« គំនិតដើម្បីកែលម្អការសិក្សាព្រះគម្ពីរជាគ្រួសាររបស់បងប្អូន » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« គំនិតដើម្បីកែលម្អការសិក្សាព្រះគម្ពីរជាគ្រួសាររបស់បងប្អូន » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២

រូបភាព

ម្តាយ និងកូនកំពុងសិក្សាព្រះគម្ពីរនៅឯផ្ទះ

គំនិតដើម្បីកែលម្អការសិក្សាព្រះគម្ពីរជាគ្រួសាររបស់បងប្អូន

ការសិក្សាព្រះគម្ពីរជាគ្រួសារជាទៀងទាត់ គឺជារបៀបមួយដ៏មានអានុភាពដើម្បីជួយដល់គ្រួសាររបស់បងប្អូនឲ្យរៀនដំណឹងល្អ ។ ទោះជាបងប្អូនអានជាគ្រួសារច្រើន និងយូរប៉ុណ្ណាក៏ដោយ ក៏វាមិនសំខាន់ដូចជាការមានភាពខ្ជាប់ខ្ជួននៅក្នុងកិច្ចខិតខំរបស់បងប្អូនដែរ ។ នៅពេលបងប្អូនធ្វើឲ្យការសិក្សាព្រះគម្ពីរជាផ្នែកមួយដ៏សំខាន់នៃជីវិតគ្រួសាររបស់បងប្អូន នោះបងប្អូននឹងជួយសមាជិកគ្រួសាររបស់បងប្អូនឲ្យខិតមកកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ហើយស្ថាបនាទីបន្ទាល់របស់ពួកគេនៅលើគ្រឹះនៃព្រះបន្ទូលរបស់ព្រះ ។

សូមពិចារណាសំណួរខាងក្រោម ៖

តើបងប្អូនអាចលើកទឹកចិត្តសមាជិកគ្រួសាររបស់បងប្អូនឲ្យសិក្សាព្រះគម្ពីរដោយខ្លួនពួកគេតាមរបៀបណា ?
តើបងប្អូនអាចធ្វើអ្វីខ្លះដើម្បីលើកទឹកចិត្តដល់សមាជិកគ្រួសារឲ្យចែកចាយនូវអ្វីដែលពួកគេកំពុងរៀន ?
តើបងប្អូនអាចគូសបញ្ជាក់អំពីគោលការណ៍ទាំងឡាយ ដែលបងប្អូនកំពុងរៀននៅក្នុងព្រះគម្ពីរសញ្ញាចាស់ នៅក្នុងពេលបង្រៀនរៀងរាល់ថ្ងៃយ៉ាងដូចម្ដេច ?

សូមចាំថា គេហដ្ឋានគឺជាកន្លែងដ៏ពិសិដ្ឋមួយសម្រាប់ការរៀនសូត្រដំណឹងល្អ ។ បងប្អូនអាចរៀន និងបង្រៀនដំណឹងល្អនៅគេហដ្ឋានតាមរបៀបដែលពុំអាចធ្វើទៅបាននៅក្នុងថ្នាក់រៀននៅឯសាសនាចក្រឡើយ ។ សូមមានគំនិតច្នៃប្រឌិត នៅពេលបងប្អូនគិតអំពីរបៀបជួយដល់គ្រួសារបងប្អូនឲ្យរៀនសូត្រចេញមកពីបទគម្ពីរ ។ សូមប្រើគំនិតមួយចំនួនដូចខាងក្រោមដើម្បីពង្រីកការសិក្សាបទគម្ពីរជាគ្រួសាររបស់បងប្អូន ។

ប្រើតន្ត្រី

សូមច្រៀងចម្រៀងដែលពង្រឹងដល់គោលការណ៍ដែលបានបង្រៀននៅក្នុងបទគម្ពីរ ។ ទំនុកតម្កើង ឬចម្រៀងកុមារដែលត្រូវបានផ្ដល់យោបល់ឲ្យប្រើ គឺត្រូវបានដាក់នៅក្នុងគម្រោងមេរៀននីមួយៗរាល់សប្តាហ៍ ។ បងប្អូនអាចសួរសំណួរដល់សមាជិកគ្រួសារអំពីពាក្យ ឬឃ្លានៅក្នុងទំនុកបទនោះ ។ បន្ថែមពីលើការច្រៀងចម្រៀង គ្រួសាររបស់បងប្អូនអាចធ្វើសកម្មភាពដែលត្រូវនឹងបទចម្រៀង ឬចាក់បទចម្រៀងលេងកំដរ នៅពេលពួកគេកំពុងធ្វើសកម្មភាពដទៃទៀត ។ សម្រាប់គំនិតបន្ថែមទៀត សូមមើល « ការបញ្ចូលតន្រ្តីពិសិដ្ឋនៅក្នុងការរៀនសូត្រដំណឹងល្អរបស់បងប្អូន » នៅក្នុងធនធាននេះ ។

ចែកចាយបទគម្ពីរដែលមានអត្ថន័យ

សូមផ្ដល់ពេលឲ្យសមាជិកគ្រួសារចែកចាយវគ្គបទគម្ពីរ ដែលពួកគេឃើញថាមានអត្ថន័យ អំឡុងពេលពួកគេសិក្សាព្រះគម្ពីរផ្ទាល់ខ្លួន ។

ប្រើសម្តីរបស់បងប្អូនផ្ទាល់

សូមអញ្ជើញសមាជិកគ្រួសារឲ្យសង្ខេបជាសម្ដីរបស់គេផ្ទាល់អំពីអ្វី ដែលពួកគេបានរៀនចេញមកពីបទគម្ពីរដែលបងប្អូនសិក្សា ។

រូបភាព

យុវវ័យកំពុងជួយកុមារតូចម្នាក់ឲ្យអានព្រះគម្ពីរ

អនុវត្ដបទគម្ពីរមកក្នុងជីវិតរបស់បងប្អូន

បន្ទាប់ពីអានវគ្គបទគម្ពីរមួយរួចហើយ សូមឲ្យសមាជិកគ្រួសារចែកចាយអំពីរបៀបដែលបទគម្ពីរអនុវត្តចំពោះជីវិតរបស់ពួកគេ ។

សួរសំណួរ

សូមអញ្ជើញសមាជិកគ្រួសារឲ្យសួរសំណួរអំពីដំណឹងល្អ ហើយបន្ទាប់មកចំណាយពេលរកមើលខគម្ពីរដែលអាចជួយឆ្លើយសំណួរនោះ ។

បង្ហាញបទគម្ពីរមួយ

សូមជ្រើសរើសខគម្ពីរមួយដែលបងប្អូនយល់ថាមានអត្ថន័យ ហើយដាក់បង្ហាញខគម្ពីរនេះនៅកន្លែងដែលសមាជិកគ្រួសារអាចមើលឃើញជាញឹកញាប់ ។ សូមអញ្ជើញសមាជិកគ្រួសារដទៃទៀតឲ្យផ្លាស់វេនគ្នាជ្រើសរើសបទគម្ពីរមួយមកដាក់បង្ហាញ ។

បង្កើតបញ្ជីបទគម្ពីរមួយ

សូមជ្រើសរើសខគម្ពីរមួយចំនួនជាគ្រួសារ ដែលបងប្អូនចង់ពិភាក្សានៅអំឡុងសប្ដាហ៍ក្រោយ ។

ទន្ទេញបទគម្ពីរ

សូមជ្រើសរើសវគ្គបទគម្ពីរមួយដែលមានអត្ថន័យចំពោះគ្រួសារបងប្អូន ហើយអញ្ជើញសមាជិកគ្រួសារឲ្យទន្ទេញវគ្គបទគម្ពីរនោះ ដោយការសូត្រវគ្គបទគម្ពីរនោះឡើងវិញរាល់ថ្ងៃ ឬលេងល្បែងទន្ទេញ ។

រូបភាព

ក្រុមគ្រួសារកំពុងច្រៀងជាមួយគ្នានៅក្នុងផ្ទះ

ចែកចាយមេរៀនដែលប្រើវត្ថុ

សូមស្វែងរកវត្ថុដែលទាក់ទងនឹងគោលការណ៍ដំណឹងល្អនៅក្នុងវគ្គបទគម្ពីរ ដែលបងប្អូនកំពុងអានជាគ្រួសារ ។ សូមអញ្ជើញសមាជិកគ្រួសារឲ្យនិយាយអំពីរបៀបដែលវត្ថុនីមួយៗជាប់ទាក់ទងនឹងការបង្រៀននៅក្នុងបទគម្ពីរ ។

ជ្រើសរើសប្រធានបទមួយ

សូមឲ្យសមាជិកគ្រួសារប្តូរវេនគ្នាជ្រើសរើសប្រធានបទមួយដែលគ្រួសារនឹងសិក្សារួមគ្នា ។ សូមប្រើ Topical Guide, Bible Dictionary ឬ សេចក្ដីណែនាំដល់បទគម្ពីរទាំងឡាយ ( នៅលើគេហទំព័័រ scriptures.ChurchofJesusChrist.org ) ដើម្បីស្វែងរកវគ្គបទគម្ពីរអំពីប្រធានបទនេះ ។

គូររូបភាព

សូមអានខគម្ពីរពីរបីជាគ្រួសារ បន្ទាប់មកទុកពេលឲ្យសមាជិកគ្រួសារគូររូបអ្វីមួយ ដែលជាប់ទាក់ទងនឹងអ្វីដែលបងប្អូនអាន ។ សូមចំណាយពេលពិភាក្សាអំពីគំនូររបស់គ្នាទៅវិញទៅមក ។

សម្ដែងជាសាច់រឿង

បន្ទាប់ពីអានរឿងមួយចប់ សូមអញ្ជើញសមាជិកគ្រួសារឲ្យសម្ដែងជាសាច់រឿង ។ បន្ទាប់មក សូមនិយាយអំពីរបៀបដែលសាច់រឿងនោះទាក់ទងនឹងអ្វីដែលបងប្អូនកំពុងជួបប្រទះជាលក្ខណៈបុគ្គល ឬជាគ្រួសារ ។

ប្រធាន រ័សុល អិម ណិលសុន បានមានប្រសាសន៍ ៖ « ខ្ញុំសូមសន្យាថា នៅពេលបងប្អូនធ្វើការដោយឧស្សាហ៍ព្យាយាម ដើម្បីរៀបចំគេហដ្ឋានរបស់បងប្អូនជាថ្មី ឲ្យក្លាយទៅជាមជ្ឈមណ្ឌលនៃការរៀនសូត្រដំណឹងល្អ នោះយូរៗទៅថ្ងៃឈប់សម្រាករបស់បងប្អូន នឹងបានជាទីរីករាយចិត្តយ៉ាងពិតប្រាកដ ។ កូនចៅរបស់បងប្អូន នឹងមានចិត្តរំភើបក្នុងការរៀនសូត្រ និងរស់នៅតាមការបង្រៀនរបស់ព្រះអង្គសង្គ្រោះ ហើយឥទ្ធិពលរបស់មារសត្រូវនៅក្នុងជីវិតរបស់បងប្អូន និងគេហដ្ឋានរបស់បងប្អូននឹងត្រូវសាបរលាប ។ ការផ្លាស់ប្តូរនៅគ្រួសាររបស់បងប្អូននឹងមានច្រើន ហើយក៏ជាការគាំទ្រយ៉ាងពេញទំហឹងផងដែរ » ( « Becoming Exemplary Latter-day Saints » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ១១៣ ) ។