ongomātuʻa mo e leka kei siʻi ʻoku nau sio ʻi ha tohi

Ko Hono Akoʻi e Fānau Īkí

Kapau ʻoku ʻi ai ha fānau iiki ʻi ho fāmilí, ko ha ngaahi ʻekitivitī ʻeni ʻe ala tokoni ke nau ako ai:

• Hivá. ʻOku mālohi hono akoʻi ʻe he Ngaahi Himí mo e ngaahi hiva mei he Tohi Hiva ʻa e Fānaú ʻa e tokāteliné. Fakaʻaongaʻi e fakahokohoko ʻo e ngaahi tefitó ʻi he tafaʻaki ki mui ʻo e Tohi Hiva ʻa e Fānaú ke kumi e ngaahi hiva ʻoku felāveʻi mo e ngaahi tefitoʻi moʻoni ʻo e ongoongolelei ʻokú ke akoʻí. Tokoniʻi hoʻo fānaú ke nau fakafekauʻaki ʻa e ngaahi pōpoaki ʻo e ngaahi hivá ki heʻenau moʻuí. (Vakai foki, “Ko Hono Fakakau e Hiva Toputapú ʻi Hoʻo Ako e Ongoongoleleí” ʻi he maʻuʻanga tokoni ko ʻení.)

• Fanongo ki ha talanoa pe fakatātaaʻi. ʻOku manako ʻa e fanau īkí ʻi he ngaahi talanoa—mei he folofolá, mei hoʻo moʻuí, mei homou hisitōlia fakafāmilí, pe mei he ʻū makasini ʻa e Siasí. Fekumi ki ha ngaahi founga ke fakakau mai ai kinautolu ki he talanoá. Te nau lava ʻo pukepuke e ngaahi fakatātaá, tā ha ngaahi fakatātā ʻo e meʻa ʻoku nau fanongo ki aí, fakafaivaʻi ha foʻi talanoa, pe ko e tokoni ki hono fai e talanoá. Tokoni ke ʻiloʻi ʻe hoʻo fānaú ʻa e ngaahi moʻoni ʻo e ongoongoleleí ʻi he ngaahi talanoa ʻokú ke vahevahé.

• Lau ha veesi folofola Mahalo ʻoku ʻikai lava e fānau īkí ʻo laukonga fēfē, ka te ke kei lava pē ke fakakau mai kinautolu ki he ako mei he folofolá. Mahalo ʻe fie maʻu ke ke tokanga taha ki ha foʻi veesi, kupuʻi lea mahuʻinga, pe foʻi lea pē ʻe taha. Mahalo ʻe lava ʻa e fānaú ʻo ako maʻuloto ha ngaahi kupuʻi lea nounou mei he folofolá kapau te nau toutou lea ʻaki ia. ʻI heʻenau fanongo ki he folofola ʻa e ʻOtuá, te nau ongoʻi e Laumālié.

• Sio ki ha fakatātā pe sio ha vitiō. ʻI he taimi te ke fakaʻaliʻali ai ki hoʻo fānaú ha fakatātā pe vitiō ʻoku felāveʻi mo ha tefitoʻi moʻoni ʻo e ongoongoleleí pe ko ha talanoa pē ʻi he folofolá, ʻeke ange ha ngaahi fehuʻi ʻe tokoni ke nau ako mei he meʻa ʻoku nau mamata ki aí. Hangē ko ʻení, te ke lava ʻo fehuʻi ange, “Ko e hā e meʻa ʻoku hoko ʻi he fakatātā pe vitiō ko ʻení? Ko e hā hoʻo ongoʻi ki aí?” Ko ha feituʻu lelei ʻa e polokalama Gospel Media, ke fekumi ai ki he ngaahi fakatātaá mo e vitioó.

• Faʻu. ʻE lava e fānaú ʻo langa, tā, pe valivali ha meʻa ʻoku felāveʻi mo e talanoa pe tefitoʻi moʻoni ʻoku nau ako ki aí.

• Kau ʻi he ngaahi lēsoni fakataumuʻá. ʻE ala tokoni ha lēsoni fakataumuʻa faingaofua ke mahino ki hoʻo fānaú ha tefitoʻi moʻoni ʻo e ongoongoleleí ʻoku faingataʻa ke mahinó. ʻI hono fakaʻaongaʻi ʻo e ngaahi lēsoni fakataumuʻá, fekumi ki ha ngaahi founga ke fakakau atu ai hoʻo fānaú. Te nau ako lahi ange mei ha aʻusia ʻoku nau kau tonu ki ai ʻi hano siofi pē hano fakatātaaʻi ʻo ha meʻa.

• Fakatulamaʻi. ʻI he taimi ʻoku fakatulamaʻi ai ʻe he fānaú ha tūkunga ʻe ngalingali te nau fehangahangai mo ia ʻi he moʻuí, ʻoku malava leva ke mahino kiate kinautolu e founga ʻoku fakaʻaongaʻi ai ha tefitoʻi moʻoni ʻo e ongoongoleleí ki heʻenau moʻuí.

• Toe fai ʻa e ngaahi ʻekitivitií. ʻE ala fie maʻu ʻe he fānau īkí ke nau toutou fanongo ki ha tefitoʻi fakakaukau kae lava ke mahino ia kiate kinautolu. ʻOua te ke manavahē ke toutou fai maʻu pē ha foʻi talanoa pe ʻekitivitī tatau. Hangē ko ʻení, te ke lava ʻo toutou vahevahe ha talanoa mei he folofolá ʻi ha ngaahi founga kehekehe—lau mei he folofolá, fakamatalaʻi fakanounou ia ʻi hoʻo lea pē ʻaʻau, huluʻi ha foʻi vitiō, tuku e fānaú ke nau tokoni ʻi hono fai e talanoá, fakaafeʻi ke nau fakafaivaʻi ʻa e talanoá, mo e alā meʻa pehē.