“Council Meeting iti Umuna a Domingo,”Umaykayo, Sumurot Kaniak—Para iti Melchizedek Priesthood ken Relief Society (2017)
Dagiti Council Meeting iti Umuna a Domingo
Dagiti Council Meeting iti Umuna a Domingo
Iti umuna a Domingo ti tunggal bulan, dagiti miting iti korum, grupo, ken Relief Society ket saanna nga iraman iti leksion nga insuro ti mannursuro. Ketdi, dagiti panguluen wenno dagiti group leader ti mangidaulo iti council meeting. Aggiinnuman ti tunggal korum, grupo, wenno Relief Society maipapan kadagiti lokal a pagrebbengan,dagiti gundaway, ken karit; a nasursuro manipud kadagiti pannakaammo ken pannakaawat ken dagiti padas manipud iti tunggal maysa; ken agplano kadagiti wagas nga agtignay kadagiti impresion a naawat manipud iti Espiritu.
“Maiwaras ti paltiing kadatayo.”1
Elder Neil L. Andersen
Sakbay ti Council Meeting
-
Ilasin dagiti lider dagiti lokal a pagrebbengan, dagiti gundaway, ken dagiti karit ken nainkararagan a pumili iti topiko a pagsasaritaan.
-
Ikarigatan a gun-oden ti tunggal maysa ti Espiritu.
-
Agsagana ti tunggal maysa a mangibinglay kadagiti kapanunotan ken padasda.
Kabayatan ti Council Meeting
-
Awisen dagiti lider dagiti miembro a mangibinglay kadagiti padas nga agtignay kadagiti impresion nga adda kadakuada manipud kadagiti kallabes a miting.
-
Aggiinnuman ti tunggal maysa maipapan iti topiko, dumngeg iti tunggal maysa, ket ikarigatan a gun-oden ti pannarabay ti Espiritu.
-
Gupugopen dagiti lider dagiti key points ket mangted kadagiti pangawis nga agtignay.
Kalpasan ti Council Meeting
-
Agtignay ti tunggal maysa kadagiti impresion ken awis, sangkamaysa ken kas indibidual.
-
Agsagana ti tunggal maysa a mangibinglay iti padas kadagiti masakbayan a miting.
“Datayo dagiti Imana.”2
Ni Presidente Dieter F. Uchtdorf
Prayer icon from Getty Images
Dagiti Prinsipio ti Panaggiinnuman
Saan nga agpapada amin dagiti council meeting. Bay-an nga isuronakayo ti Apo. Dagitoy ti sumagmamano a pagbatayan a pangrugianyo:
-
Ti panggep ti council meeting ket tapno aggiinnuman maipapan kadagiti lokal a pagrebbengan, gundaway, ken karit; ken masursuruan manipud kadagiti pannakaammo ken pannakaawat ken padas ti tunggal maysa; ken agplano kadagiti wagas nga agtignay kadagiti impresion a naawat manipud iti Espiritu.
-
Nasken nga agbanag ti council meeting iti aksion—dagiti plano ti indibidual ken grupo, a pinaregta ti Espiritu, nga agtignay iti ruar ti miting a mangipatungpal iti aramid ti Apo (kitaen iti DkK 43:8–9).
-
Nasken nga usaren dagiti council dagiti nasantuan a kasuratan ken balikas dagiti propeta ken apostol iti ud-udina nga aldaw, dadduma pay a General Authority,ken General Officer tapno maiwanwan ken masuportaran ti panagllinnawag. Iti kastoy a wagas, dagiti balikas dagiti naparegta a lider iti Simbaan ket makatulong kadagiti korum, grupo, ken Relief Society a mangipaay kadagiti napapateg a kasapulan.
-
Nasken a saan a a madakamat kadagiti panaglilinnawag maipapan iti kompidensial wenno sensitibo nga isyu maipanggep kadagiti indibidual a miembro wenno pamilia.
-
Nupay idauluan ti maysa a miembro ti presidency wenno group leadership ti council meeting, saanna a rimbawan ti panagbibinninglay. Yam-ammo ti lider ti isyu para iti panaglilinnawag ket awisenna ti tunggal maysa a mangibinglay kadagiti kapanunotan ken padas, kas iwanwan ti Espiritu.
-
Idinto ta nasken nga awan ti makarikna a mapilpilit a makiraman, nasken a marikna a natalged ti tunggal maysa a mangibinglay kadagiti komento ken kapanunotan nga awan panagbutengda a madillaw.
-
No mabalin, ti panagtugaw iti sirkulo ket makatulong a mangpadur-as iti espiritu ti panagbibinninglay ken nawaya a panaglilinniwag.
Dagiti Mabalin a Topiko para kadagiti Council Meeting iti Umuna a Domingo
Dagiti kapanunotan para kadagiti topiko a pagsasaritaan kadagiti council meeting ket mabalin nga aggapu iti ward council, dagiti miting ti presidency, ti plano ti area, dagiti impresion dagiti lider manipud iti panangministerio kadagiti miembro, ken dagiti impresion manipud iti Espiritu Santo. Singasing laeng dagiti topiko iti baba. Mabalin nga ammo dagiti lider ti dadduma pay a kasapulan ket mariknada a naparegta ti mangtaming kadagitoy.
-
Kasano a nasaysayaat nga urnosentayo dagiti amin a nadumaduma a pagrebbengantayo?
-
Kasano nga ad-adda pay a makaasidegtayo iti Dios ken umawat iti ad-adu pay a pannarabay manipud iti Espiritu iti biagtayo ken iti pagtaengantayo?
-
Kasano a maibinglaytayo ti ebanghelio kadagiti gagayyem ken padatayo a tattao? (kitaen iti Alma 17).
-
Kasano a masaluadantayo ti bagbagitayo ken dagiti pamiliatayo manipud iti saan nga umno a media ken pornograpia? (kitaen iti DkK 42:22–23).
-
Anianto ti aramidentayo a makatulong a masursuruan ken mapapigsa dagiti annaktayo ken dagiti agtutubo iti wardtayo?
-
Kasano a mapadur-astayo ti panagkaykaysa iti korumtayo, grupo, wenno Relief Society? (kitaen iti Mosiah 18:19–22).
-
Kasano nga ad-adda a makiramantayo iti aramid iti family history ken panagdayaw iti templo?
-
Kasano a mayawistayo ti tulong ti Apo bayat ti panangikarigatantayo a manggun-od kadagiti saludsod ken naun-uneg a pannakaawat iti ebanghelio?
-
Kasano a makapagbalin dagiti nagannak a nasaysayaat a dadaulo iti pagtaengan?
-
Kasano a mapapigsatayo dagiti pammaneknektayo maipapan ti Apo ken ti ebangheliona ken makatulong kadagiti pamiliatayo nga agbalin a naespirituan nga agpannuray iti bagi?
-
Ania ti kaipapanan ti agministerio? Kasano nga agministeriotayo kadagiti adda iti aglawlawtayo? (kitaen iti 1 Pedro 4:11).
No mabalin, dagiti lider mabalin a kayatda a nasapsapa a maammuan dagiti miembro ti maipapan iti topiko tapno makaumayda a nakasagana a pagsasaritaan daytoy.