“ການໃຊ້ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ການໃຊ້ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ການໃຊ້ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ
ແຫລ່ງຊ່ວຍເຫລືອເຫລັ້ມນີ້ແມ່ນສຳລັບໃຜ?
ແຫລ່ງຊ່ວຍເຫລືອເຫລັ້ມນີ້ແມ່ນສຳລັບທຸກຄົນ ແລະ ທຸກຄອບຄົວໃນສາດສະໜາຈັກ. ມັນຖືກກະກຽມໄວ້ເພື່ອຊ່ວຍທ່ານໃຫ້ຮຽນຮູ້ພຣະກິດຕິຄຸນ—ບໍ່ວ່າຈະເປັນແບບສ່ວນຕົວ ຫລື ກັບຄອບຄົວຂອງທ່ານກໍຕາມ. ຖ້າຫາກແຕ່ກ່ອນ ທ່ານຍັງບໍ່ໄດ້ສຶກສາພຣະກິດຕິຄຸນເປັນປະຈຳເທື່ອ, ແຫລ່ງຊ່ວຍເຫລືອເຫລັ້ມນີ້ສາມາດຊ່ວຍທ່ານເລີ່ມຕົ້ນໄດ້. ຖ້າຫາກທ່ານມີນິໄສສຶກສາພຣະກິດຕິຄຸນຢູ່ແລ້ວ, ແຫລ່ງຊ່ວຍເຫລືອເຫລັ້ມນີ້ສາມາດຊ່ວຍທ່ານໃຫ້ມີປະສົບການທີ່ມີຄວາມໝາຍຫລາຍຂຶ້ນໄດ້.
ເຮົາຄວນໃຊ້ແຫລ່ງຊ່ວຍເຫລືອເຫລັ້ມນີ້ແບບໃດ?
ໃຫ້ໃຊ້ແຫລ່ງຊ່ວຍເຫລືອເຫລັ້ມນີ້ໃນວິທີໃດກໍໄດ້ ທີ່ມັນຈະຊ່ວຍທ່ານ. ທ່ານອາດພົບວ່າ ມັນເປັນຄູ່ມື ຫລື ສິ່ງຊ່ວຍເຫລືອ ທີ່ມີປະໂຫຍດ ສຳລັບການສຶກສາພຣະຄຳພີເປັນສ່ວນຕົວ ແລະ ເປັນຄອບຄົວ. ທ່ານກໍສາມາດໃຊ້ມັນສຳລັບການສັງສັນໃນຕອນແລງນຳອີກ. ໂຄງຮ່າງບັນຈຸຫລັກທຳທີ່ສຳຄັນ ທີ່ພົບເຫັນຢູ່ໃນພຣະຄຳພີເດີມ, ຊຶ່ງແນະນຳແນວຄິດສຳລັບການສຶກສາ ແລະ ກິດຈະກຳ ສຳລັບບຸກຄົນ ແລະ ຄອບຄົວ, ແລະ ມີຊ່ອງວ່າງໃຫ້ບັນທຶກຄວາມປະທັບໃຈຂອງທ່ານນຳອີກ.
ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ ບໍ່ມີເຈດຕະນາທີ່ຈະເອົາມາປ່ຽນ ຫລື ເອົາມາແຂ່ງຂັນກັບສິ່ງທີ່ດີຢ່າງອື່ນໆ ທີ່ທ່ານກຳລັງເຮັດຢູ່. ໃຫ້ເຮັດຕາມການນຳພາຂອງພຣະວິນຍານ ເພື່ອຕັດສິນໃຈກ່ຽວກັບວິທີທີ່ຈະເຂົ້າຫາພຣະຄຳຂອງພຣະເຈົ້າ ໃນການສຶກສາຂອງທ່ານເອງ.
ແຫລ່ງຊ່ວຍເຫລືອເຫລັ້ມນີ້ກ່ຽວຂ້ອງກັບສິ່ງທີ່ເກີດຂຶ້ນຢູ່ໃນສາດສະໜາຈັກແນວໃດ?
ໂຄງຮ່າງຢູ່ໃນແຫລ່ງຊ່ວຍເຫລືອເຫລັ້ມນີ້ ໄດ້ຖືກຈັດລະບຽບຕາມຕາຕະລາງການອ່ານໃນແຕ່ລະອາທິດ. ແຫລ່ງຊ່ວຍເຫລືອ ຈົ່ງຕາມເຮົາມາ ສຳລັບ ຊັ້ນປະຖົມໄວ, ສຳລັບ ໂຮງຮຽນວັນອາທິດ, ແລະ ສຳລັບຫ້ອງຮຽນ ກຸ່ມຖານະປະໂລຫິດແຫ່ງອາໂຣນ ແລະ ກຸ່ມຍິງໜຸ່ມ ຈະເຮັດຕາມຕາຕະລາງອັນດຽວກັນ. ເພື່ອສະໜັບສະໜູນຄວາມມຸ່ງໝັ້ນຂອງທ່ານ ທີ່ຈະຮຽນຮູ້ ແລະ ດຳລົງຊີວິດຕາມພຣະກິດຕິຄຸນຢູ່ທີ່ບ້ານ, ຄູສອນຂອງທ່ານຢູ່ທີ່ໂບດ ຈະໃຫ້ໂອກາດທ່ານເພື່ອແບ່ງປັນປະສົບການ, ຄວາມຄິດ, ແລະ ຄຳຖາມຂອງທ່ານ ກ່ຽວກັບຂໍ້ພຣະຄຳພີ ທີ່ທ່ານໄດ້ສຶກສາຢູ່ທີ່ບ້ານ.
ເພາະໂຮງຮຽນວັນອາທິດພຽງແຕ່ໄດ້ສອນເດືອນລະສອງເທື່ອເທົ່ານັ້ນ, ສະນັ້ນຄູສອນຂອງໂຮງຮຽນວັນອາທິດ ຈຶ່ງຕ້ອງໄດ້ເລືອກທີ່ຈະຂ້າມ ຫລື ລວມຫລາຍໂຄງຮ່າງເຂົ້າກັນ ເພື່ອໃຫ້ກົງກັບຕາຕະລາງປະຈຳອາທິດ. ສິ່ງນີ້ອາດຈຳເປັນຕ້ອງໄດ້ເຮັດ (ສຳລັບທັງໂຮງຮຽນວັນອາທິດ ແລະ ຊັ້ນປະຖົມໄວ) ໃນວັນອາທິດ ທີ່ບໍ່ມີຫ້ອງຮຽນຕາມປົກກະຕິ ເພາະມີກອງປະຊຸມສະເຕກ ຫລື ເພາະເຫດຜົນຢ່າງອື່ນ. ໃນວັນອາທິດເຫລົ່ານັ້ນ ທ່ານສາມາດສຶກສາພຣະຄຳພີເດີມຕໍ່ຢູ່ທີ່ບ້ານ.
ເຮົາຕ້ອງເຮັດຕາມຕາຕະລາງຢູ່ບໍ?
ຕາຕະລາງຈະຊ່ວຍທ່ານໃຫ້ອ່ານພາກຕ່າງໆຈາກພຣະຄຳພີເດີມ ແລະ ໄຂ່ມຸກອັນລ້ຳຄ່າໃຫ້ສຳເລັດກ່ອນທ້າຍປີ. ນອກເໜືອຈາກນັ້ນ, ການເຮັດຕາມຕາຕະລາງຄືກັນກັບຄົນອື່ນໆ ສາມາດນຳພາໄປສູ່ປະສົບການທີ່ມີຄວາມໝາຍ ຢູ່ທີ່ບ້ານ, ຢູ່ທີ່ໂບດ, ແລະ ຢູ່ບ່ອນອື່ນນຳອີກ. ແຕ່ບໍ່ຄວນຮູ້ສຶກວ່າ ຕ້ອງເຮັດຕາມຕາຕະລາງ ຫລື ຖືກບັງຄັບໃຫ້ອ່ານທຸກຂໍ້; ຕາຕະລາງພຽງເປັນສິ່ງນຳພາ ເພື່ອຊ່ວຍທ່ານສຶກສາເທື່ອລະເລັກເທື່ອລະໜ້ອຍເທົ່ານັ້ນ. ສິ່ງທີ່ສຳຄັນແມ່ນ ທ່ານກຳລັງຮຽນຮູ້ພຣະກິດຕິຄຸນເປັນສ່ວນຕົວ ແລະ ເປັນຄອບຄົວ.
ໝາຍເຫດກ່ຽວກັບຕາຕະລາງການອ່ານພຣະຄຳພີເດີມ
ຕາຕະລາງແນະນຳການອ່ານປຶ້ມ ຈົ່ງຕາມເຮົາມາ ສຳລັບປີ 2022 ບໍ່ມີທຸກບົດຈາກພຣະຄຳພີເດີມ. ຍ້ອນວ່າພຣະຄຳພີເດີມຍາວກວ່າພຣະຄຳພີເຫລັ້ມອື່ນໆທຸກເຫລັ້ມ, ສະນັ້ນບາງບົດ ແລະ ພຣະທຳບາງເຫລັ້ມຈຶ່ງຖືກລະເວັ້ນ ເພື່ອເຮັດໃຫ້ຕາຕະລາງການອ່ານພໍເໝາະສຳລັບທ່ານ ແລະ ຄອບຄົວຂອງທ່ານ.
ບົດ ແລະ ພຣະທຳເຫລັ້ມຕ່າງໆຖືກເລືອກເພື່ອຫລີກເວັ້ນຈາກຄວາມຊ້ຳເກົ່າ ແລະ ເພື່ອເນັ້ນຂ່າວສານທີ່ເປັນພະຍານເຖິງພຣະເຢຊູຄຣິດ, ອັນທີ່ເຕັມໄປດ້ວຍຄຳສອນ, ແລະ ກ່ຽວຂ້ອງກັບວັນເວລາຂອງເຮົາໂດຍສະເພາະ. ຍົກຕົວຢ່າງ, ຕາຕະລາງແນະນຳການອ່ານບໍ່ໄດ້ລວມ 1 ແລະ 2 ຂ່າວຄາວ ຍ້ອນວ່າເນື້ອຄວາມສ່ວນຫລາຍຂອງພຣະທຳເຫລົ່ານັ້ນມີແລ້ວຢູ່ໃນ 1 ແລະ 2 ກະສັດ. ຕາຕະລາງກໍບໍ່ໄດ້ລວມຍອດເພງໃສ່ນຳ, ຍ້ອນວ່າສາດສະດາໂຈເຊັບ ສະມິດ ໄດ້ສິດສອນວ່າ ມັນບໍ່ໄດ້ເປັນພຣະຄຳພີທີ່ດົນໃຈ (ເບິ່ງ ຄູ່ມືພຣະຄຳພີ, “ຍອດເພງ,” scriptures.ChurchofJesusChrist.org). ເຖິງຢ່າງໃດກໍຕາມ, ຈົ່ງຈື່ຈຳວ່ານີ້ເປັນພຽງແຕ່ຕາຕະລາງ ແນະນຳ ການສຶກສາເທົ່ານັ້ນ. ການສຶກສາເປັນສ່ວນຕົວ ແລະ ເປັນຄອບຄົວຂອງທ່ານ ຄວນຖືກນຳພາໂດຍການເປີດເຜີຍສ່ວນຕົວ.