“27 Sānuali–2 Fēpueli. 1 Nīfai 16–22: ‘Te U Tofa ʻa e Halá ki muʻa ʻiate Kimoutolu,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“27 Sānuali–2 Fēpueli. 1 Nīfai 16–22,” Haʻu, ʻo Muimui ʻIate Au—Maʻá e Palaimelí: 2020
Līhai mo e Liahoná, tā ʻe Joseph Brickey
27 Sānuali–2 Fēpueli
1 Nīfai 16–22
“Te U Tofa ʻa e Halá ki muʻa ʻiate Kimoutolu”
ʻOku akoʻi mai ʻe he ngaahi talanoa manakoa ʻi he 1 Nīfai 16–22 ha ngaahi moʻoni ʻe lava ke faitāpuekina ai e fānau ʻi hoʻo kalasí. Lau ʻa e ngaahi vahe ko ʻení pea lekooti e ngaahi ongo ʻokú ke maʻú.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Hiki ʻa e ngaahi foʻi lea ko ʻení ʻi he palakipoé, pe fakaʻaliʻali honau ngaahi fakatātaá: ko e Liahoná, ko e kaufaná, mo e ko e vaká. Fakaafeʻi ha fānau ʻe toko tolu ke nau takitaha fili ha taha ʻo e ngaahi foʻi leá pe fakatātaá pea vahevahe ʻa e konga ʻi he talanoa ʻo Nīfaí ʻoku fekauʻaki mo e meʻa ko iá. Fai ha tokoni kapau ʻe fie maʻu.
Akoʻi e Tokāteliné: Fānau Iiki Angé
1 Nīfai 16:10, 28–29; 18:8–13, 20–22
ʻE lava ke tataki mo fakahinohinoʻi au ʻe he ʻEikí.
Akoʻi ange ki he fānaú, neongo e taimi te nau fehangahangai ai mo ha ngaahi faingataʻa, ʻe lava ke tataki kinautolu ʻe he ʻEikí (vakai, 1 Nīfai 16:29).
Ngaahi ʻEkitivitī ʻe Ala Fakahokó
-
Fakaʻaliʻali ki he fānaú ha kāpasa, mape, pe ko ha faʻahinga meʻa kehe ʻokú ne tokoni ke tau ʻiloʻi hotau halá, pea fakamatalaʻi ange e founga ke tau fakaʻaongaʻi ai e ngaahi meʻangāue ko ʻení. Fakahoa ʻa e ngaahi meʻangāue ko ʻení ki he Liahoná, lolotonga hoʻo fakamatala fakanounouʻi ʻa e talanoa ʻi he 1 Nīfai 16:10, 28–29 mo e 18:9–13, 20–22. Fakamahino ange, ʻi he taimi naʻe talangataʻa ai ʻa e fāmili ʻo Līhaí, naʻe ʻikai ke ngāue ʻa e Liahoná (vakai foki, 1 Nīfai 18:9–12, 20–22). Ko e hā ʻe ala tokoni kiate kitautolu he ʻahó ni ke tau ʻiloʻi e hala ke tau foki ai ki he Tamai Hēvaní?
-
ʻOmi ha puha ʻoku ʻi ai ha fanga kiʻi fakamatala tokoni ʻokú ne fakamatalaʻi ha feituʻu ʻi loto pe takatakai ʻi he ʻapisiasí. Fakaʻaongaʻi ʻa e puhá mo e fakamatala tokoní ke fakafofongaʻi ʻa e Liahoná, pea tuku ki he fānaú ke nau taufetongi ʻi hono fili e ngaahi fakamatala mei lotó pea mateʻi pe ko e fē ʻa e feituʻu ko iá. Pea fononga fakataha leva ki he feituʻu ko iá. Fakamatalaʻi ange, ko e taimi ʻoku tau fakahaaʻi ai ʻetau tuí pea muimui ki he fakahinohino ʻoku ʻomi ʻe he ʻEikí, te Ne tokoniʻi kitautolu ke tau toe foki kiate Ia (vakai, ʻAlamā 37:38–42). ʻOku tataki fēfē kitautolu ʻe he Tamai Hēvaní ʻi heʻetau fononga foki hake kiate Iá?
Te u lava ʻo hoko ko ha faʻifaʻitakiʻanga lelei ki hoku fāmilí.
ʻE lava ke tokoni ʻa e ngaahi fakafeangai ʻa Nīfai mo hono fāmilí ʻi he taimi faingataʻá, ke ʻiloʻi ʻe he fānaú, neongo ʻoku nau kei iiki, te nau lava ʻo hoko ko ha kau faʻifaʻitakiʻanga lelei ki honau ngaahi fāmilí.
Ngaahi ʻEkitivitī ʻe Ala Fakahokó
-
Vahe ki he fānaú takitaha ke nau tā ha fakatātā ʻo ha meʻa mei he talanoa ʻo e kaufana ʻa Nīfai ne maumaú (vakai, 1 Nīfai 16:14–32), hangē ko Nīfai, ko ha kaufana, pe ko e Liahoná. Fakaʻaongaʻi leva ʻa e ngaahi fakatātaá ke fai ki he kalasí ʻa e talanoá, pea tuku ki he fānaú ke nau taufetongi ʻi hono fai e meʻa tatau. Te tau lava fēfē ʻo hangē ko Nīfaí ʻi he taimi ʻoku foua ai ʻe hotau ngaahi fāmilí ha ngaahi taimi faingataʻa?
-
Fakaafeʻi ʻa e fānaú ke nau takitaha kosi ʻo toʻo ha laʻi pepa fuopotopoto pea tā ha fofonga mamahi ʻi ha tafaʻaki pea mo ha fofonga fiefia ʻi he tafaʻaki ʻe tahá. ʻI hoʻo fai e talanoa ʻo e kaufana ʻa Nīfai ne motú, fakaafeʻi kinautolu ke nau fakaʻaongaʻi e ngaahi fofonga ʻi he laʻi pepá ke fakahaaʻi e ongo ne maʻu ʻe he fāmili ʻo Nīfaí lolotonga e ngaahi konga kehekehe ʻo e talanoá. Naʻe tokoniʻi fēfē ʻe Nīfai ʻa hono fāmilí ke nau fiefiá? Ko e hā te tau lava ʻo fai ke ngaohi hotau fāmilí ke fiefiá?
ʻE lava ke tokoniʻi au ʻe he Tamai Hēvaní ke u fai ha ngaahi meʻa faingataʻa.
Hangē ko Nīfaí, ʻoku ako ʻa e fānau ʻokú ke akoʻí ke nau fai ha ngaahi meʻa ʻoku ngali faingataʻa. ʻE lava ke tokoni ʻa e aʻusia ʻa Nīfaí ke nau ʻiloʻi ʻe tokoniʻi kinautolu ʻe he Tamai Hēvaní ʻi he taimi te nau kole aí.
Ngaahi ʻEkitivitī ʻe Ala Fakahokó
-
Talanoa ki he fānaú ʻa e talanoa ʻo hono fekauʻi ʻo Nīfai ke ne foʻu ha vaká, ʻo fakaʻaongaʻi ʻa e 1 Nīfai 17:7–19 mo e 18:1–4. Te ke ala fakaʻaongaʻi foki ʻa e “Vahe 7: Ko Hono Foʻu ʻo e Vaká” (Ngaahi Talanoa ʻo e Tohi ʻa Molomoná, 21–22) pe ko e vitiō ʻi he Book of Mormon Videos collection ʻi he ChurchofJesusChrist.org. ʻE lava ke toe fakamamafaʻi ʻe he peesi ʻekitivitī ʻo e uike ní ʻa e tefitoʻi moʻoni, naʻe tokoniʻi ʻe he Tamai Hēvaní ʻa Nifai, pea te Ne tokoniʻi kitautolu.
-
Hivaʻi fakataha ʻa e veesi hono ua ʻo e “Loto-toʻa ʻa Nīfaí” (Tohi Hiva ʻa e Fānaú, 64). Ko e hā e meʻa naʻe tokoni kia Nīfai ke ne maʻu ha loto-toʻa ʻi he taimi ne manukiʻi ai ia ʻe hono ongo taʻoketé ʻi heʻene feinga ke foʻu e vaká?
Akoʻi e Tokāteliné: Fānau Lalahi Angé
1 Nīfai 16:10, 28–29; 17:13–15; 18:8–13, 20–22
ʻOku tataki au ʻe he ʻEikí ʻi he taimi ʻoku ou tauhi ai ʻa e ngaahi fekaú.
Fakaʻaongaʻi ʻa e talanoa ʻo hono tataki e fāmili ʻo Līhaí ʻe he Liahoná, ke fakahaaʻi ki he fānaú ʻa e founga ʻe tataki ai kinautolu ʻe he ʻOtuá ʻi heʻenau feinga ke fai ʻa Hono finangaló.
Ngaahi ʻEkitivitī ʻe Ala Fakahokó
-
Fili ha konga lea ʻe taha pe lahi ange mei heni ke lau fakataha mo e fānaú: 1 Nīfai 16:10, 28–29; 17:13–15; mo e 18:8–13, 20–22. Kole ange ke nau fekumi ki he meʻa kuo pau ke tau fai ke maʻu ai ha tataki mo ha fakahinohino mei he ʻOtuá, pea aleaʻi e meʻa ʻoku nau akó.
-
Hili hono toe vakaiʻi e ngaahi talanoa ʻi he 1 Nīfai 16–18, fakaʻekeʻeke ha niʻihi ʻi he fānaú ʻo pehē pē ne nau fononga fakataha mo e fāmili ʻo Līhaí. Te ke lava ʻo fai ha ngaahi fehuʻi hangē ko ʻení: Ko e hā e ʻuhinga ʻokú ke houngaʻia ai ʻi he Liahoná? Ko e hā e meʻa naʻe fie maʻu ke ke fai kae lava ke ngāue ʻa e Liahoná? (vakai, 1 Nīfai 16:28–29). Fakaafeʻi ʻa e fānaú ke nau aleaʻi e ngaahi meʻa kuo foaki mai ʻe he ʻEikí ke ne tataki kitautolu ʻi hotau kuongá ni.
-
Kole ki he fānaú ke nau fakakaukau ki he founga te nau ala fakaʻaongaʻi ai ʻa e talanoa ʻo e Liahoná ke tokoniʻi ha kaungāmeʻa ʻokú ne fie maʻu ke fai ha fili mahuʻinga. Fokotuʻu ange ʻe ʻikai ngata pē ʻi he 1 Nīfai 16:10, 26–31 mo e 18:9–22, ka te nau lava foki ʻo vakai ki he ʻAlamā 37:38–44. Vahevahe ha aʻusia ʻa ia ne tokoniʻi ai koe ʻe he Tamai Hēvaní ʻi ha taimi faingataʻa, pe fakaafeʻi e fānaú ke vahevahe ha aʻusia ʻe taha. Ko e hā kuo pau ke tau fai ke maʻu ai ʻa ʻEne tokoní?
ʻE lava ʻo tokoni lelei ʻa hoku ʻulungāngá mo ʻeku ngaahi filí, ki hoku fāmilí.
Ko ha tāpuaki lahi ʻa e tui ʻa Nīfaí ʻi he taimi ne fehangahangai ai ʻa hono fāmilí mo ha ngaahi faingataʻa lahi. Te ke tokoniʻi fēfē e fānaú ke nau ako mei heʻene sīpingá?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau tā ha ngaahi fakatātā ʻokú ne fakamatalaʻi ʻa e talanoa ki he kaufana ʻa Nīfai naʻe motú (vakai, 1 Nīfai 16:14–39). Toe vakaiʻi mo kinautolu ʻa e talanoá ʻo ka fie maʻu. ʻI heʻenau vahevahe ʻenau ngaahi fakatātaá, tokoniʻi kinautolu ke nau ʻiloʻi e ngaahi founga ne faitāpuekina ai ʻe he faivelenga ʻa Nīfaí ʻa hono fāmilí. Fakaafeʻi e fānaú ke nau fakalaulauloto ki he ngaahi faingataʻa ʻoku fehangahangai mo honau ngaahi fāmilí. Ko e hā te nau lava ʻo fai ke nau muimui ai ki he sīpinga ʻa Nīfaí?
-
Lau fakataha ha ngaahi veesi mei he 1 Nīfai 16:21–32. Aleaʻi ha ngaahi taumuʻa ʻoku ala maʻu ʻe he ngaahi fāmili ʻo e fānaú, hangē ko hono fai e efiafi fakafāmili angamahení pe lotu fakafāmilí. ʻE lava fēfē ke tokoniʻi ʻe he fānaú honau ngaahi fāmilí ke nau ikunaʻi e ngaahi taumuʻa ko ʻení? Fakaafeʻi kinautolu ke nau palani ke fai ha meʻa ʻe taha ke tokoniʻi honau fāmilí ke nau lavaʻi ʻa ʻenau ngaahi taumuʻa ki he uike ní.
Te u lava ʻo fakatatau ʻa e folofolá ki heʻeku moʻuí.
Tokoniʻi e fānaú ke nau ʻiloʻi ʻoku mahulu hake ʻa e ngaahi fakamatala ʻi he folofolá ʻi heʻenau hoko pē ko e talanoá—ʻoku ʻi ai e ngaahi tefitoʻi moʻoni ʻe lava ke ne faitāpuekina ai ʻenau moʻuí.
Ngaahi ʻEkitivitī ʻe Ala Fakahokó
-
Kole ki ha tokotaha ke ne lau leʻo lahi ʻa e 1 Nīfai 19:22–24 pea fehuʻi ki he fānaú pe ʻoku nau fakakaukau ʻoku ʻuhinga ki he hā ke “fakatatau ʻa e ngaahi folofolá” kiate kitautolú. Tokoniʻi kinautolu ke nau ʻiloʻi e founga ne fakatatau ai ʻe Nīfai ha talanoa fakaefolofola ki heʻene aʻusia ʻi hono ʻomi e ʻū lauʻi peleti palasá (vakai, 1 Nīfai 4:1–4; vakai foki, ʻEkesōtosi 14). Naʻe tokoniʻi fēfē ʻe hono manatuʻi e talanoa ko ʻení ʻa Nīfai mo hono ngaahi tokouá?
-
Toe vakaiʻi ha niʻihi ʻo e ngaahi talanoa kuo ako ʻe he fānaú kau kia Līhai mo hono fāmilí, mei he 1 Nīfaí, pea fakaafeʻi kinautolu ke vahevahe ʻa e meʻa kuo nau ako mei he ngaahi talanoa ko ʻení. Tokoniʻi kinautolu ke nau fakakaukau ki ha ngaahi tūkunga ʻi heʻenau moʻuí ʻe ala hangē ko e ngaahi talanoa ko ʻení. Hangē ko ʻení, ʻe ala fakamanatu kiate kinautolu ʻa e fekauʻi ʻe he ʻEikí ʻa Nīfai ke ne foʻu ha vaká, ha taimi ne nau fie maʻu ai ke fai ha meʻa faingataʻa pea nau kolea e tokoni ʻa e ʻEikí.
Poupouʻi e Akó ʻi ʻApi
Fakaafeʻi ʻa e fānaú ke nau fili ha talanoa mei he 1 Nīfai 16–22 pea vahevahe mo honau ngaahi fāmilí ha ngaahi founga te nau lava ai ʻo “fakatatau” ʻenau moʻuí ki he talanoa ko iá.
Fakatupulaki ʻo ʻEtau Founga Akoʻí
Fakaʻaongaʻi ha ngaahi talanoa. ʻOku tokoni ʻa e ngaahi talanoá ke mahino ki he fānaú ʻa e ngaahi tefitoʻi moʻoni ʻo e ongoongoleleí koeʻuhí he ʻoku nau fakahaaʻi e founga ʻoku moʻui ʻaki ai ʻe he niʻihi kehé ʻa e ngaahi tefitoʻi moʻoni ko iá.