Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí

Ko Hai ʻOku Fakataumuʻa Ki ai e Naunau Ko ʻEní?

ʻOku fakataumuʻa e naunau ko ʻení ki he fakafoʻituituí mo e fāmili kotoa pē ʻi he Siasí. ʻOku fakataumuʻa ia ke tokoniʻi koe ke ako e ongoongoleleí—ʻiate koe pē pe fakataha mo ho fāmilí. Kapau kuo teʻeki ke ke ako maʻu pē ʻa e ongoongoleleí ʻi he kuohilí, ʻe ala tokoni ʻa e naunau ko ʻení ke ke kamata leva. Kapau kuó ke ʻosi ako maʻu pē ʻa e ongoongoleleí, ʻe ala tokoni ʻa e naunau ko ʻení ke ke maʻu ha ngaahi aʻusia ʻoku ʻuhingamālie angé.

Te u Fakaʻaongaʻi Fēfē ʻa e Naunau Ko ʻEní?

Fakaʻaongaʻi ʻa e naunau ko ʻení ʻi ha founga pē ʻe ala tokoni kiate koé. ʻE lava ke hoko ia ko haʻo fakahinohino pe maʻuʻanga tokoni ki hono ako fakataautaha mo fakafāmili e folofolá. Te ke lava foki ʻo fakaʻaongaʻi ia ki he efiafi ʻi ʻapí. ʻOku fakamamafaʻi ʻe he ngaahi fokotuʻutuʻú ha ngaahi tefitoʻi moʻoni mahuʻinga ʻi he Fuakava Motuʻá, fokotuʻu atu ha ngaahi fakakaukau ki he akó mo e ngaahi ʻekitivitī maʻá e fakafoʻituituí mo e ngaahi fāmilí, pea fakaʻatā mo ha feituʻu ke lekooti ai e ngaahi ongo ʻokú ke maʻú.

ʻOku ʻikai fakataumuʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fetongi pe feʻauʻauhi mo e ngaahi meʻa lelei ʻokú ke lolotonga fakahokó. Muimui ki he fakahinohino ʻa e Laumālié ke fakapapauʻi e founga te ke fakahoko ai hoʻo ako e folofola ʻa e ʻOtuá.

ʻOku Fekauʻaki Fēfē ʻa e Naunau Ko ʻEní mo e Meʻa ʻOku Hoko ʻi he Siasí?

ʻOku fakamāʻopoʻopo ʻa e ngaahi fokotuʻutuʻu fakalēsoni ʻi he naunau ko ʻení ʻo fakatatau ki ha taimi-tēpile laukonga fakauike. ʻOku muimui ʻa e ngaahi maʻuʻanga tokoni Haʻu, ʻo Muimui ʻIate Au maʻá e Palaimelí, Lautohi Faka-Sāpaté, mo e ngaahi kōlomu Lakanga Taulaʻeiki Faka-ʻĒloné mo e ngaahi kalasi ʻa e Kau Finemuí ki he taimi-tēpile tatau. Ke tokoniʻi hoʻo ngaahi feinga ke ako mo moʻui ʻaki e ongoongoleleí ʻi ʻapí, ʻe ʻoatu ʻe hoʻo kau faiako he lotú ha ngaahi faingamālie ke ke vahevahe ai hoʻo ngaahi aʻusiá, fakakaukaú, mo e ngaahi fehuʻi fekauʻaki mo e ngaahi potufolofola kuó ke ako ʻi ʻapí.

Koeʻuhí ʻoku akoʻi tuʻo ua pē e Lautohi Faka-Sāpaté he māhina, ʻe lava ke fili ʻa e kau faiako Lautohi Faka-Sāpaté ke hiki fakalaka pe fakatahaʻi ʻa e ngaahi fokotuʻutuʻu fakalēsoní ke lele tatau mo e taimi-tēpile fakauiké. Mahalo foki ʻe fie maʻu ʻeni (ki he Lautohi Faka-Sāpaté mo e Palaimelí fakatouʻosi) ki he ngaahi uike ʻoku ʻikai fakahoko ai ha ngaahi fakataha angamaheni ʻa e Siasí koeʻuhi ko ha konifelenisi fakasiteiki pe ngaahi ʻuhinga kehe. ʻOku fakaafeʻi koe ke hokohoko atu hoʻo ako e Fuakava Motuʻá ʻi ʻapi lolotonga e ngaahi uike ko ʻení.

ʻOku Fie Maʻu Nai Ke u Muimui ki he Taimi-Tēpilé?

ʻE tokoni atu ʻa e taimi-tēpilé ke ke lau ha ngaahi meʻa kuo filifili mei he Fuakava Motuʻá mo e Mataʻitofe Mahuʻingá ʻi he fakaʻosinga ʻo e taʻú. ‘Ikai ngata aí, ʻe lava e muimui ki he taimi-tēpile tatau mo e niʻihi kehé ʻo iku ki ha ngaahi aʻusia ʻaonga ʻi ʻapi, ʻi he lotú, mo ha toe feituʻu pē. Kae ʻoua te ke ongoʻi haʻisia ki he taimi-tēpilé pe fakamālohiʻi ke lau e veesi kotoa; ko e taimi-tēpilé ko ha fakahinohino pē ia ke tokoni atu ke taimiʻi lelei hoʻo fokotuʻutuʻú. Ko e meʻa mahuʻingá ko hoʻo ako fakafoʻituitui mo fakafāmili ʻa e ongoongoleleí.

Fakamatala fekauʻaki mo e Taimi-tēpile Laukonga ʻa e Fuakava Motuʻá

ʻOku ʻikai kau ʻi he taimi-tēpile ʻoku fokotuʻu atu ki he laukonga ʻa e Haʻu, ʻo Muimui ʻIate Aú ʻi he 2022, ʻa e vahe kotoa pē ʻi he Fuakava Motuʻá. Koe‘uhí ʻoku lōloa ange ʻa e Fuakava Motuʻá ʻi he toenga ʻo e ngaahi folofolá, kuo toʻo ha ngaahi vahe mo e ngaahi tohi ʻe niʻihi ke lava ʻo mapuleʻi lelei ange ʻa e taimi-tēpile laukongá kiate koe mo ho fāmilí.

Na‘e fili e ngaahi vahé mo e ngaahi tohí ke fakaʻehiʻehi mei he ngaahi meʻa ʻoku ʻikai ʻaongá pea ke fakamamafaʻi e ngaahi potufolofola ʻoku fakamoʻoni kia Sīsū Kalaisí, ʻa ia ʻoku mahu ʻi he tokāteliné, pea tautautefito ʻene felāveʻi ki hotau kuongá. Hangē ko ʻení, ʻoku ʻikai kau ʻi he taimi-tēpile laukonga ne fokotuʻu atú ʻa e 1 mo e 2 Fakamatala Meʻa Hokohoko koeʻuhí ko e lahi taha ʻo e meʻa ʻi he ongo tohi ko iá ʻoku toe ʻasi pē ia ʻi he 1 mo e 2 Ngaahi Tuʻi. ʻOku ʻikai foki ke fakakau ʻi he taimi-tēpilé ʻa e Hiva ʻa Solomoné, koeʻuhí naʻe akonaki e Palōfita ko Siosefa Sāmitá ʻoku ʻikai ko ha folofola ia naʻe tataki fakalaumālie (vakai, Fakahinohino ki he Ngaahi Folofolá, “Hiva ʻa Solomoné,” scriptures.ChurchofJesusChrist.org). Ka neongo ia, manatuʻi ko ha taimi-tēpile ako ʻeni ʻoku fokotuʻu atu pē. ‘Oku totonu ke tataki hoʻo ako folofola fakatāutahá mo fakafāmilí ʻi he fakahā fakatāutahá.