ʻĀtama mo ʻIvi, tā ʻe Douglas Fryer

3–9 Fēpueli

2 Nīfai 1–5

“Naʻa Mau Nofo ʻi he Fiefia”

ʻE lava ke fakaava ʻe he folofolá ʻa e matapā ki he fakahā fakafoʻituituí. ʻI hoʻo lau ʻa e 2 Nīfai 1–5, te ke ala ʻilo ai ʻoku ʻi ai ha meʻa pau ʻa e ʻEikí ʻokú Ne fie akoʻi atu.

Lekooti e Ngaahi Ongo ʻOkú ke Maʻú

Kapau naʻá ke ʻilo ʻoku ofi ke ngata hoʻo moʻuí, ko e hā ha ngaahi pōpoaki fakaʻosi te ke fie vahevahe mo kinautolu ʻokú ke ʻofa taha aí? ʻI he taimi naʻe ongoʻi ai ʻe he palōfita ko Līhaí ʻoku ofi ke ngata ʻene moʻuí, naʻá ne fakatahatahaʻi fakaʻosi ʻene fānaú ke kikite pea ke vahevahe mo e kakai naʻá ne ʻofa aí ʻa e ngaahi moʻoni ʻo e ongoongolelei naʻá ne mataʻikoloa ʻakí. Naʻá ne akoʻi ʻa e tauʻatāiná, talangofuá, Hinga ʻa ʻĀtama mo ʻIví, huhuʻi ʻia Sisu Kalaisí, mo e fiefiá. Naʻe ʻikai ke tali kotoa ʻe heʻene fānaú ʻa ʻene fakamoʻoni fakaʻosí, ka ko kinautolu naʻa nau talí—fakataha mo e lauimiliona kuo nau lau ia he ʻaho ní—ʻoku nau ʻilo ʻi heʻene fakamoʻoní ʻa e ngaahi tefitoʻi moʻoni ki he moʻui “fiefiá” (2 Nifai 5:27).

Ngaahi Fakakaukau ki Hono Ako Fakataautaha ʻo e Folofolá

2 Nīfai 2

ʻOku ou tauʻatāina ke fili ʻa e moʻui taʻengatá.

Naʻe pehē ʻe ʻEletā D. Toti Kulisitofasoni: “ʻOku finangalo e ʻOtuá ke ngāue ʻEne fānaú ʻo fakatatau mo e tauʻatāina ke fili kuó Ne foaki kiate kinautolú. … Ko ʻEne palaní mo Hono finangaló ʻoku tau maʻu ai ʻa e tefitoʻi fatongia ke tau fili ʻi he ngaahi palopalema ʻo ʻetau moʻuí” (“Tauʻatāina ʻo Taʻengata ke Fili MaʻanautoluEnsign pe Liahona, Nōvema 2014,16). Naʻe fakamahino ʻe Līhai ʻi heʻene ngaahi akonaki fekauʻaki mo e tauʻatāina ke filí, ʻa e ngaahi tuʻunga ʻe lava ke maʻu ai ʻa e tauʻatāina ke filí mo tau lava ke aʻusia hotau ngaahi tuʻunga fakalangí, ʻo kau ai e ngaahi meʻa ko ʻení:

1. Ha ʻilo ʻo e leleí mo e koví (2 Nīfai 2:5)

2. Ha fono kuo foaki ki he faʻahinga ʻo e tangatá(2 Nīfai 2:5

3. Fakafepakí, ngaahi fili ʻoku takiekina ki he koví (2 Nīfai 2:11

4. Mālohi ke ngāue (2 Nīfai 2:16

ʻI hoʻo lau ʻa e 2 Nīfai 2, ko e hā ʻokú ke ako fekauʻaki mo e ngaahi tuʻunga takitaha ko ʻeni ʻo e tauʻatāina ke filí pea mo ʻenau fekauʻakí? Ko e hā ne mei hoko ki heʻetau tauʻatāina ke filí kapau naʻe mole ha taha ʻo e ngaahi tuʻunga ko ʻení pe toe lahi ange? Ko e hā mo ha toe meʻa ʻokú ke ako fekauʻaki mo e tauʻatāina ke filí mei he ngaahi lea ʻa Līhaí?

2 Nīfai 2:22–29

Ko e Hinga mo e Fakalelei ʻa Sīsū Kalaisí ko e ongo konga mahuʻinga ia ʻo e palani ʻa e Tamai Hēvaní.

ʻOku pehē ʻe ha kakai tokolahi ko ha meʻa fakamamahi ʻa e Hinga ʻa ʻĀtama mo ʻIví. Ka neongo ia, ‘oku fakahaaʻi ʻe he ngaahi akonaki ʻa Līhai ki he Hingá ʻa e ʻuhinga naʻe hoko ai ko ha konga mahuʻinga ʻo e palani ʻa e Tamaí ki heʻetau fakalakalaka taʻengatá. ʻI hoʻo lau ʻa e ngaahi veesi ko ʻení, fakatokangaʻi ʻa e ʻuhinga naʻe fie maʻu ai ʻa e Hingá ke hoko kae lava ke tau fakalakalaka—ko e fānau ʻa e Tamai Hēvaní. Naʻe huhuʻi fēfeeʻi kitautolu ʻe he feilaulau fakalelei ʻa e Fakamoʻuí mei he Hingá?

Vakai foki ki he Mōsese 5:9–126:51–62; “Ko e Hinga ʻa ʻĀtama mo ʻIví,” Ngaahi Tefitoʻi Moʻoni ʻo e Ongoongoleleí, topics.ChurchofJesusChrist.org

2 Nīfai 3:6–24

Naʻe tomuʻa fakanofo ʻa Siosefa Sāmita ke ne fakafoki mai ʻa e ongoongoleleí.

ʻOku ʻi he konga fakaʻosi ʻo e 2 Nīfai 3 ha kikite naʻe fai ʻe Siosefa ʻo ʻIsipité fekauʻaki mo ha tangata kikite te na hingoa tatau (vakai, veesi 14–15)—Siosefa Sāmita. ʻOku fekauʻaki lahi foki ʻeni mo e misiona ʻo Siosefa Sāmitá. Ko e hā ʻoku ʻasi ʻi he veesi 6–24 ʻe fakahoko ʻe Siosefa Sāmita, ko ha “tangata kikite kuo fili,” ke tāpuekina e kakai ʻo e ʻOtuá? Ko e hā ha founga kuo hoko ai e ngāue ʻa Siosefá ko ha meʻa “mahuʻinga lahi” kiate koe?

Ko ha konga mahuʻinga ʻo e misiona ʻo Siosefa Sāmitá ko hono ʻomai e ngaahi tohi ʻo e hako ʻo Siosefá, ʻa ia ʻoku ʻi he Tohi ʻa Molomoná. Ko e hā ʻokú ke ako mei he vahe ko ʻení fekauʻaki mo hono mahuʻinga ʻo e Tohi ‘a Molomoná?

Vakai foki ki he Liliu ʻa Siosefa Sāmitá, Sēnesi 50:24–38 (ʻi he Bible appendix).

Palōfita ʻa e ʻEikí, tā fakatātaaʻi ʻe David Lindsley

2 Nīfai 4:15–35

Te u lava ʻo tafoki ki he ʻEikí ʻi hoku vaivaí.

Ne toki mole meia Nīfai ʻa ʻene tamaí. Kuo hilifaki ʻeni kiate ia ʻa e fatongia ki hono tataki hono fāmilí. Naʻá ne ongoʻi kuo ʻākilotoa ia ʻe he ʻahiʻahí peá ne loto-foʻi koeʻuhí ko ʻene ngaahi angahalá. Neongo kapau ʻoku kehe ho ngaahi tūkungá meia Nīfai, ʻe lava ke mahino kiate koe ha niʻihi ʻo ʻene ngaahi fakakaukau mo e ngaahi ongo ʻoku lekooti ʻi he 2 Nīfai 4:15–35. Ko e hā naʻá ne tokoniʻi ʻa Nīfai ʻi hono ngaahi faingataʻá? ʻE lava fēfē ke tokoniʻi koe ʻe he ngaahi meʻa naʻe fai ʻe Nīfai ki hono ngaahi faingataʻaʻiá ʻi hoʻo fehangahangai mo ho ngaahi faingataʻaʻiá?

2 Nīfai 5

ʻOku maʻu ʻa e fiefiá ʻi hono moʻui ʻaki e ongoongoleleí.

Te ke fakamatalaʻi fēfē ʻa e fiefiá? Naʻe tohi ʻe Nīfai naʻe nofo hono kakaí “ʻi he fiefia” (2 Nīfai 5:27). ʻE lava ke mou kumi e ngaahi fili naʻe fakahoko ʻe Nīfai mo hono kakaí naʻe fakaiku ki he fiefiá—ha ngaahi founga ne nau fetokoniʻaki ai mo honau ngaahi fāmilí, pea mo e meʻa naʻa nau fakamahuʻingaʻi ʻi honau kakaí, mo e ngaahi alā meʻa peheé. Ko e hā e meʻa ʻokú ke ako ʻe lava ʻo tokoni atu ke ke maʻu ai ha moʻui fiefia, hangē ko e kakai ʻo Nīfaí?

2 Nīfai 5:20–21

Ko e hā ʻa e malaʻia naʻe hoko ki he kakai Leimaná?

ʻI he kuonga ʻo Nīfaí, ko e mala ʻo e kakai Leimaná, naʻe “motuhi atu [ʻa kinautolu] mei he ʻao ʻo e ʻEikí … koeʻuhi ko ʻenau angahalá” (2 Nīfai 5:20–21). Naʻe ʻuhinga ʻeni, naʻe mavahe ʻa e Laumālie ʻo e ʻEikí mei heʻenau moʻuí. ʻI he taimi ne tali ai ʻe he kau Leimaná kimui ange e ongoongolelei ʻo Sīsū Kalaisí, “naʻe ʻikai ke toe ʻiate kinautolu e fakamalaʻia ʻa e ʻOtuá” ( ʻAlamā 23:18).

ʻOku toe pehē foki ʻi he Tohi ʻa Molomoná, naʻe ʻi ai ha fakaʻilonga ʻo ha kili ʻuliʻuli ʻo e kau Leimaná hili e mavahe ʻa e kau Nīfaí meiate kinautolú. ʻOku ʻikai ke mahino kakato ʻa e natula mo e fōtunga ʻo e fakaʻilonga ko ʻení. Naʻe kamata ke fakaʻilongaʻi makehe ʻe he fakaʻilongá ʻa e kau Leimaná mei he kau Nīfaí. ʻI he foua kimui ange ai ʻe he kau Nīfaí mo e kau Leimaná fakatouʻosi ʻa e vahaʻataimi ʻo e faiangahalá mo e anga māʻoniʻoní, naʻe ʻikai toe ʻaonga ʻa hono fakaʻilongaʻi ʻe he fakaʻilongá ʻa e kau Leimaná’ ʻi heʻenau tuʻu ʻi he ʻao ʻo e ʻOtuá.

ʻOku fakapapauʻi mai ʻe he kau palōfitá ʻi hotau kuongá ni, ʻoku ʻikai fakaʻilongaʻi ʻe he kili fakapōpōʻulí ha ʻikai fakahoifua fakalangi pe fakamalaʻia. ʻOku tali ʻe he Siasí ʻa e akonaki ʻa Nīfai, ʻoku “ʻikai te ne taʻofi [ʻe he ʻEikí] ha tokotaha ʻoku haʻu kiate ia, pe ko ha ʻuliʻuli pe hinehina, pōpula mo tauʻatāina, pe ko ha tangata pe fefine” (2 Nīfai 26:33). Naʻe meʻa ʻaki ʻe Palesiteni Lāsolo M. Nalesoni: “Naʻe fakamamafaʻi ʻe he ʻEikí ʻa ʻEne tokāteline mahuʻinga ʻo e faingamālie potupotutataú maʻa ʻEne fānaú. … ʻOku ʻikai mahuʻinga e ngaahi faikehekehe ʻi he anga fakafonuá, leá, tangata pe fefiné, matakalí, mo e fōtunga ʻo e matá ki he fononga ʻa e kau faivelengá ʻi he hala ʻo e fuakavá mo haʻu ki hotau Fakamoʻui ʻofeiná” (“Lea ʻa Palesiteni Nalesoni ʻi he Fakafiefia Fakamāmanilahi ʻo e Lakanga Fakataulaʻeikí” [1 Sune, 2018], newsroom.ChurchofJesusChrist.org).

Vakai foki ki he vitiō “Till We All Come in the Unity of the Faith” (vitiō, ChurchofJesusChrist.org).

Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí

ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fiemaʻu ho fāmilí. Ko ha ngaahi fakakaukau ʻeni ʻe niʻihi.

2 Nīfai 1:13–25

Ko e hā ʻoku akoʻi mai ʻe he ngaahi veesi ko ʻení fekauʻaki mo e ngaahi fakaʻamu fisifisimuʻa ʻa ha mātuʻa angatonu maʻa ʻenau fānaú?

2 Nīfai 3:6

Lau fakataha ʻa e “tangata kikité” ʻi he Fakahinohino ki he Folofolá. Naʻe hoko fēfē ʻa Siosefa Sāmita ko ha tangata kikité? Ko e hā e ʻuhinga ʻoku tau houngaʻia ai ʻi he ngāue naʻe fakahoko ʻe Siosefa Sāmitá 2 Nīfai 3:6–24).

2 Nīfai 4:20–25

ʻI hoʻomou lau fakataha ʻa e 2 Nīfai 4:20–25, kiʻi taʻofi ʻi he ʻosi ʻa e veesi takitaha, pea fakaafeʻi e kau mēmipa ʻo e fāmilí ke nau vahevahe ha taimi ne nau aʻusia pe ongoʻi ai e meʻa ʻoku fakamatalaʻi ʻe Nīfaí. Ko e hā ha meʻa kuo fai ʻe he ʻOtuá maʻa hotau fāmilí?

2 Nīfai 5

Ko e hā ha ngaahi founga ʻoku moʻui “fiefia” ai homou fāmilí? ʻI hono lau ko ia ʻe homou fāmilí ʻa e 2 Nīfai 5, ʻe lava ke mou aleaʻi ai e ngaahi meʻa naʻe tokanga ki ai ʻa Nīfaí: fāmilí (veesi 6), ngaahi fekaú (veesi 10), ngaahi folofolá (veesi 12), akó (veesi 15), ngaahi temipalé (veesi 16), ngāué (veesi 17), mo e ngaahi uiuiʻi faka-Siasi (veesi 26) . Ko e taha ʻo e ngaahi founga ke fakahoko ai ʻení ko hano kumi ha ngaahi meʻa ʻokú ne fakafofongaʻi ha niʻihi ʻo e ngaahi meʻá ni pea mou talanoa fekauʻaki mo e founga ʻoku tau, tatau ai mo e kakai Nīfaí, ʻo fakamahuʻingaʻi ʻa e ngaahi meʻa tatau.

Ki ha ngaahi fakakaukau lahi ange ki hono akoʻi ‘o e fānaú, vakai ki he lēsoni ʻo e uike ko ‘ení ʻi he Haʻu, ‘o Muimui ʻIate Au— Ki he Palaimeli.

Ko Hono Fakatupulaki ʻEtau Founga Akoʻí

Ke ke faʻa tokanga. Kapau te ke tokanga ki he meʻa ʻoku hoko ʻi he moʻui hoʻo fānaú, te ke maʻu ha ngaahi faingamālie fisifisimuʻa ke akoʻi kinautolu. ʻE toe lava foki ke hoko e ngaahi fakamatala pe ngaahi fehuʻi ʻe fai ʻe hoʻomou fānaú ko ha ngaahi faingamālie akoʻi ia. (Vakai ki he Ko e Faiako ʻi he Founga ʻa e Fakamoʻuí,16

Tūʻuta ʻa Līhai mo Hono Kakaí ʻi he Fonua Foʻoú, tā fakatātaaʻi ʻe Clark Kelley Price