“ວັນທີ 1–7 ເດືອນສິງຫາ. ໂຢບ 1–3; 12–14; 19; 21–24; 38–40; 42: ‘ຂ້າກໍຍັງຈະຫວັງໃນພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 1–7 ເດືອນສິງຫາ. ໂຢບ 1–3; 12–14; 19; 21–24; 38–40; 42,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ຜູ້ຊາຍສາມຄົນກຳລັງເວົ້າລົມກັບຜູ້ຊາຍຄົນໜຶ່ງທີ່ນັ່ງຢູ່ພື້ນດິນ

The Judgments of Job [ການຕັດສິນຂອງໂຢບ], ໂດຍ ໂຈເຊັບ ບຣິກກີ

ວັນທີ 1–7 ເດືອນສິງຫາ

ໂຢບ 1–3; 12–14; 19; 21–24; 38–40; 42

“ຂ້າກໍຍັງຈະຫວັງໃນພຣະອົງ”

ຂະນະທີ່ທ່ານອ່ານກ່ຽວກັບໂຢບ, ພຣະວິນຍານຈະນຳພາທ່ານໃຫ້ຄົ້ນພົບຄວາມຈິງທີ່ສຳຄັນທີ່ກ່ຽວຂ້ອງກັບຕົວທ່ານ. ໃຫ້ຂຽນສິ່ງທີ່ທ່ານຄົ້ນພົບລົງໄວ້, ແລະ ໄຕ່ຕອງວິທີທີ່ຄວາມຈິງເຫລົ່ານີ້ກ່ຽວຂ້ອງກັບທ່ານແນວໃດ.

ບັນທຶກຄວາມປະທັບໃຈຂອງທ່ານ

ມັນເປັນເລື່ອງປົກກະຕິທີ່ຈະແປກໃຈວ່າເປັນຫຍັງສິ່ງທີ່ບໍ່ດີຈຶ່ງເກີດກັບຄົນດີ—ຫລື ເຊັ່ນດຽວກັນ, ເປັນຫຍັງສິ່ງທີ່ດີຈຶ່ງເກີດກັບຄົນຊົ່ວ. ເປັນຫຍັງພຣະເຈົ້າ, ທີ່ຍຸດຕິທຳ, ຈຶ່ງປ່ອຍໃຫ້ສິ່ງນີ້ເກີດຂຶ້ນ? ກໍມີຄຳຖາມແບບດຽວກັນນີ້ຄືກັນໃນປະສົບການຂອງໂຢບ, ຜູ້ເປັນຄົນດີແຕ່ໄດ້ປະເຊີນກັບສິ່ງທີ່ບໍ່ດີ. ຍ້ອນການທົດລອງຂອງໂຢບ, ໝູ່ເພື່ອນຂອງເພິ່ນຈຶ່ງສົງໄສຖ້າຫາກວ່າເພິ່ນເປັນຄົນດີຫລືບໍ່. ໂຢບໄດ້ຢືນຢັນຄວາມຊອບທຳຂອງຕົນ ແລະ ໄດ້ສົງໄສຖ້າຫາກວ່າພຣະເຈົ້າຍຸດຕິທຳແທ້ໆບໍ. ແຕ່ເຖິງແມ່ນເພິ່ນໄດ້ຮັບທຸກທໍລະມານ ແລະ ມີຄວາມສົງໄສ, ແຕ່ໂຢບກໍຍັງຊື່ສັດ ແລະ ມີສັດທາໃນພຣະເຢຊູຄຣິດຢູ່ຄືເກົ່າ. ໃນພຣະທຳໂຢບ, ສັດທາຖືກສົງໄສ ແລະ ຖືກທົດສອບ ແຕ່ບໍ່ເຄີຍປະຖິ້ມທັງໝົດ. ສິ່ງນັ້ນບໍ່ໄດ້ ໝາຍຄວາມວ່າຄຳຖາມທຸກຂໍ້ໄດ້ຮັບຄຳຕອບທັງໝົດ. ແຕ່ພຣະທຳໂຢບສິດສອນວ່າ ຈົນກວ່າມັນຈະຖືກຕອບ, ຄຳຖາມ ແລະ ສັດທາສາມາດຄຽງຄູ່ກັນໄປ, ແລະ ບໍ່ວ່າຈະມີຫຍັງເກີດຂຶ້ນໃນເວລານີ້, ເຮົາສາມາດເວົ້າເຖິງພຣະຜູ້ເປັນເຈົ້າຂອງເຮົາວ່າ, “ຂ້າກໍຍັງຈະຫວັງໃນພຣະອົງ” (ໂຢບ 13:15).

ສຳລັບພາບລວມຂອງພຣະທຳໂຢບ, ໃຫ້ເບິ່ງ “ໂຢບ” ໃນຄູ່ມືພຣະຄຳພີ (scriptures.ChurchofJesusChrist.org).

ຮູບພາບ

Learn More image

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢບ 1–3; 12–13

ຄວາມໄວ້ວາງໃຈຂອງເຮົາໃນພຣະບິດາເທິງສະຫວັນ ແລະ ພຣະເຢຊູຄຣິດ ສາມາດຊ່ວຍເຮົາໃຫ້ສືບຕໍ່ມີສັດທາໃນທຸກສະຖານະການໄດ້.

ບົດນຳໜ້າທັງຫລາຍຂອງພຣະທຳໂຢບມີຈຸດປະສົງເພື່ອຈະເນັ້ນໜັກບົດບາດຂອງຊາຕານ ໃນຖານະຜູ້ປໍລະປັກ ຫລື ຜູ້ກ່າວຫາ, ບໍ່ແມ່ນເພື່ອບັນຍາຍເຖິງວິທີທີ່ ພຣະເຈົ້າກັບຊາຕານມີຄວາມປະຕິສຳພັນກັນແທ້ໆຫລືບໍ່. ຂະນະທີ່ທ່ານອ່ານເລື່ອງທີ່ຊາຕານກ່າວກ່ຽວກັບໂຢບ (ເບິ່ງ ໂຢບ 1:9–11; 2:4–5), ທ່ານອາດໄຕ່ຕອງຖ້າຫາກວ່າ ສິ່ງດຽວກັນນັ້ນຖືກເວົ້າກ່ຽວກັບທ່ານຫລືບໍ່. ທ່ານອາດຖາມຕົວເອງວ່າ, ແມ່ນຫຍັງຄືເຫດຜົນຂອງເຮົາທີ່ຍັງຄົງຊື່ສັດຕໍ່ພຣະເຈົ້າຢູ່ຄືເກົ່າ? ໃຫ້ໄຕ່ຕອງການທົດລອງທີ່ໂຢບໄດ້ຮັບ ແລະ ການຕອບຮັບຂອງເພິ່ນ (ເບິ່ງ ໂຢບ 1:20–22; 2:9–10). ທ່ານຮຽນຮູ້ຫຍັງແດ່ຈາກເພິ່ນທີ່ອາດຊ່ວຍທ່ານໃຫ້ຕອບຮັບຕໍ່ການທ້າທາຍຂອງທ່ານ?

ເຖິງແມ່ນວ່າໂຢບພະຍາຍາມຊື່ສັດຢູ່ຄືເກົ່າ, ແຕ່ການທົດລອງ ແລະ ຄວາມທຸກທໍລະມານຂອງເພິ່ນກໍມີຢູ່ຕໍ່ໄປ (ໃຫ້ສັງເກດເບິ່ງການຄ້ຳຄວນຂອງເພິ່ນ ຢູ່ໃນ ບົດທີ 3). ຕາມຈິງແລ້ວ, ຄວາມທຸກທໍລະມານຂອງເພິ່ນເບິ່ງຄືສາຫັດ, ແລະ ໝູ່ເພື່ອນຂອງເພິ່ນກໍໄດ້ເວົ້າວ່າ ພຣະເຈົ້າກຳລັງລົງໂທດເພິ່ນ (ເບິ່ງ ໂຢບ 4–5; 8; 11). ຂະນະທີ່ທ່ານອ່ານຄຳຕອບບາງສ່ວນຂອງໂຢບ ຢູ່ໃນ ບົດທີ 12–13, ໃຫ້ພິຈາລະນາສິ່ງທີ່ໂຢບຮູ້ຈັກກ່ຽວກັບພຣະເຈົ້າ ທີ່ຊ່ວຍເພິ່ນໃຫ້ສືບຕໍ່ໄວ້ວາງໃຈ, ເຖິງແມ່ນວ່າເພິ່ນຕ້ອງຮັບທຸກທໍລະມານ ແລະ ຄຳຖາມບໍ່ໄດ້ຮັບຄຳຕອບກໍຕາມ. ທ່ານຮູ້ຫຍັງແດ່ກ່ຽວກັບພຣະເຈົ້າ ທີ່ຊ່ວຍທ່ານປະເຊີນກັບການທ້າທາຍ? ທ່ານຮູ້ຈັກຄວາມຈິງເຫລົ່ານີ້ໄດ້ແນວໃດ, ແລະ ມັນເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານແນວໃດ?

ໂຢບ 19

ພຣະເຢຊູຄຣິດຄືພຣະຜູ້ໄຖ່ຂອງເຮົາ.

ບາງເທື່ອຄວາມຈິງທີ່ສຳຄັນທີ່ສຸດແມ່ນຖືກເປີດເຜີຍຕໍ່ເຮົາໃນເວລາທີ່ເຮົາມີຄວາມເຈັບປວດຫລາຍທີ່ສຸດ. ໃຫ້ໄຕ່ຕອງການທົດລອງທີ່ໂຢບບັນຍາຍຢູ່ໃນ ໂຢບ 19:1–22 ແລະ ຄວາມຈິງທີ່ເພິ່ນໄດ້ປະກາດຢູ່ໃນ ໂຢບ 19:23–27. ແລ້ວໃຫ້ໄຕ່ຕອງວິທີທີ່ທ່ານຮູ້ວ່າພຣະຜູ້ໄຖ່ຊົງພຣະຊົນແນວໃດ. ຄວາມຮູ້ນີ້ສ້າງຄວາມແຕກຕ່າງເມື່ອທ່ານປະສົບກັບການທົດລອງທີ່ຫຍຸ້ງຍາກແນວໃດ?

ເບິ່ງ ຄຳສອນ ແລະ ພັນທະສັນຍາ 121:1–12; 122 ນຳອີກ.

ໂຢບ 21–24

“ເມື່ອພຣະອົງທົດສອບຂ້ອຍແລ້ວ, ພຣະອົງຈະພົບວ່າຂ້ອຍບໍລິສຸດເໝືອນຄຳ.”

ຂະນະທີ່ທ່ານອ່ານຕື່ມອີກກ່ຽວກັບການໂຕ້ຖຽງກັນລະຫວ່າງໂຢບກັບໝູ່ເພື່ອນຂອງເພິ່ນກ່ຽວກັບເຫດຜົນຂອງການຮັບທຸກທໍລະມານຂອງໂຢບ, ທ່ານອາດໄຕ່ຕອງວິທີທີ່ທ່ານຈະຕອບຄຳຖາມຂໍ້ສຳຄັນໃນການໂຕ້ຖຽງຂອງພວກເພິ່ນທີ່ວ່າ: ເປັນຫຍັງບາງເທື່ອຄົນຊອບທຳຈຶ່ງຕ້ອງຮັບທຸກທໍລະມານ ແລະ ບາງເທື່ອຄົນຊົ່ວບໍ່ໄດ້ຖືກລົງໂທດ? ໃຫ້ຄິດກ່ຽວກັບສິ່ງນີ້ ຂະນະທີ່ທ່ານອ່ານ 2 ນີໄຟ 21-24. ທ່ານຮູ້ຫຍັງແດ່ກ່ຽວກັບພຣະບິດາເທິງສະຫວັນ ແລະ ແຜນຂອງພຣະອົງ ທີ່ສາມາດຊ່ວຍຕອບຄຳຖາມເຫລົ່ານີ້? ເບິ່ງ, ຍົກຕົວຢ່າງ, 2 ນີໄຟ 2:11–13; ໂມໄຊຢາ 23:21–23; 24:10–16; ອັບຣາຮາມ 3:22–26; Dallin H. Oaks, “Opposition in All Things,” Liahona, May 2016, 114–17.

ເບິ່ງ L. Todd Budge, “Consistent and Resilient Trust,” Liahona, Nov. 2019, 47–49 ນຳອີກ.

ໂຢບ 38; 40; 42

ທັດສະນະຂອງພຣະເຈົ້າແມ່ນຍິ່ງໃຫຍ່ກວ່າທັດສະນະຂອງເຮົາ.

ໂດຍທີ່ອຸກອັ່ງກັບການກ່າວຫາຂອງໝູ່ເພື່ອນຂອງເພິ່ນ (ເບິ່ງ ໂຢບ 16:1–5; 19:1–3), ໂຢບໄດ້ຮ້ອງຫາພຣະເຈົ້າໂດຍບໍ່ລົດລະ ເພື່ອທູນຂໍຄຳອະທິບາຍກ່ຽວກັບການຮັບທຸກທໍລະມານຂອງເພິ່ນ (ເບິ່ງ ໂຢບ 19:6–7; 23:1–9; 31). ແອວເດີ ນຽວ ເອ ແມ໊ກສະແວວ ໄດ້ສັງເກດວ່າ “ເມື່ອເຮົາຂາດຄວາມອົດທົນກັບເວລາຂອງພຣະເຈົ້າ,” ຄືກັນກັບໂຢບ, “ເຮົາໄດ້ສະແດງອອກວ່າ ເຮົາຮູ້ວ່າສິ່ງໃດດີທີ່ສຸດ. ແປກຫລາຍແທ້ໆເນາະ—ເຮົາຜູ້ໃສ່ນາລິກາ ບັງອາດຢາກແນະນຳຜູ້ຄວບຄຸມນາລິກາຈັກກະວານ ແລະ ປະຕິທິນຂອງພຣະເຈົ້າ” (“Hope through the Atonement of Jesus Christ,” Ensign, Nov. 1998, 63). ໃຫ້ໄຕ່ຕອງຂໍ້ຄວາມເຫລົ່ານີ້ຂະນະທີ່ທ່ານອ່ານຄຳຕອບຂອງພຣະເຈົ້າຕໍ່ໂຢບຢູ່ໃນ ບົດທີ 38 ແລະ 40. ມີຄວາມຈິງໃດແດ່ທີ່ພຣະອົງໄດ້ສິດສອນໂຢບ? ຄວາມຈິງເຫລົ່ານີ້ມີຄວາມສຳຄັນແນວໃດສຳລັບເຮົາ ທີ່ຈະຮູ້ຈັກ ຂະນະທີ່ເຮົາດີ້ນລົນກັບຄວາມຍາກລຳບາກ ແລະ ຄຳຖາມໃນຊ່ວງມະຕະນີ້? ແມ່ນຫຍັງທີ່ປະທັບໃຈທ່ານກ່ຽວກັບຄຳຕອບຂອງໂຢບຢູ່ໃນ ໂຢບ 42:1–6?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຢບ 1:20–22.ເພື່ອຈະເຂົ້າໃຈວິທີທີ່ໂຢບອາດຮູ້ສຶກ, ດັ່ງທີ່ບັນຍາຍຢູ່ໃນຂໍ້ເຫລົ່ານີ້, ຄອບຄົວຂອງທ່ານສາມາດອ່ານ “ໂຢບ” ໃນປຶ້ມ ເລື່ອງພຣະຄຳພີເດີມ ຫລື ສະແດງຕາມ ໂຢບ 1:13–22. ເຮົາຮຽນຮູ້ຫຍັງແດ່ຈາກຕົວຢ່າງຂອງໂຢບ?

ໂຢບ 14:14.ເຮົາຈະຕອບຄຳຖາມຂອງໂຢບຢູ່ໃນຂໍ້ນີ້ແນວໃດ? ແອວມາ 11:42–44 ຊ່ວຍເຮົາແນວໃດ? (ເບິ່ງ ວິດີໂອ “He Lives—Celebrate Easter Because Jesus Christ Lives,” ChurchofJesusChrist.org ນຳອີກ.)

ໂຢບ 16:1–5.ເຮົາກໍເຄີຍເປັນຄືກັນກັບໝູ່ເພື່ອນຂອງໂຢບຢູ່ບໍ, ຜູ້ຕັດສິນ ແລະ ກ່າວວິຈານໂຢບ ຕອນທີ່ເພິ່ນຕ້ອງການ ການປອບໂຍນ? (ເບິ່ງ ໂຢບ 16:1–4; ເບິ່ງ ໂຢຮັນ 7:24) ນຳອີກ. ຄຳເວົ້າຂອງເຮົາສາມາດເພີ່ມຄວາມເຂັ້ມແຂງໃຫ້ແກ່ຄົນອື່ນໃນເວລາໂສກເສົ້າແນວໃດ? (ເບິ່ງ ໂຢບ 16:5).

ໂຢບ 19:23–27.ຫລັງຈາກການອ່ານຂໍ້ເຫລົ່ານີ້ແລ້ວ, ສະມາຊິກໃນຄອບຄົວສາມາດແບ່ງປັນວິທີທີ່ເຂົາເຈົ້າຮູ້ວ່າ ພຣະຜູ້ໄຖ່ຂອງເຮົາຊົງພຣະຊົນແນວໃດ. ພວກທ່ານອາດຊ່ວຍກັນຮວບຮວມຖ້ອຍຄຳທີ່ເປັນປະຈັກພະຍານຂອງພວກທ່ານ (ຫລື ໃຫ້ເດັກນ້ອຍແຕ້ມຮູບພຣະຜູ້ຊ່ວຍໃຫ້ລອດ) ໄວ້ໃນປຶ້ມ, ດັ່ງເຊັ່ນປຶ້ມບັນທຶກຂອງຄອບຄົວ (ເບິ່ງ ຂໍ້ທີ 23). ພວກທ່ານກໍຍັງສາມາດຮ້ອງເພງ ທີ່ເປັນພະຍານເຖິງພຣະຜູ້ຊ່ວຍໃຫ້ລອດ, ດັ່ງເຊັ່ນ “ເຮົາຮູ້ພຣະຜູ້ໄຖ່ຊົງພຣະຊົນ” (ເພງສວດ ແລະ ເພງຂອງເດັກນ້ອຍ, 42), ແລະ ແບ່ງປັນວະລີທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະອົງ.

ໂຢບ 23:8–11.ຄຳວ່າ “ພົບເຫັນວ່າ” ເຮົາເປັນ “ເໝືອນຄຳ” ໝາຍຄວາມວ່າແນວໃດ? (ເບິ່ງ ວິດີໂອ “The Refiner’s Fire,” ChurchofJesusChrist.org ນຳອີກ). ເຮົາຮູ້ວ່າແມ່ນໃຜທີ່ໄດ້ເຮັດສິ່ງນີ້? ເດັກນ້ອຍອາດມັກເຮັດບາງສິ່ງ ແລ້ວຂຽນຖ້ອຍຄຳຈາກ ຂໍ້ທີ 10 ໃສ່ໃນນັ້ນ. ພວກທ່ານກໍສາມາດສົນທະນາວິທີທີ່ພຣະເຢຊູຄຣິດໄດ້ເອົາຊະນະການທົດລອງຂອງພຣະອົງແນວໃດ (ເບິ່ງ ລູກາ 22:41–44; ຄຳສອນ ແລະ ພັນທະສັນຍາ 19:16–19).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຮູ້ພຣະຜູ້ໄຖ່ຊົງພຣະຊົນ,” ເພງສວດ ແລະ ເພງຂອງເດັກນ້ອຍ, 42.

ການປັບປຸງການສຶກສາສ່ວນຕົວ

ວາດພາບ. ຄວາມຮູ້ທີ່ມີຄວາມໝາຍອາດມີມາຂະນະທີ່ເຮົາສຶກສາພຣະຄຳພີ. ຍົກຕົວຢ່າງ, ການສົມມຸດຕົວເອງຢູ່ໃນສະຖານະການຂອງໂຢບ ສາມາດຊ່ວຍທ່ານໄຕ່ຕອງຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດໄດ້.