Te Ne Tataki Nima Koe, tā ʻe Sandra Rast

24 Fepueli–Māʻasi 1

2 Nīfai 26–30

“Ko ha Ngāue Lahi mo Fakaofo”

Kimuʻa peá ke kamata palaniʻi e ngaahi ʻekitivitī fakaako maʻá e fānau ʻi hoʻo kalasí, ako ʻa e 2 Nīfai 26–30. ʻE hanga ʻe he meʻá ni ʻo fakaafeʻi e Laumālié ke tataki hoʻo palaní.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Puke hake ha tatau ʻo e Tohi ʻa Molomoná, pea fakamatalaʻi ange naʻe tomuʻa mamata ʻa Nīfai ʻe mahuʻinga ʻa e Tohi ʻa Molomoná ʻi hotau kuongá. Kole ki he fānaú ke nau vahevahe ha meʻa kuo nau ako kau ki he Tohi ʻa Molomoná ʻi he taʻú ni.

Akoʻi e Tokāteliné: Fānau Iiki Angé

2 Nīfai 26:33

ʻOku finangalo ʻa Sīsū Kalaisi ke haʻu ʻa e tokotaha kotoa kiate Ia.

Naʻe fakamoʻoniʻi ʻe Nīfai ʻoku ʻofa ʻa e Fakamoʻuí ki he taha kotoa, neongo pe ko hai kinautolu, pea ʻokú Ne fakaafeʻi kinautolu kotoa ke nau “maʻu ʻi heʻene angaleleí.”

Ngaahi ʻEkitivitī ʻe Ala Fakahokó

• Fakaʻaliʻali ha ngaahi fakatātā ʻo e kakai mei he ngaahi matakali mo e ʻulungaanga fakafonua kehekehe (te ke ala ʻiloʻi ha niʻihi mei he ngaahi makasini ʻo e Siasí). Kole ki he fānaú ke nau fakamatalaʻi ha niʻihi e ngaahi fakaikiiki ʻoku nau maʻu ʻi he ngaahi fakatātaá. Fakaava e folofolá ki he 2 Nīfai 26:33 pea lau e, “ʻoku fakaafeʻi [ʻe Sīsū Kalaisi] ʻa kinautolu kotoa pē ke nau haʻu kiate ia.” Toe lau mo e fānaú e kupuʻi lea ko ʻení ʻi hoʻo tuhu ki he fakatātā takitaha. Tuhu leva ki he fānaú takitaha mo pehē, “ʻOku fakaafeʻi koe ʻe Sīsū Kalaisi ke ke haʻu kiate Ia.” Ko e hā te tau lava ʻo fai ke tau haʻu ai ki he Fakamoʻuí?

• Hivaʻi mo e fānaú ha foʻi hiva kau ki he ʻofa ki he kakai kotoa pē, hangē ko e “Te u ʻAʻeva Pea mo Koe” pe “We Are Different” (Tohi Hiva ʻa e Fānaú, 78, 263). Fakamahinoʻi ange ha ngaahi foʻi lea pe ngaahi kupuʻi lea ʻi he hivá ʻa ia ʻokú ke ongoʻi ʻokú ne fakamamafaʻi mai ʻa e pōpoaki ʻo e 2 Nīfai 26:33.

2 Nīfai 28:2; 30:6

Ko ha tāpuaki ʻa e Tohi ʻa Molomoná.

Fakakaukau ki he founga te ke tokoniʻi ai e fānau ʻi hoʻo kalasí ke nau ongoʻi ʻoku hoko ʻa e Tohi ʻa Molomoná “ko ha tāpuaki kiate kinautolu mei he toʻukupu ʻo e ʻOtuá” (2 Nīfai 30:6).

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha Tohi ʻa Molomona kuo ʻosi kofu hangē ha meʻaʻofá, pea talaange kiate kinautolu ʻoku ʻi ai ha meʻa mahuʻinga ʻi loto. Tuku ke nau puke ʻa e meʻaʻofá, pea ʻoange ha fanga kiʻi fakamatala ke tokoni ke nau mateʻi pe ko e hā ia; hangē ko ʻení, ko ha meʻa kuo foaki mai ʻe he ʻEikí maʻatautolu, ʻokú ne tokoniʻi kitautolu ke tau tui kia Sīsū Kalaisi, mo e alā meʻa pehē. Lau mei he 2 Nīfai 30:6: “Ko ha tāpuaki ia kiate kinautolu mei he toʻukupu ʻo e ʻOtuá.” Tuku ki he fānaú ke nau fakaava ʻa e meʻaʻofá, pea fakamatalaʻi ange leva kuo pau ke tau fakaava ʻa e Tohi ʻa Molomoná pea lau ia ke maʻu ʻa e ngaahi tāpuaki ʻoku ʻi aí.

• Lau e 2 Nīfai 28:2 ki he fānaú. Fakamatalaʻi ange naʻe mamata ʻa Nīfai ʻe “ʻaonga lahi” ʻa e Tohi ʻa Molomoná kiate kitautolu, ʻa ia ʻoku ʻuhinga ia te ne tokoniʻi mo tāpuekina kitautolu. Talaange ki he fānaú ʻa e ʻuhinga ʻoku ʻaonga lahi ai ʻa e Tohi ʻa Molomoná kiate koé. Vahevahe hoʻo veesi manakó pe talanoa mei he Tohi ʻa Molomoná, pea fakaafeʻi e fānaú ke nau vahevahe foki. Fakaʻaliʻali ha ngaahi fakatātā mei he Tohi Fakatātā ʻo e Ongoongoleleí ke nau maʻu ai ha ngaahi fakakaukau.

2 Nīfai 28:30

ʻOku akoʻi māmālie au ʻe he Tamai Hēvaní.

Mahalo te ke lava ʻo fakakaukau ki ha lēsoni pe ʻekitivitī te ne tokoniʻi e fānaú ke nau ʻiloʻi hono ʻuhinga ke ako ʻa e “ʻotu lea ki he ʻotu lea.” ʻE ala fakatupu ʻe he ngaahi fokotuʻu ko ʻení ha ngaahi fakakaukau ʻe niʻihi.

Ngaahi ʻEkitivitī ʻe Ala Fakahokó

• Tokoniʻi e fānaú ke nau fakatahatahaʻi ha pāsolo faingofua pe faʻu ha meʻa ʻaki ha ngaahi kongokonga. ʻOange kiate kinautolu ha konga pāsolo ʻe taha pe kongokonga ʻe taha, pea lolotonga ʻenau faʻú, fakamatalaʻi ange ko e founga ʻeni ʻoku akoʻi ʻaki kitautolu ʻe he Tamai Hēvaní—ko e moʻoni ʻe taha ʻi he taimi. Ko e hā ʻe hoko kapau te tau feinga ke fakatahatahaʻi kotoa ʻa e ngaahi kongá ʻi he taimi tatau pē?

• Akoʻi tahataha ki he fānaú ha pōtoʻi ngāue, hangē ko hono haʻi ha foʻi līpine pe tā ha fakatātā. Lau mei he 2 Nīfai 28:30: “Te u foaki ki he fānau ʻa e tangatá ʻa e ʻotu lea ki he ʻotu lea, … ko e siʻi ʻi heni pea siʻi ʻi hena.” Ko e hā e ʻuhinga ʻoku akoʻi māmālie ai kitautolu ʻe he ʻOtuá?

Akoʻi e Tokāteliné: Fānau Lalahi Angé

2 Nīfai 26:23–28, 33

ʻOku finangalo ʻa Sīsū Kalaisi ke haʻu ʻa e tokotaha kotoa kiate Ia.

Tokoniʻi e fānaú ke nau ongoʻi ʻoku fakapatonu mai ki he taha kotoa pē ʻa e fakaafe ke haʻu kia Kalaisí

Ngaahi ʻEkitivitī ʻe Ala Fakahokó

• Talanoa mo e fānaú kau ki he ngaahi taimi kuo nau fakaafeʻi ai ha ngaahi kaungāmeʻa pe fāmili ke nau haʻu ki ha meʻa mahuʻinga ʻoku hoko, hangē ko ha fakafiefiaʻi ha ʻaho fāʻeleʻi. Ko e hā ne nau fai ke poupouʻi ai e kakaí ke nau haʻú? Lau mo e fānaú ʻa e 2 Nīfai 26:23–28, 33, pea tokoniʻi kinautolu ke nau ʻiloʻi e meʻa ʻoku fakaafeʻi mai ʻe he ʻEikí ke tau faí. Kole ki he fānaú ke nau faʻu ha kaati pe tohi ʻo fakaafeʻi ha taha ke haʻu kia Sīsū Kalaisi. Poupouʻi kinautolu ke nau fakaʻaongaʻi ha kupuʻi lea mei he ngaahi veesi ko ʻení ʻi heʻenau fakaafé (kapau ʻe fie maʻu, hiki ha ngaahi kupuʻi lea ʻi he palakipoé ke tokoni).

• Lau mo e fānaú ʻa e 2 Nīfai 26:33 pea tokoniʻi kinautolu ke nau faʻu ha lisi ʻo kinautolu ʻoku fakaafeʻi ke “maʻu ʻa e angalelei [ʻa e ʻEikí].” (Mahalo ʻe fie maʻu ke ke fakamatalaʻi ange ko e “kau hītení” ʻakinautolu ʻoku ʻikai ke nau tui ki he ʻOtuá.) Fakaafeʻi kinautolu ke tānaki atu honau ngaahi hingoá ki he lisí. ʻOku tau maʻu fēfē ʻa e angalelei ʻa e ʻEikí?

• Talanoa mo e fānaú fekauʻaki mo e founga ʻoku faikehekehe ai e fānau ʻi he māmaní, pea fakamoʻoniʻi ange ʻoku ʻofa ʻa e ʻEikí kiate kinautolu kotoa (vakai, 2 Nīfai 26:24, 33). Fakaafeʻi e fānaú ke nau tā ha fakatātā ʻo Sīsū mo ha fānau kehekehe lahi.

2 Nīfai 28:27–30

ʻOku fakahā mai ʻe he Tamai Hēvaní ʻa e moʻoní ʻi he “ʻotu lea ki he ʻotu lea.”

Naʻe fakatokanga mai ʻa Nīfai ki he ʻulungaanga ʻoku pehē ʻoku ʻikai ke tau toe fie maʻu ha toe moʻoni mei he ʻOtuá. Tokoniʻi e fānaú ke nau vakai ki he ako ʻo e ongoongoleleí ko ha fai feinga ʻoku ʻikai ngata.

Ngaahi ʻEkitivitī ʻe Ala Fakahokó

• Fili ha kupuʻi lea mei he 2 Nīfai 28:30, pea kole ki ha tokotaha ke ne hiki ʻi he palakipoé ʻa e fuofua foʻi leá. Kole leva ki ha tokotaha ʻe taha ke ne tohiʻi ʻa e foʻi lea hokó, ʻo hokohoko atu ai kae ʻoua leva kuo hiki ʻa e kupuʻi leá kotoa. ʻOku faitatau fēfē nai ʻa e ʻekitivitī ko ʻení mo e founga ʻoku ʻomi ʻaki ʻe he ʻOtuá ʻa e moʻoní?

• Tokoniʻi e fānaú ke nau lau pea ke mahino kiate kinautolu e 2 Nīfai 28:27–30, fekumi ki he ngaahi tali ki ha fehuʻi hangē ko ʻení: Ko e hā ʻoku akoʻi mei ʻe he ngaahi veesi ko ʻení ʻo fekauʻaki mo e kakai ʻoku nau tui kuo feʻunga e moʻoní pea ʻoku ʻikai fie maʻu ha toe moʻoní? Kole ange ke nau fokotuʻu ha ngaahi founga te tau lava ai ʻo fakahā ki he ʻEikí ʻoku tau fie maʻu ke tau maʻu ha toe moʻoni lahi ange meiate Ia.

2 Nīfai 29:7–11

ʻOku fengāueʻaki fakataha ʻa e Tohi ʻa Molomoná mo e Tohi Tapú.

Koeʻuhi ko ʻetau maʻu ʻa e Tohi Tapú, ʻoku tui ha kakai ʻe niʻihi ʻoku ʻikai mahuʻinga ʻa e Tohi ʻa Molomoná. ʻE tokoni ʻa e ngaahi veesi ko ʻení ke mahino ki he fānaú, pea vahevahe ki he niʻihi kehé ʻa e ʻuhinga ʻoku tau houngaʻia ai ʻi he ongo tohi folofolá fakatouʻosi.

Ngaahi ʻEkitivitī ʻe Ala Fakahokó

• ʻOange ki ha tokotaha ha tatau ʻo e Tohi ʻa Molomoná, pea ki he tokotaha ha tatau ʻo e Tohi Tapú. Fehuʻi ange pe ʻoku faitatau fēfē ʻa e ongo tohí ni pea ʻokú na faikehekehe fēfē. Fakaʻaliʻali ki he fānaú ha mape ʻo e māmāní, pea tokoniʻi kinautolu ke nau fakatauhoa e tohí takitaha pea mo e konga ʻo e māmaní ne haʻu mei aí. Lau mo aleaʻi e 2 Nīfai 29:8. Ko e hā e ʻuhinga naʻe ʻomi ai ʻe he ʻOtuá kiate kitautolu ʻa e “ongo fakamoʻoní” pe ngaahi tohi folofola ʻa ia ʻoku akoʻi kitautolu ʻo kau kiate Iá?

• Kole ki he fānaú ke nau fakakaukauloto ne talaange ʻe hanau kaungāmeʻa, “ʻOku ʻikai ke u fie maʻu ke u lau e Tohi ʻa Molomoná. Kuó u ʻosi lau e Tohi Tapú.” Lau fakataha e 2 Nīfai 29:7–11, pea fakamatalaʻi e ngaahi kupuʻi leá mo e tefitoʻi fakakaukaú ʻo fakatatau mo e fie maʻú. Kole ange leva ke nau vahevahe ha ngaahi fakakaukau kau ki he meʻa te nau ala lea ʻaki ki honau kaungāmeʻá.

Poupouʻi e Akó ʻi ʻApi

Fakaafeʻi ʻa e fānaú ke nau fakamatalaʻi ki honau ngaahi fāmilí ʻa e founga ʻoku ngāue fakataha ai ʻa e Tohi Tapú mo e Tohi ʻa Molomoná, ke fakamoʻoni kia Sīsū Kalaisí.

Fakatupulaki ʻo ʻEtau Founga Akoʻí

Fakatefito e tokangá ʻi he kakaí, kae ʻikai ko e lēsoní. Ko e ngaahi fakakaukau ʻi he fokotuʻutuʻu ko ʻení ko ha ngaahi fokotuʻu pē. Ongoʻi tauʻatāina ke liliu kinautolu ʻo fakatatau ki he ngaahi fie maʻu mo e ngaahi meʻa ʻoku malava ʻe he fānau ʻokú ke akoʻí.