ʻIkai ko Hoku Lotó, Ka ko e Finangalo pē ʻOʻoú, tā fakatātaaʻi ʻe Harry Anderson

10–16 Fēpuelí

2 Nīfai 6–10

“ʻOiauē Hono ʻIkai Maʻongaʻonga ʻa e Palani ʻa Hotau ʻOtuá!

ʻI hoʻo lau e 2 Nīfai 6–10, fakalaulauloto ki he meʻa ʻoku feinga ʻa e ʻEikí ke akoʻi atú. ʻI hoʻo ʻilo e ngaahi moʻoni ko ʻení, lekooti kinautolu pea mo fakakaukauʻi ʻi he faʻalotu ʻa e founga ʻe lava ke ke ngāueʻi ai e meʻa ʻokú ke ʻiló.

Lekooti e Ngaahi Ongo ʻOkú ke Maʻú

Kuo ʻosi ha taʻu ʻe 40  talu mei he mavahe ʻa e fāmili ʻo Līhaí mei Selusalemá. Kuo nau ʻi ha fonua foʻou, ʻi he tafaʻaki ʻe taha ʻo e māmaní, mei Selusalema pea mo e toenga ʻo e kakai fuakava ʻo e ʻOtuá. Kuo pekia ʻa Līhai, pea kuo kamata hono hakó ke fakahoko ha meʻa ʻe hoko ko ha fekeʻikeʻiʻanga ʻo laui senituli ʻi he vahaʻa ʻo e kakai Nīfaí—ko kinautolu “naʻa nau tui ki he ngaahi fakatokanga mo e ngaahi fakahā ʻa e ʻOtuá”—pea mo e kakai Leimaná, naʻe ʻikai ke nau tui ki aí (2 Nīfai 5:6). ʻI he ngaahi tūkunga ko ʻení, naʻe fie maʻu ʻe Sēkope, ko e tokoua siʻi ʻo Nīfaí pea kuo ʻosi fakanofo ko ha akonaki ki he kakai Nīfaí, ke ʻilo ʻe he kakai fuakavá he ʻikai teitei fakangaloki kinautolu ʻe he ʻOtuá, pea kuo pau ke ʻoua naʻa nau fakangaloki Ia. Ko ha pōpoaki ʻeni ʻoku tau fie maʻu moʻoni ʻi hotau māmaní, ʻa ia ʻoku fakamaʻamaʻaʻi ai ʻa e ngaahi fuakavá mo fakasītuʻaʻi ʻa e fakahaá. “Tau manatu kiate ia, … he kuo ʻikai ke liʻaki ʻa kitautolu. … Naʻá ne pehē, ʻʻOku lalahi ʻa e ngaahi talaʻofa ʻa e ʻEikí,” (2 Nīfai 10:20–21). ʻI he ngaahi talaʻofa ko iá, ʻoku ʻikai ha taha ʻe maʻongoʻonga ange ʻi he talaʻofa ʻo e “fakalelei taʻe-fakangatangata” ke ikunaʻi ʻa e maté mo helí (2 Nīfai 9:7). Naʻe fakaʻosi ʻaki ʻe Sēkope, “Ko ia, fakafiefiaʻi homou lotó”! (2 Nīfai 10:23).

Ngaahi Fakakaukau ki hono Ako Fakataautaha ʻo e Folofolá

2 Nīfai 6–8

ʻOku ʻaloʻofa ʻa e ʻEikí ki Hono kakaí pea te Ne fakahoko ʻa ʻEne ngaahi talaʻofá.

Naʻe lau ʻe Sēkope ʻa e ngaahi kikite ʻa ʻĪsaiá, ke tokoni ke mahino ki hono kakaí ko ha konga kinautolu ʻo e fale ʻo ʻIsilelí pea te nau lava ʻo falala ki he ʻOtuá mo ʻEne ngaahi talaʻofá, ʻa ia ʻoku lekooti he 2 Nīfai 6–8. Naʻe fakamatalaʻi ʻe ʻĪsaia hono fakamoveteveteʻi ʻo ʻIsilelí pea mo e tānaki mo e huhuʻi naʻe talaʻofa ʻe he Fakamoʻuí ki Hono kakaí. ʻI hoʻo laú, fakalaulauloto ki ha ngaahi fehuʻi hangē ko ʻení:

• Ko e hā ʻoku ou ako fekauʻaki mo e ʻofa huhuʻi ʻa e Fakamoʻuí kiate aú?

• Ko e hā ha fakafiemalie ʻoku foaki ʻe he Fakamoʻuí kiate kinautolu ʻoku fekumi kiate Iá?

• Ko e hā te u lava ʻo fai ke u “tatali” faivelenga ange ai ki he Fakamoʻuí mo ʻEne ngaahi tāpuaki kuo talaʻofá?

2 Nīfai 9:1–26

ʻOku fakatauʻatāinaʻi ʻe Sīsū Kalaisi ʻa e kakai kotoa pē mei he mate fakatuʻasino mo fakalaumālié, ʻo fakafou ʻi Heʻene Fakaleleí.

Ko e hā ha faʻahinga lea pe ʻīmisi te ke fakaʻaongaʻi ke fakamatalaʻi ki ha taha ʻa ʻetau mātuʻaki fie maʻu ha Huhuʻi ke Ne fakahaofi kitautolu mei he maté mo e angahalá? Naʻe fakaʻaongaʻi ʻe Sēkope ʻa e ongo foʻi lea ko e “fuʻu meʻá” mo e “fakamanavaheé.” Ko e hā naʻe akoʻi ‘e Sekope fekauʻaki mo e “meʻa fakamanavaheé, ʻa e maté mo heli” mo e “hao[ʻanga]” kuo ʻosi teuteu ʻe he ʻOtuá maʻatautolú? (2 Nīfai 9:10). ʻI hoʻo lau ʻa e 2 Nīfai 9:1–26, e lava ke ke fakaʻilongaʻi ʻaki ha lanu pē ʻe taha ʻa e meʻa ʻe hoko kiate kitautolu ka ne taʻeʻoua e Fakalelei ʻa Sīsū Kalaisí. Hili ia, peá ke fakailongaʻi ʻaki ha lanu kehe ʻa e meʻa te tau lava ʻo maʻu tuʻunga ʻi he Fakalelei ʻa e Fakamoʻuí. Ko e hā ha ngaahi moʻoni ʻokú ke maʻu fekauʻaki mo e Fakalelei ʻa Sīsū Kalaisí ʻokú ne ʻai ke ke fakahīkihikiʻi ai e “poto ʻo e ʻOtuá, mo ʻEne ʻaloʻofá”? (2 Nīfai 9:8).

Vakai foki, “Atonement of Jesus Christ,” Gospel Topics, topics.ChurchofJesusChrist.org.

2 Nīfai 9:27–54

Te u lava ʻo haʻu kia Kalaisi mo maʻu e ngaahi tāpuaki nāunauʻia ʻo ʻEne Fakaleleí.

Naʻe hāʻele mai ʻa Sīsū Kalaisi “ki he māmaní koeʻuhí ke ne fakamoʻui ʻa e kakai fulipē ʻo kapau te nau tokanga ki hono leʻó” (2 Nīfai 9:21; toki tānaki atu hono fakamamafaʻí). Ko hono fakalea ʻe tahá, kuo pau ke tau loto fiemālie ke tali ʻa e ngaahi tāpuaki fakahaofi ʻokú Ne foakí. Naʻe fai ʻe Sēkope ʻi he hili ʻene fakamatalaʻi ʻa e palani ʻo e huhuʻí, ha ngaahi fakatokanga mo ha ngaahi fakaafe mahuʻinga, ʻoku maʻu ʻi he 2 Nīfai 9:27–54, ke tokoni mai ke tau maʻu ʻa e ngaahi tāpuaki ʻo e Fakaleleí. Fakakaukau ke ke lekooti kinautolu ʻi ha saati hangē ko ʻení:

Ngaahi fakatokangá	ngaahi fakaafé
Ngaahi fakatokangá	ngaahi fakaafé
Ngaahi fakatokangá	ngaahi fakaafé

Ko e hā ʻokú ke ongoʻi ʻoku ueʻi ʻe he Laumālié ke ke fai ʻi he ngaahi fakatokanga mo e ngaahi fakaafe ko ʻení?

2 Nīfai 10:20, 23–25

Koeʻuhí ko e feilaulau ʻa Sīsū Kalaisí, ʻe lava “ke fiefia” hoku lotó.

Naʻe fakafiefia e pōpoaki ʻa Sēkopé. Naʻá ne pehē, “ʻOku ou lea ʻaki ʻa e ngaahi meʻá ni kiate kimoutolu koeʻuhí ke mou fiefia, pea hanga hake ʻa homou matá ʻo taʻengata” (2 Nīfai 9:3). ʻI hoʻo lau ʻa e 2 Nīfai 10:20, 23–25, ko e hā ha meʻa ʻokú ke maʻu ʻokú ne ʻoatu ha ʻamanaki lelei? Ko e hā mo ha toe meʻa kuó ke maʻu ʻi he 2 Nīfai 9–10 kuó ne foaki atu ha ʻamanaki lelei kiate koe? Ko e hā te ke fakahoko ke manatuʻi ai ʻa e ngaahi meʻá ni ʻi he taimi ʻokú ke ongoʻi loto-foʻi aí?

Vakai foki, Sione 16:33.

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fakakaukau ʻeni ʻe niʻihi.

2 Nīfai 8:3–7

ʻI hoʻo lau ʻa e 2 Nīfai 8:3, te ke lava ke fakaʻaliʻali ha fakatātā ʻo ha toafa mo ha ngoue. ʻOku liliu fēfē ʻe he ʻEikí ʻa e ngaahi toafá ko ha ngaahi ngoue ʻi heʻetau moʻuí? ʻI he veesi 4–7, ko e hā ʻoku naʻinaʻi mai ʻa e ʻEikí ke tau fai kae lava ke tau maʻu ʻa e fiefia ʻoku fakamatalaʻi ʻi he veesi 3?

2 Nīfai 8:24–25

ʻE lava fēfē ʻe he ngaahi lea fakalotolahi ʻa ʻĪsaia ki he kakai ʻo Saioné ke fakamālohia kitautolu ʻi heʻetau feinga ke hoko ko ha kau ākonga faivelenga lahi ange ʻa e ʻEiki ko Sīsū Kalaisí? ʻOku faitatau fēfē ʻa e ʻā haké mo e teuteú ki he meʻa ʻoku fie maʻu ʻe he ʻOtuá ke tau fakahoko fakalaumālié?

2 Nīfai 9:1–26

Ko e ha ʻe lava ke fai ‘e homou fāmilí ke mahino lelei ange e mafatukituki ʻo e “fakalelei taʻefakangatangata“ ʻa Sīsū Kalaisí? veesi 7 Te nau lava ke vakai pe fakakaukau ki ha ngaahi meʻa ʻoku ngali taʻe-fakangatangata hono laú—ʻa e ngaahi lauʻi mohuku ʻi he ngoueʻangá, ʻoneʻone ʻo ha matātahi, pe ngaahi fetuʻu ʻi he langí. ʻOku taʻe-fakangatangata fēfē e Fakalelei ʻa e Fakamoʻuí? Ko e hā ha ngaahi kupuʻi lea ʻi he 2 Nīfai 9 ʻokú ne fakaloloto ʻetau houngaʻia ʻi he meʻa naʻe fai ʻe he Fakamoʻuí maʻatautolú?

2 Nīfai 9:27–44

Mahalo naʻa lava ʻe homou fāmilí ʻi ha ʻaho he uiké ni ke fekumi ʻi he 2 Nīfai 9:27–38, ki he ngaahi fakatokanga (ʻoku muʻomuʻa ai ʻa e “ʻe malaʻiá”). Ko e fē ʻi he ngaahi meʻa ko ʻení ʻoku tautautefito ʻene mahuʻinga ke aleaʻi ʻe homou fāmilí? Te mou lava ʻi ha ʻaho kehe ke fekumi ʻi he 2 Nīfai 9:39–44, ʻa e ngaahi meʻa naʻe fakaafeʻi ʻe Sēkope ke manatuʻi ʻe hono kakaí.

2 Nīfai 9:28–29, 50–51

Ko e hā ha ngaahi sīpinga ʻo e “laukau, mo e vaivai, pea mo e vale ʻa e tangatá”? (veesi 28). Ko e hā te tau lava ʻo fai ke tau fakamahuʻingaʻi ange ai e ngaahi meʻa ʻa e ʻOtuá ʻi he ngaahi meʻa ʻo e māmaní?

2 Nīfai 9:45

Mahalo naʻa fiefia homou fāmilí hono ngaohi ha seini pepa pea taufetongi ʻi hono tui mo veteki kinautolú. ʻOku tatau fēfē e ngaahi angahalá mo ha ngaahi seiní? ʻOku tokoniʻi fēfē nai kitautolu ʻe he Fakamoʻuí ʻi hono veteki kinautolú?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Fakatupulaki ʻEtau Founga Akoʻí

Fakafaingamālieʻi mo anga fakafaingofua. “ʻOku kamata ha niʻihi ʻo e ngaahi momeniti akoʻi lelei tahá ʻi ha fehuʻi pe loto hohaʻa ʻi he loto ʻo ha mēmipa ʻo e [fāmilí]. … Tuku ke ʻiloʻi ʻe he kau mēmipa ʻo e fāmilí hoʻo vēkeveke ke fanongo kiate kinautolú ʻaki hoʻo leá mo e tōʻongá” (vakai, Faiako ʻi he Founga ʻa e Fakamoʻuí, 16).

ʻE fakahaofi ʻe he Fakamoʻuí e kotoa ʻo e fānau ʻa e ʻOtuá “kapau te nau tokanga ki hono leʻó” (2 Nīfai 9:21). Naʻá Ne Fakamoʻui ha Ngaahi Mahaki Kehekehe, tā fakatātaaʻi ʻe J. Kirk Richards