໍລິສຸດ.
ຍ້ອນວ່າພຣະວິຫານທີ່ເຢຣູຊາເລັມໄດ້ຖືກສ້າງຂຶ້ນຢູ່ເທິງເນີນພູ, ວະລີທີ່ວ່າ “ເນີນພູຂອງພຣະຜູ້ເປັນເຈົ້າ” (ເພງສັນລະເສີນ 24:3) ຈຶ່ງອາດໝາຍເຖິງພຣະວິຫານ ຫລື ທີ່ປະທັບຢູ່ຂອງພຣະເຈົ້າ. ສິ່ງນີ້ຊ່ວຍໃຫ້ທ່ານເຂົ້າໃຈ ເພງສັນລະເສີນ 24 ຫລາຍຂຶ້ນແນວໃດ? ຄຳວ່າ “ມືສະອາດ, ແລະ ໃຈບໍລິສຸດ” ມີຄວາມໝາຍຕໍ່ທ່ານແນວໃດ? (ເພງສັນລະເສີນ 24:4).
ເພງສັນລະເສີນ 26 ແລະ 27 ສິດສອນທ່ານຫຍັງແດ່ກ່ຽວກັບບ້ານຂອງພຣະຜູ້ເປັນເຈົ້າ?
ເບິ່ງ ເພງສັນລະເສີນ 15; David A. Bednar, “Clean Hands and a Pure Heart,” Liahona, Nov. 2007, 80–83 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເພງສັນລະເສີນ 22.ຂະນະທີ່ຄົນໜຶ່ງໃນຄອບຄົວອ່ານເພງສັນລະເສີນບົດນີ້, ຄົນອື່ນໆສາມາດຊອກຫາຂໍ້ຄວາມທີ່ຄ້າຍຄືກັນຢູ່ໃນ ມັດທາຍ 27:35–46. ແລ້ວເຂົາເຈົ້າສາມາດແບ່ງປັນຄວາມຮູ້ສຶກຂອງເຂົາເຈົ້າກ່ຽວກັບພຣະເຢຊູຄຣິດ ແລະ ການເສຍສະລະຂອງພຣະອົງເພື່ອເຮົາ.
-
ເພງສັນລະເສີນ 23.ເພງສັນລະເສີນ 23 ເປັນການດົນໃຈສຳລັບຫລາຍໆເພງ, ດັ່ງເຊັ່ນ “The Lord Is My Shepherd” ແລະ “The Lord My Pasture Will Prepare” (Hymns, nos. 108, 109). ບາງເທື່ອຄອບຄົວຂອງທ່ານຢາກຮ້ອງເພງໜຶ່ງ ແລະ ຊີ້ບອກຖ້ອຍຄຳຢູ່ໃນເພງສັນລະເສີນ ທີ່ອາດເປັນການດົນໃຈສຳລັບເນື້ອເພງ. ຫລື ເຂົາເຈົ້າອາດມັກແຕ້ມຮູບຂອງບາງສິ່ງທີ່ພົບເຫັນຢູ່ໃນເພງສັນລະເສີນ ຫລື ເພງສວດ ແລະ ໃຫ້ສະມາຊິກໃນຄອບຄົວເດົາວ່າເປັນຂໍ້ໃດ ຫລື ເນື້ອເພງໃດ ທີ່ເຂົ້າກັບຮູບເຫລົ່ານັ້ນ. ພຣະຜູ້ເປັນເຈົ້າເປັນເໝືອນດັ່ງຜູ້ລ້ຽງແກະຕໍ່ເຮົາແນວໃດ?
-
ເພງສັນລະເສີນ 24:3–5.ເພື່ອເນັ້ນເຖິງຄວາມສຳຄັນຂອງການມີມືທີ່ສະອາດ ແລະ ມີໃຈທີ່ບໍລິສຸດ, ທ່ານສາມາດອ່ານ ເພງສັນລະເສີນ 24:3–5 ຂະນະທີ່ສະມາຊິກໃນຄອບຄົວກຳລັງລ້າງມື. ມືເປັນຕົວແທນໃຫ້ສິ່ງໃດ ຢູ່ໃນເພງສັນລະເສີນບົດນີ້? ຫົວໃຈສາມາດເປັນເຄື່ອງໝາຍໃຫ້ສິ່ງໃດ? ເຮົາສາມາດເຮັດຫຍັງແດ່ເພື່ອໃຫ້ມືສະອາດ ແລະ ໃຫ້ໃຈບໍລິສຸດທາງວິນຍານໄດ້?
-
ເພງສັນລະເສີນ 30:5, 11.ເພງສັນລະເສີນ 30:5 ບັນຈຸຄຳສັນຍາວ່າ “ນ້ຳຕາອາດໄຫລຫລັ່ງໃນເວລາກາງຄືນ, ແຕ່ຄວາມຊົມຊື່ນຍິນດີກໍມີມາໃນຕອນເຊົ້າ.” ພຣະຜູ້ເປັນເຈົ້າໄດ້ປ່ຽນຄວາມໂສກເສົ້າຂອງເຮົາໃຫ້ກາຍເປັນຄວາມຊົມຊື່ນຍິນດີແນວໃດ? ສະມາຊິກໃນຄອບຄົວບາງຄົນອາດມັກການສະແດງຕາມສິ່ງທີ່ບັນຍາຍຢູ່ໃນ ຂໍ້ທີ 11.
-
ເພງສັນລະເສີນ 33.ໃຫ້ສັງເກດເບິ່ງຄຳວ່າ ທຸກຄົນ ຖືກໃຊ້ຈັກເທື່ອຢູ່ໃນເພງສັນລະເສີນບົດນີ້. ເຮົາຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າຈາກການໃຊ້ຄຳນີ້ຊ້ຳຫລາຍເທື່ອ, ໂດຍສະເພາະຢູ່ໃນ ຂໍ້ທີ 13–15?
-
ເພງສັນລະເສີນ 46:10.ພວກທ່ານສາມາດເຮັດບາງສິ່ງນຳກັນ ທີ່ຮຽກຮ້ອງໃຫ້ສະມາຊິກໃນຄອບຄົວ “ງຽບສະຫງົບ.” ການງຽບສະຫງົບຊ່ວຍເຮົາໃຫ້ມາຮູ້ຈັກພຣະເຈົ້າແນວໃດ? ມີໂອກາດໃດແດ່ທີ່ເຮົາສາມາດງຽບສະຫງົບ ແລະ ມາຮູ້ຈັກພຣະເຈົ້າ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.
ການປັບປຸງການສຶກສາສ່ວນຕົວ
ມີຄວາມຄິດສ້າງສັນ. ພຣະຄຳພີທີ່ເໝືອນດັ່ງເພງສັນລະເສີນມັກດົນໃຈຜູ້ຄົນໃຫ້ສັນລະເສີນພຣະຜູ້ເປັນເຈົ້າ ໃນວິທີທາງທີ່ສ້າງສັນ. ຖ້າຫາກທ່ານຮູ້ສຶກໄດ້ຮັບການດົນໃຈໃຫ້ສະແດງຄວາມອຸທິດຕົນຂອງທ່ານຜ່ານທາງສຽງເພງ, ຄຳກະວີ, ຮູບພາບສິລະປະ, ຫລື ໃນວິທີອ່ານ, ໃຫ້ເຮັດຕາມຄວາມຮູ້ສຶກເຫລົ່ານັ້ນ. ໃຫ້ຄິດທີ່ຈະແບ່ງປັນສິ່ງທີ່ທ່ານໄດ້ປະດິດຄິດສ້າງ ເພື່ອຊ່ວຍຄົນອື່ນສ້າງສັດທາໃນພຣະບິດາເທິງສະຫວັນ ແລະ ພຣະເຢຊູຄຣິດ.
The Good Shepherd [ພຣະຜູ້ລ້ຽງທີ່ດີ], ໂດຍ ເຄັນ ສະເປັນເຊີ