“Dagiti Miting iti Maikapat a Domingo,” Umaykayo, Sumurot Kaniak—Para iti Malchizedek Priesthood ken Relief Society (2017)
Dagiti Miting iti Maikapat a Domingo
Dagiti Miting iti Maikapat a Domingo
Iti maikapat a Domingo ti tunggal bulan paglilinnawagan dagiti korum, grupo, ken Relief Society ti maysa a topiko a pinili ti Umuna a Panguluen ken Korum dagiti Sangapulo-ket-dua nga Apostol. Ma-update dagitoy a topiko iti tunggal sapasap a komperensia. Ti topiko agingga iti sumaruno a sapasap a komperensia ket ti aldaw iti Sabbath. Mabalin ti pumili dagiti lider wenno mannursuro manipud kadagiti doktrina ken aktibidad iti panagsursuro a naisingasing iti baba, pagtitiponen ti sumagmamano kadagitoy, wenno mangparnuay iti bukodda segun kadagiti kasapulan dagiti miembro.
Ti Sabbath ti aldaw a panglagip no ania ti inaramid ti Dios para kadatayo.
Iti unos ti pakasaritaan, inkadua ti Dios dagiti sumagmamano a nabileg nga aramid iti Sabbath. Mairaman kadagitoy nabileg nga aramid ti Panagparsua (kitaen iti Genesis 2:1–3), ti ipapanaw dagiti annak ti Israel manipud iti Egipto (kitaen iti Deuteronomio 5:15), ken ti Panagungar ti Mangisalakan (kitaen iti Juan 20:1–19; Dagiti Aramid 20:7). Awisen dagiti miembro a mangreview kadagitoy a binatog ket paglilinnawagan no kasano a makatulong kadatayo a mangdayaw iti Sabbath ti pananglagip iti tunggal maysa kadagitoy a pasamak. Ania ti sumagmamano kadagiti nabileg nga aramid a naaramiden ti Dios para kadatayo. Kasano a malagiptayo dagitoy a banag iti aldaw ti Sabbath? No mayaplikar, awisen dagiti miembro ta paglilinnawagan dagiti saludsod kas dagitoy kadagiti pamiliada.
Ni Jesucristo ti Apo ti Sabbath.
Maawagan pay ti Sabbath iti aldaw ti Apo (kitaen iti Apocalipsis 1:10). Apay iti panagkunayo a maawagan ni Jesucristo iti Apo ti Sabbath? (kititaen iti Mateo 12:8). Sangsangkamaysa a mangreview ti sumagmamano a bersikulo a makatulong a mangparegta kadagiti miembro a mangpanunot kadagiti wagas a mangisentro kadagiti padasda iti aldaw ti Sabbath ken ni Jesucristo (kas pagarigan, Helaman 5:12; Ether 12:41; Moroni 10:32; ken DkK 6:36–37). Ania dagiti dadduma pay a bersikulo a maibinglay dagiti miembro a makatulong kadakuada a mangaramid iti Sabbath nga ad-adda a naisentro ken ni Cristo? Ania dagiti goal a maitudingtayo a makatulong a mangipokus iti Mangisalakan iti unos ti aldaw ti Sabbath?
Ni Jesucristo ti pagwadantayo iti panagdayaw iti Sabbath.
Kabayatan ti mortal a panagministeriona, naaddaan ti Mangisalakan kadagiti gundaway a mangisuro maipapan iti aldaw ti Sabbath. Pabasa kadagiti miembro dagiti sumaganad a pakaammuan ket agaramid iti listaan dagiti banag nga inaramid ni Jesus iti Sabbath ken dagiti prinsipio nga insurona: Lucas 6:1–11; 13:11–17; Juan 5:1–20; 9:1–16. Ania dagiti dadduma pay a prinsipio maipapan iti Sabbath a masursurotayo manipud kadagiti sumaganad a bersikulo? Exodo 20:8–11; 31:12–18; Isaias 58:13–14; ken DkK 59:9–19. Awisen dagiti miembro a mangibinglay no ania ti maaramidda tapno masurot ti pagwadan ti Mangisalakan.
Kitaen met iti Russell M. Nelson, “The Sabbath Is a Delight,” Ensign wenno Liahona, Mayo 2015, 129–32.
Ti Sabbath ti aldaw nga agdaydayaw.
Isurat ti balikas nga agdaydayaw iti pisarra ket paisurat kadagiti miembro ti klase ti dadduma pay a balikas a mainaig iti abay daytoy. Kalpasanna mangaramid iti tallo a column a nakasurat dagiti balikas a sakbay, kabayatan, ken kalpasan iti ngato ti tunggal column. Ania ti maaramidtayo sakbay, kabayatan, ken kalpasan ti church tapno agdaydayaw iti Apo iti nasantuan nga aldawna? Mabalin nga aggigiddan dagiti miembro ti klase a mangbasa iti Mosiah 18:17–29 ken Moroni 6 para kadagiti kapanunotan. Awisen dagiti miembro a mangutob no kasano a dagiti galad ken tignayda iti aldaw ti Sabbath ket makatulong kadakuada nga agdaydayaw iti Apo iti dayta nga aldaw (kitaen iti Exodo 31:16–17). Ania ti maaramidtayo a makatulong a dumur-as ti padas iti panagdayaw nga adda kadagiti pamiliatayo ken dagiti miembro ti ward kabayatan dagiti miting iti Simbaan?
Ti pannakiranud iti sakramento ti mangpalubos kadatayo tapno kanayon nga adda ti Espiritu kadatayo.
Isurat ti sumaganad a saludsod iti pisarra: Kasano ti panangapekto ti sakramento ti biagyo? Tapno masungbatan daytoy a saludsod, awisen dagiti miembro a sagpaparis nga agtrabaho a pumili ken paglilinnawagan ti maysa a phrase manipud kadagiti kararag iti sakramento itiDoktrina ken Katulagan 20:77, 79 ken ti balakad iti Doktrina ken Katulagan 59:9. Ikkan ti tunggal sangaparis iti oras a mangsarak kadagiti nasantuan a kasuratan a makatulong kadakuada tapno maawatan a nasaysayaat ti phraseda ken paglilinnawagan no kasano a masungbatanda ti saludsod iti pisarra. Mabalinyo pay nga awisen dagiti miembro ti klase a pumili kadagiti paggugusto a himno iti sakramento ket aggigiddan a kantaen dagitoy.
Kitaen met iti Cheryl A. Esplin,“The Sacrament—a Renewal for the Soul,” Ensign wenno Liahona, Nob. 2014, 12–14.
Ti Sabbath ti aldaw a panagserbi iti dadduma.
Ania ti masursurotayo maipapan ti panagserbi iti dadduma iti Sabbath manipud kadagiti wagas a nagserbi ti Mangisalakan ken nangbendision kadagiti adda iti lawlawna? Allukoyen dagiti miembro a mangreview ken paglilinnawagan ti Mateo 9:10–13; Lucas 19:1–9; Juan 11:32–46; 13:1–5, 12–17; ken 3 Nephi 17:5–10. Idawat kadagiti miembro a mangpanunot ti maipapan kadagitoy a nasantuan a kasuratan bayat ti panangibilangda no kasano a makapagserbida iti Sabbath. Kas pagarigan, makapagserbida kadagiti miembro ti pamilia. makatulongda kadagiti indibidual ken pamilia a pagserbianda kas home ken visiting teacher, makapagtrabahoda iti family history, masarungkaranda ti masakit, wenno maibinglayda ti ebanghelio. Nalabit a maaddaan dagiti miembro iti family council tapno agplano kadagiti wagas a makapagserbida iti dadduma iti Sabbath.