17–23 Fēpueli

2 Nīfai 11–25

“ʻOku Mau Fiefia ʻia Kalaisi”

ʻOku kamata hoʻo teuteu ke akoʻí ʻaki hoʻo lau e 2 Nīfai 11–25. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea lava ke ʻoatu ʻe he lēsoni ko ʻení ha ngaahi fakakaukau ki hono akoʻí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Toe vakaiʻi mo e fānaú ʻa e ngaahi meʻa ne nau ako ʻi he uike kuo ʻosí kau ki he Fakamoʻuí mo ʻEne Fakaleleí. Kapau ne nau vahevahe ki honau ngaahi fāmilí e ngaahi meʻa ne nau akó, poupouʻi ke nau vahevahe e aʻusia ko iá.

Akoʻi e Tokāteliné: Fānau Iiki Angé

2 Nīfai 12:2–3

Ko e temipalé ko e fale ia ʻo e ʻEikí.

ʻE lava hoko e kikite ʻa ʻĪsaia fekauʻaki mo e “moʻunga ʻo e fale ʻo e ʻEikí” ko ha faingamālie ke akoʻi e fānaú kau ki he temipalé pea tokoniʻi kinautolu ke nau hanganaki atu ke nau hū ai ha ʻaho.

Ngaahi ʻEkitivitī ʻe Ala Fakahokó

• Tuku ke pukepuke ʻe ha taha ʻo e fānaú ha fakatātā ʻo ha temipale (ʻoku ʻi hefokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ), pea kole ki he fānaú ke nau vahevahe e meʻa ʻoku nau ʻilo fekauʻaki mo e temipalé. Lau e 2 Nīfai 12:3, pea fakamatalaʻi ange, naʻe kikite ha palōfita ʻi he veesi ko ʻení, ʻe ʻi ai ha ngaahi temipale ʻi he ngaahi ʻaho fakaʻosí. Toe lau e vēsí, pea fakamamafaʻi ange ʻi he taimi ʻoku tau ʻalu ai ki he temipalé, “ʻe akonakiʻi kitautolu [ʻe he ʻEikí] ʻi hono ngaahi halá” mo tokoniʻi kitautolu ke tau “ʻaʻeva ʻi hono ngaahi halá.”

• ʻAi ha foʻi hala ʻi he falikí, pea ʻi he ngataʻanga ʻo e foʻi halá, tuku ai ha fakatātā ʻo e temipalé pea ʻufiʻufiʻi leva. Tuku ke lue ʻa e fānaú ʻi he foʻi halá, pea lolotonga ʻenau lué, tokoniʻi kinautolu ke nau toutou lea ʻaki e kupuʻi lea “ʻaʻeva ʻi hono ngaahi halá.” ʻI he aʻu e fānaú ki he ngataʻanga ʻo e foʻi halá, tuku ke nau toʻo ʻa e ʻufiʻufi ʻo e fakatātaá. ʻOku ʻuhinga ki he hā ke ʻaʻeva ʻi he ngaahi hala ʻa e ʻOtuá?

• Hivaʻi mo e fānaú ha foʻi hiva fekauʻaki mo e temipalé, hangē ko e Fie Siofia ha Temipale” (Tohi Hiva ʻa e Fānaú, 99). Tokoniʻi kinautolu ke nau kumi ha ngaahi foʻi lea mo e ngaahi kupuʻi lea ʻi he foʻi hivá ʻokú ne akoʻi mai ko e hā ʻa e temipale mo e meʻa ʻoku tau fai ʻi lotó.

2 Nīfai 19:6; 25:26

“ʻOku mau fiefia ʻia Kalaisi.”

Naʻe ʻi ai ha ngaahi fakamoʻoni ʻa Nīfai mo ʻĪsaia kau ki he Fakamoʻuí, pea naʻe fakafiefiaʻi kinautolu ʻe heʻenau ngaahi fakamoʻoní. Tokoniʻi e fānaú ke nau ʻiloʻi ʻokú ke “fiefia ʻia Kalaisi.”

Ngaahi ʻEkitivitī ʻe Ala Fakahokó

• Fakaafeʻi ha tokotaha ke ne pukepuke ha fakatātā ʻo e ʻaloʻi ʻo Sīsū Kalaisí (hangē ko e Tohi Fakatātā ʻo e Ongoongoleleí, fika 30), pea tokoniʻi e fānaú ke nau kumi e pēpē ko Sīsuú ʻi he fakatātaá. Lau e 2 Nīfai 19:6 pe fakaʻaliʻali e vitiō “A Savior Is Born—Christmas Video” (ChurchofJesusChrist.org), pea kole ki he fānaú ke nau tuhu kia Sīsū ʻi he taimi te nau fanongo ai ki he ongo foʻi lea ko e tama mo e foha. Fakamatalaʻi ange, naʻe ʻiloʻi ʻe he palōfita ko ʻĪsaiá, ʻa ia naʻá ne hiki e ngaahi lea ʻi he 2 Nīfai 19:6, kau ki he aloʻi ʻo Sīsuú ʻi ha ngaahi taʻu ʻe laungeau kimuʻa pea hokó.

• Fai ha talanoa fekauʻaki mo hono ʻomi ʻe Sīsū Kalaisi ʻa e fiefiá ki he niʻihi kehé. Fakamahinoʻi ange ʻa e ngaahi taimi fakafiefia ʻi he talanoá. Lau e 2 Nīfai 25:26 pea talanoa fekauʻaki mo e ʻuhinga ʻokú ke “fiefia [ai] ʻia Kalaisí.” Kole ki he fānaú ke nau talanoa atu kau ki he founga ʻoku ʻomi ai ʻe Sīsū ʻa e fiefiá kiate kinautolú.

2 Nīfai 21:6–9; 22

ʻE hoko ʻa e Nofo Tuʻí ko ha taimi ʻo e melino mo e fiefia.

Hili ʻa e Hāʻele ʻAngaua Mai ʻa Sīsū Kalaisí, te Ne nofo fakataha mo Hono kakaí lolotonga ha vahaʻa taimi ʻo e melino ʻa ia ʻoku ui ko e Nofo Tuʻí.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ʻa e ngaahi fakatātā ʻo e fanga monumanu ʻoku lave ki ai ʻi he 2 Nīfai 21:6–7, pea kole ki he fānaú ke nau fakahingoa e fanga monumanú. Fakamatalaʻi ange ʻoku faʻa hoko e fanga monumanu ko ʻení ko ha ngaahi fili, ka naʻe akoʻi mai ʻe ʻĪsaia, ko e hili e toe hāʻele mai ʻa Sīsū Kalaisí, ʻe ʻi ai ʻa e taimi ʻo e melino ʻoku ui ko e Nofo Tuʻí, ʻa ia he ʻikai fefakamamahiʻaki ʻa e fanga monumanú. Te tau muimui fēfē ki he sīpinga ʻo e fanga monumanu ko ʻení ʻi he founga ʻoku tau feangai ai mo e niʻihi kehé? Fakaafeʻi e fānaú ke nau tā ha ngaahi fakatātā ʻo e fanga monumanu ko ʻení ʻoku nau nofo melino fakataha.

• Lau e 2 Nīfai 22:5, pea kole ki he fānaú ke nau tokoni atu ke kumi ha foʻi hiva ʻokú ne fakamatalaʻi e “ngaahi lelei lahi” kuo fai ʻe he ʻEikí. ʻE ala kau he ngaahi sīpingá ʻa e “ ‘Oku ‘Ofa ‘Eku Tamai Hēvaní ‘Iate Au” (Tohi Hiva ʻa e Fānaú, 16) pe “ ‘E ‘Otua ko e Tapuh`a” (Ngaahi Himí, fika 38). Hivaʻi fakataha ʻa e foʻi hivá. Fakamatalaʻi ange, ʻi he taimi Nofo Tuʻí, ʻe ʻiloʻi ʻe he tokotaha kotoa ʻa e “ngaahi meʻa lelei lahi” kuo fai ʻe he ʻEikí.

Akoʻi e Tokāteliné: Fānau Lalahi Angé

2 Nīfai 12:2–3

Ko e temipalé ko e fale ia ʻo e ʻEikí.

Te ke fakaʻaongaʻi fēfē ʻa e ngaahi veesi ko ʻení ke tokoniʻi e fanaú ke nau hanganaki atu ki he ʻaho te nau lava ʻo hū ai ʻi he temipalé?

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo ha temipale (ʻoku ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ). Kole ki ha tokotaha ke ne lau ʻa e 2 Nīfai 12:2–3, pea fakaafeʻi e fānau kehé ke nau fanongo ki ha ngaahi ʻuhinga naʻe pehē ʻe ʻĪsaia ʻoku tau fie maʻu ai ʻa e temipalé. Te ke lava ʻo fakamatalaʻi naʻe ui ʻe ʻĪsaia ʻa e temipalé “ko e moʻunga ʻo e fale ʻo e ʻEikí.” Ko e hā e ʻuhinga ʻoku hoko ai e moʻungá ko ha fakaʻilonga lelei ki he temipalé?

• Fakaafeʻi ʻa e fānaú ke nau tā ha fakatātā ʻo kinautolu ʻoku nau ō ki he temipalé. Kapau ʻe lava, kole ki ha taha ʻo e kau talavoú pe kau fiemui ʻi he uōtí ke ne talanoa ki he fānaú ʻa ʻenau ongo ʻi hono fakahoko ʻa e papitaiso maʻá e pekiá ʻi he temipalé. ʻE lava ke akoʻi ʻe he tokotaha talavou ko ʻení pe tokotaha ʻi he uōtí ʻa e fānaú ki he founga ke kumi ai e ngaahi hingoa ʻo ʻenau ngaahi kui ʻoku nau fie maʻu e ngaahi ouau ʻo e temipalé.

2 Nīfai 15:20

ʻOku feinga ʻa Sētane ke ne fakapuputuʻuʻi au fekauʻaki mo e leleí pea mo e koví.

ʻOku tau moʻui ʻi ha māmani kuo ui ʻe he kakaí ʻa e koví ko e lelei pea ko e leleí ko e koví, ʻo hangē ko hono kikiteʻi ʻe ʻĪsaiá. Te ke lava fēfē ʻo tokoniʻi ʻa e fānaú ke nau ʻiloʻi ha faʻahinga kākā pehē?

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha meʻa ʻoku kona pe mahi, hangē ko ha pikale pe lēmani, ʻi loto ʻi ha kofukofu ʻo ha foʻi lole. Lau fakataha e 2 Nīfai 15:20, pea fakamatalaʻi ange ʻoku feinga ʻa Sētane ke ngaohi e ngaahi meʻa ʻoku koví ke hā lelei. Tokoniʻi e fānaú ke nau fakakaukau ki ha ngaahi founga ʻa ia ʻoku fai ai ʻe Sētane ʻeni. Te tau lava fēfē ʻo ʻiloʻi ʻa ʻene ngaahi kākaá?

• Huluʻi e fuofua miniti ʻe taha mo e konga ʻo e foʻi vitiō “You Will Be Freed” (ChurchofJesusChrist.org). Ko e hā e ʻuhinga ʻoku fakapuli ai ʻe he tangata toutaí ʻa ʻene mātaʻú? Ko e hā e ʻuhinga ʻoku fakapuli ai ʻe Sētane ʻa e angahalá?

2 Nīfai 17:14; 19:6; 25:23–26

“ʻOku mau fiefia ʻia Kalaisi.”

ʻOku fie maʻu ke ʻiloʻi ʻe he fānaú ʻoku fakafiefia ʻa e ongoongolelei ʻo Sīsū Kalaisí. Te ke tokoniʻi fēfē nai kinautolu ke nau “fiefia ʻia Kalaisi”?

Ngaahi ʻEkitivitī ʻe Ala Fakahokó

• Tokoniʻi e fānaú ke nau fekumi ki he ngaahi huafa ʻo Sīsū Kalaisí ʻi he 2 Nīfai 17:14 mo e 19:6. Mahalo te ke fie maʻu ke fakamatalaʻi ange, ko e “ʻĪmanuelá” ko e taha ia ʻo e ngaahi huafa ko ʻení, ʻa ia ʻoku ʻuhinga ia ki he “ʻOku ʻiate kitautolu ʻa e ʻOtuá.” Ko e hā e ngaahi meʻa ʻoku akoʻi mai kiate kitautolu ʻe he ngaahi huafa takitaha ko ʻení ʻo kau kiate Iá?

• Tuku ha fakatātā ʻo e Fakamoʻuí ʻi he palakipoé, pea lau fakataha e 2 Nīfai 25:26. Ko e hā e ʻuhinga ʻoku tuʻo lahi ai e lea mo e tohi ʻa Nīfai fekauʻaki mo Sīsū Kalaisí? Tuku ki he fānaú takitaha ke nau hiki ʻo ofi ki he fakatātā ʻo Sīsuú, ha meʻa ʻe taha fekauʻaki mo e Fakamoʻuí ʻokú ne ʻomi kiate kinautolu ʻa e fiefiá.

• Kole ki he fānaú ke nau fakakaukau ki ha taha te nau fie “fakalotoʻi … ke tui kia Kalaisi” (2 Nīfai 25:23). Te tau fakahaaʻi fēfē ki he niʻihi kehé ʻa e fiefia ʻoku ʻomi ʻe he Fakamoʻuí ki heʻetau moʻuí? Tuku ki he fānaú ke nau hiki pe fakatātaaʻi ha ngaahi meʻa te nau ala fai ke tokoniʻi ai e tokotaha ʻoku nau fakakaukau ki aí, ke tui kia Kalaisi.

Poupouʻi e Akó ʻi ʻApi

Fakaafeʻi ʻa e fānaú ke nau fakakaukau ki ha meʻa ʻe taha te nau lava ʻo fai ke fakahaaʻi ki honau ngaahi fāmilí, ʻoku nau “fiefia ʻia Kalaisi.”

Fakatupulaki ʻo ʻEtau Founga Akoʻí

Tuku ki he fānaú ke nau mohu founga. “ʻI hoʻo akoʻi ʻa e fānaú, tuku ke nau faʻu, tā fakatātaaʻi, valivali, tohi pe faʻu. ʻOku mahulu hake e ngaahi meʻá ni ia ko ha fanga kiʻi ʻekitivitī fakafiefia peé—ʻoku mahuʻinga ia ki he akó” (Ko e Faiako ʻi he Founga ʻa e Fakamoʻuí, 25).