“10–16 Fēpueli. 2 Nīfai 6–10: ʻHono ʻIkai ke Maʻongoʻonga ʻa e Palani ʻa Hotau ʻOtuá!’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“10–16 Fēpueli. 2 Nīfai 6–10,” Haʻu, ʻo Muimui ʻIate Au—Maʻá e Palaimelí: 2020
ʻOua Naʻa Fai Hoku Lotó, Ka ko e Finangalo ʻOʻoú, tā ʻa Harry Anderson
10–16 Fēpueli
2 Nīfai 6–10
“Hono ʻIkai ke Maʻongoʻonga ʻa e Palani ʻa Hotau ʻOtuá!”
ʻI hoʻo lau e 2 Nīfai 6–10, fekumi ki he tataki ʻa e Laumālié fekauʻaki mo e meʻa ke akoʻí. ʻE ala ueʻi fakalaumālie ʻe he fokotuʻutuʻu ko ʻení mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ha toe ngaahi fakakaukau.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Poupouʻi e fānaú ke nau taufetongi ʻi hono vahevahe ha meʻa kuo nau ako fekauʻaki mo Sīsū Kalaisi mo ʻEne Fakaleleí, lolotonga ʻenau ako fakafoʻituitui e 2 Nīfai 6–10 pe fakataha mo honau ngaahi fāmilí.
Akoʻi e Tokāteliné: Fānau Iiki Angé
ʻOku fakahaofi au ʻe Sīsū Kalaisi mei he angahalá mo e maté.
Te ke fakaʻaongaʻi fēfē ʻa e 2 Nīfai 9:7–13 mo e 20–23 ke tokoni ke mahino ki he fānaú ʻoku fakahaofi ʻe Sīsū Kalaisi ʻa e tokotaha kotoa pē mei he maté pea ʻokú Ne fakaʻatā ke tau lava ʻo fakatomala mei he angahalá?
Ngaahi ʻEkitivitī ʻe Ala Fakahokó
-
Talanoa ki he fānaú kau ki ha tokotaha ne tō ki ha luo naʻe loloto ʻa ia ne ʻikai lava ke ne toe kaka ki tuʻa. Naʻe haʻu ha tangata ʻo ne fusi hake ʻa e tokotahá ni mei he loto luó. ʻE lava ke ke fie tā ha fakatātā ʻo e talanoa ko ʻení ʻi he palakipoé pe fakatātaaʻi ia mo e fānaú. Fakamatalaʻi ange, ʻoku tatau ʻa e luo ko ʻení mo e maté, pea ko e tangata naʻá ne tokoniʻi e tokotaha ne toó ʻoku tatau ia mo Sīsū Kalaisi, ʻa ia naʻá Ne fakahaofi e kakai kotoa pē mei he maté ʻaki hono ʻomi kiate kitautolu e meʻafoaki ʻo e toetuʻú. Talaange ki he fānaú, naʻe toe tō ʻa e tokotaha tatau pē ko ʻení ki ha luo ʻe taha. ʻI he taimi ko ʻení, naʻe ʻoange ʻe he tokotaha fakahaofi moʻuí ha tuʻunga ki he tokotahá ni ke ne fakaʻaongaʻi ke kaka hake ai mei he luó. Fakamatalaʻi ange, ʻoku hangē ʻa e luó ko e angahalá pea ko e tuʻungá, ko e Fakalelei ia ʻa Sīsū Kalaisí, ʻa ia ʻokú ne fakaʻatā ke tau fakatomala pea fakamolemoleʻi ʻetau ngaahi angahalá. Lau e 2 Nīfai 9:22–23, pea vahevahe hoʻo fakamoʻoni kia Sīsū Kalaisi mo ʻEne Fakaleleí.
-
Hivaʻi fakataha ha hiva fekauʻaki mo e ʻofa ʻa Sīsū Kalaisí, hangē ko e “ ʻOku Ongo ʻa e ʻOfá” (Tohi Hiva ʻa e Fānaú, 42). Fakaafeʻi ʻa e fānaú ke nau tā ha fakatātā ʻo e ngaahi meʻa ʻokú ne tokoniʻi ke nau ʻiloʻi ʻoku ʻofa ʻa e Fakamoʻuí ʻiate kinautolú.
“ʻOku nēkeneka ʻa hoku lotó ʻi he māʻoniʻoní.”
Te ke fakalotolahiʻi fēfē ʻa e fānau ʻokú ke akoʻí ke nau “[fiefia] ʻi he māʻoniʻoní”, pe talangofua fiefia ki he ʻEikí? (2 Nīfai 9:49).
Ngaahi ʻEkitivitī ʻe Ala Fakahokó
-
Lau ki he fānaú ʻa e 2 Nīfai 9:49 pea tokoni ke nau ʻiloʻi pea mo mahino kiate kinautolu e meʻa ne lea ʻaki ʻe Sēkope ʻokú ne saiʻia mo fehiʻa aí. Vahevahe ha ngaahi fakatātā ʻa ia ʻoku fai ai ʻe ha fānau ha fili lelei pe ko ha fili ʻoku kovi, pea fakaafeʻi ʻa e fānaú ke nau tuʻu ki ʻolunga ʻi he taimi ʻoku ʻomi ai ʻe he fili ko iá ha fiefiá pea tangutu leva ʻi he taimi ʻoku ʻomi ai ʻe he fili ko iá ha loto-mamahí. Ko e hā e ʻuhinga ʻoku ʻomi ai ʻe he fili ki he totonú ʻa e fiefiá? Ko e fē nai ha taimi naʻá ke fiefia ai koeʻuhí naʻá ke fai ha fili totonu?
-
Hivaʻi fakataha ha foʻi hiva fekauʻaki mo e fiefia ʻoku maʻu ʻi he talangofuá, hangē ko e “ ʻI heʻetau Tokoní” (Tohi Hiva ʻa e Fānaú, 108b), pea kole ki he fānaú ke nau fakafanongo ki he meʻa ʻokú ne fakafiefiaʻi kitautolú. Tuku ki he fānaú ke nau taufetongi ʻi heʻenau ʻeti ko ha mātuʻa kinautolu ʻoku nau kole ki he toenga e fānaú ke nau fai ha ngāue. Tuku ki he toenga e fānaú ke nau fakaangaanga ʻa e talangofua fiefiá.
Akoʻi e Tokāteliné: Fānau Lalahi Angé
ʻE fakahoko maʻu pē ʻe he ʻEikí ʻa ʻEne ngaahi talaʻofá.
ʻE ala tokoni ʻa hono maʻu e mahino ʻoku tauhi ʻe he ʻEikí ʻa ʻEne ngaahi talaʻofá ke fakatupulaki ʻe he fānaú ʻenau tui kiate Iá pea mo ʻenau loto-falala ke talangofua ki Heʻene ngaahi fekaú.
Ngaahi ʻEkitivitī ʻe Ala Fakahokó
-
Kole ki he fānaú ke nau talanoa kau ki ha ngaahi palōmesi kuo nau fai, hangē ko ha palōmesi ne nau fai ki ha kaungāmeʻa pe ko e ngaahi fuakava ne nau fai ʻi he papitaisó. Ko e hā e ʻuhinga ʻoku faingataʻa ai he taimi ʻe niʻihi ke tauhi ʻetau ngaahi palōmesí? Ko e hā e ʻuhinga ʻoku mahuʻinga ai ke tau tauhi ʻetau ngaahi palōmesí? Lau e kupuʻi lea ko ʻení: “ʻE fakahoko ʻe he ʻEiki ko e ʻOtuá ʻa ʻene ngaahi fuakava kuó ne fai ki heʻene fānaú” (2 Nīfai 6:12). Vahevahe ha sīpinga ʻo e founga naʻe tauhi ai ʻe he ʻOtuá ʻa ʻEne ngaahi palōmesí, neongo kapau naʻe ʻikai hoko e ngaahi tāpuakí ʻi he taimi pē ko iá.
-
Fakaʻaliʻali ha fakatātā ʻo Sīsū ʻo ofi ki ha fakatātā ʻo ha kiʻi tamasiʻi pe kiʻi taʻahine. Lau e 2 Nīfai 7:1, pea fakamatalaʻi ange ko e taimi ʻoku taʻofi ai ʻe he kakai ʻo e ʻOtuá ʻa ʻenau talangofua ki Heʻene ongoongoleleí, ʻoku hangē kuo nau “vete” Iá. ʻUnuakiʻi ʻa e fakatātā ʻo e kiʻi leká ke mamaʻo mei he fakatātā ʻo Sīsuú ke fakahaaʻi ko e taimi ʻoku ʻikai ke tau tauhi ai ʻetau ngaahi fuakavá, hangē ko e fuakava ʻo e papitaisó, ʻoku tau fakamavahevaheʻi ai kitautolu mei he Tamai Hēvaní pea mo e Fakamoʻuí. (Ke toe vakaiʻi e ngaahi fuakava ʻo e papitaisó, vakai T&F 20:37.) ʻOku fakaʻatā fēfē nai ʻe he Fakalelei ʻa e Fakamoʻuí ke tau toe ofi ange kiate Iá? ʻI hoʻomou aleaʻi ʻení, fakaafeʻi ʻa e fānaú ke nau toe ʻunuakiʻi e ongo fakatātaá ke na vāofi.
ʻOku fakahaofi au ʻe Sīsū Kalaisi mei he angahalá mo e maté.
Te ke fakaʻaongaʻi fēfē ʻa e 2 Nīfai 9:10–23 ke tokoniʻi e fānaú ke nau ʻiloʻi ko Sīsū Kalaisi ʻa honau Fakamoʻuí?
Ngaahi ʻEkitivitī ʻe Ala Fakahokó
-
Kole ki he fānaú ke nau tokoni atu ke tā ha foʻi hala ʻi he palakipoé, pea fakafeʻi ke nau tānaki atu ha ngaahi meʻa te ne fakafeʻātungiaʻi e halá. Lau fakataha e 2 Nīfai 9:10, pea fakaafeʻi ʻa e fānaú ke nau fakahingoa e ngaahi meʻa ʻokú ne fakafeʻātungiaʻi ʻa e halá ʻaki e ngaahi lea mei he veesi ko ʻení ʻa ia ʻokú ne fakamatalaʻi e ngaahi meʻa te ne fakafeʻātungiaʻi kitautolu mei heʻetau toe foki hake ki he ʻOtuá. Talanoa leva kau ki he founga ne ikunaʻi ai e Sīsū Kalaisi e ngaahi fakafeʻātungia ko ʻení maʻatautolú (vakai, 2 Nīfai 9:21–23), pea ʻi hoʻo fai iá, fakaafeʻi e fānaú ke nau tamateʻi e ngaahi faka-feʻātungia ʻokú ne fakafeʻātungiaʻi ʻa e foʻi halá.
-
Fakaʻaliʻali ha fakatātā ʻo ʻĀtama mo ʻIvi, hangē ko e Mavahe mei he Ngoue ko ʻĪtení (ChurchofJesusChrist.org). Fakamatalaʻi ange ko e taimi naʻe kai ai ʻe ʻĀtama mo ʻIvi ʻa e fuaʻi ʻakau ne folofola ange ʻe he ʻOtuá ke ʻoua naʻá na kai ʻi he Ngoue ko ʻĪtení, naʻá na ʻomi e angahalá mo e maté ki he māmaní. Fakaʻaliʻali ha fakatātā ʻo Sīsū Kalaisi. Ke tokoni ke mahino ki he fānaú ʻa e founga ne ikunaʻi ai ʻe Sīsū ʻa e angahalá mo e maté, fai ʻa e talanoa ki he tokotaha ne tō ki he loto luó, ʻa ia ʻoku ʻi he fuofua fakakaukau akoʻi ʻi he “Fānau Iiki Angé” ʻi he fokotuʻutuʻu ko ʻení. Kole leva ki he fānaú ke nau tā ha fakatātā ʻo e talanoa ko ʻení pe fakafaivaʻi ia. Lau e 2 Nīfai 9:21–23, pea vahevahe hoʻo fakamoʻoni kia Sīsū Kalaisi mo ʻEne Fakaleleí.
-
Tokoniʻi e fānau takitaha ke nau kumi ha foʻi hiva kau ki he Fakalelei ʻa e Fakamoʻuí ʻi he tohi himí pe ko e Tohi Hiva ʻa e Fānaú (ʻe lava ke tokoni e fakahokohoko fakamotuʻalea ʻi he ongo tohi ko ʻení). Fakaafeʻi e fānaú ke nau fekumi pea vahevahe ha ngaahi kupuʻi lea mei he hivá ʻokú ne fakamatalaʻi e meʻa ne fai ʻe Sīsū maʻatautolú. Kole ki he fānaú ke nau vahevahe ʻenau fakakaukau mo e ongo kau ki he Fakalelei ʻa e Fakamoʻuí, pe vahevahe hoʻo fakamoʻoní.
ʻE faitāpuekina au ʻi heʻeku muimui ki he faleʻi ʻa e ʻOtuá.
Tokoniʻi e fānaú ke nau fakatupulaki ha fakavaʻe mālohi ʻo e falala ki he ʻOtuá, kae lava ke tupulaki ʻenau ʻiló mo e ngaahi meʻa ʻoku nau malavá, koeʻuhi ke hokohoko atu ʻenau falala kiate Ia mo muimui ki Heʻene ngaahi akonakí.
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau tala atu kau ki ha meʻa ʻoku nau ʻilo lahi ki ai, hangē ko ha tohi pe ngāue ʻoku nau saiʻia ai. Kole ki ha tokotaha ke ne lau e 2 Nīfai 9:20, pea fakamoʻoni ʻoku ʻafioʻi ʻe he ʻOtuá ʻa e “meʻa kotoa pē.” Ko e hā e ʻuhinga ʻoku mahuʻinga ai ke mahino kiate kitautolu ʻoku ʻafioʻi ʻe he ʻOtuá ʻa e meʻa kotoa pē?
-
Kole ki he fānaú ke nau fakakaukauloto ʻoku nau fanongo ki ha pehē ʻe hanau kaungāmeʻa ʻoku fakavalevale ʻa e ngaahi fekau pe akonaki ʻa e Siasí. Ko e hā e meʻa te nau lea ʻaki ki honau kaungāmeʻá? Ko e hā ʻoku mahuʻinga ai ke falala ki he faleʻi ʻa e ʻOtuá neongo kapau ʻoku ʻikai fuʻu mahino kakato ia kiate kitautolu? Poupouʻi e fānaú ke nau fekumi ki ha tokoni ʻi he 2 Nīfai 9:20, 28–29, mo e 42–43 ʻaki ʻenau fakalaulauloto mo aleaʻi e ngaahi fehuʻi ko ʻení.
Poupouʻi e Ako ʻi ʻApí
Tokoniʻi e fānaú ke nau fakakaukau ki ha founga te nau lava ai ʻo akoʻi ki honau fāmilí ʻa e ngaahi meʻa kuo nau ako kau kia Sīsū Kalaisi mo ʻEne Fakaleleí. Hangē ko ʻení, te nau ala fakaʻaongaʻi ʻa e peesi ʻekitivitī ki he uike ní ke fakamatalaʻi e founga ʻoku tokoniʻi ai kitautolu ʻe he Fakamoʻuí ke tau ikunaʻi ʻa e angahalá mo e maté.
Fakatupulaki ʻEtau Akoʻí
Fakaʻaongaʻi e ʻū peesi ʻekitivitií. Lolotonga e ngāue ʻa e fānaú ʻi he ʻū peesi ʻekitivitií, fakaʻaongaʻi e taimi ko iá ke tokoni ke nau ʻiloʻi e founga ʻoku fekauʻaki ai ʻa e ʻekitivitií mo e ngaahi tefitoʻi moʻoni mei he lēsoní pea mo e founga ʻoku fakaʻaongaʻi ai ʻa e ngaahi tefitoʻi moʻoní ʻi heʻenau moʻuí.