« ការប្រជុំនៅសប្តាហ៍ទីពីរ និងទីបី » ចូរមកតាមខ្ញុំ—សម្រាប់ថ្នាក់បព្វជិតភាពមិលគីស្សាដែក និងថ្នាក់សមាគមសង្គ្រោះ ( ២០១៧ )
ការប្រជុំនៅសប្តាហ៍ទីពីរ និងទីបី
ការប្រជុំនៅសប្តាហ៍ទីពីរ និងទីបី
នៅសប្តាហ៍ទីពីរ និងទីបី នៃខែនីមួយៗ កូរ៉ុមបព្វជិតភាពមិលគីស្សាដែក និងសមាគមសង្គ្រោះ សិក្សាការបង្រៀនទាំងឡាយនៃពួកព្យាការី សាវក និងអ្នកដឹកនាំសាសនាចក្រផ្សេងៗទៀតដែលនៅរស់មកពីសន្និសិទទូទៅថ្មីៗបំផុត ។ សារលិខិតណាក៏បានឲ្យតែមកពីសន្និសិទចុងក្រោយបំផុតអាចយកមកពិភាក្សាបាន ។
ជាទូទៅ គណៈប្រធានកូរ៉ុម គណៈប្រធាន ថ្នាក់ដឹកនាំក្រុម ឬ គណៈប្រធានសមាគមសង្គ្រោះ នឹងជ្រើសរើសសារលិខិតសន្និសិទមួយមកសិក្សាដោយផ្អែកលើសេចក្តីត្រូវការរបស់សមាជិក ទោះជាយ៉ាងណាក៏ដោយ ប៊ីស្សព ឬ ប្រធានស្តេកអាចផ្តល់ជាគំនិតផងដែរ ។ អ្នកដឹកនាំអាចជ្រើសរើសនូវសារលិខិតមួយដែលទាក់ទងនិងប្រធានបទដែលបានពិភាក្សានៅក្នុង ការប្រជុំក្រុមប្រឹក្សាសប្តាហ៍ទីមួយ ឬ ពួកគេអាចជ្រើសរើស សារលិខិតផ្សេងទៀតដោយផ្អែកលើការបំផុសមកពីព្រះវិញ្ញាណ ។ អ្នកដឹកនាំ និងគ្រូបង្រៀនទាំងឡាយគួរស្វែងរកនូវវិធីដើម្បីលើកទឹកចិត្តសមាជិកឲ្យអានសារលិខិតដែលបានជ្រើសរើសជាមុន ហើយមកព្រះវិហារដោយរៀបចំដើម្បីចែកចាយគំនិតទាំងនោះ ។ សកម្មភាពរៀនសូត្រដែលបានផ្តល់យោបល់ខាងក្រោម ដែលផ្អែកលើគោលការណ៍ទាំងឡាយនៅក្នុងការបង្រៀនតាមរបៀបរបស់ព្រះអង្គសង្គ្រោះអាចនាំឲ្យសមាជិកចូលរួមក្នុងការរៀនសូត្រមកពីសារលិខិតសន្និសិទទូទៅ ។
សារ៉ុន អូប៊ែង « បញ្ចេញពន្លឺរបស់អ្នក »
សុំឲ្យសមាជិកនៃកូរ៉ុមរបស់អ្នក ឬ សមាគមសង្គ្រោះ ដើម្បីគិតអំពី របៀបដែលជីវិតរបស់ពួកគេធ្លាប់បានទទួលឥទ្ធិពលល្អដោយសារតែស្រ្តីសុចរិត និងស្មោះត្រង់ម្នាក់ ។ សូមពិចារណាពីការអញ្ជើញសមាជិកពីរបីនាក់ឲ្យចែកចាយពីរបៀបដែលស្ត្រីនេះឆ្លុះបញ្ចាំងនូវចរិតលក្ខណៈមួយ ឬ ច្រើននៃស្រ្តីសុច្ចរិតដូចដែលបាននិយាយនៅក្នុងសារលិខិតរបស់បងស្រី អឺប៊ែងឃ៍ ។ តើយើងរៀនអ្វីខ្លះមកពី បងស្រី អឺប៊ែងឃ៍ អំពីរបៀបដែលយើងអាចក្លាយជា « កម្លាំងដ៏សំខាន់មួយនៅក្នុងការរីកចម្រើនទាំងខាងសាច់ឈាម និង ខាងព្រលឹងវិញ្ញាណនៃសាសនាចក្រនៅក្នុងថ្ងៃចុងក្រោយ » ?
នេល៍ អែហ្វ ម៉ារ៉ត « Abiding in God and Repairing the Breach »
សាលិខិតនេះអាចជួយសមាជិកដែលមានអារម្មណ៍ថាបានឃ្លាតឆ្ងាយពីព្រះវបិតាសួគ៌ ឬ ពីអ្នកទាំងឡាយដែលនៅជុំវិញខ្លួន ។ តើអ្វីខ្លះនឹងជួយដល់អ្នកទាំងឡាយដែលអ្នកបង្រៀនឲ្យយល់ពីការបែកបាក់គឺជាអ្វី ? ប្រហែលជាអ្នកអាចនាំយករូបភាពការបែកបាក់ផ្សេងៗគ្នាមកបង្ហាញ ។ តើបងស្រី ម៉ារ៉ត ឲ្យនិយមន័យការបែកបាក់យ៉ាងដូម្តេច ? តើអ្វីទៅដែលអាចបង្កឲ្យមានការបែកបាក់ដល់ទំនាក់ទំនងរបស់យើងជាមួយនឹងព្រះ និងអ្នកដទៃផ្សេងទៀត ? សូមអញ្ជើញសមាជិកឲ្យស្វែងរកមើលសារលិខិតរបស់បងស្រី ម៉ារ៉ត សម្រាប់យោបល់ទាំងឡាយអំពីអ្វីដែលអាចធ្វើដើម្បីផ្សះផ្សាការបែកបាក់ទាំងឡាយនៅក្នុងជីវិតរបស់យើង ។ សូមទុកពេលឲ្យសមាជិកដើម្បីកត់ត្រាទុកនូវអ្វីដែលព្រះវិញ្ញាណបំផុសពួកគេឲ្យធ្វើដើម្បីខិតកាន់តែជិតព្រះ និងអ្នកដទៃ ។
ចយ ឌី ចូនស៍ « តម្លៃហួសពីការអាចវាស់វែងបាន »
តើពរជ័យអ្វីខ្លះកើតឡើងមកក្នុងជីវិតយើងនៅពេលយើងយល់ពីអត្តសញ្ញាណដ៏ទេវភាពរបស់យើង ? ដើម្បីឆ្លើយសំនួរនេះ សមាជិកនៃកូរ៉ុម ឬ សមាគមសង្គ្រោះ អាចរំឭកឡើងវិញនូវរឿងរបស់ ម៉ារីម៉ា រីនុ និង ថៃអាណា នៅក្នុងសារលិខិតរបស់បងស្រី ចូនស៍ ។ តើការប្រឹក្សាអ្វីខ្លះដែលបងស្រី ចូនស៍ផ្តល់ឲ្យដើម្បីជួយយើង « ចងចាំ និងក្រសោបអត្តសញ្ញាណដ៏ទេវភាពរបស់យើង »? អញ្ជើញសមាជិកឲ្យស្វែងរក និង ពិភាក្សានូវវគ្គបទគម្ពីរមួយ ឬ ពាក្យដកស្រង់មួយមកពីសារលិខិតរបស់បងស្រី ចូនស៍ ដែលជួយពួកគេយល់នូវគុណតម្លៃពិតរបស់ខ្លួនចំពោះព្រះ ។ សូមអញ្ជើញពួកគេឲ្យចែកចាយបទគម្ពីរមួយ ឬ ពាក្យដកស្រង់ទាំងនេះជាមួយនរណាម្នាក់ដែលត្រូវការនូវការរំឭកមួយពីតម្លៃដ៏ទេវភាពរបស់គាត់ ។
ឌៀថើរ អេហ្វ អុជដូហ្វ« បងប្អូនស្រីបីនាក់ »
របៀបមួយដើម្បីរំឭកឡើងវិញនូវសារលិខិតរបស់ប្រធាន អុជដូហ្វ គឺត្រូវបែងចែកកូរ៉ុម ឬ សមាគមសង្គ្រោះ ជាក្រុមតូចៗ ។ អ្នកអាចចាត់តាំងក្រុមនីមួយៗឲ្យអាននូវរឿងមួយនៃបងប្អូនស្រីទាំងបីមកពីសារលិខិតរបស់ប្រធាន អុជដូហ្វ ។ ក្រុមនីមួយៗអាចសរសេរសំបុត្រមួយទៅកាន់បងស្រីនោះដោយសង្ខេបការប្រឹក្សារបស់គាត់ ហើយចែកចាយជាមួយនិងក្រុមផ្សេងៗនូវអ្វីដែលគាត់បានសរសេរ ។ តើយើងអាចធ្វើអ្វីខ្លះដើម្បីប្រែកាន់តែដូចជាប្អូនស្រីទីបី ? តើយើងអាចធ្វើឲ្យកូរ៉ុម ឬ សមាគមសង្គ្រោះរបស់យើងក្លាយជា « គេហដ្ឋានដ៏មានសុវត្ថិភាព » សម្រាប់អ្នកទាំងឡាយដែលកំពុងជួបនូវឧបសគ្គដោយរបៀបណា ?
ឌៀថើរ អេហ្វ អុជដូហ្វ « បំណងប្រាថ្នាត្រឡប់ទៅផ្ទះវិញ »
តើអ្នកអាចជួយដល់អ្នកទាំងឡាយដែលអ្នកបង្រៀនឲ្យស្គាល់នូវរបៀបដែលព្រះកំពុងប្រើពួកគេដើម្បីប្រសិទ្ធពរដល់អ្នកដទៃដោយរបៀបណា ? អ្នកអាចអញ្ជើញពួកគេឲ្យរំឭកឡើងវិញនូវវគ្គមួយនៃសារលិខិតរបស់ប្រធាន អុជដូហ្វ ដែលមានចំណងជើងថា « ព្រះនឹងប្រើអ្នក » ស្វែងរកមើលនូវការសន្យានានាដែលបានធ្វើចំពោះអ្នកទាំងឡាយណាដែលព្យាយាមបម្រើនៅក្នុងនរគរបស់ព្រះដោយមិនគិតពីភាពទន់ខ្សោយរបស់ពួកគេទេ ។ ការអានសារលិខិតនេះក៏អាចរំឭកសមាជិកផងដែរពីបទពិសោធន៍ទាំងឡាយដែលពួកគេអាចចែកចាយពីរបៀបដែលព្រះបានប្រើពួកគេដើម្បីប្រទានពរដល់អ្នកដទៃ—ឬ ពីពេលដែលទ្រង់បានប្រើអ្នកដទៃដើម្បីប្រទានពរដល់ពួកគេ ។ ផ្តល់ពេលវេលាឲ្យសមាជិកដើម្បីពិចារណានូវអ្វីដែលពួកគេបានទទួលការបំផុសឲ្យធ្វើមកពីការពិភាក្សានេះ ។
បូនី អិល អូស្ការសុន « សេចក្ដីត្រូវការនៅចំពោះ យើង »
វិធីមួយដើម្បីចាប់ផ្តើមកិច្ចពិភាក្សាមួយអំពីសារលិខិតរបស់បងស្រី អូស្ការសុន គឺចែកក្រដាសមួយសន្លឹកដល់គ្រប់គ្នាដោយសរសេរសំនួរនៅខាងលើថា « តើនរណាត្រូវការខ្ញុំថ្ងៃនេះ ? » ។ សមាជិកនៃសមាគមសង្គ្រោះ ឬ កូរ៉ុមរបស់អ្នកអាចចំណាយពេលពីរបីនាទីក្នុងការគិតពិចារណា និងធ្វើបញ្ជីចម្លើយចំពោះសំនួរនេះ ។ បន្ទាប់មកពួកគេអាចស្វែងរកគំនិតនានាអំពីរបៀបដែលពួកគេអាចបម្រើមនុស្សទាំងឡាយនៅលើបញ្ជីរបស់ខ្លួនពីក្នុងសារលិខិតរបស់បងស្រី អូស្ការសុន—ឬ ដាក់ឈ្មោះបន្ថែមពេលបានបំផុសគំនិត ។ ប្រហែលពួកគេពីរបីនាក់អាចចែកចាយនូវអ្វីដែលពួកគេបានរៀន ។
ដាល្លិន អេក អូក « ផែនការ និងសេចក្ដីប្រកាស »
តើសមាជិកនៃកូរ៉ុម ក្រុម ឬ សមាគមសង្គ្រោះរបស់អ្នកឆ្លើយតបចំពោះការអញ្ជើញរបស់អែលឌើរ អូក ឲ្យ « បង្រៀន[ និង ]រស់នៅតាម » ការប្រកាសស្តីពីក្រុមគ្រួសារ នៅក្នុងគេហដ្ឋាន នៅក្នុងសហគមន៍ និងនៅក្នុងសាសនាចក្រយ៉ាងដូចម្តេច ? អញ្ជើញពួកគេឲ្យចែកចាយនូវគំនិតនានាជាមួយគ្នា ។ វាអាចមានប្រយោជន៍ផងដែរដើម្បីស្វែងរកសារលិខិតសម្រាប់សេចក្តីថ្លែងបែបគោលលទ្ធិមួយចំនួនចេញមកពីការប្រកាសស្តីពីក្រុមគ្រួសារ ។ តើសេចក្តីថ្លែងទាំងនេះជួយយើងឆ្លើយតបដោយរបៀបណាចំពោះ « ឧបសគ្គបច្ចុប្បន្ននេះចំពោះគ្រួសារ » ? វគ្គទី IV នៃសារលិខិតរបស់អែលឌើរ អូក មាននូវគំរូមួយចំនួននៃសេចក្តីថ្លែងដូច្នោះ ។
ឌី ថត គ្រីស្តូហ្វឺសិន « នំប៉័ងដ៏រស់ដែលចុះពីស្ថានសួគ៌ »
នេះគឺជាសំនួរមួយចំនួនដែលសមាជិកសមាគមសង្គ្រោះ និង កូរ៉ុម អាចគិតនៅក្នុងចិត្តនៅពេលដែលពួកគេពិនិត្យមើលឡើងវិញនូវសារលិខិតរបស់អែលឌើរ គ្រីស្តូហ្វឺសិន ៖ តើភាពបរិសុទ្ធគឺជាអ្វី ? តើយើងស្វែងរកភាពបរិសុទ្ធតាមរបៀបណា ? តើការទទួលទានសាក្រាម៉ង់ជួយយើងនៅក្នុងកិច្ចខិតខំរបស់យើងដោយរបៀបណា ? សមាជិកអាចចែកចាយនូវពាក្យទាំងឡាយមកពីសារលិខិតរបស់អែលឌើរ គ្រីស្តូហ្វឺសិន ដែលជួយឆ្លើយសំនួរទាំងនេះ ។ តើយើងអាចជួយគ្នាក្នុងនាមជា « ពួកបរិសុទ្ធ » ក្នុងកិច្ចខិតខំដើម្បីបានកាន់តែបរិសុទ្ធយ៉ាងណា ?
ជែហ្រ្វី អ័រ ហូឡិន « ចូរឲ្យអ្នករាល់គ្នាបានគ្រប់លក្ខណ៍—នៅទីបញ្ចប់ »
សមាជិកខ្លះដែលអ្នកបង្រៀនអាចមានអារម្មណ៍ថា ពួកគេពុំសក្តិសមឡើយនៅពេលដែលនិយាយដល់ការរស់នៅតាមបង្រៀនរបស់ព្រះអង្គសង្គ្រោះ ។ តើអែលឌើរ ហូឡិន បង្រៀនអ្វីខ្លះដែលអាចលួងលោម និង លើកទឹកចិត្តអ្នកទាំងឡាយដែលអាចមានអារម្មណ៍បែបនោះ ? អ្នកអាចអញ្ជើញសមាជិកសមាគមសង្គ្រោះ ឬ កូរ៉ុម ដើម្បីស្វែងរកនូវអ្វីមួយនៅក្នុងសារលិខិតនេះដែលអាចឲ្យពួកគេចែកចាយជាមួយនរណាម្នាក់ដែលកំពុងមានឧបសគ្គដើម្បីទទួលអារម្មណ៍ថាពួកគេគឺ « ល្អគ្រប់គ្រាន់ ។ » ឬ ពួកគេអាចស្វែងរកនូវអ្វីមកពីសារលិខិតដែលបំផុសគំនិតដល់ពួកគេឲ្យទទួលអារម្មណ៍ នូវ« សេចក្តីស្រឡាញ់ និង ការកោតសរសើរចំពោះ [ ព្រះគ្រីស្ទ ] ហើយនិងបំណងប្រាថ្នាមួយកាន់តែខ្លាំងដើម្បីក្លាយដូចជាទ្រង់ ។ »
ហ្គែរី អ៊ី ស្ទីវ៉ែនសុន « សូរ្យគ្រាសខាងវិញ្ញាណ »
តើមានសមាជិកណាខ្លះនៃកូរ៉ុម ឬ សមាគមសង្គ្រោះរបស់អ្នកធ្លាប់ឃើញសូរ្យគ្រាសដែរទេ ? បើធ្លាប់ អ្នកអាចអញ្ជើញម្នាក់ឲ្យពន្យល់នូវភាពស្រដៀងគ្នាដែលអែលឌើរ ស្ទីវ៉ែនសុន ចែកចាយអំពី « ភាពងងឹតខាងព្រលឹងវិញ្ញាណ ។ » តើឧបសគ្គអ្វីខ្លះដែលអាច « រាំងខ្ទប់នូវទំហំ ភាពភ្លឺច្បាស់ និង ភាពកក់ក្តៅពីពន្លឺនៃព្រះយេស៊ូវគ្រីស្ទ និងដំណឹងល្អទ្រង់ » ? តើប្រព័ន្ធផ្សព្វផ្សាយសង្គមអាចរំខានយើងពី « ភាពស្រស់ស្អាត កក់ក្តៅ និងពន្លឺសួគ៌ានៃដំណឹងល្អដោយរបៀបណា » ? តើយើងពាក់ « វ៉ែនតាដំណឹងល្អ » ដែលការពារយើងពីភាពងងឹតខាងព្រលឹងវិញ្ញាណដោយរបៀបណា ? តើរឿងប្រៀបធៀបរបស់អែលឌើរ ស្ទីវ៉ែនសុនបង្រៀនយើងអំពីការថែរក្សាទស្សនវិស័យមួយនៃដំណឹងល្អដូចម្ដេចខ្លះ ?
ឃ្វីនថិន អិល ឃុក « រឿងប្រចាំថ្ងៃមានភាពអស់កល្ប »
សារលិខិតរបស់អែលឌើរ ឃុក រំឭកយើងពីសារៈសំខាន់នៃការព្យាយាមដើម្បីបន្ទាបខ្លួនតាមមធ្យោបាយផ្សេងៗ ។ របៀបមួយដើម្បីពិភាក្សានូវអ្វីដែលគាត់បង្រៀនគឺចែកសមាជិកជាពីរក្រុម ។ ចូរសុំក្រុមមួយឲ្យស្វែងរកនូវយោបល់នានាមកពីសារលិខិតរបស់អែលឌើរ ឃុក ដែលអាចជួយយើងអភិវឌ្ឍន៍ការបន្ទាបខ្លួន និងក្រុមមួយទៀតឲ្យស្វែងរកនូវវិធីផ្សេងៗដែលមនុស្សសម្ដែងភាពឆ្មើងឆ្នៃ ។ សូមអញ្ជើញក្រុមនីមួយៗឲ្យចែកចាយ ការរៀបរាប់ របស់ពួកគេជាមួយក្រុម ផ្សេងទៀត ។ សមាជិកក៏អាចចែកចាយនូវរបៀបផ្សេងៗទៀតដែលពួកគេអាចបង្ហាញកាន់តែច្រើននូវ « ការបន្ទាបខ្លួនរាល់ថ្ងៃ » នៅក្នុងជីវិតរបស់ពួកគេ ហើយពិចារណានូវរបៀបនៃការបន្ទាបខ្លួននេះអាចជួយពួកគេរៀបចំខ្លួនដើម្បីទៅជួបព្រះ ។
រ៉ូណល អេ រ៉ាសបាន « ការតាក់តែងដ៏ទេវភាព »
ដើម្បីលើកទឹកចិត្តក្នុងការពិភាក្សាអំពីសារលិខិតរបស់អែលឌើរ រ៉ាសបាន វាអាចមានប្រយោជន៍ដើម្បីអញ្ជើញសមាជិកពីរបីនាក់ឲ្យយកគំរូកាត់សំលៀកបំពាក់មួយ គំនូសព្រាងផ្ទះមួយ ឬក៏រូបមន្តធ្វើម្ហូបមួយ ហើយជជែកអំពីមូលហេតុដែលពួកវាមានប្រយោជន៍ ។ តើគំរូ ឬការបង្រៀនអ្វីខ្លះមកពីសារលិខិតរបស់អែលឌើរ រ៉ាសបាន ដែលបំផុសគំនិតសមាជិកដើម្បីឲ្យស្គាល់នូវការតាក់តែងរបស់ព្រះសម្រាប់ជីវិតរបស់ពួកគេ ? ប្រហែលជាសមាជិកថ្នាក់អាចចែកចាយនូវបទពិសោធន៍នានាដែលពួកគេបានឃើញព្រះអម្ចាស់កំពុងដឹកនាំជីវិតរបស់ពួកគេ ។ តើពួកគេបានធ្វើអ្វីខ្លះដើម្បីបង្ហាញព្រះថាពួកគេ « ផ្តល់តម្លៃ » ដល់ការដឹកនាំរបស់ទ្រង់ ? ហេតុអ្វីវាសំខាន់ដែលត្រូវស្គាល់អំពី « ការតាក់តែងដ៏ទេវភាព » របស់ព្រះ ?
រ័សុល អិម ណិលសុន « ព្រះគម្ពីរមរម ៖ តើជីវិតអ្នកនឹងទៅជាយ៉ាងណាបើគ្មានគម្ពីរនេះ? »
ប្រធាន ណិលសុនបានអញ្ជើញសមាជិកដើម្បីគិតអំពីសំនួរចំនួនបី ៖ ( ១ ) « តើជីវិតអ្នកនឹងទៅជាយ៉ាងណាបើគ្មាន ព្រះគម្ពីរមរមន ? » ( ២ ) តើអ្នកនឹង ពុំស្គាល់អ្វីខ្លះ ? ( ៣ ) តើអ្នកនឹង ពុំមានអ្វីខ្លះ ? អញ្ជើញសមាជិកនៃកូរ៉ុម ក្រុម ឬ សមាគមសង្គ្រោះ ដើម្បីពិចារណាសំនួរទាំងនេះ ហើយចែកចាយនូវរបៀបដែលពួកគេអាចឆ្លើយសំនួរទាំងនោះ ។ តើពួកគេរកឃើញអ្វីខ្លះមកពីសារលិខិតនេះដែលបំផុសគំនិតពួកគេដើម្បីឲ្យតម្លៃព្រះគម្ពីរមរមនច្រើនជាង « គ្រាប់ពេជ្រ ឬ ត្បូងទន្ទឹមនានា » ?
ឌែល ជី រេនឡាន់ « បព្វជិតភាព និងព្រះចេស្ដាដ៏ធួនរបស់ព្រះអង្គសង្គ្រោះ »
តើអ្នកជួយសមាជិកនៃកូរ៉ុម ឬ សមាគមសង្គ្រោះ យល់នូវរបៀបដែលបព្វជិតភាពជួយធ្វើឲ្យពរជ័យនៃដង្វាយធួនរបស់ព្រះអង្គសង្គ្រោះមានសម្រាប់ពួកគេយ៉ាងដូចម្តេច ? អ្នកអាចសរសេរនូវចំណងជើងទាំងពីរនេះនៅលើក្តារខៀន ៖ « ហេតុអ្វីយើងត្រូវការដង្វាយធួននៃព្រះយេស៊ូវគ្រីស្ទ » និង « របៀបដែលបព្វជិតភាព នាំពរជ័យនៃដង្វាយធួនមកដល់យើង ។ » បន្ទាប់មក អញ្ជើញសមាជិកឲ្យស្រាវជ្រាវសារលិខិតរបស់អែលឌើរ រេនឡាន់ រកមើលឃ្លាទាំងឡាយដើម្បីសរសេរនៅក្រោមចំណងជើងនីមួយៗ ។ តើបព្វជិតភាព និងពិធីបរិសុទ្ធទាំងឡាយរបស់វាជួយយើងឲ្យបំពេញព្រះរាជបំណងរបស់ព្រះវរបិតាសួគ៌សម្រាប់កូនចៅរបស់ទ្រង់តាមរបៀបណា ?
ឌៀថើរ អេហ្វ អុជដូហ្វ « អ្នកកាន់ពន្លឺស្ថានសួគ៌ »
អញ្ជើញសមាជិកឲ្យស្រាវជ្រាវសារលិខិតរបស់ប្រធាន អុជដូហ្វ ហើយធ្វើការកត់សម្គាល់ពីរបៀបដែលវត្តមាន ឬ អវត្តមាននៃពន្លឺស្ថានសួគ៌អាចប៉ះពាល់ដល់ជីវិតពួកយើង ។ អ្នកអាចអញ្ជើញសមាជិកឲ្យសិក្សានូវបទគម្ពីរមួយចំនួនដែលប្រធាន អុជដូហ្វ លើកឡើងហើយធ្វើការកត់សម្គាល់នូវសេចក្តីពិតដែលទាក់ទងដល់ពន្លឺខាងវិញ្ញាណ ។ តើពាក្យប្រៀបប្រដូចអំពីសូរ្យគ្រាសបង្រៀនយើងអំពីតួនាទីនៃសិទ្ធិជ្រើសរើសនៅក្នុងការសែ្វងរកពន្លឺខាងវិញ្ញាណដូចម្តេចខ្លះ ? តើយើងអាចធ្វើអ្វីខ្លះដើម្បីចែកចាយនូវពន្លឺដ៏ទេវភាពរបស់ព្រះយេស៊ូវគ្រីស្ទជាមួយអ្នកដទៃ ជាពិសេសជាមួយនិងក្រុមគ្រួសាររបស់យើង និង « យុវវ័យរបស់យើង ដែលកំពុងតែស្វែងរកពន្លឺ » ?
ហិនរី ប៊ី អាវរិង « ព្រះអង្គម្ចាស់ដឹកនាំសាសនាចក្ររបស់ទ្រង់ »
អញ្ជើញសមាជិកនៃកូរ៉ុម ឬ សមាគមសង្គ្រោះរបស់អ្នកដើម្បីចែកចាយនូវបទពិសោធន៍នានាដែលពួកគេត្រូវការអភិវឌ្ឍន៍សេចក្តីជំនឿដែលថាការហៅបម្រើរបស់ពួកគេ ឬ ការហៅបម្រើរបស់អ្នកដទៃគឺមកពីព្រះ ។ តើពួកគេបានអនុវត្តសេចក្តីជំនឿរបស់ពួកគេតាមរបៀបណា ? តើពួកគេបានរៀនថាការហៅបម្រើរបស់ពួកគេបានមកពីព្រះដោយរបៀបណា ? អញ្ជើញសមាជិកឲ្យស្រាវជ្រាវសារលិខិតរបស់ប្រធាន អាវរិង ហើយធ្វើការកត់សម្គាល់នូវសេចក្តីពិតដែលលោកបានរៀនមកពីបទពិសោធន៍ផ្ទាល់ខ្លួនដែលអាចជួយយើងមានទំនុកចិត្ត និងអត់ធ្មត់ជាមួយខ្លួនឯង និងអ្នកដទៃដែលព្រះបានហៅ ។
ជីន ប៊ី ប៊ីងហាំ « ដើម្បីឲ្យអំណរបងប្អូនបានពេញលេញ »
សារលិខិតរបស់បងស្រី ប៊ីងហាំ អាចជួយសមាជិកនៃសមាគមសង្គ្រោះ ឬ កូរ៉ុមរបស់អ្នកយល់នូវរបៀបដើម្បីស្វែងរកសេចក្តីអំណរនៅពេលយើងមកកាន់ព្រះគ្រីស្ទ បើទោះជាជីវិតយើងពោរពេញដោយក្តីលំបាកក៏ដោយ ។ របៀបមួយដើម្បីពិភាក្សាសារលិខិតរបស់គាត់គឺដោយគូសផ្លូវមួយនៅលើក្តារខៀនឆ្ពោះទៅកាន់ពាក្យក្តីអំណរ ។ អញ្ជើញសមាជិកបីបួននាក់ឲ្យសរសេរលើផ្លូវនោះនូវយោបល់មួយមកពីសារលិខិតរបស់បងស្រី ប៊ីងហាំ ដែលនាំទៅកាន់ក្តីអំណរពិត ។ លើកទឹកចិត្តសមាជិកឲ្យពិចារណានូវរបៀបផ្សេងៗទៀតដែលពួកគេអាចធ្វើតាមការប្រឹក្សារបស់បងស្រី ប៊ីងហាំ។ សូមអញ្ជើញសមាជិកបីបួននាក់ឲ្យចែកចាយគំនិតរបស់ពួកគេ ។
ដេវីឌ អេ បែដណា « សេចក្តីសន្យាដ៏ធំបំផុត ហើយវិសេសផង »
ដើម្បីជួយសមាជិកនៃសមាគមសង្គ្រោះ ឬ កូរ៉ុមរបស់អ្នកពិភាក្សាសារលិខិតរបស់អែលឌើរ បែដណា អ្នកអាចដាក់តាំងរូបភាពលើក្តារខៀនដើម្បីតំណាងឲ្យ ថ្ងៃឈប់សម្រាក ព្រះវិហារបរិសុទ្ធ និងគេហដ្ឋានរបស់យើង ។ អញ្ជើញសមាជិកឲ្យអានវគ្គការឆ្លើយឆ្លងគ្នានៃសារលិខិតរបស់អែលឌើរ បែដណា ហើយសរសេរនៅលើក្តារខៀននូវរបៀបដែលថ្ងៃឈប់សម្រាក ព្រះវិហារបរិសុទ្ធ និងគេហដ្ឋានរបស់យើង ជួយយើងផ្តោតលើការសន្យាទាំងឡាយរបស់ព្រះដល់យើង ។ តើអ្វីខ្លះនៅក្នុងជីវិតរបស់យើងដែលអាចទាញចំណាប់អារម្មណ៍យើងចេញពីការសន្យាទាំងនេះ ? តើជំហានអ្វីខ្លះដែលយើងត្រូវដើរដើម្បីប្រាកដថាយើងចងចាំនូវការសន្យាទាំងនោះ ?
ហិនរី ប៊ី អាវរិង « ចូរកុំខ្លាចនឹងធ្វើល្អឡើយ »
សារលិខិតរបស់ប្រធាន អាវរិង អាចជួយមនុស្សទាំងឡាយដែលអ្នកបង្រៀនស្វែងរកនូវការលើកទឹកចិត្ត និងជំនឿដើម្បីធ្វើល្អនៅក្នុងពិភពលោក ។ អ្នកអាចអញ្ជើញសមាជិកពីរបីនាក់ដើម្បីសង្ខេបនូវគំរូនៃមនុស្សស្មោះត្រង់ដែលប្រធាន អាវរិងចែកចាយ ។ តើគំរូទាំងនេះបង្រៀនយើងអំពីរបៀបបម្រើអ្នកដទៃយ៉ាងដូចម្ដេច ? តើគំរូទាំងនេះឲ្យយោបល់អំពីរបៀបផ្សេងៗដែលយើងអាចបម្រើក្នុងនាមជាកូរ៉ុម ឬ សមាគមសង្គ្រោះដូចម្តេចខ្លះ ?
របៀបមួយទៀតដើម្បីពិភាក្សាសារលិខិតនេះគឺតាមរយៈការរំឭកឡើងវិញនូវពរជ័យនានាដែលប្រធាន អាវរិងបានឃើញមកពីការធ្វើតាមការប្រឹក្សារបស់ប្រធាន ថូម៉ាស អេស ម៉នសុន ឲ្យសិក្សាព្រះគម្ពីរមរមន ។ តើពរជ័យអ្វីខ្លះដែលអ្នកធ្លាប់បានឃើញតាមរយៈការសិក្សា ព្រះគម្ពីរមរមន ?
អិម រ័សុល បាឡឺដ « ដំណើរមានបន្តទៅមុខទៀត! »
ដើម្បីចាប់ផ្តើមការពិភាក្សាអំពីសារលិខិតរបស់អែលឌើរ បាឡឺដ អ្នកអាចអញ្ជើញនរណាម្នាក់ឲ្យចែកចាយនូវបទពិសោធន៍មួយនៅពេលពួកគេបានធ្វើដំណើរទៅទិសដៅមួយ ប៉ុន្តែពួកគេបានដឹងថាពួកគេនៅលើផ្លូវខុស ។ តើគំរូទាំងនេះទាក់ទងទៅនឹងដំណើរ « ថ្មើរជើង » ផ្ទាល់ខ្លួនរបស់យើងត្រឡប់ទៅកាន់ព្រះវរបិតាសួគ៌វិញរបៀបណា ? បន្ទាប់មកសមាជិកអាចស្រាវជ្រាវរកការប្រឹក្សា និង ការព្រមាននានា ដែលអែលឌើរ បាឡឺដ ផ្តល់ឲ្យ ដែលអាចជួយយើងដឹងប្រសិនបើយើងដើរលើផ្លូវត្រូវក្នុងជីវិតរបស់យើង ឬអត់ ។ ទុកពេលឲ្យសមាជិកដើម្បីពិចារណាពីផ្លូវផ្ទាល់របស់ពួកគេ ហើយពិភាក្សារករបៀបផ្សេងៗដែលយើងអាចជួយ និងលើកទឹកចិត្តអ្នកដទៃ នៅក្នុងដំណើរ « ថ្មើរជើង »របស់ពួកគេត្រឡប់ទៅកាន់ព្រះវិរបិតាសួគ៌វិញ ។
នែល អិល អាន់ឌើរសិន « សំឡេងនៃព្រះអម្ចាស់ »
ប្រហែលជាសមាជិកនៃសមាគមសង្គ្រោះ ឬ កូរ៉ុមរបស់អ្នកអាចចែកចាយនូវបទពិសោធន៍មួយដែលសារលិខិតមកពីសន្និសីទទូទៅមួយមានន័យចំពោះពួកគេ ។ ហេតុអ្វីសារលិខិតទាំងនេះមានន័យ ? តើអែលឌើរ អាន់ឌើរសិន បង្រៀនអំពីសារៈសំខាន់នៃសារលិខិតសន្និសីទទូទៅនានា និងកិច្ចប្រឹងប្រែង និងដំណើរការដែលទាក់ទងក្នុងការរៀបចំពួកវាយ៉ាងដូចម្តេចដែរ ? តើចំណេះដឹងនេះមានឥទ្ធិពលលើភាពចាំបាច់ដែលថាយើងត្រូវសិក្សា ហើយស្តាប់តាមពាក្យទាំងនេះយ៉ាងដូចម្តេច ? សូមគិតបង្កើតជាបញ្ជីនៃការអញ្ជើញទាំងឡាយមកពីសន្និសីទថ្មីៗបំផុត ។ តើយើងត្រូវធ្វើអ្វីខ្លះ ដើម្បីធ្វើតាមការអញ្ជើញទាំងនេះ ?