ʻI he Tauhi ʻo Homou ʻOtuá, tā fakatātaaʻi ʻe Walter Rane

20–26 ʻEpeleli

Mōsaia 4–6

“Ha Fuʻu Liliu Lahi”

Ko e fē ʻi he ngaahi akonaki ʻa e Tuʻi ko Penisimaní ʻi he Mōsaia 4–6 ʻe tokoni lelei taha ki he fānau ʻokú ke akoʻí ke kamata ʻenau aʻusia “ha fuʻu liliu lahi” (Mōsaia 5:2) ʻi honau lotó? Lekooti hoʻo ngaahi ongó lolotonga hoʻo lotua ha fakahinohinó.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Hiki e hingoa kotoa ʻo e fānau ʻi hoʻo kalasí ʻi ha fanga kiʻi laʻipepa pea faʻo e laʻipepá ʻi ha faʻoʻanga meʻa. ʻI hoʻo toʻo e hingoa takitaha mei lotó, fakaafeʻi e tokotaha ko iá ke ne vahevahe ha meʻa mei he lēsoni ʻo e uike kuo ʻosí pe ko ha meʻa naʻa nau ako mei he Mōsaia 4–6 ʻi honau ʻapí he uiké ni.

Akoʻi e Tokāteliné: Fānau Iiki Angé

Mōsaia 4:1–3, 10

ʻOku ʻomi ʻe he fakatomalá ʻa e fiefiá.

Tokoniʻi e fānaú ke nau ako fekauʻaki mo e meʻaʻofa fakaʻofoʻofa ʻo e fakatomalá ʻoku lava ke maʻu koeʻuhi ko e Fakalelei ʻa Sīsū Kalaisí.

Ngaahi ʻEkitivitī ʻe Ala Fakahokó

• Fakaʻaongaʻi e Mōsaia 4:1–3 mo e 10 ke akoʻi e fānaú ki he ʻuhinga ke fakatomalá. Hangē ko ʻení, tokoniʻi kinautolu ke nau ʻilo naʻe ongoʻi fakatomala ʻa e kakai ʻo e Tuʻi ko Penisimaní fekauʻaki mo ʻenau ngaahi angahalá pea nau kolea ha fakamolemole (veesi 1–2), pea naʻe talaange ʻe he Tuʻi ko Penisimaní ke nau liʻaki (pe taʻofi) ʻenau ngaahi angahalá (veesi 10). Lau ʻa e veesi 3 kiate kinautolu, mo fehuʻi pe naʻe ongoʻi fēfē ʻa e kakaí ʻi heʻenau fakatomalá.

• Fehuʻi ki he fānaú pe ʻoku nau ongoʻi fēfē ʻi heʻetau fakaʻuliʻi hotau valá. Ko e hā e ongo ʻoku tau maʻu ʻi he taimi ʻoku tau toe maʻa aí? Fakamatalaʻi ange ʻe lava ke tau fakatomala ʻi heʻetau fakahoko ha fehalaaki, ʻo hangē ko hono fō ke maʻa e vala ʻulí. Fakaʻaliʻali ha fakatātā ʻo Sīsū Kalaisi, mo fakamoʻoni ʻokú Ne maʻu ʻa e mālohi ke toʻo ʻetau ngaahi angahalá mo ngaohi kitautolu ke tau toe maʻa kapau te tau fakatomala. Hiva fakataha ʻa e veesi hono ua ʻo e “Help Me, Dear Father” (Children’s Songbook, 99). Fehuʻi ki he fānaú pe ko e hā ʻoku akoʻi ʻe he foʻi hivá fekauʻaki mo e fakatomalá.

Mōsaia 4:13–26

ʻOku totonu ke u ʻofa mo angaʻofa ki he niʻihi kehé.

Te ke fakaʻaongaʻi fēfē ʻa e Mōsaia 4:13–26 ke akoʻi e fānaú “ke nau feʻofaʻaki mo fetauhiʻaki ʻiate kinautolu”? (veesi 15).

Ngaahi ʻEkitivitī ʻe Ala Fakahokó

• Tā ha foʻi haati siʻisiʻi ʻi he palakipoé. Fakaafeʻi e fānaú ke vahevahe ha ngaahi founga te nau lava ai ʻo angaʻofa ki he ki he niʻihi kehé. ʻI heʻenau vahevahé, tamateʻi ʻa e foʻi hātí mo tā ha foʻi haati lahi ange. Fakamoʻoni ʻoku tupulaki ʻetau ʻofa ki he niʻihi kehé ʻi heʻetau angaʻofa kiate kinautolú. ʻOange ki he fānaú ha ngaahi foʻi haati pepa, mo fakaafeʻi kinautolu ke tohi ʻi he foʻi hātí ha ngaahi founga te nau lava ai ʻo fakahā ʻa e ʻofá mo angaʻofa.

• Tokoni ki he fānaú ke nau ʻilo ha ngaahi ngāue ke fai ʻi heʻenau hivaʻi ha foʻi hiva fekauʻaki mo e ʻofa ki he niʻihi kehé ʻo hangē ko e “Jesus Said Love Everyone” pe “Ke Mou Feʻofaʻaki” (Tohi Hiva ʻa e Fānaú, 61, 74).

Mōsaia 5:5–15

ʻI heʻeku fakahoko e ngaahi fuakava mo e ʻOtuá, ʻoku ou toʻo kiate au ʻa e huafa ʻo Kalaisí.

Fakalaulauloto ki he founga ke ke tokoni ai ki he fānau ʻokú ke akoʻí ke nau teuteu ke fakahoko e ngaahi fuakava ʻo e papitaisó mo e ʻOtuá pea “hoko ai ko e fānau ʻa Kalaisí” (Mōsaia 5:7).

Ngaahi ʻEkitivitī ʻe Ala Fakahokó

• Tokoni ki he fānaú ke nau faʻu ha pine ʻo fakaʻaliʻali e huafa “Sīsū Kalaisí” pea pineʻi ia ki honau soté pe kofú ʻi tuʻa ʻi honau lotó (vakai ki he peesi ʻekitivitī ʻo e uike ní). Fakamatala ange naʻe akoʻi ʻe he Tuʻi ko Penisimaní hono kakaí, ko e taimi ʻoku tau fakahoko ai e ngaahi fuakavá, pe palōmesí, mo e ʻOtuá, ʻoku hangē ia ko hano “tohi maʻu ai pē ʻi [hotau] lotó” ʻa e huafa ʻo Kalaisí (Mōsaia 5:12). Ko e hā ʻoku tau fuakava ke fai ʻi he taimi ʻoku papitaiso ai kitautolú mo tau toʻo e sākalamēnití? (vakai, Mōsaia 5:8; TF 20:37, 77, 79).

• Fehuʻi ki he fānaú ʻa e meʻa te nau lava ʻo fai ke fakakaungāmeʻa ai mo ha taha (hangē ko ʻení, talanoa mo kinautolu, fai ha meʻa maʻanautolu, mo feohi mo kinautolu). Lau ʻa e Mōsaia 5:13 ki he fānaú. Ko e hā ʻe lava ke tau fai ke ʻiloʻi lelei ange ai ʻa Sīsū Kalaisi kae ʻikai ke Ne hoko ko ha “muli” kiate kitautolú?

Akoʻi e Tokāteliné: Fānau Lalahi Angé

Mōsaia 4:1–11

Te u Lava ʻo Fakatomala.

Te ke tokoniʻi fēfē e fānaú ke mahino e ʻuhinga ke fakatomalá? Ko e fē ʻi he ngaahi veesi he Mōsaia 4:1–11 ‘okú ke ongoʻi ʻe tokoni kiate kinautolú?

Ngaahi ʻEkitivitī ʻe Ala Fakahokó

• Tohiʻi e foʻi lea fakamolemole ʻi he palakipoé. Lau fakataha e Mōsaia 4:1–3, mo kole ki he fānaú ke fekumi ki ha ngaahi foʻi lea ʻi he veesi 3 ʻokú ne fakamatalaʻi e ngaahi tāpuaki ʻoku hoko ʻi heʻetau fakatomala mo maʻu e fakamolemolé.

• Kole ki he fānaú ke nau fakamatala e ngaahi meʻa kuo pau ke tau fai ke tau fakatomala kakato mo moʻoni aí. Tokoniʻi kinautolu ke maʻu ha niʻihi ʻo e ngaahi meʻa ko ʻení ʻi he Mōsaia 4:10, mo aleaʻi e ʻuhinga ʻo e ngaahi foʻi lea mo e kupuʻi lea ʻoku maʻu ʻi he veesi ko iá. Fai ha talanoa ʻokú ne fakatātaaʻi e fakatomalá, mahalo mei hoʻo moʻuí pe mei ha makasini kimui mai ʻo e Siasí.

• Tokoniʻi e fānaú ke ʻilo ha ngaahi foʻi lea ʻi he Mōsaia 4:6, 9, and 11 ʻokú ne fakamatalaʻi e Tamai Hēvaní. Ko e hā ʻoku mahuʻinga ai ke mahino e natula ʻo e Tamai Hēvaní ʻi heʻetau fie maʻu ke fakatomalá? Vahevahe ange hoʻo fakamoʻoni ki hoʻo ongoʻi e ʻofa ʻa e ʻOtuá ʻi hoʻo fakatomalá.

Mōsaia 4:12–26

ʻOku ueʻi au ʻe he ongoongoleleí ke ʻofa mo angaʻofa ki he niʻihi kehé.

Naʻe akoʻi ʻe he Tuʻi ko Penisimaní ʻi heʻetau haʻu kia Kalaisi mo maʻu ha fakamolemole ʻo ʻetau ngaahi angahalá, ʻoku tau “fonu ʻi he ʻofa ʻa e ʻOtuá” (Mōsaia 4:12), ʻa ia ʻokú ne ʻai ke tau ʻofa mo angaʻofa ki he niʻihi kehé.

Ngaahi ʻEkitivitī ʻe Ala Fakahokó

• Tokoniʻi e fānaú ke nau fekumi ʻi he Mōsaia 4:13–16, 26 ke ʻiloʻi ha ngaahi kupuʻi lea ʻoku nau fakamatalaʻi e founga ke tau tokoniʻi ai e niʻihi kehé. Fakaafeʻi kinautolu ke nau fakatātaaʻi ʻa e ngaahi meʻá ni, pe tā ha fakatātā pea tuku ki he fānau kehé ke nau mateʻi pe ko e hā e kupuʻi leá. Te tau fakahaaʻi fēfē ʻa e ʻofá mo e angaʻofá ʻi ʻapi, ʻapiako, pe ʻi he lotú?

• Fakaafeʻi e fānaú ke nau vahevahe ha aʻusia ʻa ia naʻa nau ʻofa ai pe tokoniʻi ha taha pea mo e ongo naʻa nau maʻu mei he aʻusia ko iá. Ko e hā ha ngaahi ʻuhinga ʻe ʻikai fie tokoniʻi ai ʻe ha kakai e niʻihi kehé? Fehuʻi ki he fānaú pe ko e hā te nau lea ʻaki ki ha taha ke fakaʻaiʻai kinautolu ke tokoni ki he kakai faingataʻaʻiá. ʻE lava ke nau maʻu ha ngaahi fakakaukau ʻi he Mōsaia 4:16–26.

Naʻe akoʻi kitautolu ʻe Sīsū Kalaisi ke tau angaʻofa ki he niʻihi kehé.

Mōsaia 5:5–15

ʻI hono papitaiso au pea maʻu e sākalamēnití, ʻoku ou toʻo kiate au ʻa e huafa ʻo Kalaisí.

Mahalo ko e tokolahi ʻo e fānau ʻokú ke akoʻí kuo papitaiso kinautolu pea ʻoku nau fakafoʻou ʻenau ngaahi fuakavá ʻo fakafou ʻi he sākalamēnití. Fakamanatu ange ko ha konga mahuʻinga ʻo ʻenau fuakava ʻi he papitaisó ko hono toʻo kiate kinautolu ʻa e huafa ʻo Sīsū Kalaisí.

Ngaahi ʻEkitivitī ʻe Ala Fakahokó

• Tā ha foʻi siakale ʻi he palakipoé, pea tuku ha fakatātā ʻo Sīsū Kalaisi ʻi loto mālie ʻi he foʻi siakalé. Fakaafeʻi e fānaú ke nau tā kinautolu lolotonga hoʻomou lau fakataha e Mōsaia 5:8. Ko e hā ʻoku lau ʻe he veesi ko ʻení ʻoku totonu ke tau toʻo kiate kitautolú? Ko e hā kuo tau “faí”? Fakaafeʻi e fānaú ke nau tohi ʻa e huafa ʻo Kalaisí ʻi heʻenau fakatātaá pea tuku ʻa e ngaahi fakatātaá ʻi loto ʻi he siakalé mo e Fakamoʻuí. Ko e hā ha ngaahi fuakava ʻoku tau fai ʻi he taimi ʻoku tau papitaiso mo tau toʻo ai e sākalamēnití? (vakai, Mōsaia 18:8–9; TF 20:77, 79).

• Talanoa ki he fānaú fekauʻaki mo e ʻuhinga ʻoku tohi ai ʻe he kakaí honau hingoá ʻi ha meʻa, hangē ko ʻenau ngāue fakaakó, falani sipotí, mo e ngaahi meʻa peheé (vakai, Mōsaia 5:14–15). Te tau fakahaaʻi fēfē kuo “tohi maʻu ai pē ʻi [hotau] lotó” ʻa e huafa ʻo Kalaisí? (Mōsaia 5:12).

• Fakaafeʻi ha kau tangata pe fefine mei he uōtí ke nau ʻaʻahi mai ki hoʻo kalasí mo fakamatalaʻi e ngaahi fuakava ʻoku tau fakafoʻou ʻi heʻetau maʻu e sākalamēnití. Lau mo e fānaú e lotu sākalamēniti ʻi he Tokāteline mo e Ngaahi Fuakava 20:77 mo e 79, pea fakaafeʻi kinautolu ke fekumi ki ha ngaahi kupuʻi lea ʻoku nau fakamatalaʻi e meʻa ʻoku tau fuakava ke faí mo e meʻa ʻoku talaʻofa ʻe he ʻOtuá ke fai maí.

Poupouʻi e Akó ʻi ʻApi

Fakaafeʻi e fānaú ke nau tā ha fakatātā ʻo e ngaahi meʻa naʻa nau ako he ʻaho ní pea fakaʻaongaʻi ʻenau fakatātaá ke akoʻi honau ngaahi fāmilí.

Fakatupulaki ʻEtau Akoʻí

Akoʻi e fānaú ke hiki e ngaahi ongo ʻoku nau maʻú. Naʻa mo e fānaú, te nau lava ʻo ako ke anga ki hono hiki e ngaahi ueʻi fakalaumālié— hangē ko hono fakaʻilongaʻi e folofolá, tā e ngaahi fakatātaá, pe hiki ha ngaahi fakamatala tohinoa faingofua.