« ថ្ងៃទី ២០–២៦ ខែ មេសា ម៉ូសាយ ៤–៦ ៖ ‹ ការផ្លាស់ប្តូរយ៉ាងធំ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២០–២៦ ខែ មេសា ម៉ូសាយ ៤–៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
នៅក្នុងការបម្រើនៃព្រះរបស់អ្នក ដោយ វលធើរ រេន
ថ្ងៃទី ២០–២៦ ខែ មេសា
ម៉ូសាយ ៤–៦
« ការផ្លាស់ប្តូរយ៉ាងធំ »
តើការបង្រៀនណាមួយរបស់ស្តេចបេនយ៉ាមីននៅក្នុង ម៉ូសាយ ៤–៦ ដែលនឹងជួយកុមារដែលអ្នកបង្រៀនបានល្អបំផុត ឲ្យចាប់ផ្តើមដកបទពិសោធន៍នៃ « ការផ្លាស់ប្តូរយ៉ាងធំ » ( ម៉ូសាយ ៥:២ ) នៅក្នុងចិត្តរបស់ពួកគេនោះ ? សូមកត់ត្រាការបំផុសគំនិតរបស់អ្នក នៅពេលអ្នកស្វែងរកការណែនាំប្រកបដោយការអធិស្ឋាន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមសរសេរឈ្មោះកុមារម្នាក់ៗនៅក្នុងថ្នាក់របស់អ្នកនៅលើចម្រៀកក្រដាស ហើយដាក់ចម្រៀងក្រដាសទាំងនោះនៅក្នុងកំប៉ុងមួយ ។ នៅពេលអ្នកដកយកឈ្មោះនីមួយៗមកពីកំប៉ុងនោះ សូមអញ្ជើញកុមារនោះឲ្យចែកចាយអ្វីៗ ដែលពួកគេចាំពីមេរៀនសប្តាហ៍មុន ឬអ្វីមួយដែលពួកគេបានរៀនពី ម៉ូសាយ ៤–៦ នៅផ្ទះនាសប្តាហ៍នេះ ។
បង្រៀនគោលលទ្ធិ ៖ កុមារតូចៗ
ការប្រែចិត្តនំាមកនូវអំណរ ។
សូមជួយកុមារឲ្យរៀនអំពីអំណោយទានដ៏អស្ចារ្យនៃការប្រែចិត្ត ដែលមានដោយសារតែដង្វាយធួនរបស់ព្រះយេស៊ូវគ្រីស្ទ ។
សកម្មភាពដែលអាចជ្រើសរើស
-
សូមប្រើ ម៉ូសាយ ៤:១–៣ និង ១០ ដើម្បីបង្រៀនកុមារអំពីអត្ថន័យនៃការប្រែចិត្ត ។ ឧទាហរណ៍ សូមជួយពួកគេឲ្យរកឃើញថា ប្រជាជនរបស់ស្តេចបេនយ៉ាមីនបានមានអារម្មណ៍សោកស្តាយអំពីអំពើបាបរបស់ពួកគេ ហើយបានទូលសូមការអភ័យទោស ( ខទី ១–២ ) ហើយស្តេចបេនយ៉ាមីនបានប្រាប់ពួកគេឲ្យបោះបង់ ( ឬឈប់ធ្វើ ) អំពើបាបរបស់ពួកគេ ( ខទី ១០ ) ។ សូមអាន ខទី ៣ ឲ្យពួកគេស្តាប់ ហើយសួរពួកគេថា តើប្រជាជនបានមានអារម្មណ៍យ៉ាងណា នៅពេលពួកគេបានប្រែចិត្ត ។
-
សូមសួរកុមារថា តើយើងមានអារម្មណ៍បែបណា នៅពេលសម្លៀកបំពាក់របស់យើងប្រឡាក់នោះ ។ តើយើងមានអារម្មណ៍យ៉ាងណា នៅពេលសម្លៀកបំពាក់យើងបានជ្រះស្អាតម្តងទៀតនោះ ? សូមពន្យល់ថា ដូចជាការលាងជម្រះសម្លៀកបំពាក់ប្រឡាក់ដែរ នោះយើងអាចប្រែចិត្តពេលយើងធ្វើខុស ។ សូមបង្ហាញរូបភាពព្រះយេស៊ូវគ្រីស្ទ ហើយថ្លែងទីបន្ទាល់ថា ទ្រង់មានព្រះចេស្តាដើម្បីដកយកអំពើបាបរបស់យើង ហើយធ្វើឲ្យយើងជ្រះស្អាតម្តងទៀត ប្រសិនបើយើងប្រែចិត្ត ។ សូមច្រៀងជាមួយគ្នានូវវគ្គទីពីរនៃបទ « បិតាសូមជួយកូន » ( សៀវភៅចម្រៀងកុមារ ទំព័រ ៥២ ) ។ សូមសួរកុមារថា តើចម្រៀងនេះបង្រៀនអ្វីខ្លះអំពីការប្រែចិត្ត ។
ខ្ញុំគប្បីប្រព្រឹត្តដាក់មនុស្សដទៃដោយសេចក្តីស្រឡាញ់ និងសន្តានចិត្តល្អ ។
តើអ្នកអាចប្រើ ម៉ូសាយ ៤:១៣–២៦ ដើម្បីបង្រៀនកុមារឲ្យ « ស្រឡាញ់គ្នាទៅវិញទៅមក ហើយឲ្យបម្រើគ្នាទៅវិញទៅមក » ដោយរបៀបណា ? ( ខទី ១៥ ) ។
សកម្មភាពដែលអាចជ្រើសរើស
-
សូមគូសរូបបេះដូងតូចមួយនៅលើក្ដារខៀន ។ សូមអញ្ជើញកុមារឲ្យចែកចាយរបៀបនានាដែលពួកគេអាចមានសន្តានចិត្តល្អចំពោះមនុស្សដទៃ ។ គ្រប់ពេលដែលពួកគេចែកចាយ សូមលុបរូបបេះដូងនោះចោល ហើយគូសរូបបេះដូងថ្មីឲ្យកាន់តែធំ ។ សូមថ្លែងទីបន្ទាល់ថា សេចក្តីស្រឡាញ់របស់យើងចំពោះមនុស្សដទៃនឹងកើនឡើង នៅពេលយើងមានសន្តានចិត្តល្អចំពោះពួកគេ ។ សូមចែកក្រដាសរាងបេះដូងឲ្យទៅកុមារ ហើយអញ្ជើញពួកគេឲ្យគូរលើរូបបេះដូងទាំងនោះនូវរបៀបនានា ដែលពួកគេអាចបង្ហាញសេចក្ដីស្រឡាញ់ ឬមានសន្ដានចិត្តល្អ ។
-
សូមជួយកុមារឲ្យធ្វើសកម្មភាព នៅពេលពួកគេច្រៀងចម្រៀងមួយបទអំពីការស្រឡាញ់មនុស្សដទៃ ដូចជាបទ « ព្រះយេស៊ូវមានបន្ទូលស្រឡាញ់មនុស្សគ្រប់រូប » ឬ « ចូរអ្នកស្រឡាញ់គ្នា » ( សៀវភៅចម្រៀងកុមារ ទំព័រ ៣៩, ៧៤ ) ។
ពេលខ្ញុំចុះសេចក្តីសញ្ញាជាមួយព្រះ នោះខ្ញុំលើកដាក់មកលើខ្លួនខ្ញុំនូវព្រះនាមនៃព្រះគ្រីស្ទ ។
សូមពិចារណាពីរបៀបដែលអ្នកអាចជួយកុមារដែលអ្នកបង្រៀន ឲ្យរៀបចំខ្លួនចុះសេចក្តីសញ្ញានៃបុណ្យជ្រមុជទឹកជាមួយព្រះ ហើយត្រូវបាន « ហៅថា ជាកូនចៅនៃព្រះគ្រីស្ទ » ( ម៉ូសាយ ៥:៧ ) ។
សកម្មភាពដែលអាចជ្រើសរើស
-
សូមជួយកុមារឲ្យធ្វើស្លាកឈ្មោះ « ព្រះយេស៊ូវគ្រីស្ទ » ហើយខ្ទាស់ស្លាកឈ្មោះនោះទៅនឹងអាវគេលើត្រង់បេះដូងរបស់ពួកគេ ( សូមមើលទំព័រសកម្មភាពសប្តាហ៍នេះ ) ។ សូមពន្យល់ថា ស្តេចបេនយ៉ាមីនបានបង្រៀនប្រជាជនទ្រង់ថា នៅពេលយើងចុះសេចក្តីសញ្ញា ឬធ្វើការសន្យាជាមួយព្រះ វាដូចជាការមានព្រះនាមរបស់ព្រះគ្រីស្ទ « ចារិកនៅក្នុងដួងចិត្ត [ របស់យើង ] ជានិច្ច » ដែរ ( ម៉ូសាយ ៥:១២ ) ។ តើយើងសន្យាធ្វើអ្វីខ្លះ ពេលយើងទទួលបុណ្យជ្រមុជទឹក និងពេលទទួលទានសាក្រាម៉ង់នោះ ? ( សូមមើល ម៉ូសាយ ៥:៨; គ. និង ស. ២០:៣៧, ៧៧, ៧៩ ) ។
-
សូមសួរកុមារនូវអ្វីដែលពួកគេនឹងធ្វើដើម្បីក្លាយជាមិត្តជាមួយនរណាម្នាក់ ( ឧទាហរណ៍ និយាយជាមួយពួកគេ, ធ្វើកិច្ចការនានាជាមួយពួកគេ និងចំណាយពេលនៅជាមួយពួកគេ ) ។ សូមអាន ម៉ូសាយ ៥:១៣ ឲ្យកុមារស្ដាប់ ។ តើយើងត្រូវធ្វើអ្វីខ្លះ ដើម្បីស្គាល់ព្រះយេស៊ូវគ្រីស្ទកាន់តែច្បាស់ ដូច្នេះទ្រង់នឹងពុំមែនជា « មនុស្សចម្លែក » ចំពោះយើង ?
បង្រៀនគោលលទ្ធិ ៖ កុមារធំៗ
ខ្ញុំអាចប្រែចិត្តបាន ។
តើអ្នកអាចជួយកុមារឲ្យយល់ពីអត្ថន័យនៃការប្រែចិត្តយ៉ាងដូចម្ដេច ? តើខគម្ពីរណាមួយនៅក្នុង ម៉ូសាយ ៤:១–១១ ដែលអ្នកទទួលអារម្មណ៍ថានឹងជួយពួកគេ ?
សកម្មភាពដែលអាចជ្រើសរើស
-
សូមសរសេរពាក្យ ការអភ័យទោស នៅលើក្ដារខៀន ។ សូមអាន ម៉ូសាយ ៤:១–៣ ជាមួយគ្នា ហើយសូមឲ្យកុមារស្រាវជ្រាវរកពាក្យនៅក្នុង ខទី ៣ ដែលពិពណ៌នាអំពីពរជ័យដែលកើតមាន នៅពេលយើងប្រែចិត្ត និងទទួលបានការអភ័យទោស ។
-
សូមឲ្យកុមារប្រាប់ពីកិច្ចការដែលយើងត្រូវធ្វើ ដើម្បីប្រែចិត្តពេញលេញ និងស្មោះសរ ។ សូមជួយពួកគេឲ្យស្វែងរកកិច្ចការមួយចំនួនទាំងនេះនៅក្នុង ម៉ូសាយ ៤:១០ ហើយពិភាក្សាអំពីអត្ថន័យនៃពាក្យ និងឃ្លាដែលមាននៅក្នុងខគម្ពីរនោះ ។ សូមចែកចាយរឿងមួយដែលបង្ហាញអំពីការប្រែចិត្ត ប្រហែលជារឿងមកពីជីវិតរបស់អ្នកផ្ទាល់ ឬមកពីទស្សនាវដ្តីសាសនាចក្រថ្មីៗ ។
-
សូមជួយកុមារឲ្យស្វែងរកពាក្យនៅក្នុង ម៉ូសាយ ៤:៦, ៩ និង ១១ ដែលពិពណ៌នាអំពីព្រះវរបិតាសួគ៌ ។ ហេតុអ្វីបានជាវាសំខាន់ដើម្បីយល់អំពីលក្ខណៈរបស់ព្រះវរបិតាសួគ៌ នៅពេលយើងត្រូវប្រែចិត្តនោះ ? សូមចែកចាយទីបន្ទាល់របស់អ្នកអំពីរបៀបដែលអ្នកបានទទួលអារម្មណ៍នៃសេចក្តីស្រឡាញ់របស់ព្រះ នៅពេលអ្នកបានប្រែចិត្ត ។
ដំណឹងល្អបំផុសគំនិតខ្ញុំឲ្យប្រព្រឹត្តដាក់មនុស្សដទៃដោយសេចក្តីស្រឡាញ់ និងសន្តានចិត្តល្អ ។
ស្តេចបេនយ៉ាមីនបានបង្រៀនថា នៅពេលយើងមកកាន់ព្រះគ្រីស្ទ ហើយទទួលការផ្តាច់បាបរបស់យើង នោះយើង « បានពោរពេញទៅដោយសេចក្តីស្រឡាញ់នៃព្រះ » ( ម៉ូសាយ ៤:១២ ) ដែលដឹកនាំយើងឲ្យមានសេចក្តីស្រឡាញ់ និងមានសន្តានចិត្តល្អចំពោះមនុស្សដទៃ ។
សកម្មភាពដែលអាចជ្រើសរើស
-
សូមជួយកុមារឲ្យស្រាវជ្រាវ ម៉ូសាយ ៤:១៣–១៦, ២៦ ហើយស្វែងរកឃ្លានានា ដែលពិពណ៌នាអំពីរបៀបដែលយើងអាចបម្រើមនុស្សដទៃ ។ សូមអញ្ជើញពួកគេឲ្យដើរតួសម្តែងអំពីរឿងទាំងនេះ ឬគូររូបភាពអំពីរឿងទាំងនោះ ហើយឲ្យកុមារផ្សេងទៀតទាយពីឃ្លានោះ ។ តើយើងអាចបង្ហាញសេចក្តីស្រឡាញ់ និងសន្តានចិត្តល្អនៅផ្ទះ សាលារៀន ឬព្រះវិហារដោយរបៀបណា ?
-
សូមអញ្ជើញកុមារឲ្យចែកចាយបទពិសោធន៍ ដែលពួកគេបានស្រឡាញ់ ឬបម្រើនរណាម្នាក់ និងអារម្មណ៍ដែលពួកគេបានទទួលមកពីបទពិសោធន៍នោះ ។ តើមានហេតុផលអ្វីខ្លះដែលមនុស្សពុំចង់បម្រើមនុស្សដទៃ ? សូមសួរកុមារថា តើពួកគេនឹងនិយាយអ្វីខ្លះ ទៅកាន់នរណាម្នាក់ដែលបញ្ចុះបញ្ចូលពួកគេឲ្យជួយមនុស្សដែលត្រូវការជំនួយនោះ ។ ពួកគេអាចរកឃើញគំនិតនៅក្នុង ម៉ូសាយ ៤:១៦–២៦ ។
ព្រះយេស៊ូវគ្រីស្ទបានបង្រៀនយើងឲ្យមានសន្តានចិត្តល្អចំពោះមនុស្សដទៃ ។
ពេលខ្ញុំធ្វើបុណ្យជ្រមុជទឹក និងទទួលទានសាក្រាម៉ង់ នោះខ្ញុំលើកដាក់មកលើខ្លួនខ្ញុំនូវព្រះនាមនៃព្រះគ្រីស្ទ ។
កុមារជាច្រើនដែលអ្នកបង្រៀនប្រហែលជាបានធ្វើបុណ្យជ្រមុជទឹករួចហើយ ហើយកំពុងរំឭកសេចក្តីសញ្ញារបស់ពួកគេតាមរយៈពិធីសាក្រាម៉ង់ ។ សូមរំឭកពួកគេថា ផ្នែកមួយសំខាន់នៃសេចក្តីសញ្ញាបុណ្យជ្រមុជទឹករបស់ពួកគេគឺ ការលើកដាក់មកលើខ្លួនពួកគេនូវព្រះនាមនៃព្រះយេស៊ូវគ្រីស្ទ ។
សកម្មភាពដែលអាចជ្រើសរើស
-
សូមគូសរង្វង់មួយនៅលើក្ដារខៀន ហើយដាក់រូបភាពព្រះយេស៊ូវគ្រីស្ទនៅចំកណ្តាលរង្វង់នោះ ។ សូមអញ្ជើញកុមារឲ្យគូររូបខ្លួនពួកគេ នៅពេលអ្នកអាន ម៉ូសាយ ៥:៨ ជាមួយគ្នា ។ តើខគម្ពីរនេះចែងអំពីអ្វីទៅ ដែលយើងគួរតែលើកដាក់មកលើខ្លួនយើង ? តើយើង « បានចូលក្នុងអ្វី ? » សូមអញ្ជើញកុមារឲ្យសរសេរព្រះនាមនៃព្រះគ្រីស្ទនៅលើរូបភាពរបស់ពួកគេ ហើយដាក់រូបភាពនោះនៅក្នុងរង្វង់ជាមួយរូបភាពព្រះអង្គសង្គ្រោះ ។ តើយើងចុះសេចក្ដីសញ្ញាអ្វីខ្លះ នៅពេលយើងទទួលពិធីបុណ្យជ្រមុជទឹក និងទទួលទានសាក្រាម៉ង់នោះ ? ( សូមមើល ម៉ូសាយ ១៨:៨–៩; គ. និង ស. ២០:៧៧, ៧៩ ) ។
-
សូមនិយាយទៅកាន់កុមារអំពីមូលហេតុដែលមនុស្សដាក់ឈ្មោះរបស់ពួកគេនៅលើកិច្ចការនានា ដូចជា ការចាត់តាំងពីសាលារៀន អាវយឺតកីឡា ជាដើម ( សូមមើល ម៉ូសាយ ៥:១៤–១៥ ) ។ តើយើងអាចបង្ហាញថា យើងមានព្រះនាមព្រះយេស៊ូវគ្រីស្ទ « ចារិកនៅក្នុងដួងចិត្ត [ របស់យើង ] ជានិច្ច » ដោយរបៀបណា ? ( ម៉ូសាយ ៥:១២ ) ។
-
សូមអញ្ជើញយុវជន ឬយុវនារីម្នាក់មកពីវួដឲ្យមកថ្នាក់របស់អ្នក ហើយពន្យល់អំពីសេចក្តីសញ្ញាដែលយើងរំឭក តាមរយៈការទទួលទានសាក្រាម៉ង់ ។ សូមអានការអធិស្ឋានសាក្រាម៉ង់នៅក្នុង គោលលទ្ធិ និង សេចក្តីសញ្ញា ២០:៧៧ និង ៧៩ ជាមួយកុមារ ដោយអញ្ជើញពួកគេឲ្យរកមើលឃ្លាដែលពិពណ៌នាអំពីសេចក្តីសញ្ញាអ្វីខ្លះដែលយើងចុះ និងការសន្យាអ្វីខ្លះដែលព្រះសន្យាត្រឡប់មកឲ្យយើងវិញនោះ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យគូររូបអ្វីដែលពួកគេបានរៀននាថ្ងៃនេះ ហើយប្រើគំនូររបស់ពួកគេបង្រៀនគ្រួសាររបស់ពួកគេ ។
ការកែលម្អការបង្រៀនរបស់យើង
សូមបង្រៀនកុមារឲ្យកត់ត្រាចំណាប់អារម្មណ៍នានា ។ សូម្បីតែកុមារក៏អាចរៀនអំពីទម្លាប់នៃការកត់ត្រាការបំផុសគំនិតខាងវិញ្ញាណបានដែរ—ឧទាហរណ៍ តាមរយៈការគូសចំណាំព្រះគម្ពីរ គូររូបភាព ឬសរសេរកំណត់ហេតុសាមញ្ញៗ ។