fāmili ʻoku ako folofola ʻi ʻapi

Ngaahi Maʻuʻanga Tokoni Kehé

ʻE lava ke maʻu e konga lahi taha ʻo e ngaahi maʻuʻanga tokoni ko ʻení ʻi he Gospel Library app mo e ChurchofJesusChrist.org.

Ngaahi Himí mo e Tohi Hiva ʻa e Fānaú

ʻOku fakaafeʻi ʻe he hiva toputapú ʻa e Laumālié mo akoʻi e tokāteliné ʻi ha founga fakangalongataʻa. Makehe mei he ngaahi tatau kuo paaki ʻo e Ngaahi Himí mo e Tohi Hiva ʻa e Fānaú, te ke lava ʻo maʻu e hiki tatau ʻo e ngaahi fasi mo e ngaahi vitiō ʻo ha ngaahi himi lahi mo ha ngaahi hiva maʻá e fānaú ʻi he music.ChurchofJesusChrist.org mo e Sacred Music pea mo e polokalama Gospel Media.

Ngaahi Tohi Lēsoni ʻo e Seminelí mo e ʻInisititiutí

‘Oku ʻomi ʻe he ʻū tohi lēsoni seminelí mo e ʻinisititiutí ha puipuituʻa fakahisitōlia mo e ngaahi fakamatala fakatokāteline ki he ngaahi tefitoʻi moʻoni mo e ngaahi fakamatala ʻi he folofolá.

ʻŪ Makasini ʻa e Siasí

ʻOku ʻomi ʻi he makasini Kaumeʻá, Ki Hono Fakamālohia ʻo e Toʻu Tupú, mo e Liahoná ha ngaahi talanoa mo e ngaahi ʻekitivitī ʻe ala tokoni ki he ngaahi tefitoʻi moʻoni ʻokú ke akoʻi mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

Ngaahi Tefito ʻo e Ongoongoleleí

Te ke lava ʻo maʻu ʻi he Ngaahi Tefito ʻo e Ongoongoleleí (topics.ChurchofJesusChrist.org) ha ngaahi fakamatala tefito fekauʻaki mo ha ngaahi tefito kehekehe ʻo e ongoongoleleí, fakataha mo ha ngaahi fakafehokotakiʻanga ki ha ngaahi maʻuʻanga tokoni ʻaonga, hangē ko ha ngaahi lea fekauʻaki mei he konifelenisi lahí, ngaahi fakamatala, potufolofola, mo ha ngaahi vitiō.  

Ngaahi Talanoa mei he Fuakava Motuʻá

ʻE ala tokoni ʻa e Ngaahi Talanoa mei he Fuakava Motuʻá ki he fānaú ke nau ako ʻa e tokāteline mo e ngaahi talanoa ʻi he Fuakava Motuʻá. Te ke lava foki ʻo maʻu e ngaahi vitiō ʻo e ʻū talanoa ko ʻení ʻi he Gospel Library app mo e MediaLibrary.ChurchofJesusChrist.org.

Tohi Tā Valivali ʻo e Ngaahi Talanoa Fakafolofolá: Fuakava Motuʻá

ʻOku ʻi he maʻuʻanga tokoni ko ʻení ha ngaahi peesi ʻekitivitī tā valivali fakamānako naʻe faʻu ke fakatupulaki e ako ʻa e fānaú mei he Fuakava Motuʻá.

Ngaahi Vitioó mo e Tā Valivalí

ʻE ala tokoni ʻa e ʻū tā valivalí, vitioó mo e ngaahi mītia kehé ke mahino ki ho fāmilí ʻa e tokāteline mo e ngaahi talanoa ʻi he folofolá. Vakai ki he Gospel Media ʻi he MediaLibrary.ChurchofJesusChrist.org ke vakaiʻi e ngaahi maʻuʻanga tokoni fakamītia ʻa e Siasí. ‘Oku toe maʻu atu foki e Gospel Media ko ha app ki he telefoni toʻotoʻó. Ko e lahi e ngaahi fakatātā ʻoku lava ke ke fakaʻaongaʻí ʻoku maʻu ʻi he Tohi Fakatātā ʻo e Ongoongoleleí.

Ko e Faiako ‘i he Founga ‘a e Fakamoʻuí

ʻE lava ke tokoni atu ʻa e Ko e Faiako ‘i he Founga ‘a e Fakamo‘uí ke ke ako mo ngāue ʻaki ʻa e ngaahi tefitoʻi moʻoni ʻo e faiako faka-Kalaisí.