“3–9 Fēpueli. 2 Nīfai 1-5: ‘Naʻa Mau Nofo ʻi he Fiefia,’” Haʻu, ʻo Muimui ʻIate Au—Maʻá e Palaimelí: Tohi ʻa Molomona 2020 (2020)
“3–9 Fēpueli. 2 Nīfai 1–5,” Haʻu, ʻo Muimui ʻIate Au—Maʻá e Palaimelí: 2020
ʻĀtama mo ʻIvi, tā ʻe Douglas Fryer
Fepueli 3–9
2 Nīfai 1–5
“Naʻa Mau Nofo ʻi he Fiefia”
Naʻe akoʻi ʻe Līhai ʻa ʻene fānaú kotoa ʻo fakatatau ki heʻenau ngaahi fie maʻú mo e ngaahi tūkunga fakafoʻituituí. ʻI hoʻo teuteu ke akoʻi e fānau ʻi hoʻo kalasí, muimui ki heʻene sīpingá.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Hili hono fakamatalaʻi ange naʻe akoʻi ʻe Līhai hono fāmilí kau ki he tauʻatāina ke takitaha fai ʻenau ngaahi filí, fakaafeʻi ʻa e fānaú ke vahevahe ha ngaahi aʻusia kuo nau maʻu ʻi heʻenau fili ʻa e totonú. Ne nau ongoʻi fēfē hili ʻenau fai e fili ko iá? Te nau lava fēfē ʻo manatuʻi ke fili e totonú ʻi he kahaʻú?
Akoʻi e Tokāteliné: Fānau Iiki Angé
ʻOku tāpuekina au ʻi he taimi ʻoku ou talangofua aí.
ʻOku faʻa fakahaaʻi mai ʻe he tefitoʻi moʻoni ʻoku akoʻi ʻi he veesi ko ʻení—ʻoku ʻomi ʻe he talangofuá ʻa e ngaahi tāpuaki—ʻi he kotoa ʻo e Tohi ʻa Molomoná. Fakakaukau ki he founga te ke lava ai ʻo tokoniʻi e fānaú ke nau fakatokangaʻi ia ʻi heʻenau moʻuí.
Ngaahi ʻEkitivitī ʻe Ala Fakahokó
-
Kole ki he fānaú ke nau tokoni atu ki hono fakaʻuhingaʻi e foʻi lea ko e ngaahi fekaú pea faʻu ha lisi ʻo e ngaahi fekaú. Lau e 2 Nīfai 1:20, pea fakamamafaʻi ange, te tau “tuʻumālie,” pe tāpuekina kitautolu ʻi he taimi ʻoku tau tauhi ai ʻa e ngaahi fekaú. Ko e hā e ongo ʻoku tau maʻu ʻi he taimi ʻoku tau tauhi ai e ngaahi fekau ko ʻení?
-
Fakaʻaliʻali ki he fānaú ʻa e ngaahi meʻa ʻokú ne ʻomi e malú, hangē ko e sū, tatā, mo e ngaahi kofu nima. Tuku ke nau tui ʻeni. ʻOku maluʻi fēfē nai kitautolu ʻe he ngaahi meʻa ko ʻení? Talaange kiate kinautolu, ʻoku lava ke maluʻi kitautolu ʻe he ngaahi fekau ʻa e Tamai Hēvaní mei he ngaahi fakatamaki fakalaumālié. Vahevahe ha aʻusia ki ha taimi naʻe maluʻi ai koe ʻe hoʻo muimui ki he ngaahi fekaú.
Naʻe ʻomi ʻe he ʻOtuá kiate au ʻa e tauʻatāina ke filí.
Koeʻuhi ko ʻena ngaahi filí, naʻe pau ai ke mavahe ʻa ʻĀtama mo ʻIvi mei he Ngoue ko ʻĪtení. Te ke akoʻi fēfē ki he fānaú, ʻoku fakaʻatā kitautolu ʻe he fili ʻa ʻĀtama mo ʻIví ke tau fakaʻaongaʻi ʻetau tauʻatāina ke filí, ke tau fili e Tamai Hēvaní he ʻahó ni?
Ngaahi ʻEkitivitī ʻe Ala Fakahokó
-
Tā ha fakatātā ʻo ha tokotaha tauʻatāina mo ha fakatātā ʻo ha taha ʻoku puke pōpula (pe ko ha tokotaha ʻi he fale fakapōpulá), pea fakaafeʻi ʻa e fānaú ke nau tuhu ki he fakatātā tonú lolotonga hoʻo lea ʻaki e ongo foʻi lea tauʻatāina mo e pōpula ʻi he 2 Nīfai 2:27. Fakamamafaʻi ʻa e kupuʻi lea “tauʻatāina ke fili”, pea fakaafeʻi takitaha e fānaú ke toutou lea ʻaki ia.
-
Toe vakaiʻi mo e fānaú ʻa e talanoa ʻo ʻĀtama mo ʻIví (vakai, 2 Nīfai 2:17–19; vakai foki, “Vahe 3: ʻĀtama mo ʻIvi,” Ngaahi Talanoa ʻo e Fuakava Motuʻá, 15–18 mo e fili ne na fai ʻi he Ngoue ko ʻĪtení. Tokoniʻi e fānaú ke nau lisi ha ngaahi fili ʻoku nau fai he ʻaho kotoa. Fakamoʻoni ange, naʻe ʻomi ʻe he Tamai Hēvaní kiate kitautolu ʻa e tauʻatāina ke fili mei he leleí mo e koví, pea fakaafeʻi e fānaú ke nau punopuna pe pasipasi ke fakafiefiaʻi ʻa ʻenau tauʻatāina ke filí.
-
Fai ha kiʻi vaʻinga ʻa ia te ke lea ʻaki ai ha foʻi lea (hangē ko e maama) pea lea ʻaki leva ʻe he fānaú ʻa hono fehangahangaí (poʻuli). Toutou fai e ʻekitivitī ko ʻení. Ke tokoniʻi ʻa e fānaú ke mahino e founga ʻoku tokoniʻi ai kitautolu ngaahi fehangahangaí ke fai ha ngaahi filí, lau ʻa e ʻuluaki vahe ua ʻe taha ʻo e 2 Nīfai 2:11 mo e 2 Nīfai 2:16. Fai ha ngaahi talanoa ki he fānaú ʻo kau ki ha kiʻi tamasiʻi ʻoku ʻahiʻahiʻi ke ne fai ha fili hala. Tokoniʻi e fānaú ke nau fakakaukau ki he fehangahangai ʻo e fili ko iá, pea fakaafeʻi kinautolu ke nau fakatātaaʻi ia. Fakamoʻoniʻi ange ʻoku tāpuekina kitautolu ʻe he Tamai Hēvaní ʻi he taimi ʻoku tau fili ai ʻa e totonú.
-
Hivaʻi fakataha ha foʻi hiva kau ki hono fai ha ngaahi fili, hangē ko e “ ʻOku ou Feinga ke Hangē ko Sīsuú” pe “Fili e Hala Totonú” (Tohi Hiva ʻa e Fānaú, 40, 82), pea fehuʻi ki he fānaú ko e hā ʻoku nau ako mei he hivá kau ki hono fai ha filí.
Akoʻi e Tokāteliné: Fānau Lalahi Angé
ʻOku tāpuekina au ʻi he taimi ʻoku ou talangofua aí.
ʻI he taimi ʻoku maʻu ai ʻe he fānaú ʻa e tui ʻe tāpuekina kinautolu ʻe he ʻOtuá ʻi heʻenau tauhi e ngaahi fekaú—neongo kapau ʻoku ʻikai hoko mai ʻa e ngaahi tāpuakí he taimi pē ko iá—ʻoku faingofua ange kiate kinautolu ke nau fai ʻa e ngaahi fili ʻoku māʻoniʻoní.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau toe vakaiʻi ha ngaahi fili ʻe niʻihi naʻe fai ʻe Nīfai mo hono ngaahi tokouá. Ki ha ngaahi sīpinga, vakai, 1 Nīfai 2:11–16; 3:5–7; mo e 18:9–11. Fakaafeʻi kinautolu ke nau lau fakataha e 2 Nīfai 1:20 pea vahevahe ʻenau fakakaukau ki he ʻuhinga ne ʻoange ai ʻe Līhai ʻa e pōpoaki ko ʻení ki heʻene fānaú.
-
Hiki ha ngaahi kupuʻi lea mei he 2 Nīfai 1:20 ʻi ha ngaahi laʻi pepa, pea aleaʻi hono ʻuhinga e ngaahi kupuʻi leá. Fakaafeʻi ʻa e fānaú ke nau fokotuʻutuʻu ʻa e ngaahi laʻi pepá ‘i hono hokohoko totonú ʻo ngāue ʻaki ʻa e vēsí. Ke fakatātaaʻi e faikehekehe ʻi he tuʻumālié mo e motuhí, fakaʻaliʻali ki he fānaú ha kiʻi fuʻu ʻakau moʻui lelei pea mo ha laʻi ʻakau pe ko ha vaʻa kuo motuhi mei he fuʻu ʻakaú. Ko e hā ʻa e faikehekehe ʻi he laʻi ʻakau ʻoku ʻi he fuʻu ʻakaú pea mo e laʻi ʻakau kuo motuhí? ʻOku tau faitatau fēfē nai mo e laʻi ʻakau ʻi he fuʻu ʻakaú ʻi he taimi ʻoku tau talangofua ai ki he ngaahi fekau ʻa e ʻOtuá? Fakaafeʻi ʻa e fānaú ke nau lekooti ʻi ha tohinoa ʻa e ngaahi founga ʻoku faitāpuekina ai kinautolu ʻe he ʻOtuá ʻi he taimi ʻoku nau fili ai ki he totonú.
Naʻe ʻomi ʻe he ʻOtuá kiate au ʻa e tauʻatāina ke filí.
Naʻe fakahaofi kitautolu ʻe Sīsū Kalaisi mei he mate fakaesinó mo e mate fakalaumālié (mavahe mei he ʻOtuá koeʻuhi ko e angahalá) ʻo fakafou ʻi Heʻene Fakamoʻuí mo e Toetuʻú. Kuo pau ke tau fakaʻaongaʻi ʻetau tauʻatāina ke filí ke tau hokohoko atu ʻi he fakatomala mo feinga ke moʻui angatonu kae lava ke tau toe nofo fakataha mo e Tamai Hēvaní.
Ngaahi ʻEkitivitī ʻe Ala Fakahokó
-
Puke hake ha fakatātā ʻo ʻIvi mo ʻĀtama (vakai, Tohi Fakatātā ʻo e Ongoongoleleí, fika 4), pea fakaafeʻi ʻa e fānaú ke vahevahe ʻa e meʻa ʻoku nau ʻilo kau ki he meʻa ne hoko kia ʻĀtama mo ʻIvi ʻi he Ngoue ko ʻĪtení. Tokoniʻi e fānaú ke nau fekumi ki he ngaahi talí ʻi he 2 Nīfai 2:22–27. Fakamatalaʻi ange, koeʻuhi ko e fili ʻa ʻĀtama mo ʻIví, ʻoku faitāpuekina ai kitautolu ke tau haʻu ki he māmaní ʻo fakaʻaongaʻi ʻetau tauʻatāina ke filí ke fai ha ngaahi fili ʻoku leleí pea fakatomala ʻi he taimi ʻoku tau fai ai ha ngaahi fili hala, ʻo fakafou ʻi he Fakalelei ʻa Kalaisí.
-
Hiki e ngaahi lea ʻo e 2 Nīfai 2:27 ʻi he palakipoé. Tokoniʻi e fānaú ke nau ako maʻuloto e vēsí ʻaki hono toutou lau ia pea nau taufetongi ʻi hono tamateʻi ʻa e ngaahi foʻi leá ʻi he taimi kotoa pē ʻoku nau toe lea ʻaki iá. Tokoniʻi e fānaú ke nau fakakaukauloto pe ʻe fēfē ha moʻui ʻoku ʻikai lava ke fai ai ha fili. Ko e hā e ʻuhinga ʻoku nau houngaʻia ai ʻi he tauʻatāina ke filí?
-
Fakaafeʻi ʻa e fānaú ke vahevahe ha aʻusia ʻi he taimi ne nau fai ai ha fili lelei. Ne nau ongoʻi fēfē hili ʻenau fai e fili ko iá? Ko e hā te tau lava ʻo fai ke tokoniʻi kitautolu ke tau fili e totonú ʻi he taimi ʻoku ʻahiʻahiʻi ai kitautolu ke tau fai ha meʻa halá? Fakakaukau ke hivaʻi ha hiva kau ki hono fai ha ngaahi fili, hangē ko e “Fili ʻa e Moʻoní” (Ngaahi Himí, fika 146), pea fakaafeʻi ʻa e fānaú ke vahevahe ha meʻa ne nau ako mei he hivá.
Ko ha “tangata kikite mahuʻinga” ʻa Siosefa Sāmita.
ʻI he 2 Nīfai 3 naʻe lave ʻa Līhai ki ha kikite kau ki he Palōfita ko Siosefa Sāmitá. Te ke lava ʻo fakaʻaongaʻi ʻeni ko ha faingamālie ke akoʻi e fānaú kau ki heʻene ngāue fakafaifekau ʻi he ngaahi ʻaho kimui ní.
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke fekumi ki ha ngaahi fakamatala tokoni ʻi he 2 Nīfai 3:6–24 fekauʻaki mo e palōfita ʻoku lau ki aí. Hiki e ngaahi fakamatala tokoni ko ʻení ʻi he palakipoé. Ko e hā e ʻuhinga ʻoku ui ai ʻa Siosefa Sāmita ko ha “tangata kikite mahuʻingá”? Ko e hā ha meʻa ne fai ʻe Siosefa Sāmita ʻoku “fuʻu mahuʻinga lahi [ki hono ngaahi tokouá]”? (veesi 7.)
-
Hivaʻi ha himi fekauʻaki mo Siosefa Sāmita, hangē ko e “ ʻOku Mau Fakamālō” (Ngaahi Himi, fika 16), pe mamataʻi ha vitiō ʻokú ne fakatātaaʻi e ngaahi tapa kehekehe ʻo ʻene ngāue fakafaifekaú ʻo hangē ko ia ʻoku maʻu ʻi he history.ChurchofJesusChrist.org/article/joseph-smith-video-downloads. Fehuʻi ki he fānaú pe ko e hā e ʻuhinga ʻoku nau houngaʻia ai ʻi he Palōfita ko Siosefa Sāmitá.
Poupouʻi e Akó ʻi ʻApi
Poupouʻi e fānaú ke nau fakatokangaʻi e ngaahi faingamālie ʻoku nau maʻu ke nau fai ai ha ngaahi fili ʻi he uiké ni. Fakaafeʻi kinautolu ke nau mateuteu ke vahevahe ʻi he uike kahaʻú, ʻa e ngaahi fili ne nau fai pea mo e ngaahi ola ʻo ʻenau ngaahi filí.
Fakatupulaki ʻEtau Akoʻí
ʻOku lava ke ʻiloʻi ʻe he fānaú e tākiekina ʻo e Laumālié. Akoʻi ki he fānaú ʻoku haʻu mei he Laumālie Māʻoniʻoní ʻa e ongo ʻo e nongá, ʻofá, mo e fiefia ʻoku nau maʻu ʻi he taimi ʻoku nau talanoa pe hiva ai kau kia Sīsū Kalaisi mo ʻEne ongoongoleleí. ʻE lava ʻe he ngaahi ongo ko ʻení ke ne langaki ʻenau ngaahi fakamoʻoní.