Ko Hono Fakakau e Hiva Toputapú ʻi Hoʻo Ako e Ongoongoleleí

ʻE lava ʻe hono hivaʻi e ngaahi hiva Palaimelí mo e ngaahi himí ʻo tāpuekina koe mo ho fāmilí ʻi ha ngaahi founga lahi. ‘E lava ke tokoni e ngaahi fakakaukaú ni ke ke fakaʻaongaʻi e hiva toputapú ʻi hoʻo faifeinga ke ako mo moʻui ʻaki e ongoongoleleí.

• Ako ‘a e ngaahi tefitoʻi moʻoni fakatokāteliné. Kumi ha ngaahi moʻoni ʻoku akoʻi ʻi he ngaahi hiva ʻokú ke hivaʻí pe fanongo ki aí. ʻE lava ke iku ʻeni ki he ngaahi fealeaʻaki he ongoongoleleí ʻo fekauʻaki mo e ngaahi moʻoni ko ʻení ʻi he ʻahó kakato. Hiva‘i pe fanongo ki he ngaahi hiva Palaimeli pe ngaahi himi ʻoku akoʻi fekauʻaki mo Sīsū Kalaisi mo ʻEne ongoongoleleí. Tokanga ki he ngaahi founga ‘oku fakamoʻoni ai ʻa e Laumālie Māʻoniʻoní ki he Fakamoʻuí mo ʻEne ngaahi akonakí.

• Fakatokanga‘i ʻa e mālohi ʻo e hivá. ‘E lava ʻe he hivaʻi pe fanongo ki he ngaahi hiva Palaimelí mo e ngaahi himí ʻo hoko ko ha tāpuaki ʻi he ngaahi taimi ʻo e faingataʻaʻiá. Hangē ko ʻení, ʻe lava ʻe hono hivaʻi ha hiva ʻo fakanonga ha tamasiʻi pe taʻahine he taimi mohé, fakatupu fiefia ʻi he ngāue fakataha homou fāmilí, langaki hake ha kaungāʻapi ʻoku puke, pe fakafiemālieʻi ha taha ʻoku ongoʻi loto-hohaʻa.

• Vahevahe e ngaahi aʻusiá. Vahevahe ha ngaahi aʻusia fakataautaha mo fakafāmili ʻoku felāveʻi mo e ngaahi pōpoaki ʻo e hivá. Te ke lava foki ʻo vahevahe ha ngaahi talanoa folofola fakafekauʻaki.

• Fakakau mai hoʻo fāmilí. ʻE ako lahi ange homou fāmilí mei he ngaahi hivá ʻo kapau ʻoku longomoʻui ʻenau kau maí. Ke fakakau mai e kau mēmipa ʻo e fāmilí, te ke lava ʻo fakaafeʻi ha tamasiʻi lahi ke tokoni ke akoʻi ha foʻi hiva ki ha tamasiʻi pe taʻahine siʻisiʻi ange pe fakaafeʻi e fānaú ke akoʻi ki he fāmilí ha hiva naʻa nau ako ʻi he Palaimelí. Te ke lava foki ʻo tuku ke taufetongi ʻa e kau mēmipa ʻo e fāmilí ʻi hono tataki ha hiva.

• Ke ke mohu founga. Faka‘aongaʻi ha ngaahi founga kehekehe ke ako fakafāmili e hiva toputapú. Hangē ko ʻení, te mou lava ʻo fakaʻaongaʻi ha ngaahi fakaʻilonga nima ʻoku fekauʻaki mo e ngaahi lea mo e kupuʻi lea ʻi ha hiva. Pe te mou lava ʻo taufetongi ʻi hono fakatātaaʻi ha konga ʻo ha foʻi hiva kae feinga e toenga ʻo fāmilí ke mateʻi e foʻi hivá. Mahalo ʻe fiefia homou fāmilí ʻi hono hivaʻi e ngaahi hivá ʻi ha vave pe leʻolahi kehekehe. ʻOku ʻi he polokalama Gospel Library mo e polokalama Gospel for Kids ha ngaahi lekooti ʻo e leʻó mo e ngaahi vitiō ʻe lava ʻo tokoni atu ke mou ako e ngaahi hivá. Te mou lava foki ʻo fakatahatahaʻi ha ngaahi hiva toputapu ke mou fanongo ki ai.

Ke maʻu ha ngaahi fakakaukau lahi ange, vakai ki he ngaahi konga “Ko hono Fakaʻaongaʻi e Hivá ke Akoʻi e Tokāteliné” mo e “Ko hono Tokoniʻi e Fānaú ke Ako mo Manatuʻi e Ngaahi Hiva Palaimelí mo e Ngaahi Himí,” ʻi he “Ngaahi Fakahinohino ki he Taimi Hivá mo e Polokalama Hiva ʻa e Fānaú ʻi he Sākalamēnití” ʻi he Haʻu, ʻo Muimui ʻIate Au—Maʻá e Palaimelí.