សប្តាហ៍ទីមួយ

« ការប្រជុំក្រុមប្រឹក្សានៅសប្តាហ៍ទីមួយ » ចូរមកតាមខ្ញុំ—សម្រាប់ការប្រជុំថ្នាក់បព្វជិតភាពមិលគីស្សាដែក និងថ្នាក់សមាគមសង្គ្រោះ ( ឆ្នាំ២០១៧ )

ការប្រជុំក្រុមប្រឹក្សានៅសប្តាហ៍ទីមួយ

នៅសប្តាហ៍ទីមួយរៀងរាល់ខែ ការប្រជុំថ្នាក់កូរ៉ុម ក្រុម និងថ្នាក់សមាគមសង្គ្រោះ នឹងមិនរួមបញ្ចូលមេរៀនមួយដែលបានបង្រៀនដោយគ្រូម្នាក់នោះទេ ។ គណៈប្រធាន ឬក៏អ្នកដឹកនាំក្រុមនឹងដឹកនាំការប្រជុំក្រុមប្រឹក្សាជំនួសវិញ ។ កូរ៉ុម ក្រុម ឬសមាគមសង្គ្រោះ នឹងប្រឹក្សាជាមួយគ្នាអំពីទំនួលខុសត្រូវ ឳកាស និងឧបសគ្គនានានៅក្នុងមូលដ្ឋាន រៀនសូត្រពីគ្នានូវគំនិត និងបទពិសោធន៍ ហើយរៀបចំផែនការដើម្បីឆ្លើយតបទៅសេចក្តីបញ្ជាក់ទាំងឡាយដែលបានទទួលមកពីព្រះវិញ្ញាណ ។

« វិវរណៈគឺមាននៅក្នុងចំណោមយើង ។ »^១

អែលឌើរ នែល អិល អាន់ឌើរសិន

ពីមុនការប្រជុំក្រុមប្រឹក្សា

ថ្នាក់ដឹកនាំកត់សម្គាល់អំពីទំនួលខុសត្រូវ ឳកាស និងឧបសគ្គនានានៅក្នុងមូលដ្ឋាន ហើយជ្រើសរើសប្រធានបទមួយប្រកបដោយការអធិដ្ឋានដើម្បីពិភាក្សា ។
អ្នកគ្រប់គ្នាស្វែងរកការដឹកនាំពីព្រះវិញ្ញាណ ។
អ្នកគ្រប់គ្នារៀបចំដើម្បីចែកចាយគំនិតនិងបទពិសោធន៍ទាំងឡាយ ។

អំឡុងពេលការប្រជុំក្រុមប្រឹក្សា

ថ្នាក់ដឹកនាំអញ្ជើញសមាជិកដើម្បីចែករំលែកបទពិសោធន៍ទាំងឡាយពីការឆ្លើយតបចំពោះការបញ្ជាក់ទាំងឡាយដែលពួកគេបានមានមកពីការប្រជុំមុនៗ ។
គ្រប់គ្នាប្រឹក្សាជាមួយគ្នាអំពីប្រធានបទ ស្តាប់គ្នាទៅវិញទៅមក ហើយស្វែងរកការដឹកនាំពីព្រះវិញ្ញាណ ។
ថ្នាក់ដឹកនាំធ្វើការសង្ខេបចំនុចសំខាន់ៗ ហើយធ្វើការអញ្ជើញដើម្បីអនុវត្ត ។

ការប្រជុំក្រុមប្រឹក្សាថ្នាក់បព្វជិតភាពមិលគីស្សាដែក

បន្ទាប់ពីការប្រជុំក្រុមប្រឹក្សា

គ្រប់គ្នាអនុវត្តចំពោះការបញ្ជាក់ និងការអញ្ជើញ ជាមួយគ្នា និងជាបុគ្គល។
គ្រប់គ្នារៀបចំដើម្បីចែកចាយនូវបទពិសោធន៍របស់ពួកគេទៀតនៅក្នុងការប្រជុំនាពេលខាងមុខ ។

« យើងជាព្រះហស្ថរបស់ទ្រង់ ។ »^២

ប្រធាន ឌៀថើរ អេស្វ អុជដូហ្វ

គោលការណ៍នៃការប្រឹក្សារួមគ្នា

មិនមែនការប្រជុំក្រុមប្រឹក្សាទាំងអស់សុទ្ធតែដូចគ្នានោះទេ ។ ចូរឲ្យព្រះអង្គម្ចាស់បង្រៀនដល់អ្នក ។ នេះគឺជាគោលការណ៍មួយចំនួនដើម្បីជួយអ្នកចាប់ផ្ដើម ៖

គោលបំណងនៃការប្រជុំក្រុមប្រឹក្សាមួយគឺដើម្បី ប្រឹក្សារួមគ្នាអំពីទំនួលខុសត្រូវ ឳកាស និងឧបសគ្គនានានៅក្នុងមូលដ្ឋាន រៀនសូត្រពីគ្នានូវគំនិត និងបទពិសោធន៍ផ្សេងៗ ហើយរៀបចំផែនការដើម្បីឆ្លើយតបចំពោះការបញ្ជាក់ទាំងឡាយដែលបានទទួលមកពីព្រះវិញ្ញាណ ។
ការប្រជុំក្រុមប្រឹក្សាមួយគួរតែនាំទៅរកការអនុវត្ត—ផែនការជាបុគ្គលនិងជាក្រុមដែលបំផុសដោយព្រះវិញ្ញាណ ដើម្បីអនុវត្តក្រៅការប្រជុំដើម្បីសម្រេចកិច្ចការរបស់ព្រះអង្គម្ចាស់ ( សូមមើល គ.និងស. ៤៣:៨–៩ ) ។
ក្រុមប្រឹក្សាគួរប្រើបទគម្ពីរ និងប្រសាសន៍នានារបស់ព្យាការី និងសាវកថ្ងៃចុងក្រោយ ពួកអ្នកមានសិទ្ធិអំណាចទូទៅនិងពួកអ្នកកាន់តំណែងផ្សេងទៀតដើម្បីដឹកនាំ ហើយគាំទ្រក្នុងការពិភាក្សា ។ ដោយមធ្យោបាយនេះ នោះប្រសាសន៍ដ៏បំផុសគំនិតរបស់ថ្នាក់ដឹកនាំសាសនាចក្រអាចជួយដល់កូរ៉ុម ក្រុម និងសមាគមសង្គ្រោះ ឆ្លើយតបនូវរាល់តម្រូវការដែលចាំបាច់បំផុត ។
ការពិភាក្សាមិនគួរប៉ះពាល់ដល់ភាពសម្ងាត់ ឬ បញ្ហារសើបផ្សេងៗអំពីសមាជិកម្នាក់ៗ ឬក្រុមគ្រួសារឡើយ ។
ទោះជាការប្រជុំក្រុមប្រឹក្សាត្រូវបានដឹកនាំដោយសមាជិកម្នាក់នៃគណៈប្រធាន ឬអ្នកដឹកនាំក្រុមក៏ ដោយ ក៏គាត់មិនត្រូវចែករំលែកឡើយ ។ ថ្នាក់ដឹកនាំណែនាំបញ្ហាមួយសម្រាប់ការពិភាក្សា ហើយអញ្ជើញគ្រប់គ្នាឲ្យចែកចាយនូវគំនិត និងបទពិសោធន៍នានា ដូចដែលបានដឹកនាំដោយព្រះវិញ្ញាណ ។
នៅពេលដែលគ្មាននរណាម្នាក់ត្រូវបានបង្ខំឲ្យចូលរួមផ្តល់យោបល គ្រប់គ្នាគួរតែមានសេរីភាពក្នុងការចែកចាយនូវមតិ និងគំនិតនានាដោយគ្មានការបារម្ភពីការរិះគន់ឡើយ ។
បើអាច ការអង្គុយជារង្វង់ អាចជួយបណ្តុះនូវវិញ្ញាណនៃការចែកចាយ ហើយនិងការពិភាក្សាដោយបើកចំហរ ។

ប្រធានបទនានាដែលអាចលើកឡើងសម្រាប់ការប្រជុំក្រុមប្រឹក្សានៅសប្តាហ៍ទីមួយ

គំនិតនានាសម្រាប់ប្រធានបទដើម្បីពិភាក្សានៅក្នុងការប្រជុំក្រុមប្រឹក្សា អាចយកមកពីក្រុមប្រឹក្សាវួដ ការប្រជុំគណៈប្រធាន ផែនការតំបន់ ការបញ្ជាក់របស់អ្នកដឹកនាំមកពីការបម្រើដល់សមាជិក និងការបញ្ជាក់នានាមកពីព្រះវិញ្ញាណបរិសុទ្ធ ។ ប្រធានបទខាងក្រោមគ្រាន់តែជាការផ្តល់យោបល់ប៉ុណ្ណោះ ។ ថ្នាក់ដឹកនាំអាចនិងដឹងជាមុននូវតម្រូវការផ្សេងៗទៀតដែលពួកគេបានទទួលការបំផុសឲ្យលើកយកមកពិភាក្សា ។

តើយើងអាចរៀបចំអាទិភាពទាំងអស់នូវទំនួលខុសត្រូវផ្សេងៗរបស់យើងឲ្យបានល្អប្រសើរតាមរបៀបណា ?
តើយើងអាចខិតកាន់តែជិតព្រះ ហើយទទួលការដឹកនាំពីព្រះវិញ្ញាណកាន់តែច្រើននៅក្នុងការរស់នៅ និងក្នុងគេហដ្ឋានរបស់យើងដោយរបៀបណា ?
តើយើងនិងចែកចាយដំណឹងល្អជាមួយមិត្តភក្តិ និង អ្នកជិតខាងដោយរបៀបណា ? ( សូមមើល អាលម៉ា ១៧ ) ។
តើយើងអាចការពារខ្លួនយើង និងក្រុមគ្រួសារយើងពីប្រព័ន្ធផ្សព្វផ្សាយមិនសមរម្យ ហើយនិងរូបអាសគ្រាមដោយរបៀបណា ? ( សូមមើល គ. និង ស. ៤២:២២–២៣ ) ។
តើយើងនឹងធ្វើអ្វីខ្លះដើម្បីជួយណែនាំ ហើយពង្រឹងដល់កូនចៅ និងយុវជននៅក្នុងវួដយើង ?
តើយើងបង្កើនសាមគ្គីភាពនៅក្នុងកូរ៉ុម ក្រុម ឬ សមាគមសង្គ្រោះយើងដោយរបៀបណា ? ( សូមមើល ម៉ូសាយ ១៨:១៩–២២ ) ។
តើយើងអាចចូលរួមក្នុងកិច្ចការពង្សប្រវត្តិ និងការថ្វាយបង្គំក្នុងព្រះវិហារបរិសុទ្ធឲ្យបានកាន់តែច្រើនដោយរបៀបណា ?
តើយើងទូលសូមជំនួយពីព្រះអង្គម្ចាស់ នៅពេលយើងស្វែងរកចម្លើយនានាចំពោះសំនួររបស់យើង និងការយល់ដឹងជ្រៅជ្រះមួយនៃដំណឹងល្អដោយរបៀបណា ?
តើឪពុកម្តាយអាចក្លាយជាអ្នកដឹកនាំកាន់តែល្អប្រសើរនៅក្នុងគេហដ្ឋានដោយរបៀបណា ?
តើយើងអាចពង្រឹងទីបន្ទាល់យើងពីព្រះអង្គម្ចាស់ និងដំណឹងល្អរបស់ទ្រង់ និងជួយដល់ក្រុមគ្រួសារយើងមានភាពរឹងមាំខាងព្រលឹងវិញ្ញាណដោយរបៀបណា ?
តើការបម្រើមានអត្ថន័យយ៉ាងណាដែរ ? តើយើងអាចបម្រើអ្នកនៅជុំវិញខ្លួនយើងដោយរបៀបណា ? ( សូមមើល ១ ពេត្រុស ៤:១១ ).

បើអាច ថ្នាក់ដឹកនាំអាចប្រាប់សមាជិកឲ្យដឹងពីប្រធានបទជាមុនដើម្បីពួកគេអាចរៀបចំរួចជាស្រេចក្នុងការពិភាក្សា ។