“Māʻasi 2–8. 2 Nīfai 31–33: ‘Ko e Halá ʻEni,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“Māʻasi 2–8. 2 Nīfai 31–33,” Haʻu, ʻo Muimui ʻIate Au—Maʻá e Palaimelí: 2020
Ko hono akoʻi ʻe Kalaisi ʻa ʻEne Kau Ākongá, tā ʻe Justin Kunz
Māʻasi 2–8
2 Nīfai 31–33
“Ko e Halá ʻEni”
Kamata hoʻo teuteú ʻaki hono lau e 2 Nīfai 31–33. Fekumi ki he fakahinohino ʻa e Laumālié fekauʻaki mo e meʻa ke akoʻi ki he fānaú. ʻE lava ke ʻoatu ʻe he fokotuʻutuʻu ko ʻení ha ngaahi fakakaukau.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Koeʻuhí naʻe akoʻi ʻe Nīfai fekauʻaki mo e papitaiso ʻo Kalaisí, kole ki he fānaú ke nau vahevahe ha meʻa kuo nau ako fekauʻaki mo e papitaisó. Te nau lava foki ʻo vahevahe ha ngaahi fakakaukau mo ha ngaahi ongo fekauʻaki mo hono papitaiso kinautolú pe ko ha papitaiso ʻo honau ngaahi kaungāmeʻá pe mēmipa honau fāmilí.
Akoʻi e Tokāteliné: Fānau Iiki Angé
Naʻe akoʻi au ʻe Sīsū Kalaisi kau ki he founga ke u toe foki hake ai ki he Tamai Hēvaní.
Naʻe akoʻi mai ʻe Nīfai, ko e founga pē ke “fakamoʻui ʻi he puleʻanga ʻo e ʻOtuá” (2 Nīfai 31:21) ko e muimui ki he sīpinga ʻa e Fakamoʻuí.
Ngaahi ʻEkitivitī ʻe Ala Fakahokó
-
Fakaʻaliʻali ʻa e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí lolotonga hoʻo fakamatala fakanounouʻi ʻa e talanoa ʻo e papitaiso ʻo Sīsuú 2 Nīfai 31:4–13). Fakamatalaʻi ange ko e papitaisó ko ha sitepu ia ʻe taha ki he hala ke foki ʻo nofo mo e Tamai Hēvaní. Fakaafeʻi ha tokotaha ne tohi papitaiso, ke ne talanoa ki he fānaú fekauʻaki mo ʻene ongo kau ki he papitaisó.
-
Fakamatalaʻi ange naʻe akoʻi kiate kitautolu ʻe Sīsū Kalaisi ʻa e meʻa ʻoku fie maʻu ke tau fai ke tau toe foki hake ai kiate Ia hili ʻetau maté. Tā ha foʻi hala ʻi he palakipoé, pea tuku ha fakatātā ʻo Kalaisi ʻi he ngataʻanga ʻo e foʻi halá. ʻOange ki he fānaú ha ngaahi fakatātā ʻoku nau fakafofongaʻi e ngaahi kongokonga ʻo e tokāteline ʻo Sīsū Kalaisí (tui kia Kalaisí, fakatomalá, papitaisó, ko e meʻafoaki ʻo e Laumālie Māʻoniʻoní, pea kātaki ki he ngataʻangá). Tokoniʻi kinautolu ke nau tuku ha ngaahi fakatātā ʻi he foʻi halá.
-
Tokoniʻi e fānaú ke nau ako e tefito ʻo e tui fika faá. Hivaʻi fakataha ha foʻi hiva fekauʻaki mo e taha ʻo e ngaahi ʻuluaki tefitoʻi moʻoni ʻo e ongoongoleleí, hangē ko e “Faith,” “ʻI Heʻeku Papitaisó,” pe “Fili e Hala Totonú” (Tohi Hiva ʻa e Fānaú, 96–97, 53, 82).
Te u lava ʻo keinanga ʻi he ngaahi folofola ʻa Kalaisí.
ʻE lava fēfē ʻe hoʻo ngaahi aʻusia ʻi he “keinanga ʻi he ngaahi folofola ʻa Kalaisí” (2 Nīfai 32:3) ʻo tokoni ke mahino ki he fānaú ʻa e kupuʻi lea ko ʻení?
Ngaahi ʻEkitivitī ʻe Ala Fakahokó
-
Kole ki he fānaú ke nau tala mai ʻa e niʻihi ʻo ʻenau ngaahi meʻatokoni manakó, pea fakaafeʻi kinautolu ke nau fakatātaaʻi e founga te nau kai ai iá. Lau e 2 Nīfai 32:3, pea kole ki he fānaú ke nau fakafanongo ki he meʻa ʻoku pehē ʻe Nīfai ʻoku totonu ke tau keinanga aí. Ko e hā hono ʻuhinga ke keinanga ʻi he ngaahi folofolá? Fakamatalaʻi ange ko e ngaahi folofolá ko e feituʻu ia ʻe taha ʻe lava ke tau maʻu ai e ngaahi folofola ʻa Kalaisí.
-
Hikiʻi e ongo foʻi lea ʻOtua mo e ʻEiki ʻi he palakipoé. Fakaafeʻi ʻa e fānaú ke nau huke ki ha peesi ʻi he folofolá pea nau fekumi ki he ongo foʻi lea ko ʻení. Tokoniʻi kinautolu ʻo ka fie maʻu. Fakamoʻoniʻi ange ʻi he taimi ʻoku tau lau ai e folofolá, te tau lava ʻo ako fekauʻaki mo e ʻOtuá.
ʻOku finangalo e Tamai Hēvaní ke u lotu maʻu pē.
ʻE lava ʻe he ngaahi veesi ko ʻení ʻo ueʻi fakalaumālie ʻa e fānaú ke nau ngaohi e lotú ke hoko ko ha konga ʻo ʻenau ngaahi moʻui fakaʻahó.
Ngaahi ʻEkitivitī ʻe Ala Fakahokó
-
Fehuʻi ki he fānaú ʻa e taimi ʻoku nau lotu aí. ʻOku nau lotu nai ʻi he pongipongí? ʻi he poʻulí? kimuʻa ʻi he ngaahi houa maʻu meʻatokoní? Tokoniʻi e fānaú ke nau fakakaukau ki ha ngaahi ngāue ʻokú ne fakahaaʻi ai e ngaahi taimi te tau lava ai ʻo lotú, hangē ko e taimi ʻoku tau ʻā hake aí, mohé, mo e kaí—pe ko ha toe taimi kehe. Lau kiate kinautolu ʻa e laine ʻuluaki pe ua mei he 2 Nīfai 32:9, pea fakamamafaʻi ange e konga lea “lotu maʻu pē.”
-
Fehuʻi ki he fānaú ʻa e founga ʻoku nau lotu aí. Ko e hā ʻoku fai ʻe honau ʻulú, ongo nimá, mo e alā meʻa pehē? Ko e hā ha ngaahi meʻa ʻoku nau lea ʻaki? Kole ange ke nau fakakaukauloto ʻoku ʻikai ke ke ʻiloʻi e founga ki he lotú, pea tuku ke nau akoʻi atu koe. Ko e hā e ʻuhinga ʻoku finangalo ai e Tamai Hēvaní ke tau lotú?
ʻOku tau lava ʻo fakataufolofola ki he ʻOtuá ʻi he lotu.
Akoʻi e Tokāteliné: Fānau Lalahi Angé
Naʻe akoʻi au ʻe Sīsū Kalaisi kau ki he founga ke u toe foki hake ai ki he Tamai Hēvaní.
Te tau lava ʻo toe foki hake ki he ʻOtuá hili ʻa e moʻui ko ʻení, ʻaki ʻetau muimui ki he tokāteline naʻe akoʻi ʻe Sīsū Kalaisí: tui kia Kalaisi, fakatomala, papitaiso, ko e meʻafoaki ʻo e Laumālie Māʻoniʻoní, pea kātaki ki he ngataʻangá.
Ngaahi ʻEkitivitī ʻe Ala Fakahokó
-
Fakaʻaliʻali ʻa e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea kole ki he fānaú ke nau vahevahe e meʻa ʻoku nau ʻilo fekauʻaki mo e papitaiso ʻa Sīsuú (vakai, Mātiu 3:13–17). Fokotuʻutuʻu e ngaahi foʻi lea ko ʻení ʻi ha hokohoko ʻoku kehekehe: Naʻe fakamoʻoniʻi ʻe Sīsū ki he Tamaí te Ne talangofua kiate Ia. Fakaafeʻi e fānaú ke nau lau mo e kalasí e 2 Nīfai 31:7 pea fokotuʻutuʻu e ngaahi foʻi leá ki honau hokohoko totonú.
-
Fehuʻi ki he fānaú ko e hā te nau lea ʻaki ki ha tokotaha ʻoku teuteu ke papitaiso, pea tokoniʻi kinautolu ke nau fakatahatahaʻi ʻenau faleʻí ki ha fanga kiʻi kaati faingofua ʻa ia te nau lava ʻo ʻave ki ha tokotaha. Te tau lava fēfē ʻo hokohoko atu ʻi he muimui ki he sīpinga ʻa Sīsuú hili ʻetau papitaisó?
-
Fakamatalaʻi ange ʻoku kau ʻi he tokāteline ʻa Kalaisí ʻa e ngaahi meʻa naʻe akoʻi mai ʻe Sīsū Kalaisi ʻa ia ʻoku fie maʻu ke tau fai ke tau toe foki hake ai ki he Tamai Hēvaní. Hiki ʻi ha ngaahi laʻi pepa kehekehe ʻa e tui kia Kalaisi, fakatomala, papitaiso, ko e meʻafoaki ʻo e Laumālie Māʻoniʻoní, mo e kātaki ki he ngataʻangá, pea veteki takai kinautolu ʻi he lokí. Lau ki he fānaú ʻa e 2 Nīfai 31:11–19, pea fakaafeʻi kinautolu ke nau taufetongi ʻi he puna mei he laʻi pepa ki he laʻi pepa ʻi heʻenau fanongo ʻoku lau e ngaahi tefitoʻi moʻoni ko ʻení. Tokoniʻi kinautolu ke nau fakakaukau ki ha sīpinga kuo nau maʻu ʻi he tefitoʻi moʻoni takitaha.
Te u lava ʻo keinanga ʻi he ngaahi folofola ʻa Kalaisí.
Ko e hā e ʻuhinga ʻoku fie maʻu ai ke mahino ki he fānaú ʻa e mahuʻinga ʻo e keinanga ʻi he ngaahi folofola ʻa e ʻOtuá?
Ngaahi ʻEkitivitī ʻe Ala Fakahokó
-
Kole ki he fānaú ke nau fakakaukauloto pē ki ha kai pola. Ko e hā ha meʻakai te nau fie maʻu ke ʻi ai? Ko e hā te nau ʻuluaki kaí? Fakaafeʻi leva kinautolu ke nau fakakaukauloto ko e hā hono ʻuhinga ke keinanga ʻi he ngaahi folofolá lolotonga hoʻo lau e 2 Nīfai 32:3. Ko e hā e ʻuhinga naʻe fakaʻaongaʻi ai ʻe Nīfai ʻa e foʻi lea ko e keinanga ke akoʻi kiate kitautolu e founga ʻoku totonu ke tau ako ʻaki e folofola ʻa e ʻOtuá? Ko e hā naʻe ʻikai ke ne pehē ai pē lau? Ko e hā hono ʻuhinga ke keinanga ʻi he ngaahi folofolá? Vahevahe mo e fānaú ʻa e ngaahi tāpuaki kuó ke maʻu ʻi hoʻo keinanga ʻi he ngaahi folofolá
-
Fakakakato mo e fānaú ʻa e peesi ʻekitivitií, pea fakaafeʻi kinautolu ke nau faʻu ha taumuʻa ke fai ha meʻa ʻo ʻoua toe siʻisiʻi ange ʻi he tahá, ke keinanga ʻi he ngaahi folofolá ʻi he uiké ni.
ʻOku finangalo e Tamai Hēvaní ke u lotu maʻu pē.
ʻOku fakatauveleʻi kitautolu ʻe he filí ke ʻoua te tau lotu. Fakakaukau ki he founga te ke lava ai ʻo tokoniʻi e fānaú ke nau matuʻuaki e ʻahiʻahi ko ʻení pea “lotu maʻu pē” (2 Nīfai 32:9).
Ngaahi ʻEkitivitī ʻe Ala Fakahokó
-
Fili ha kupuʻi lea mei he 2 Nīfai 32:8–9 fekauʻaki mo e lotú, hikiʻi ia ʻi he palakipoé, pea fakapuliki e foʻi lea takitaha ʻaki ha laʻi pepa. Fakaafeʻi e fānaú ke nau taufetongi ʻi hono toʻo tahataha ʻa e laʻi pepá kae ʻoua leva kuo nau lava ʻo mateʻi ko e hā ʻa e kupuʻi leá.
-
Lau fakataha e 2 Nīfai 32:8–9 pea kole ki he fānaú ke nau vahevahe e meʻa ʻoku nau ako mei he ngaahi veesi ko ʻení fekauʻaki mo e lotú. ʻOku ʻuhinga ki he hā ke “lotu maʻu pē”? (veesi 9). Te tau lava fēfē ʻo fai ʻeni?
-
Ko e hā te ne ala ngaohi ha tokotaha ke taʻefie lotu? Vahevahe ha aʻusia ki ha taimi naʻá ke lotu ai neongo naʻe ʻikai ke ke ongoʻi fie lotu? Ko e hā hoʻo ongo hili iá? Fakaafeʻi ha tokotaha ke ne lau e konga hono ua ʻo e 2 Nīfai 32:8, pea ʻoange ki he fānaú ha taimi ke nau fakalaulauloto ai ki ai. Ko e hā e ʻuhinga ʻoku ʻikai fie maʻu ai ʻe Sētane ke tau lotú? Te tau lava fēfē ʻo fakamanatu kiate kitautolu ke tau lotu neongo e taimi ʻoku ʻikai ke tau ongoʻi fie lotu aí?
Poupouʻi e Akó ʻi ʻApi
Poupouʻi e fānaú ke nau fekumi ki ha tokotaha—ha kaungāmeʻa, ko ha tokoua pe tuongaʻane pe mēmipa kehe ʻo e fāmilí—te nau lava ʻo akoʻi ki ai e founga ʻo e lotú.
Fakatupulaki ʻEtau Akoʻí
ʻOku longomoʻui ʻa e fānaú. Fakaafeʻi ʻa e fānaú ke nau fakatātaaʻi ha ngaahi talanoa fakafolofola mo ha ngaahi hiva. Fakaʻaongaʻi ʻenau tōʻonga ngaungaué ke fakatupulaki ʻa e akó. (Vakai, Ko e Faiako ʻi he Founga ʻa e Fakamoʻuí,25–26