“ວັນທີ 15–21 ເດືອນສິງຫາ. ເພງສັນລະເສີນ 49–51; 61–66; 69–72; 77–78; 85–86: ‘ຂ້ອຍຈະບອກສິ່ງທີ່ພຣະອົງໄດ້ເຮັດເພື່ອຂ້ອຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 15–21 ເດືອນສິງຫາ. ເພງສັນລະເສີນ 49–51; 61–66; 69–72; 77–78; 85–86,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

Saving That Which Was Lost [ຊ່ວຍກູ້ສິ່ງທີ່ເສຍໄປ], ໂດຍ ໄມໂກ ທີ ມອມ

ວັນທີ 15–21 ເດືອນສິງຫາ

ເພງສັນລະເສີນ 49–51; 61–66; 69–72; 77–78; 85–86

“ຂ້ອຍຈະບອກສິ່ງທີ່ພຣະອົງໄດ້ເຮັດເພື່ອຂ້ອຍ”

ໂຄງຮ່າງນີ້ລະບຸຫົວຂໍ້ຄຳສອນບາງຢ່າງທີ່ກ່າວຢູ່ໃນຂໍ້ເຫລົ່ານີ້ຂອງເພງສັນລະເສີນ. ຂະນະທີ່ທ່ານສຶກສາ, ບາງຄຳ, ຮູບພາບ, ຫລື ແນວຄິດໃດໜຶ່ງ ອາດເດັ່ນຕໍ່ທ່ານ. ທ່ານຮູ້ສຶກວ່າພຣະຜູ້ເປັນເຈົ້າພະຍາຍາມສິດສອນຫຍັງໃຫ້ທ່ານ?

ບັນທຶກຄວາມປະທັບໃຈຂອງທ່ານ

ຜູ້ຂຽນເພງສັນລະເສີນແບ່ງປັນຄວາມຮູ້ສຶກສ່ວນຕົວທີ່ເລິກເຊິ່ງຢູ່ໃນບົດກະວີຂອງພວກເພິ່ນ. ພວກເພິ່ນໄດ້ຂຽນກ່ຽວກັບຄວາມທໍ້ແທ້ໃຈ, ຄວາມຢ້ານກົວ, ແລະ ຄວາມສຳນຶກຜິດ. ໃນບາງເວລາ, ພວກເພິ່ນໄດ້ຮູ້ສຶກວ່າຖືກພຣະເຈົ້າປະຖິ້ມ, ແລະ ເພງສັນລະເສີນບາງບົດກໍສະແດງຄວາມບໍ່ພໍໃຈ ຫລື ຄວາມໝົດຫວັງ. ຖ້າຫາກທ່ານເຄີຍຮູ້ສຶກເຊັ່ນນີ້, ການອ່ານເພງສັນລະເສີນສາມາດຊ່ວຍທ່ານໃຫ້ຮູ້ວ່າ ບໍ່ມີແຕ່ທ່ານຄົນດຽວ. ແຕ່ທ່ານຈະພົບເຫັນອີກວ່າ ເພງສັນລະເສີນສາມາດໃຫ້ກຳລັງໃຈທ່ານ ເມື່ອທ່ານຮູ້ສຶກເຊັ່ນນັ້ນ, ຍ້ອນວ່າເພງສັນລະເສີນກໍສັນລະເສີນພຣະຜູ້ເປັນເຈົ້ານຳອີກສຳລັບພຣະກະລຸນາທິຄຸນຂອງພຣະອົງ, ສຳລັບອຳນາດທີ່ໜ້າງຶດງໍ້ຂອງພຣະອົງ, ແລະ ສຳລັບຄວາມປິຕິຍິນດີໃນຄວາມເມດຕາຂອງພຣະອົງ. ພວກເພິ່ນຮູ້ວ່າ ໂລກນີ້ເຕັມໄປດ້ວຍຄວາມຊົ່ວຮ້າຍ ແລະ ບາບ ແຕ່ພຣະຜູ້ເປັນເຈົ້າຍັງ “ດີ, ແລະ ພ້ອມທີ່ຈະໃຫ້ອະໄພ” (ເພງສັນລະເສີນ 86:5). ພວກເພິ່ນເຂົ້າໃຈວ່າ ການມີສັດທາໃນພຣະຜູ້ເປັນເຈົ້າບໍ່ໄດ້ໝາຍຄວາມວ່າ ທ່ານຈະບໍ່ເຄີຍດີ້ນລົນກັບຄວາມກັງວົນ, ກັບບາບ, ຫລື ກັບຄວາມຢ້ານກົວ. ມັນໝາຍຄວາມວ່າທ່ານຮູ້ຈັກຜູ້ທີ່ຈະຫັນໄປຫາ ເມື່ອທ່ານຕ້ອງການຄວາມຊ່ວຍເຫລືອ.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເພງສັນລະເສີນ 49; 62:5–12

ການໄຖ່ມີມາຜ່ານທາງພຣະເຢຊູຄຣິດເທົ່ານັ້ນ.

ເພງສັນລະເສີນ 49 ມີຂ່າວສານສຳລັບ “ທັງຜູ້ໃຫຍ່ ແລະ ຜູ້ນ້ອຍ, ທັງຄົນຮັ່ງມີ ແລະ ຄົນຍາກຈົນ” (ຂໍ້ທີ 2). ທ່ານຄິດວ່າຂ່າວສານນີ້ແມ່ນກ່ຽວກັບຫຍັງ? ທ່ານຮູ້ສຶກວ່າ ເພງສັນລະເສີນ 62:5–12 ຕື່ມຫຍັງໃສ່ກັບຂ່າວສານນີ້?

ການອ່ານເພງສັນລະເສີນອາດກະຕຸ້ນທ່ານໃຫ້ໄຕ່ຕອງວິທີທີ່ບາງຄົນໄວ້ວາງໃຈໃນບາງສິ່ງ ແທນທີ່ຈະໄວ້ວາງໃຈໃນພຣະເຈົ້າເພື່ອການໄຖ່ (ເບິ່ງ ເພງສັນລະເສີນ 49:6–7). ຊີວິດຂອງທ່ານໄດ້ຮັບອິດທິພົນຈາກປະຈັກພະຍານຂອງທ່ານວ່າ “ພຣະເຈົ້າຈະຊ່ວຍກູ້ຈິດວິນຍານ [ຂອງທ່ານ] ຈາກອຳນາດຂອງຄວາມຕາຍ” ແນວໃດ? (ຂໍ້ທີ 15).

ເບິ່ງ ສຸພາສິດ 28:6; ແອວມາ 34:8–17 ນຳອີກ.

ເພງສັນລະເສີນ 51; 85–86

ຍ້ອນຄວາມເມດຕາຂອງພຣະຜູ້ຊ່ວຍໃຫ້ລອດ, ເຮົາຈຶ່ງສາມາດຮັບການໃຫ້ອະໄພບາບໄດ້.

ຄຳອ້ອນວອນຂໍຄວາມເມດຕາຢູ່ໃນ ເພງສັນລະເສີນ 51 ເປັນຄຳອ້ອນວອນຂອງກະສັດດາວິດ, ຜູ້ຮູ້ສຶກຜິດເພາະການຫລິ້ນຊູ້ ແລະ ການຄາດຕະກຳ (ເບິ່ງ 2 ຊາມູເອນ 11). ເຖິງແມ່ນວ່າບາບຂອງເຮົາຈະບໍ່ຮ້າຍແຮງ, ແຕ່ເຮົາກໍຮູ້ສຶກແບບດຽວກັນເຖິງຄວາມຈຳເປັນສຳລັບຄວາມເມດຕາທີ່ກ່າວຢູ່ໃນເພງສັນລະເສີນ. ເຮົາກໍຍັງສາມາດຮຽນຮູ້ບາງສິ່ງກ່ຽວກັບຄວາມໝາຍຂອງການກັບໃຈນຳອີກ. ຍົກຕົວຢ່າງ, ຄຳໃດ ຫລື ວະລີໃດ ຢູ່ໃນ ເພງສັນລະເສີນ 51 ສິດສອນທ່ານກ່ຽວກັບທັດສະນະຄະຕິທີ່ເຮົາຕ້ອງມີ ກ່ອນຈະກັບໃຈໄດ້? ທ່ານຮຽນຮູ້ຫຍັງແດ່ກ່ຽວກັບຜົນກະທົບທີ່ການຊົດໃຊ້ຂອງພຣະຜູ້ຊ່ວຍໃຫ້ລອດສາມາດມີໃນຊີວິດຂອງທ່ານ?

ທ່ານອາດຖາມຄຳຖາມແບບດຽວກັນ ຂະນະທີ່ທ່ານອ່ານ ເພງສັນລະເສີນ 85–86. ທ່ານກໍຍັງສາມາດຊອກຫາວະລີທີ່ບັນຍາຍພຣະຜູ້ເປັນເຈົ້ານຳອີກ. ວະລີເຫລົ່ານີ້ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານວ່າ ພຣະອົງຈະໃຫ້ອະໄພທ່ານແນວໃດ? (ເບິ່ງ, ຍົກຕົວຢ່າງ, ເພງສັນລະເສີນ 86:5, 13, 15).

ເບິ່ງ ແອວມາ 36; Russell M. Nelson, “We Can Do Better and Be Better,” Liahona, May 2019, 67–69; Carole M. Stephens, “The Master Healer,” Liahona, Nov. 2016, 9–12 ນຳອີກ.

ເພງສັນລະເສີນ 51:13–15; 66:16–17; 71:15–24

ປະຈັກພະຍານຂອງເຮົາເຖິງພຣະເຢຊູຄຣິດສາມາດຊ່ວຍຄົນອື່ນໃຫ້ມາຫາພຣະອົງແນວໃດ.

ໃຫ້ໄຕ່ຕອງວິທີທີ່ທ່ານໄດ້ຮັບປະຈັກພະຍານຂອງທ່ານເຖິງພຣະເຢຊູຄຣິດ ແລະ ເຖິງອຳນາດແຫ່ງການຊົດໃຊ້ຂອງພຣະອົງ. ແລ້ວ, ຂະນະທີ່ທ່ານສຶກສາ ເພງສັນລະເສີນ 51:13–15; 66:16–17; 71:15–24, ໃຫ້ຄິດກ່ຽວກັບວິທີທີ່ທ່ານສາມາດເຊື້ອເຊີນຄົນອື່ນໃຫ້ “ມາເບິ່ງສິ່ງທີ່ພຣະເຈົ້າຊົງກະທຳ” (ເພງສັນລະເສີນ 66:5). ຂໍ້ຄວາມທີ່ວ່າ “ເວົ້າເຖິງຄວາມຊອບທຳ [ຂອງພຣະອົງ] ຕະຫລອດວັນ” ມີຄວາມໝາຍຕໍ່ທ່ານແນວໃດ? (ເພງສັນລະເສີນ 71:24). ທ່ານຈະບອກຄົນອື່ນເຖິງ “ສິ່ງທີ່ພຣະອົງໄດ້ເຮັດເພື່ອຈິດວິນຍານ [ຂອງທ່ານ]” ແນວໃດ? (ເພງສັນລະເສີນ 66:16).

ເບິ່ງ ໂມໄຊຢາ 28:1–4; ແອວມາ 26 ນຳອີກ.

ຊາຍໜຸ່ມສອງຄົນກຳລັງເວົ້າລົມກັນ — ເຮົາສາມາດແບ່ງປັນປະຈັກພະຍານຂອງເຮົາກັບຄົນອື່ນ ເຖິງສິ່ງທີ່ພຣະຜູ້ເປັນເຈົ້າໄດ້ເຮັດເພື່ອເຮົາ.

ເພງສັນລະເສີນ 63; 69; 77–78

ພຣະຜູ້ເປັນເຈົ້າຈະຊ່ວຍເຮົາໃນຍາມສຸກເສີນ.

ເພງສັນລະເສີນຫລາຍບົດບັນຍາຍ, ໃນພາສາທີ່ມີພະລັງ, ວ່າຄວາມຮູ້ສຶກທີ່ໄດ້ຢູ່ຫ່າງໄກຈາກພຣະເຈົ້າ ແລະ ຕ້ອງການຄວາມຊ່ວຍເຫລືອຫລາຍທີ່ສຸດຈາກພຣະອົງນັ້ນເປັນຈັ່ງໃດ. ທ່ານອາດຄິດທີ່ຈະຊອກຫາຄຳບັນຍາຍເຊັ່ນນັ້ນ ຢູ່ໃນ ເພງສັນລະເສີນ 63:1, 8; 69:1–8, 18–21; 77:1–9. ທ່ານພົບເຫັນຫຍັງແດ່ຢູ່ໃນ ເພງສັນລະເສີນ 63; 69; 77–78 ທີ່ໃຫ້ຄວາມແນ່ນອນໃຈແກ່ຜູ້ຂຽນເພງສັນລະເສີນເຫລົ່ານີ້?

ເມື່ອທ່ານອຸກໃຈ, ການ “ຈົດຈຳວຽກງານຂອງພຣະຜູ້ເປັນເຈົ້າ” ແລະ “ການອັດສະຈັນຜ່ານມາ” ຂອງພຣະອົງ ຊ່ວຍທ່ານໄດ້ແນວໃດ? (ເພງສັນລະເສີນ 77:11). ການອັດຈະສັນບາງຢ່າງເຫລົ່ານັ້ນມີຢູ່ໃນ ເພງສັນລະເສີນ 78. ຂະນະທີ່ທ່ານອ່ານກ່ຽວກັບມັນ, ໃຫ້ໄຕ່ຕອງສິ່ງທີ່ຊ່ວຍເຫລືອທ່ານໃຫ້ “ວາງຄວາມຫວັງ [ຂອງທ່ານ] ໄວ້ໃນພຣະເຈົ້າ” ແນວໃດ (ຂໍ້ທີ 7). ປະສົບການໃດແດ່ຈາກປະຫວັດຄອບຄົວຂອງທ່ານ ທີ່ດົນໃຈທ່ານ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເພງສັນລະເສີນ 51:17.ໃຫ້ພິຈາລະນາວິທີທີ່ທ່ານຈະສິດສອນຄອບຄົວຂອງທ່ານເຖິງຄວາມໝາຍຂອງການມີໃຈທີ່ຊອກຊ້ຳ. ຍົກຕົວຢ່າງ, ສະມາຊິກໃນຄອບຄົວສາມາດປ່ຽນຜຽນກັນປອກບາງສິ່ງທີ່ມີເປືອກແຂງ, ດັ່ງເຊັ່ນ ເປືອກໄຂ່ ຫລື ເປືອກໝາກບົກ. ຫົວໃຈຂອງເຮົາເປັນເໝືອນເປືອກນັ້ນແນວໃດ? ເຮົາຈະເປີດໃຈຂອງເຮົາຕໍ່ພຣະຜູ້ເປັນເຈົ້າແນວໃດ? ການອ່ານ ເພງສັນລະເສີນ 51 ນຳກັນ ອາດໃຫ້ແນວຄິດບາງຢ່າງ.

ເພງສັນລະເສີນ 61:2–3.ສະມາຊິກໃນຄອບຄົວອາດມັກແຕ້ມຮູບສັນຍາລັກໃນຂໍ້ເຫລົ່ານີ້ ແລະ ສົນທະນາວິທີທີ່ພຣະເຢຊູຄຣິດ ເປັນ “ສີລາ” ທີ່ສູງກວ່າ, “ບ່ອນລີ້ໄພສຳລັບ [ເຮົາ],” ແລະ “ປ້ອມປ້ອງກັນ” ແນວໃດ.

ເພງສັນລະເສີນ 71:17; 78:5–7.ພຣະຜູ້ເປັນເຈົ້າຢາກໃຫ້ທ່ານ “ບອກ … ລູກຫລານ [ຂອງທ່ານ]” ກ່ຽວກັບຫຍັງ? (ເພງສັນລະເສີນ 78:5). ບາງທີສະມາຊິກໃນຄອບຄົວແຕ່ລະຄົນສາມາດແບ່ງປັນຕົວຢ່າງກ່ຽວກັບ “ວຽກງານອັນອັດສະຈັນ,” ຂອງພຣະເຈົ້າ ດັ່ງເຊັ່ນເລື່ອງລາວໃນພຣະຄຳພີ, ປະສົບການ, ຫລື ປະຈັກພະຍານສ່ວນຕົວ, ທີ່ຊ່ວຍເຂົາເຈົ້າ “ວາງຄວາມຫວັງໃນພຣະເຈົ້າ” (ເພງສັນລະເສີນ 71:17; 78:7).

ເພງສັນລະເສີນ 72.ເພງສັນລະເສີນ 72 ໄດ້ຖືກຂຽນໂດຍດາວິດກ່ຽວກັບໂຊໂລໂມນລູກຊາຍຂອງເພິ່ນ, ແຕ່ສ່ວນຫລາຍໃນນັ້ນກໍສາມາດນຳໃຊ້ກັບພຣະເຢຊູຄຣິດໄດ້ຄືກັນ. ຂະນະທີ່ຄອບຄົວຂອງທ່ານອ່ານເພງສັນລະເສີນບົດນີ້, ເຂົາເຈົ້າສາມາດເຍິງຮູບຂອງພຣະຜູ້ຊ່ວຍໃຫ້ລອດຂຶ້ນ ເມື່ອເຂົາເຈົ້າພົບເຫັນຂໍ້ທີ່ເຕືອນເຂົາເຈົ້າເຖິງພຣະເຢຊູຄຣິດ. ເຮົາຈະຊ່ວຍບັນລຸຄວາມປາດຖະໜາທີ່ວ່າ “ສະຫງ່າລາສີຈົ່ງເຕັມໄປທົ່ວແຜ່ນດິນໂລກ” ໄດ້ແນວໃດ? (ເພງສັນລະເສີນ 72:19; ເບິ່ງ ຄຳສອນ ແລະ ພັນທະສັນຍາ 65:2 ນຳອີກ).

ເພງສັນລະເສີນ 85:11.ຂໍ້ນີ້ສາມາດດົນໃຈການສົນທະນາກ່ຽວກັບເຫດການຟື້ນຟູພຣະກິດຕິຄຸນ—ວິທີທີ່ພຣະຄຳພີມໍມອນແມ່ນຈິງແທ້ ທີ່ “ສົດໃສຂຶ້ນ” ແລະ ວິທີທີ່ຜູ້ສົ່ງຂ່າວແຫ່ງສະຫວັນໄດ້ “ລົງມາຈາກສະຫວັນ” ແນວໃດ (ເບິ່ງ ໂມເຊ 7:62 ນຳອີກ). ວິດີໂອ “Preparation of Joseph Smith: Tutored by Heaven” (ChurchofJesusChrist.org) ອະທິບາຍເຫດການບາງຢ່າງເຫລົ່ານີ້.

3:39

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຂໍເພິ່ງພຣະທຸກຊົ່ວໂມງ,” ເພງສວດ ແລະ ເພງຂອງເດັກນ້ອຍ, 12.

ການປັບປຸງການສິດສອນຂອງເຮົາ

ໃຊ້ຫລາຍສິ່ງ. “ໃຫ້ຄິດຫາວິທີທາງທີ່ທ່ານສາມາດຕື່ມຫລາຍຢ່າງໃສ່ກັບຄວາມພະຍາຍາມຂອງທ່ານ ເພື່ອສິດສອນພຣະກິດຕິຄຸນ. ການເຮັດແນວນີ້ຈະຕື່ມຄວາມເລິກເຊິ່ງ ແລະ ຄວາມງົດງາມໃສ່ກັບປະສົບການ. … ໃຫ້ພິຈາລະນາການໃຊ້ເພງ, ເລື່ອງເລົ່າ, ຮູບພາບ, ແລະ ສິລະປະຢ່າງອື່ນ ສາມາດເຊື້ອເຊີນພຣະວິນຍານແນວໃດ” (Teaching in the Savior’s Way, 22).

ຜູ້ຊາຍກຳລັງນັ່ງຄຸເຂົ່າຢູ່ຕໍ່ພຣະພັກຂອງພຣະເຢຊູ