“ການສິດສອນເດັກນ້ອຍ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ການສິດສອນເດັກນ້ອຍ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ການສິດສອນເດັກນ້ອຍ
ຖ້າຫາກທ່ານມີເດັກນ້ອຍຢູ່ໃນຄອບຄົວຂອງທ່ານ, ຕໍ່ໄປນີ້ແມ່ນກິດຈະກຳບາງຢ່າງ ທີ່ສາມາດຊ່ວຍພວກເຂົາຮຽນຮູ້:
-
ຮ້ອງເພງ. ເພງສວດ ແລະ ເພງຕ່າງໆຈາກ ເພງສວດ ແລະ ເພງຂອງເດັກນ້ອຍ ສິດສອນຄຳສອນຢ່າງມີພະລັງ. ໃຫ້ໃຊ້ ດັດຊະນີລາຍຊື່ເພງ ຢູ່ທາງໜ້າປຶ້ມ ເພງສວດ ແລະ ເພງຂອງເດັກນ້ອຍ ເພື່ອຊອກຫາເພງ ທີ່ກ່ຽວພັນກັບຫລັກທຳພຣະກິດຕິຄຸນ ທີ່ທ່ານສິດສອນຢູ່. ໃຫ້ຊ່ວຍລູກໆຂອງທ່ານ ປຽບທຽບຂ່າວສານຂອງເພງໃສ່ກັບຊີວິດຂອງພວກເຂົາ. (ເບິ່ງ “ການລວມເພງສັກສິດເຂົ້າກັບການຮຽນຮູ້ພຣະກິດຕິຄຸນຂອງທ່ານ” ຢູ່ໃນແຫລ່ງນີ້ນຳອີກ.)
-
ຟັງ ຫລື ສະແດງຕາມເລື່ອງ. ເດັກນ້ອຍມັກເລື່ອງເລົ່າຕ່າງໆ—ຈາກພຣະຄຳພີ, ຈາກຊີວິດຂອງທ່ານ, ຈາກປະຫວັດຄອບຄົວຂອງທ່ານ, ຫລື ຈາກວາລະສານຂອງສາດສະໜາຈັກ. ໃຫ້ຫາວິທີເພື່ອໃຫ້ພວກເຂົາມີສ່ວນຮ່ວມໃນການເລົ່າເລື່ອງ. ພວກເຂົາສາມາດຈັບຮູບພາບ ຫລື ສິ່ງຂອງ, ແຕ້ມຮູບກ່ຽວກັບສິ່ງທີ່ພວກເຂົາໄດ້ຍິນ, ສະແດງຕາມເລື່ອງ, ຫລື ແມ່ນແຕ່ຊ່ວຍເລົ່າເລື່ອງ. ໃຫ້ຊ່ວຍລູກໆຂອງທ່ານຮັບຮູ້ຄວາມຈິງຂອງພຣະກິດຕິຄຸນ ຢູ່ໃນເລື່ອງລາວທີ່ທ່ານແບ່ງປັນ.
-
ອ່ານພຣະຄຳພີ. ເດັກນ້ອຍອາດບໍ່ສາມາດອ່ານເກັ່ງເທື່ອ, ແຕ່ທ່ານສາມາດໃຫ້ພວກເຂົາມີພາກສ່ວນໃນການຮຽນຮູ້ຈາກພຣະຄຳພີ. ທ່ານອາດຕ້ອງເນັ້ນພຽງແຕ່ຂໍ້ດຽວ, ວະລີທີ່ສຳຄັນໃດໜຶ່ງ, ຫລື ຄຳໜຶ່ງ. ເດັກນ້ອຍກໍຍັງສາມາດທ່ອງຈຳວະລີທີ່ສັ້ນໆນຳອີກ ຈາກພຣະຄຳພີ ຖ້າຫາກພວກເຂົາກ່າວມັນສອງສາມເທື່ອ. ຂະນະທີ່ພວກເຂົາໄດ້ຍິນພຣະຄຳຂອງພຣະເຈົ້າ, ພວກເຂົາຈະຮູ້ສຶກເຖິງພຣະວິນຍານ.
-
ເບິ່ງຮູບພາບ ຫລື ເບິ່ງວິດີໂອ. ເມື່ອທ່ານສະແດງຮູບພາບ ຫລື ສາຍວິດີໂອໃຫ້ລູກໆຂອງທ່ານເບິ່ງ ອັນທີ່ກ່ຽວຂ້ອງກັບຫລັກທຳພຣະກິດຕິຄຸນ ຫລື ເລື່ອງລາວພຣະຄຳພີ, ໃຫ້ຖາມພວກເຂົາບາງຢ່າງ ທີ່ຊ່ວຍພວກເຂົາໃຫ້ຮຽນຮູ້ຈາກສິ່ງທີ່ພວກເຂົາເຫັນ. ຍົກຕົວຢ່າງ, ທ່ານສາມາດຖາມວ່າ, “ມີຫຍັງເກີດຂຶ້ນຢູ່ໃນຮູບພາບ ຫລື ວິດີໂອນີ້? ມັນເຮັດໃຫ້ພວກເຈົ້າຮູ້ສຶກແນວໃດ?” ແອັບຫ້ອງສະໝຸດພຣະກິດຕິຄຸນ, MediaLibrary.ChurchofJesusChrist.org, ແລະ children.ChurchofJesusChrist.org ເປັນບ່ອນທີ່ດີ ທີ່ຈະຊອກຫາຮູບພາບ ແລະ ວິດີໂອ.
-
ສ້າງສັນ. ເດັກນ້ອຍສາມາດສ້າງ, ແຕ້ມ, ຫລື ທາສີໃສ່ບາງສິ່ງ ທີ່ກ່ຽວກັບເລື່ອງເລົ່າ ຫລື ຫລັກທຳທີ່ພວກເຂົາຮຽນຮູ້.
-
ມີສ່ວນຮ່ວມໃນບົດຮຽນທີ່ໃຊ້ສິ່ງຂອງ. ບົດຮຽນທີ່ໃຊ້ສິ່ງຂອງແບບລຽບງ່າຍ ສາມາດຊ່ວຍລູກໆຂອງທ່ານ ໃຫ້ເຂົ້າໃຈຫລັກທຳພຣະກິດຕິຄຸນ ທີ່ຍາກທີ່ຈະເຂົ້າໃຈໄດ້. ເມື່ອໃຊ້ບົດຮຽນທີ່ໃຊ້ສິ່ງຂອງ, ໃຫ້ຊອກຫາວິທີທີ່ປ່ອຍໃຫ້ລູກໆຂອງທ່ານມີສ່ວນຮ່ວມນຳ. ພວກເຂົາຈະຮຽນຮູ້ຈາກປະສົບການທີ່ໄດ້ສຳພັດ ຫລາຍກວ່າພຽງແຕ່ໄດ້ນັ່ງເບິ່ງການສາທິດເທົ່ານັ້ນ.
-
ຫລິ້ນລະຄອນກ້ອມ. ເມື່ອເດັກນ້ອຍຫລິ້ນລະຄອນກ້ອມກ່ຽວກັບສະພາບການທີ່ພວກເຂົາຂ້ອນຂ້າງຈະປະເຊີນໃນຊີວິດຈິງ, ພວກເຂົາຈະສາມາດເຂົ້າໃຈຫລາຍຂຶ້ນເຖິງຫລັກທຳພຣະກິດຕິຄຸນ ທີ່ກ່ຽວພັນກັບຊີວິດຂອງພວກເຂົາ.
-
ເຮັດກິດຈະກຳຢ່າງເກົ່າຄືນອີກ. ເດັກນ້ອຍອາດຕ້ອງໄດ້ຍິນຄວາມຄິດນັ້ນຫລາຍເທື່ອ ກ່ອນຈະເຂົ້າໃຈ. ຢ່າຢ້ານທີ່ຈະເລົ່າເລື່ອງລຶ້ມຄືນ ຫລື ເຮັດກິດຈະກຳຢ່າງເກົ່າຄືນອີກເລື້ອຍໆ. ຍົກຕົວຢ່າງ, ທ່ານອາດແບ່ງປັນເລື່ອງໃດໜຶ່ງຈາກພຣະຄຳພີຫລາຍເທື່ອ ໃນຫລາຍວິທີທາງ—ອ່ານຈາກພຣະຄຳພີ, ສະຫລຸບດ້ວຍຄຳຂອງທ່ານເອງ, ສາຍວິດີໂອ, ປ່ອຍໃຫ້ລູກໆຂອງທ່ານຊ່ວຍເລົ່າເລື່ອງ, ຊັກຊວນພວກເຂົາໃຫ້ສະແດງຕາມເລື່ອງ, ແລະ ອື່ນໆ.