“30 Māʻasi– 12 ʻEpeleli. Toetuʻú: ‘Te Ne Toe Tuʻu … mo e Fakamoʻui ʻi Hono Kapakaú,’” Haʻu, ʻo Muimui ʻIate Au—Maʻá e Palaimelí: Tohi ʻa Molomona 2020 (2020)
“30 Māʻasi– 12 ʻEpeleli. Toetuʻú,” Haʻu, ʻo Muimui ʻIate Au—Maʻá e Palaimeli: 2020
Kalaisi mo e Kau ʻAposetoló, tā ʻa Del Parson
30 Māʻasi–12 ʻEpeleli
Toetuʻú
“Te Ne Toe Tuʻu … mo e Fakamoʻui ʻi Hono Kapakaú”
ʻI hoʻo lau e ngaahi folofola ʻoku fokotuʻu atu mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, ʻe tokoniʻi koe ʻe he Laumālié ke ke ʻiloʻi e meʻa ke nofotaha ki ai ke tokoniʻi e fānaú ke nau ongoʻi e ʻofa ʻa e Fakamoʻuí ʻi he Sāpate Toetuʻú.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Talanoa ki he fānaú fekauʻaki mo e ngaahi meʻa ʻokú ke fai ke manatua ai ʻa e Fakamoʻuí ʻi he Toetuʻú. Fakaafeʻi ke nau vahevahe e meʻa ʻoku nau fakahokó.
Akoʻi e Tokāteliné: Fānau Iiki Angé
1 Nīfai 11:27; Mōsaia 3:5; 15:7; Hilamani 14:16–17
Naʻe ʻiloʻi ʻe he kau palōfita ʻo e Tohi ʻa Molomoná, ʻe hāʻele mai ʻa Sīsū Kalaisi.
ʻE lava ke tokoni ʻa hono ako e ngaahi meʻa naʻe akoʻi ʻe he kau palōfita ʻi he Tohi ʻa Molomoná ʻo kau ki he misiona ‘o Sīsū Kalaisí mo ʻEne ngāue fakafaifekau ʻi he māmaní, ke fakamālohia e tui ʻa e fānaú kiate Iá.
Ngaahi ʻEkitivitī ʻe Ala Fakahokó
-
Fakaʻaliʻali ha ʻū fakatātā ʻo hono papitaiso ʻo e Fakamoʻuí, fakamoʻui e niʻihi kehé, ko e tutukí, mo e hoko ko ha tokotaha kuo toetuʻú (vakai ki he peesi ʻekitivitī ki he uike ní pe Tohi Fakatātā ʻo e Ongoongoleleí, fika 35, 41, 57, 59). Kole ki he fānaú ke nau tala atu e meʻa ʻoku hoko ʻi he fakatātā takitaha. Fakamatalaʻi ange, ʻi ha ngaahi taʻu lahi kimuʻa pea hāʻele mai ʻa Sīsū ki he māmaní, naʻe fakahā ʻe he ʻOtuá ki ha kau palōfita ʻi he Tohi ʻa Molomoná te Ne fai ʻa e ngaahi meʻa ko ʻení. Lau e 1 Nīfai 11:27; Mōsaia 3:5; 15:7; mo e Hilamani 14:16–17, pea tokoni ki he fānaú ke nau fakatauhoa ʻa e ngaahi folofola ko ʻení ki he ʻū fakatātā ʻoku tatau mo iá.
-
Lolotonga e ngāue ʻa e fānaú ʻi he peesi ʻekitivitī ki he uike ní, talanoa kau ki he kau palōfita ʻi he fakatātaá pea mo e meʻa ne nau akoʻi kau kia Sīsū Kalaisí. Vahevahe mo e fānaú ʻa e niʻihi ʻo e ngaahi meʻa fakaofo kuo fai ʻe Sīsū maʻatautolú.
Naʻe toetuʻu ʻa Sīsū Kalaisi.
Akoʻi ki he fānaú, naʻe ʻikai ngata pē ʻi he kakai ne nau mamata ki he Fakamoʻuí kuo toetuʻu ʻi Selusalemá, naʻe toe mamata foki mo ha lauiafe kia Sīsū Kalaisi ʻi he taimi naʻá Ne hā ai ʻi ʻAmeliká.
Ngaahi ʻEkitivitī ʻe Ala Fakahokó
-
Fakaʻaliʻali ha ongo fakatātā ʻo e pekia mo e Toetuʻu ʻa e Fakamoʻuí. Fehuʻi ki he fānaú pe ko e hā ʻoku nau ʻilo fekauʻaki mo e ongo meʻa ko ʻeni ne hokó. Kapau ʻe fie maʻu, fakaʻaongaʻi e “Vahe 53: Ko Hono Tutuki ʻo Sīsuú” mo e “Vahe 54: Kuo Toetuʻu ʻa Sīsū” (Ngaahi Talanoa ʻo e Fuakava Foʻoú, 136–38, 139–44, pe ongo vitiō ʻoku fekauʻaki mo ia ʻi he ChurchofJesusChrist.org) ke fakamatala ʻaki ki he fānaú e ongo talanoa ko ʻení.
-
ʻI hono fakaʻaongaʻi e ngaahi fakatātā mei he Tohi Fakatātā ʻo e Ongoongoleleí pe Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, talanoa ki he fānaú kau ki he ʻaʻahi ʻa e Fakamoʻui kuo toetuʻú ki ʻAmeliká, ʻo hangē ko hono fakamatalaʻi ʻi he 3 Nīfai 11:1–17. Toutou tala ʻa e talanoá pea fakaafeʻi ʻa e fānaú ke nau tokoni atu. Fakamamafaʻi ʻa e ngaahi fakaikiiki ʻokú ke ongoʻi ʻe mahuʻingamālie ki he fānaú. Fakatefito ʻa e fakamamafá ki he malava ʻa e kakaí ʻo mamata kuo toetuʻu ʻa Sīsuú, neongo naʻá Ne pekia ʻi he kolosí. Tuku ki he fānaú ke nau taufetongi ʻi hono tala e talanoá ʻi heʻenau lea pē ʻanautolu.
-
Hivaʻi fakataha e “Easter Hosanna” pe ko e veesi fakaʻosi ʻo e “Ngaahi Talanoa ʻo e Tohi ʻa Molomoná” (Tohi Hiva ʻa e Fānaú, 62). Fakaafeʻi e fānaú ke nau tā ha ʻū fakatātā ʻo ha meʻa ʻoku fakamatalaʻi ʻe he hivá. Hili iá pea kole leva ki he fānaú ke nau vahevahe ʻenau ʻū fakatātaá pea mo ʻenau fakakaukau ki he ongo ne nau mei maʻu kapau ne nau ʻi ai tonu he taimi naʻe ʻaʻahi ai ʻa Sīsū ki he kau Nīfaí.
ʻOku ʻafioʻi ʻe Sīsū Kalaisi e founga ke fakafiemālieʻi ai aú.
Koeʻuhi naʻe kātakiʻi ʻe Sīsū Kalaisi “ʻa e ngaahi mamahi mo e ngaahi mahaki ʻoku moʻua ai hono kakaí” ( ʻAlamā 7:11), ʻokú Ne ʻafioʻi ʻetau ongó neongo ʻoku ʻikai ʻilo ki ai ha taha.
Ngaahi ʻEkitivitī ʻe Ala Fakahokó
-
Lau ki he fānaú ʻa e ngaahi fuofua laine ʻo e Mōsaia 3:7, pea fakaafeʻi ke nau fakangalingali pē ʻoku nau ongoʻi “mamahi … , fiekaia, fieinua, mo ongosia [ongoʻi helaʻiá].” Kole ange ke nau vahevahe ki ha ngaahi taimi kuo nau ongoʻi ai e ngaahi meʻá ni. Hili iá pea talaange leva ki he fānaú, ʻoku fakamatalaʻi ʻe he veesi ko ʻení ha ngaahi meʻa ne ongoʻi ʻe Sīsū Kalaisi ʻi he taimi naʻá Ne mamahi ai ʻi he Ngoue ko Ketisemaní. Koeʻuhi ko e meʻá ni, ʻokú Ne ʻafioʻi ʻa e founga ke tokoniʻi ai kitautolu ʻi he taimi ʻoku tau ongoʻi ai e ngaahi meʻá ni.
-
Lau leʻolahi e ʻAlamā 7:11, pea fehuʻi ki he fānaú pe ʻoku nau ʻilo nai ha tokotaha ʻoku puke pe ʻoku faingataʻaʻia. Fakamoʻoniʻi ange naʻe ongoʻi kotoa ʻe Sīsū Kalaisi ʻetau “ngaahi mamahí mo e mahakí” kae lava ke mahino kiate Ia ʻa e founga ke fakafiemālieʻi ʻaki kitautolú ( ʻAlamā 7:12).
Akoʻi e Tokāteliné: Fānau Lalahi Angé
2 Nīfai 9:10–15; ʻAlamā 11:41–45; 40:21–23
Koeʻuhí naʻe toetuʻu ʻa Sīsū Kalaisi, te u toetuʻu foki mo au.
ʻOku fakamatalaʻi mahino mai ʻe he Tohi ʻa Molomoná ʻa e ʻuhinga ʻo e toetuʻú pea mo kinautolu ʻe toetuʻú. Te ke tokoniʻi fēfē e fānaú ke nau ʻiloʻi e ngaahi moʻoni ko ʻení?
Ngaahi ʻEkitivitī ʻe Ala Fakahokó
-
Kole ki he fānaú ke nau tala atu e meʻa ʻoku nau ʻilo fekauʻaki mo e maté pea mo e Toetuʻu ʻa Sīsū Kalaisí. Hiki ʻi he palakipoé ha ongo fehuʻi hangē ko e ʻOku ʻuhinga ki he hā ke toetuʻu? mo e Ko hai ʻe toetuʻú? Tokoniʻi e fānaú ke nau fekumi ki he ngaahi talí ʻi he 2 Nīfai 9:10–15; ʻAlamā 11:41–45; mo e ʻAlamā 40:21–23 pea vahevahe mo e kalasí e meʻa ne nau maʻú.
-
Talanoa ki he fānaú ʻo kau ki ha taha ʻokú ke ʻilo kuo mālōlō. Kole ange ke nau fakangalingali pē ʻoku ʻikai ke ke ʻilo fekauʻaki mo e Toetuʻú. Te nau tokoni fēfē ke mahino kiate koe ʻa hono ʻuhingá? Poupouʻi kinautolu ke nau fakaʻaongaʻi ʻa e 2 Nīfai 9:10–15; ʻAlamā 11:41–45; pe ʻAlamā 40:21–23 ke akoʻi koe fekauʻaki mo e toetuʻú. Fakaafeʻi foki ke nau fakamoʻoni ki he Toetuʻu ʻa e Fakamoʻuí ko ha konga ʻo ʻenau talí.
Ketisemani, tā ʻa Michael T. Malm
ʻĪnosi 1:2–8; Mōsaia 27:8–24; ʻAlamā 13:11–12; 24:7–19
ʻOku fakamaʻa mo liliu au ʻe he Fakalelei ʻa Sīsū Kalaisí.
ʻOku ʻomi ʻe he Tohi ʻa Molomoná ha ngaahi sīpinga ʻo ha kakai naʻe liliu koeʻuhi ko e Fakalelei ʻa e Fakamoʻuí. Fakakaukau ki he founga ʻe ala ueʻi fakalaumālie ai ʻe he ngaahi aʻusia ko ʻení ʻa e fānaú ke nau fakatomala pea tafoki ki he Fakamoʻuí.
Ngaahi ʻEkitivitī ʻe Ala Fakahokó
-
Fakaʻaliʻali ki he fānaú ha sote hinehina ʻoku maʻa pea mo ha sote hinehina ʻoku ʻuli. Lau fakataha e ʻAlamā 13:11–12. Naʻe fakamaʻa fēfē ʻa e kakaí mei heʻenau ngaahi angahalá? Ne nau ongoʻi fēfē nai he meʻá ni fekauʻaki mo e angahalá? Talanoa fekauʻaki mo hoʻo ongo ʻi he taimi ʻokú ke fakatomala ai mo maʻu ha fakamolemolé, pea vahevahe hoʻo fakamoʻoni ki he mālohi ʻoku maʻu ʻe he Fakamoʻuí ke Ne fufulu kitautolu mei he angahalá.
-
Fakaafeʻi ʻa e fānaú ke nau fili ha taha ʻo e kakai ko ʻení ke nau ako ki ai: ʻĪnosi (vakai, ʻĪnosi 1:2–8), ʻAlamā ko e Siʻi (vakai, Mōsaia 27:8–24), pe ko e kau ʻAnitai-Nīfai-Līhaí (vakai, ʻAlamā 24:7–19). ʻI hoʻomou lau fakataha e talanoá, fakaafeʻi e fānaú ke nau fakatokangaʻi e liliu ʻa e tokotaha pe kulupu ko ʻení tuʻunga ʻi he Fakalelei ʻa Sīsū Kalaisí. Te tau lava fēfē nai ʻo muimui ki he ngaahi sīpinga ʻo e kakai ko ʻení?
Naʻe toʻo ʻe Sīsū Kalaisi kiate Ia ʻa ʻeku ngaahi angahalá, mamahí, mo e ngaahi mahakí.
Naʻe ʻikai ngata pē ʻi he mamahi ʻa e Fakamoʻuí koeʻuhi ko ʻetau ngaahi angahalá, ka naʻá Ne fuesia foki ʻetau ngaahi mamahí, mahakí, mo e ngaahi vaivai kehé kae lava ke Ne ʻafioʻi e founga ke fakafiemālieʻi ai kitautolú.
Ngaahi ʻEkitivitī ʻe Ala Fakahokó
-
Vahe ki he fānaú takitaha ke nau fekumi ʻi ha taha ʻo e ngaahi veesi ko ʻení ke ʻiloʻi e meʻa ne fuesia ʻe Sīsū Kalaisí: Mōsaia 3:7; Mōsaia 15:5; pe ʻAlamā 7:11. Fakaafeʻi kinautolu ke nau lisi ʻi he palakipoé ʻa e meʻa ne nau maʻú pea ke nau fakakaukau ki he ngaahi taimi ne nau ongoʻi ai ha niʻihi ʻo e ngaahi meʻá ni. Fakatatau ki he ʻAlamā 7:12, ko e hā e ʻuhinga naʻe fuesia ai ʻe Sīsū e ngaahi meʻá ni kotoa? Ko e hā e ʻuhinga ʻoku mahuʻinga ai ke tau ʻiloʻi naʻá Ne fuesia e ngaahi meʻa kotoa ko ʻení maʻatautolú?
-
Hivaʻi fakataha ha himi fekauʻaki mo e Fakamoʻuí, hangē ko e “ ʻOku Moʻui Hoku Huhuʻí” (Ngaahi Himí, fika 68). Fakaafeʻi e fānaú ke nau fekumi ʻi he himí ki ha ngaahi kupuʻi lea ʻokú ne fakamatalaʻi e founga ʻoku fakafiemālieʻi ai kitautolu ʻe he Fakamoʻuí, pea talanoa kau ki he ʻuhinga ʻoku mahuʻingamālie ai e ngaahi kupuʻi lea ko ʻení kiate kinautolú. Vahevahe hoʻo ongo kau kia Sīsū Kalaisí, pea fakaafeʻi ʻa e fānaú ke nau vahevahe haʻanautolú.
Poupouʻi e Ako ʻi ʻApí
Fakaafeʻi e fānaú ke nau fekumi he uiké ni ki ha tokotaha ʻokú ne fie maʻu ha fakafiemālie. Poupouʻi ke nau vahevahe mo e tokotahá ni e meʻa ne nau ako kau ki hono toʻo ʻe he Fakamoʻuí kiate Ia ʻa ʻetau mamahí kae lava ke Ne fakafiemālieʻi kitautolú.
Fakatupulaki ʻEtau Akoʻí
Fakaafeʻi ke vahevahe Fehuʻi ki he fānaú fekauʻaki mo ʻenau ngaahi fakakaukaú, ongó, mo e aʻusiá. Te ke ʻiloʻi ai ʻoku nau faʻa maʻu ha ngaahi fakakaukau faingofua kae matuʻaki mahuʻinga.