« ការប្រើសៀវភៅ ចូរមកតាមខ្ញុំ—សម្រាប់ បុគ្គលម្នាក់ៗ និង ក្រុមគ្រួសារ » ចូរមកតាមខ្ញុំ—សម្រាប់ បុគ្គលម្នាក់ៗ និង ក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ការប្រើសៀវភៅ ចូរមកតាមខ្ញុំ—សម្រាប់ បុគ្គលម្នាក់ៗ និង ក្រុមគ្រួសារ » ចូរមកតាមខ្ញុំ—សម្រាប់ បុគ្គលម្នាក់ៗ និង ក្រុមគ្រួសារ ៖ ឆ្នាំ ២០២២
ការប្រើសៀវភៅ ចូរមកតាមខ្ញុំ—សម្រាប់ បុគ្គលម្នាក់ៗ និង ក្រុមគ្រួសារ
តើធនធាននេះសម្រាប់នរណា ?
ធនធាននេះគឺសម្រាប់បុគ្គលម្នាក់ៗ និង គ្រួសារទាំងអស់នៅក្នុងសាសនាចក្រ ។ វាត្រូវបានរចនាឡើងដើម្បីជួយបងប្អូនឲ្យរៀនដំណឹងល្អ—ទោះជាដោយខ្លួនឯង ឬ ជាមួយក្រុមគ្រួសារក្ដី ។ ប្រសិនបើបងប្អូនពុំបានសិក្សាដំណឹងល្អជាទៀងទាត់កាលពីមុនៗមកទេ ធនធាននេះអាចជួយបងប្អូនឲ្យចាប់ផ្ដើមបាន ។ ប្រសិនបើបងប្អូនមានទម្លាប់ល្អក្នុងការសិក្សាដំណឹងល្អរួចហើយ នោះធនធាននេះអាចជួយបងប្អូនឲ្យមានបទពិសោធន៍កាន់តែមានអត្ថន័យ ។
តើខ្ញុំគួរតែប្រើបា្រស់ធនធាននេះយ៉ាងដូចម្តេច ?
សូមប្រើធនធាននេះតាមរបៀបណាដែលជាជំនួយដល់បងប្អូន ។ បងប្អូនអាចរកឃើញថា វាជាជំនួយក្នុងការណែនាំ ឬ ជាជំនួយបន្ថែមទៅលើការសិក្សាព្រះគម្ពីរផ្ទាល់ខ្លួន និង ជាគ្រួសារ ។ បងប្អូនក៏អាចប្រើប្រាស់វាសម្រាប់រាត្រីជួបជុំក្រុមគ្រួសារផងដែរ ។ គម្រោងមេរៀននេះបញ្ជាក់បង្ហាញគោលការណ៍សំខាន់ៗ ដែលមាននៅក្នុងព្រះគម្ពីរសញ្ញាចាស់ ផ្ដល់ជាយោបល់ក្នុងការសិក្សា និងសកម្មភាពសម្រាប់បុគ្គលម្នាក់ៗ និង ក្រុមគ្រួសារ ហើយផ្ដល់កន្លែងកត់ត្រាអំពីចំណាប់អារម្មណ៍របស់បងប្អូន ។
ចូរមកតាមខ្ញុំ—សម្រាប់ បុគ្គលម្នាក់ៗ និង ក្រុមគ្រួសារ ពុំមែនជំនួស ឬ ប្រជែងនឹងរឿងល្អៗដែលបងប្អូនកំពុងធ្វើទេ ។ សូមធ្វើតាមការណែនាំរបស់ព្រះវិញ្ញាណ ដើម្បីកំណត់អំពីរបៀបដើម្បីសិក្សាព្រះបន្ទូលរបស់ព្រះដោយផ្ទាល់ខ្លួនបងប្អូន ។
តើធនធាននេះទាក់ទងនឹងអ្វីដែលបានកើតឡើងនៅក្នុងសាសនាចក្រយ៉ាងដូចម្ដេច ?
គម្រោងមេរៀននៅក្នុងធនធាននេះត្រូវបានរៀបចំឡើងស្របតាមកាលវិភាគអានប្រចាំសប្ដាហ៍ ។ ធនធាន ចូរមកតាមខ្ញុំ សម្រាប់ អង្គការបឋមសិក្សា និង សម្រាប់ សាលាថ្ងៃអាទិត្យ និង សម្រាប់ កូរ៉ុមបព្វជិតភាពអើរ៉ុន និងក្រុមយុវនារី មានកាលវិភាគដូចគ្នា ។ ដើម្បីគាំទ្រដល់កិច្ចខិតខំរបស់បងប្អូនដើម្បីរៀនសូត្រ ហើយរស់នៅតាមដំណឹងល្អនៅក្នុងគេហដ្ឋាន គ្រូបង្រៀនរបស់បងប្អូននៅក្នុងសាសនាចក្រ នឹងផ្ដល់ឱកាសដល់បងប្អូនដើម្បីចែកចាយបទពិសោធន៍ គំនិត និងសំណួរអំពីវគ្គបទគម្ពីរ ដែលបងប្អូនកំពុងសិក្សានៅគេហដ្ឋាន ។
ដោយសារតែសាលាថ្ងៃអាទិត្យ ត្រូវបានបង្រៀនតែពីរដងក្នុងមួយខែ នោះគ្រូបង្រៀនសាលាថ្ងៃអាទិត្យ អាចជ្រើសរើសរំលង ឬ ដាក់បញ្ចូលគម្រោងមេរៀនជាមួយគ្នាដើម្បីឲ្យទាន់តាមកាលវិភាគប្រចាំសប្ដាហ៍ ។ ការណ៍នេះក៏អាចជារឿងចាំបាច់ផងដែរ ( សម្រាប់ទាំងសាលាថ្ងៃអាទិត្យ និង អង្គការបឋមសិក្សា ) នៅសប្ដាហ៍ដែលការប្រជុំធម្មតានៅក្នុងសាសនាចក្រពុំត្រូវបានធ្វើឡើង ដោយសារតែសន្និសីទស្ដេក ឬហេតុផលផ្សេងទៀត ។ អំឡុងសប្ដាហ៍ទាំងនេះ បងប្អូនត្រូវបានអញ្ជើញឲ្យបន្ដសិក្សាព្រះគម្ពីរសញ្ញាចាស់នៅផ្ទះ ។
តើខ្ញុំចាំបាច់ត្រូវធ្វើតាមកាលវិភាគឬ ?
កាលវិភាគនេះនឹងជួយបងប្អូនឲ្យអានជម្រើសចេញពីព្រះគម្ពីរសញ្ញាចាស់ និងមុក្ដាដ៏មានតម្លៃមហិមានៅត្រឹមចុងឆ្នាំ ។ បន្ថែមពីលើនោះ ការធ្វើតាមកាលវិភាគដូចគ្នានឹងអ្នកដទៃទៀតអាចដឹកនាំឲ្យមានបទពិសោធន៍កាន់តែមានអត្ថន័យនៅឯគេហដ្ឋាន សាសនាចក្រ និងនៅកន្លែងផ្សេងទៀត ។ ប៉ុន្តែសូមកុំឲ្យមានអារម្មណ៍ថាត្រូវតែធ្វើតាមកាលវិភាគជាដាច់ខាត ឬ បង្ខំឲ្យអានគ្រប់ខគម្ពីរនោះឡើយ កាលវិភាគគឺគ្រាន់តែជាការណែនាំមួយដ៏សាមញ្ញដើម្បីជួយបងប្អូនឲ្យកំណត់ល្បឿនខ្លួនឯងប៉ុណ្ណោះ ។ រឿងសំខាន់គឺថា បងប្អូនកំពុងរៀនដំណឹងល្អជាបុគ្គល និង ជាគ្រួសារ ។
កំណត់ចំណាំស្ដីពីកាលវិភាគការអានព្រះគម្ពីរសញ្ញាចាស់
កាលវិភាគការអាននៅក្នុង ចូរមកតាមខ្ញុំ ដែលបានណែនាំសម្រាប់ឆ្នាំ ២០២២ ពុំដាក់បញ្ចូលរាល់ជំពូកនៅក្នុងព្រះគម្ពីរសញ្ញាចាស់ទេ ។ ដោយសារព្រះគម្ពីរសញ្ញាចាស់វែងជាងព្រះគម្ពីរផ្សេងទៀត នោះជំពូក និងគម្ពីរមួយចំនួនត្រូវបានដកចេញ ដើម្បីធ្វើឲ្យកាលវិភាគការអាននោះមានលក្ខណៈសមស្របសម្រាប់បងប្អូន និងគ្រួសាររបស់បងប្អូន ។
ជំពូក និង គម្ពីរទាំងឡាយត្រូវបានជ្រើសរើសដើម្បីចៀសវាងពីភាពជ្រាំដែល និងរំលេចវគ្គបទគម្ពីរដែលថ្លែងទីបន្ទាល់អំពីព្រះយេស៊ូវគ្រីស្ទ មានភាពស៊ីជម្រៅនៅក្នុងគោលលទ្ធិ និងមានទំនាក់ទំនងជាពិសេសចំពោះជំនាន់របស់យើង ។ ឧទាហរណ៍ កាលវិភាគការអានដែលបានណែនាំពុំបានដាក់បញ្ចូល ទី១និងរបាក្សត្រ ទី២ ទេ ដោយសារមាតិកាជាច្រើននៃគម្ពីរទាំងនោះមានធាតុដូចគ្នាដែលមាននៅក្នុង ទី១និង ពង្សាវតារក្សត្រទី២ដែរ ។ កាលវិភាគនេះក៏ពុំដាក់បញ្ចូលនូវបទចម្រៀងសាឡូម៉ូនផងដែរ ដោយសារព្យាការីយ៉ូសែប ស្ម៊ីធបានបង្រៀនថា វាពុំមែនជាបទគម្ពីរដែលបំផុសគំនិតនោះទេ ( សូមមើលសេចក្ដីណែនាំដល់បទគម្ពីរទាំងឡាយ « បទចម្រៀងសាឡូម៉ូន » នៅលើគេហទំព័រ scriptures.ChurchofJesusChrist.org ) ។ ទោះជាយ៉ាងណាក្ដី សូមចងចាំថា នេះគ្រាន់តែជាកាលវិភាគសិក្សាមួយ ដែលបានណែនាំ ប៉ុណ្ណោះ ។ ការសិក្សាព្រះគម្ពីរផ្ទាល់ខ្លួន និងជាគ្រួសាររបស់បងប្អូនគួរតែមានការដឹកនាំដោយវិវរណៈផ្ទាល់ខ្លួន ។